Yehezkiel 42 - Eipomek

Allah Yahweh, el si eren aik dam ara, aik bitinye ton domik ning ati, laka nyabuk yupu

¹ Ura, aning nirya akunum winibukopura, anye elcuk, na bobuka, Allah si eren aik dam bukni, dabu tam uamuk gapura noutam arye kirikuka, otam lo weik batakamika noutam binuka tiknumu. Asukum arye, tuba tamubuka, iknapye tam dinmasiba, Allah si eren aik dam bukni, keting kumulban tam domik aik eipse. Anyaik dam arye dinmasibuk, dabu tam domik aik outam upmokak eipse.

² Adomik weik aik, el nong cang nirya ara, 50 meter kibuk. Atonunuk, el pala ara, 25 meter kibuk.

³ Anyaik domikce, el urasin deiamik tam, lo el pala ara, sepuluh meter (10) kibuk. Anyaik bukni ton tam ara, el urasin deibuka domik tam ara, bai tam arye ninye yanibuka yangana ati, keil pala yangap deiamikce, domik tam ara, lantai batu dam, anyaik urasin bai tam kipdeiamikce, domik. Anyaik domik ning, tonok minyuma domik ning ara, tuku deice amu tam domik. Anyapce ubuka, bitinye ning ara, noutam domik. Anyapce ubuka winilye ning ara, eitam domikce, tiga tingkat aik nyabuka dolamaka atonun, ubuka domik. Atiga tingkat aik domik ning, el urasin ara, Allah si eren aik iknapnye tam kipdeiamikce, domik tamuk kiamik.

⁴ Anyaik yuk-yuk wilibuka domikce, urasin tam bukni, mitik tonun lo batakamika, el pala ara, 10 meter kibuk. Tonda, alo bukni, el cang ara, 50 meter kibuk. Atingkat tiga domik aik, el pum tam wekelbana ati bisik ara, dabu tam diamuk botopdeiamik.

⁵ Anyaik noutam alip tam wilibuka domik aik ara, el lo pia mitik tonun kibuka domik. Bukni, yuk amu tam domik aik noutam nirya ara, mitik tonun, pala weik kibuka domik. Deiyok ara, pia mitik bisik el si ara, lorong-lorong dam domik aik, el pala ara, weik tonun domik. Anyapce amu tam domik aik ara, mitik tonun domik.

⁶ Atiga tingkat aik pum noutam, yuk-yuk wilibuka domik ning nirya ara, winilye tingkat kibuka domik. Tonda, Allah el si eren aik dam bukni, dana-dana tam aik ap, bai tam keil poka dam domik aik ap, anyasik el ayukumna yo arye ikuka, dolamika atonun ubuka, atiga tingkat aik ton, pia kum domik. Yuk aik dopnukirye, aik tam ap, aik pum tam ap arye, ayukumna ikuka dolamak touk, ubuka kum domik. Ati ara, atiga tingkat domik aik, alip tam wilibuka domik aik ara, el lo ara, mitik tonun pala weik ap kibuka domik. Bukni, anoutam domik aik pum tam nirya ara, el lo mitik tonun kibuka domik. Pia amu tam bukni, tuku deice domik aik lo nirya ara, mitik tonunuk kibuka domik.

^7-8 Ton tam arye dobuka, tukwak amu tam domik tingkat, el cang ara, 25 meter uamukba domik. Anyaik-anyaik nirya domik ning, bisik bublan urasin tam ara, ‘Talye nang arye, anyasik pum tam eibicakʼ tenen, mitik tonun keil poka, el si tembok deice aryuk deibuka domik. Atembok kup-kup tam nirya ara, dua puluh lima (25) meter kibuk. Bukni, otam asik weik domik ning, sik urasin tam deibikce domik ning ara, Allah si eren aik tam deibuka domik. Aning el kup-kup tam nirya ara, lima puluh (50) meter kibuk.

^9-10 Atingkat tiga aik domik ning ara, iknapnye tam domik. Atingkat aik amu tam ara, anyaik keting panalyangan tam, sirik tam ara, anyaik wekelbana ati, bisik bublan tonok botopdeiamik. Abisik bublan tonok damuk, kat keil arye dobuka, bumang poka domikce domik ning, el si tembok deiyok kiamika damuk, abisik bublan botopdeiamik. Ara, atingkat aik arye ubuka, otam Allah el si eren aik dam bana ati, abisik bublan botopdeiamik. Amitik keil poka tembok ara, kon kipdeibuka domik. Allah si eren aik dam, lo weik batakamik tam arye, abisik bublan wekelyangalamik. Tonda, dabu tam tingkat tiga domik aik urasin atonun ubuka, iknapnye tam domik tingkat tiga aik babye, el urasin ap, kiklipdeyukura, meter uamuk ning ap, bublan dam ap, aning nirya ara, pia atonun ubuka domik.

¹¹ Iknapye tam domik aik, tingkat tiga aik dobuka, yuk–yuk wilyamikce, anyaik urasin tam ara, wekuka binma yanmana kina ati bisik ara, dabu tam aik memepdeiamikce, domika atonun, anyaik babye atonun ubuka domik. Ara iknapye tam domik tingkat aik babye, dabu tam domik tingkat aik babye, el urasin ara neikto touk, uamuk. Tonda iknapnye tam domik aik, kiklipdeyukura, el cang babye, el pala babye, dabu tam domik aik atonun kibuk. Tonda, anyaik bitinye ara, el bisik bublan botopdeiamika babye, el urasin atonun kibuk.

¹² Iknapye tam domik tingkat aik, dobuka yuk-yuk wilibuka domikce, anyaik amu tam, ara selatan tam ara, anyaik arye bai tam bisik bublan ton botopdeiamik. Ati, dabu tam domik tingkat aik ara, anyaik pum tam arye, bai tam bisik bublan botopdeiamik ning ara, dabu tamuk deibuka domik. Ura, iknapnye tam tingkat tiga domik aik lilunak ara, keil arye dobuka, keil poka domik ning, el si tembok, deiyok kouamika damuk, abisik bublan botopdeiamik. Abublan el urasin ara, keting panalyangan tam deiamik.

¹³ Anye birye nyapnuke. “Adana-dana tam domik tingkat aik bitinye nirya ara, Teleb Lek Aik ulule,” nyapnuk. Atingkat aik pum tam ara, Allah si eren aik pum tam, pil dona deiyok nang, sik imam-imam nang aryuk wektinge. Tonda, sik imam-imam nang aryuk, Allah el si eren aik pum tam yanuka wekikirye, Allah Yahweh ap, neika epdakirye, sik Israel yala nang ati, Allah moronyake. Tonda, Allah ati aren ning, pia teleb lek ning ara, anoutam arye dopropnarye, bokuka anyaik pum tam boyanuka dinyake. Allah arena ati, kam ning boyanuka, kalipnarye, pia teleb lek ninguk, anyaik pum tam babye, dokola delinyake. ‘Allah el si erena ati, aminyan talak arepnamapʼ tenen, anyaik dokola delinyaka ara, ani. Ton ning ara, Allah si erebuka kina ati, gandum duk boyanuka delinyake. Tonda, Israel nang malye upnaba, ‘Allah arye aning nirya namin kipsilirye, kum daneipnamsilʼ tenena ap, tonda amalye ning pununa ap ati, kam ning opnarye, kalebuka dan tam ara, boyanuka anyaik dokola delinyake. Ton ning ara, Israel nang arye malye winipnarye, ‘Se, nunda dipkoprob pia malye winipmabe,’ tenen, ikin kanye bobuka, teninyak ning ara, Allah arye atenenyak ning ara, kum kipdeipsutuʼ tenen ati, aren ning boyanuka, anyaik dokola delinyake. Ara, Aminyan talak ton aning ara, dinamabe, ton ning ara, Allah ati arenamabe,’ tenena ati, aning-aning boyanuka, anyaik pum tam dokola delinyake. Asukum domik aik ara, Pia Teleb Lek Aik ulula ati, Allah el aren ning dan tam ning ara, boyanuka anyaik pum tam dinyake, tonda, dokola delinyake.

¹⁴ Allah si eren aik pum tam pil dona deiyok nang, sik imam-imam nang arye, sik pil donmana ani, akunum pil dobuka sirya dakdongopnopura, anyaik batakuka, bai tam binun talak ara, sik ongopman baju ara, atingkat tiga aik pum tamuk, kwiribuka deipnopura, yuk talye baju ongobuka, bai tam lo weik batakamik, bisik binarye banyake. Wininyaka deiyok ara, Allah si eren aik pum tam ongopnarye, pil don baju ara, Pia Teleb Lek ning ulula ati, wininyake. Winibikcopura, sikda yuk talye-talye nang weik wekmacak babye, talye banyake.

Allah el si eren aik bai tam, lo kwamukak kiklibuka ati, laka nyabuk yupu

¹⁵ Anye birye, Allah si eren aik bukni, aik pum tam akunum kiklipdeyukopura, na bobuka, cang keil arye deibuka domik aik, el si ara gapura, bukni keting panalyangan tam bisik bublan arye kirikuka, lo weik batakamikak bobinuk. Ara, Allah el si eren aik, bai tam lilun lo uamukak ap, awamuk ning nirya ap, ‘Kiklipnunamʼ tenen, bobinuka deipnuke.

¹⁶ Anye bopmuk pina arye, bai tam bukni, keting panalyangan tam arye, deibuka domik keil poka, atam arye dipdongobuka, otam kiklipdeyukura, el pala ara, dua ratus lima puluh (250) meter kibuk.

^17-19 Winibukopura, anye el bopmuk pina arye deibuka, dabu tam deibuka domik keil poka, kiklipdeyuk. Tonda, aning atouk, anye birye, iknapye tam deibuka domik keil poka dam binuka, kiklipdeyuk. Tonda, aning atouk, anye birye, keting kumulban tam deibuka domik keil poka dam binuka, kiklipdeyuk. Apoka kiklibuk ning nirya ara, el cang nirya ara, dua ratus lima puluh (250) meter kibuk.

²⁰ Ati ara, Allah el si eren aik ap, anyaik dam uamuk ning ap, ubukak nirya ara, dana-dana tam nirya atonun ubuka ati, persegi empat kibuk. Aning nirya, el kiklilena ara, atouk panjang dua ratus lima puluh (250) meter kibuk. Allah el si eren aik ap, anyaik dam uamuk ning nirya ap, anyaik dam mitik tonun lo batakamikak, ‘Aning nirya, Allah el ning ulule. Awamuk ning nirya ara, pia teleb lekak ulule,’ tenelamik. Utenelamika ati, keil poka arye dobuka antanap dongamik. Akeil poka arye antanap dongamika deiyok ara, Allah el tam pia lek ulula ati, el ning yuk, ninye talye-talye nang ban ning yuk,’ tenelamikce, apoka dobuka antanap dongamik.