Yehezkiel 43 - Eipomek

Allah Yahweh, el si eren aik pum tam tamubuka wekelbiyuka ati, laka nyabuk yupu

¹ Ura, Allah si erelamik aik bai tam batakamik lo weik tam, akunum kiklipdeyukopura, anye birye na bobuka, keting panalyangan tam, bisik bublan botopdeiamikak bobinuke. Ara, cang keil arye deibuka domik aik, el si ara gapura dam bobinuke. Ara, Allah el si eren aik wekelbanak ati, bisik dam bobinuke.

² Winipnuk talak arye, dinmasibuk, keting panalyangan tam arye, anyaik dam weik dirina yayuka ara, meldang-dang abuka yayukak, narye dipdenmanto kum upse. Weik dirina yayuk ning ara, Israel yala nang sikti, kalekuka pia melilulnye, Allah Yahweh, asukum yanmoka ati, lak kilina ati, adirina arye winibuk. Tonda, weik laut mekwen longteng aplirye, mek kait welepmalya ani, koulukliba, lelim weik nyalamle touk, Allah anyaik wekmok talak ara, alelim nyalamle touk, nyanmokba kekepse. Tonda, Allah yanmok deice arye, el dirina weik ubuka ati, mutuku sirya im sirya nirya babye, dirina weik ubukba eipse.

³ Weik dirina eipse ning ara, Allah Yahweh arye, ‘Yerusalem mutuku nirya opnirye, sice buklopnamneʼ tenen, yayuk talak dirina weik winyamukba, eiamse touk, atalak babye winibuke. Tonda, lengdar mapmasa deice arye eipmase ning ara, min talak Babel mutuku noutam bukni, Kebar mek kin dam unmase talak eipse ning atonun, pia dirina weik ap, weik lelim ap, winibuk. Tonda, Allah Yahweh yanmoka ati, ilil weik upnukba, ‘Allah si erepnunʼ tenen, na nong nirya, tuku deice mapsirye, kisok tuku kanupdongopse.

⁴ Allah, el si eren aik dam yayuk talak ara, el mikip weik ulye ning ap, pia teleb lek Allah ulye ning ap ubukba, weik dirina meldang-dang abuka yayuk ning ara, cang keil arye deibuka domik aik, el si gapura bukni, keting panalyangan tam domik ning, bisik bublan arye wekuka, adiparyuk otam, Allah el si eren aik wekukba eipse.

⁵ Atalak ara, Allah el Pia Teleb, Lek Dip Kanye arye, na erebuka bobinukce, Allah el si eren aik dam mitik tonun lo batakamik noutam deipnuke. Winibuka deipnukba, abinuka tiksirye, dinmasiba, Allah Yahweh el weik dirina ara, Allah el si eren aik noutam landipmokak eipse.

⁶ Atalak ara, anye na dam tuba atikmok talak ara, Allah Yahweh el si eren aik pum tam arye, yupu nati nyapnukba, kekepse. Allah Yahweh arye nyapnuk yupu ara, ani.

⁷ Yahweh arye nyapnuk. “Se, anda ninye sirika arye deipkiknye ulyama ati, anda minopce dipnalame. Nara, anyaik ununa deice arye, aning-aning nirya talibuka, ninye deiyok kibuka unirye, tukwak mutuku nang nirya ati, yupu bokolinamne. Anyaik noutam ara, na yan arye yanibuka unamne. Ati ara, ninye deiyok nang bunyak ning, el si ara takhta atonun, anyaik ulule. Ati, asukum ara, na unirye, Israel yala nang, sik kan–kan pia aulamnirye, sik Israel nang ati, ‘Aning winipnamlume, aning ara pia kum wininamlume,’ nyabuka, yupu bokolinamne. Ara, sik Israel talye nang ap, sik deiyok-deiyok kibuka, Raja-Raja unyak nang arye, na pia leknye si ati, tuba yaninikirye, malye kum kilinamniake. Sikce na pia teleb si, yaninikirye, malye winilininyak ning ara, ani. Ara, isa mer ati, ‘Nun niʼ tenen, si erenyake. Tonda, sik mutuku talibuka, deiyok-deiyok nang, sik Raja nang dibikiba, na si eren aik bai tam domik keil poka dam weinyaka deice arye, malye kililanyake. Minop talak aning nirya winilamik bukni, wini talak arye dipdongobuka doupnamle talak nirya ara, aning tuba kum wininamake.

⁸ Tonda, minop talak ara, sik Israel yala nang, sik deiyok-deiyok nang arye, sik aik domikce, bisik bublan dana-dana tam, yo deibuka domik ning ap, abublan wekelban bisik yanina ak ap, na aik dam atonun domik. Winilamika ati, sik aik otam, na aik atam ara, tonok keil poka domik bukni, sik aik ara, pia mening dam ubuka ati, winilamika deice arye, na leknye si ati, pia malye kililamnike. Winilamnik ning nirya ara, narye, ‘Aning-aning nirya, pia na like. Aning nirya ara, pia na likʼ tenenun bukni, aning tenina kumce, talye mangkau asa, malye winin ning weik ulamik. Winilamika ati, sikti, yu weik upnukba, amutuku ulamik nang nirya obuka, sirya dakse.

⁹ Pia malye weik ulamik bukni, wini talak arye deiyok koubuka, sikce isa mer si erenyak ning ara, adiparyuk batakanamake. Tonda, sik ninye deiyok nang, Raja-Raja dipniba, na aik dam poka kup-kup ak, tuku lukuka weilamik ning ara, adiparyuk dobuka, pera otam bobinamake. Anyapman touk, dipkoprob winibikcopura, nara sik kan-kan pia ati aunamne.

Allah arye, ‘Sik Israel nang alye daknamakʼ tenen, Yeheskiel biti nyabuk yupu

¹⁰ Yahweh arye, ayupu nirya akunum nyabukopura, Yeheskiel biti, ayupu tonap dukdongobuka nyabuk. Se, anda ninye sirika arye deipkiknye ulyama ati, minop dipnalame. Ance, ‘Sik Israel yala nang nirya biknamakʼ tenen, na si eren aik pum tam ulye ning ap, anyaik dana-dana tam ulye ning nirya ap, el kiklilen meter nirya ap, el urasin nirya ap ara, sik dam lak nyalbinalame. Aning nyapminya deice arye, sik malye unyak ning moubuka bikikirye, alye weik dakdanamake.

¹¹ Sik Israel yala nang arye aning nirya kekebikirye, alye weik dakdanamak talak ara, an Yeheskiel birye, na si eren aik pum tam ulye ning urasin ati, lak nyapnalame. Tonda, anyaik wekelban bisik bublan ap, anyaik batakuka ban bisik ap, aik taplak deibikce domik ning ap, laka nyapnalame. Tonda, na Allah ara, na si eren aik noutam pil dona ati, ‘Wininamlume, apil ara, winibuka donamlume. Aning ara, telebe, aning ara meme,’ nyabuka, laka nyapse ning ap, tonda, aning kum winibikiba, yu upnilyopura, wenepnamsin ning ap, ance lak nyalbinalame. Tonda ayupu-ayupu nirya ara, ance sik Israel nang dinamakak arye, ayupu sekenalame. Winipnalama deiyok ara, sikce eibikirye, anyaik pum pil dona nirya ati, ‘Winibuka apil donamlume,’ nyapse ning, moubuka bikikirye, na nyapse touk unamake. Tonda, narye sikti, “Anyaik pum tam ap, bai tam ap, aning wininamlume, aning ara, pia kum wininamlume,” nyapdeipse touk, moubuka tenebikirye, wininamake.

¹² Anyapnukin yupu nirya ara, na si eren aik pum tam pil donamaka ap, anyasik dam unamaka ap ati ara, narye, ‘Wininamlume,’ nyapdeipse touk, aninguk wininalame. Yuk ning ton tenebuka, winina kume. Ara, akeil poka deibuka domik ning noutam ap, anyaik dam bukamuk mutuku dup ap ara, pia dipkoprob mambul weik, pia teleb lek mutuku ulule.

Allah arena ati kam ning opnarye, uku dongonak ati, laka nyabuk yupu

¹³ Na Allah arena ati, kam ning opnarye, uku dongonak ati, el si mesba, aning dona ati nyapnukin kiklilen meter nirya ara, na Allah si eren aik pum tam uamuk ning ap, anyaik kub-kubak uamuk ning nirya ap, anyaik dana-dana tam uamuk ning ap ara, malaikatnye birye pina arye deibuka, kiklipdeyuk ninguk bobimince, kiklipdenalame. El pina cang ara, 53 sentimeter upmok touk, aninguk talibuka amesba ati kiklipdenalame. Amesba amu tam antanap dongobuka dopnamak yangalina ara, el pala babye, el cang babye, pina tonok 53 sentimeter, aning atonun setengah meter kipnamle. ‘Amesba amu tam dopnamika ati, kam ning opnarye, binuka deipnaba, ining sakalirye banamleʼ tenen, mek sekuka kintinipnamake. Amek sekna bisik, el bukam babye, setengah meter kipnamle. Ayangalin ning deice tam deipnamak mek bisik ara, outam arye dipdongobuka eitam, 25 sentimeter (seperempat meter) kipnamle.

¹⁴ ‘Ining banamleʼ tenen, seknamak mek sekna bisik deice arye, dipdongobuka eitam ara, aning nirya antanap dongobuka dopnamake. Aning ara, mek deice arye dipdongobuka, eitam el cang ara, tonok meter kiklibikirye, dopnamake. Aning el bukam ara, setengah meter kipdeipnamake. Aning deice deipnamak ning ara, outam arye dipdongobuka eitam, el cang ara, dua meter (2) kiklibuka deipnamake. Aning el bukam ara, 50 sentimeter (setengah meter) upnamle.

¹⁵ Aning deice tam ara, kam ning opnarye, uku dongopnamakak, kiklipdeipnamake. Uku sekna ati dopnamakak ara, outam arye dipdongobuka eitam, el cang ara, tinggi empat meter (4) kiklipdeipnamake. Tonda, uku sekenamak ning deice tam, sirya dana-dana ara, imam nang arye, tace ning dumbarye (4) dobuka deipnamake.

¹⁶ Ining ning opnarye, mesba deice tam uku sekenamakak ara, el cang ap, el pala ap ara, neik touk 6 meter kiklipdeipnamake. Aning el nong nirya ara, persegi empat upnamla ati, el nong dana-dana tam nirya babye, atouk 6 meter kiklipdeipnamake.

¹⁷ Ining ning opnarye, Allah arena ati, uku sekikirye dongonamakak ara, el nong dana-dana nirya ara, empat segi 7 meter kiklipdeipnamake. Ati, aning el cang ap, el pala ap atouk, 7 meter upnamle. Aning deice tam antanap dongobuka lilun deipnamak ning ara, outam arye dipdongobuka, eitam ara, 25 sentimeter kiklipdeipnamake. Aning ara, kam ning kalebuka delinamak ning ara, ‘Tukwak saklyakʼ tenen, barina ati, keil arye deipnamake. Uku sekenak amu tam ara, ‘Ining saklirye banamleʼ tenen ati, mek bisik sekdeipnamake. El bukam pala ara, 50 sentimeter upnamle. Allah aren ning opnarye, uku dongolbanak, eitam welebana ati, keil arye morona ara, keting panalyangan tam arye morobuka, mesba taram dam delinamake.

Allah arye, na Yeheskiel biti, mesba deice arenamaka ati, laka nyapnuk yupu

¹⁸ Atalak ara, Allah Yahweh, aning-aning nirya talibuka, deice tam mikip weik ululnye birye nyapnuk. “Se, ninye sirika arye deipkiknye, anda minopce dipnalame. Na Allah Yahweh nyapnukin yupu ara, moubuka kekepnalame. Na arena ati, uku sekenak, el si ara mesba, akunum dobuka sirya dakminyopura, amesba pia teleb kilina ati ara, kam ning opmince, amesba deice uku sekuka dongonalame. Tonda, akam ning, el ining dopropmince, amesba deice tam ara, ining arye dikdonokminba, dulbinamle.

¹⁹ Winipminyopura, Lewi yala nang bukni, Allah el si eren aik pum tam, pil dona deiyok nang, sik imam nang ati, apil arepnalame. Ara, Lewi yala nang arye diamiknye, el si ara Sadok, elce deiamukba, dadeipdanin yanganamak nanguk, na dam yakirye, apil donamake. Ara, ‘Israel nang, sik malye wininyak ning nirya, kilipnirye, kum kipdeipnamneʼ tenen, tenepse ning arepnamniak ning ati, Sadok el yala nang aryuk, yanuka apil donamake. Nara Allah Yahweh, aning-aning nirya talibuka, deice tam mikip weik ununye birye, ‘Winipnamlume,’ nyabuka, akunum nyapdeipmakina ati, aninguk talibuka unamlame. Ati ara, ance sik Sadok yala imam nang ati, tonok yim sapi basam keting tamun mitik tonun ning boyanuka arenamlume. Ara, na Allah arye, sik Israel yala nang malye wininyak ning kilipnirye, kum kipdeipnamne atia. Allah arye Yeheskiel biti nyabuk.

²⁰ Tonda, Allah ati asapi basam obuka arenamlum ning ara, opmince, ining mitik tonun ton dobuka, amesba deice tam kup-kup ak, sapi basam el kisok deice belelamle ning, el si sapi yang urasin atonun, atace ning dumbarye deibikiba, belepnamla deice tam, ining dikdonokuka likilinalame. Tonda, aning atonun, amesba el sirya tam dana-dana dumbarye nirya, bingkai atonun ning memepdeipnamak ning ara, el kiklinak dana-dana tam dumbarye deice ap, tonda mesba deice tam, kam ning obikirye, kalibuka deibikiba, ‘Tukwak saklyakʼ tenen, barina ati, keil arye memepdeipnamak ning deice ap, aning nirya deice tam, ining dikdonokuka likilinalame. Winipminya deice arye, amesba nong nirya ara, na ning ati, teleb kipdeipnamnilame. Ara, malye ulye ning nirya ara, narye kum kipdeipnamne ati nyapkine.

²¹ Ura, mesba dam pil akunum dopminyopura, Israel nang, sik malye unyak ning kilipnirye, kum kipdeipnamna ati, yim sapi basam obuka arepnamniake. Ara, na Allah si eren aik bai tam domik keil poka dam arye, dipdongobuka bai tam narye, ‘Asukumuk uku seknalame,’ nyapdeipkisakuk, asapi basam tuba bataknalame ning nirya ara, uku sekmince dongopnalame.

²² Ura, apil nirya akunum dopmunce, mapmamunya bereklyoura, asum ara, yim kambing basam ara, bol malye bona kumce, pia teleb ninguk boyanuka, na Allah ati arepnamlume. Ayim kambing basam arepnamnilama deiyok ara, sik Israel nang malye unyak ning kilipnirye, kum kipdeipnamna atia. Ayim kambing akunum opmince, amesba malye uplye ning teleb kilina ati, ining dobuka, amesba deice dikdonokuka likilinalame. Ara, minyuma sum, winiryuk sapi basam ining dobuka, mesba deice dikdonokuka, likdeipmamunye touk, like bitinye sum babye, apil dopmaminye touk upnamlame.

²³ Amesba teleb kilina ati, ining dikdonokuka likdeipnamluma deice arye, akunum pil dopmunce, sirya dakmumnyopura, na Allah arena ati, yuk kam ning ton obuka kintinipnamlume. Ara, yim sapi basam winiryuk ning ap, yim kambing basam winiryuk ning ap ara, bol malye bona kum, pia teleb ninguk dopropnamlume.

²⁴ Abasam bitinye opmunce, kaliplumce kintinibuka dopromunyopura, na Allah dam boyanamnulume. Aning boyanuka, na dam deipmunyopura, sik imam nang arye, garam dobuka, abitinye basam kalibuka yunamake. Winibikcopura, sik imam nang arye, aning nirya dobuka, na Allah Yahweh arena ati, uku dongopnamake.

²⁵ Anda, like tekbarye sum nirya ara, winiryuk yim kambing basam ap, yim sapi basam ap, yim kambing nong akunum nebuk ning ap, obuka, nati arenamake. Ara, sik Israel nang malye unyak ning kilipnirye, kum kipdeipnamna ati, aning arenamnulume. Ayim sapi basam winiryuk ning ap, yim kambing basam winiryuk ning ap, yim kambing basam akunum nebuk ning ap ara, bol malye bona kum, pia teleb ninguk wibuka arenamnulume.

²⁶ Apil nirya ara, like tekbarye sum deice donamluma deiyok ara, ani. Ara, sik imam nang arye, apil dopnamaka deice arye, amesba nong nirya ara, na ning ati, teleb kipdeipnamnulume. Ara, amesba dona ati, keil yangapdeibuka donamak nang, sik malye winin ning ap, amesba dam pil donamak imam nang ap, sik malye winin ning babye, narye kilipnirye, kum kipdeipnamna ati, apil donamlume. Apil nirya akunum dopmunce, amesba akunum teleb kipdeipnyopura, amesba dam nati, dotalak talye mangkau asa pil dopnin banamluma nirya ati nyapsine.

²⁷ Keting noutam tekbarye sum nyapse ning akunum uplyopura, sirya sum ap, aminyan talak nirya ara, imam-imam nang arye, kam ning obikirye, amesba deice na Allah ati, kintinibuka arepnamniake. Sikce arenamniak ning ara, ani. Ara, sik Israel nang arye, malye wininyak ning nirya kilipnirye, kum kilin ning ati, kam ning obikirye, uku dongonamake. Ton ning ara, sik Israel nang ap, na Allah ap, kanye deibuka epdabirye, neika unamaba ati, kam ning obikirye, arenamniake. Aning nirya winipmunyopura, na Allah arye, anggun Israel nang nirya ati, pia kanye deipsinirye, anggun dam neika pia unamne. Ayupu nirya ara, na Allah Yahweh, aning-aning nirya talibuka, deice tam erebuka unirye, mikip weik deiyoknye birye nyapsine. Ati ara, narye nyapmasin touk, aninguk talibuka pia unamlume.