Yehezkiel 41 - Eipomek

Allah el si eren aik pum tam, minyuma aik el si Teleb Lek Aik ati, lak nyabuk yupu

¹ Na lengdar mapmasa deice arye, anye biryuk na bobukapnukce, Allah el si eren aik noutam bukni, minyuma aik, el si ara, Teleb Lek Aik delilbinuk. Anyaik minyuma pum noutam ara, lo weik uamuk. Anyaik wekelban bisik bukni, mitik bai tam abilinga domik ning ara, ‘Yata barye meter kibuk do?’ tenen, anye biryuk bopmuk pina arye, deibuka kiklipdeyukura, dana-dana tam piamik abilinga el bukam ara, 3 meter kibuk. Tonda, abisik bublan wekenak el pala ara, atam arye dipdongobuka, otam kiklipdeyukura, el pala ara, 5 meter lebar kibuk.

² Anyaik wekelbana ati bisik bukni, atam arye, otam dukdongobuka domik ning ara, kiklipdeyukura, el pala ara, 5 meter kibuk. Anyaik wekelban bisik bukni, dana-dana tam pibuka domik abilinga bitinye ara, el bukam ara, 2 setengah meter (2.5) tebal kibuk. Winibukopura, Teleb Lek Aik noutam, lo weik uamuk aik ara, el bopmuk pina arye, anerye dipdongobuka otam kiklipnin banmokba, otam abilinga dam kiklipdeyuk ning ara, el cang ara, 21 meter panjang kibuk. Aning akunum winibukopura, Teleb Lek Aik kwanim tam arye dipdongobuka otam sirik tam, kiklipdeyukura, el pala ara, 10 meter kibuk.

³ Anyaik pum tam nirya, akunum kiklibuka sirya dabukopura, anyaik batakuka otam aik, keting kumulban tam, sirya domik aik, el si ara, Pia Teleb Lek Aik. wekukce, anyaik babye kiklipdeyuk. Anye birye anyaik noutam wekukopura, pia mitik bisik, el si ara lorong dam binuka kiklipdeyuk. Winibukopura, el cang ara, satu meter kibuk. Bukni, el pala ara, 3 meter kibuk. Aik abilinga deibuka domik ning ara, bitinye, el pala ara, tiga setengah (3.5) meter kibuk.

⁴ Winibuka akunum kiklibuka sirya dabukopura, adiparyuk anyaik noutam babye, anye biryuk, el bopmuk pina arye, kiklipdeyuk. Anyaik el urasin ara, persegi empat kibuka domik. Ati ara, aning atonun, anyaik el cang ap, el pala ap ara, yuk-yuk bukni, ato touk sepuluh meter (10) kibuka domik. Winibukopura, anye birye nati nyapnuk. “Asukum ara, Pia Teleb Lek Aik atia,” nyapnuk.

Allah Yahweh el si eren aik noutam, yuk-yuk keil pala arye deibikce, bokuka domik ning ati, nyabuk yupu

⁵ Aning akunum winibukopura, el anye birye na boyanuka, Allah si eren aik, batakuka bai tam binuka deipnukce, tamubuka aik pum tam dinmase. Winibukopura, anye birye, Allah el si eren aik bai tam, abilinga piamika lilun tam ara, el bopmuk pina arye, kiklipdeyukura, el bukam tebal ara, 3 meter kibuk. Allah si eren aik bai tam antanap dongobuka domik aik nirya ara, anye bopmuk pina arye, kiklipdeyukura, ayuk-yuk wilibuka domik aik, el pala ara, dua meter (2) kibuk.

⁶ Allah si eren aik bai tam bukni, anyaik kup-kup ak dana-dana tam, ara iknapnye tam ap, dabu tam ap, aik winilye tingkat domik ning ara, minyuma ning ara, tukwak domik. Anyapce ubuka bitinye ning ara, mitik tonun kisikuka, Allah si eren aik tam ap domik. Atonun, winilye ning ara, mitik tonun ton kisikuka, Allah si eren aik tam ap domik. Anyaik winilye tingkat domik ning ara, yuk-yuk wilibikce domik. Anyaik tingkat winilye domika noutam ara, mitik aik yuk-yuk wilibuka domik aik ara, 30 aik domik. Ara, tukwak babye, noutam babye, deice tam babye, mitik aik 30 wilibuka domik. Tonda, anyaik tingkat winilye domik ning barina ati, cang weik ayukumna yo atonun, keil weik tonun antanap dongamikce, ikuka domik. Tonda, atingkat winilye domik aik arye, ‘Allah el si eren aik abilinga bol pipyakʼ tenen, lo batakamik.

⁷ Allah si eren aik kup-kup domik tingkat winilye aik bukni, tonok tukwak tam domik ning ara, anyaik nong pala ara, mitik tonun kibuka domik. Bukni, bitinye noutam tingkat domik aik ara, el nong pala ara, mitik tonun ton weik kibuka domik. Atonun, eitam tingkat winilye domik aik ara, mitik tonun ton, weik kibuka domik. Ati eitam tingkat winilye domik aik, pia weik kibuka domik. Tukwak domik aik ara, pia mitik kibuka domik. Tukwak tam arye awinilye tingkat aik welebana ati, domik morona el urasin ara, minyuma domik aik pum tam arye, kwalibuka bitinye aik domikak moropdeibik. Atonun, amorona bitinye aik dam arye, winilye tingkat dam kepdeipdanin biyikce, moropdeibik.

^8-11 Allah el si eren aik dam arye, tikuka dinmasiba, anyaik amu tam tukwak nirya ara, weik keil arye, taplak deiamikak, utam arye dipdongobuka, eitam el cang ara, tiga meter (3) kibuk. Adeice tam arye dipdongobuka, otam el bukam ara, dua setengah (2.5) meter kibuk. Atingkat winilye domik aik, el bai tam abilinga, kiklipdeyukura, el bukam ara, dua setengah (2.5) meter kibuk. Tonda, winilye aik tingkat dobikak arye, Allah el si eren aik domika, dana-dana tam lo mitik tonun batakamikak, kiklipdeyukura, el pala ara, 10 meter kibuk. Tonda, Allah el si eren aik kup-kup iknapnye tam ap, dabu tam ap, anyaik wekelban bisik bublan botopdeiamikce domik. Abublan bitinye potopdeiamika dam, kwanim tam ap, sirik tam ap, eitam ap ara, atouk dua setengah meter (2.5) kibuk. Tonda, Allah el si eren aik lalinak, el pala ara, dua setengah meter (2.5) kibuk.

Keting kumulban tam domik aik ati, nyabuk yupu

¹² Allah el si eren ati domik aik kaplibuka otam ara, weik aik ton domik. Allah si eren aik atam ap, otam ap domik aik anoutam ara, lo mitik tonun ton batakamik. Anoutam lo el pala ara, 10 meter kibuk. Anoutam batakamik lo kaplibuka, keting kumulban tam domik aik ara, anye bopmuk pina arye deibuka, kiklipdeyukura, anyaik bai kwanim tam kiklinak arye dipdongobuka, sirik tam kiklinak el pala ara, 45 meter kibuk. Tonda, anyaik urasin tam arye dipdongobuka, anyaik dong tam, el cang ara, 35 meter kibuk. Tonda anyaik bai tam antanap dongobuka piamik abilinga, el bukam ara, dua setengah meter (2.5) kibuk.

Allah Yahweh el si eren aik ap, keting kumulban tam domik aik ap, kiklibuka domik ning ati, laka nyabuk yupu

¹³ Anye bira, ‘Allah si eren aik el cang ara, yata barye meter do?’ tenen, el bopmuk pina arye, deibuka kiklipdeyukura, el cang ara, 50 meter kibuk. Ara, anyaik urasin tam arye dipdongobuka, donga tam ati, kiklipdeyuk. Tonda, Allah el si eren aik domik ning, donga tam arye dipdongobuka, keting kumulban tam mitik weik aik domik ning kaplibuka, anyaik donga tam binuka kiklipdeyukura, el cang babye, 50 meter kibuk.

¹⁴ Allah el si eren aik urasin tam ara, keting panalyangan tam kiamik. Ati, anyaik urasin tam bukni, dabu tam domik keil poka arye dipdongobuka, iknapnye tam domik keil poka, anoutam batakamik lo nirya ara, ‘Yata barye meter upnul do?’ tenen, anye bopmuk pina arye deibuka, kiklipdeyukura, alo el pala ara, 50 meter kibuk.

¹⁵ Winibukopura, anye birye, keting kumulban tam domik aik, ‘El nong nirya ara, yata barye meter upnul do?’ tenen, dabu tam deibuka, piamik abilinga dukulongonak arye dipdongobuka, iknapnye tam piamik abilinga dukulongonak, kiklipdeyukura, el pala ara, 50 meter kibuk. Amitik weik aik domikak arye, otam Allah el si eren aik domik ning atam, anoutam batakamik lo mitik tonun ara, kiklipdeyukura, el pala ara, 10 meter kibuk.

Allah el si eren aik pum tam uamuk ning ati, lak nyabuk yupu

¹⁶ Allah el si eren aik noutam, yuk-yuk wilibuka domik aik bukni, minyuma ning ara, el si Teleb Lek Aik ap, tonda, Allah si eren aik bisik bublan dam lapdeiamik atolonga domik ning ap eipse. Ura, minyuma domik aik bublan dam bukni, tikuka otam dinmasiba, mambul ning, ‘Naʼ tenen delina ati, mitik marikna memebuka, abilinga taram deice deiamik ning eipse. Amarikna, el lelilongon ning, teleb kain lapkwecamikba, lelyamuk ning eipse. Amarikna deice tam ara, ‘Anyaik abilinga taram urasin, pia teleb upnamleʼ tenen, mitik yo winilye, el si ara bingkai, abilinga taram deice lelepdeiamikce, taplak dongamik. Tonda, alo weik aik, el abilinga taram deice nirya ara, ‘Urasin teleb upnamleʼ tenen, pala yo lakase, el bukam pia mitik uamuk ning, el si ara tripleks, atonun taplak dongamik. Aning ara, amsuna deice utam arye dipdongobuka, jendela botopdeiamika dam amu tam domik. Tonda, mitik jendela botopdeiamika ara, el lelin ning, el si ara kain tirai arye, lapkwecamik.

¹⁷ Allah si eren aik pum tam ap, bai tam ap ara, anyaik abilinga nirya, ‘Urasin pia teleb upnamleʼ tenen, anyaik abilinga taram deice nirya ara, ninye arye gambar ton memepdeiamik ning eipse. Agambar ara, malaikat atonun ning, el si Kerub ap, tonda korma yo ap, urasin atonun ubuka memepdeiamik.

¹⁸ Amemebuka deiamik ning ara, anyaik urasin teleb una ati, kel nang arye memepdeiamik gambar ara, ani. Noutam ara, malaikat urasin atonun bukni, el si ara Kerub, memepdeiamik. AKerub dana-dana tam ara, yo el si Koroma yo, urasin atonun gambar memepdeiamik. AKerub el urasin, bitinye kibuka diamik.

¹⁹ AKerub urasin memepdeiamik ning kwanim tam ara, bai tam ulamle ning el si ara, yu singa kus urasin atonun kibuka deiamik. Tonda, aning atonun, sirik tam ara, ninye urasin atonun kibuka deiamik. Aurasin teleb una ati memepdeiamik ning ara, Allah el si eren aik, abilinga taram deice nirya ara, aning urasin atonun ubuka, gambar memepdeiamik.

²⁰ Anyaik amsuna deice arye dipdongobuka, bisik bublan eitam nirya ara, malaikat atonun ning, el si ara Kerub ap, korma yo ap, urasin atonun memepdeiamik.

²¹ Teleb Lek Aik wekelbana ati, bisik bublan dam dana-dana barina ati, tikeiamik yo, el urasin ara, persegi empat kibuka, deiamikce domik. Tonda, otam domik aik, el si ara, Pia Teleb Lek Aik, el bisik bublan dam dana-dana barina ati, tikeiamik yo babye, el urasin ara, persegi empat kibuka, deiamikce domik. Pia Teleb Lek Aik, talye nang wekmanto kumak ara, Allah morona ati, ‘Aning deice tam ining dobuka likeipnamapʼ tenen, yo arye memepdeiamik ning, el si ara mesba awamukak eipse.

Israel nang arye, “Nun malye wininyap ning nirya, Allah arye aning namin kipsilirye, kum kilipnamsilʼ tenen, yo arye memebuka deiamik ning ati, lak nyabuk yupu

²² Anye el bopmuk pina arye, aning kiklipdeyuk. Aning el utam arye dipdongobuka, eitam el cang ara, satu setengah meter tinggi (1.5) kibuk. Tonda, el pala dana-dana tam ara, satu meter uk kibuk. Tonda amesba delina ati, amu tam yangalina ap, tonda aning kup-kup ak sirya dana-dana nirya ap, tonda aning el lelina ati piamik abilinga ap ara, yo arye domik. Aning akunum eipsopura, anye birye nyapnuk. “Kume, amesba ara, Allah Yahweh el urasin din tam deibik touk, tuba asukumuk ulule,” nyapnuke.

Allah si eren aik pum tam bukni, Pia Teleb Lek Aik wekelban bisik bublan ati, laka nyabuk yupu

²³ Ura, Allah el si eren aik pum tam bukni, Teleb Lek Aik wekelban bisik bublan ara, bitinye memepdeiamik. Bukni, abublan tirikilongona ap, kukuna ap ati ara, winilamik. Imam deiyoknye birye, abublan kukun talak ara, tonok kibuka pakulongolamuk. Tonda, abublan tirikin talak ara, yokuka tirikilyangalamuk. Ara, kwanim tam bublan babye, sirik tam bublan babye, pakubuka tonok kilongolamuk. Ura, aning atonun, otam domikak uamuk aik, el si ara, Pia Teleb Lek Aik, talye nang babye, yuk-yuk imam-imam nang babye, anyaik talye mangkau asa, kum binmanto kum ulamik. Imam nang, sik weik deiyoknye binyuk, anyaik wekelbinarye, pil dolamuk. Otam aik, el si ara, Pia Teleb Lek Aik babye, el bisik bublan wekelbanak ara, bisik kin-kin tonok botobuka memepdeiamik. Bukni, abisik bublan tirikilongona ap, kukuna ap ati ara, ani. Imam weik deiyoknye birye, kukuka weknun talak ara, bublan tonok kiamik ning kuknaba, abublan el yuk dana-dana tam pakulolbalamuk. Atonun, imamnye birye tamubuka tirikne talak ara, abublan el yuk yokuka, dana-dana tam tirikilyangalamuk.

²⁴ Abublan nirya ara, bitinye-bitinye uk boteiamik. Winyamikce, abublan ara, noutam aryuk bublan kuklamik.

²⁵ Pia Teleb Lek Aik noutam wekelbana ati, botopdeiamik bublan deice, el urasin teleb un ning, yo el si korma nyalamak yo urasin atonun ap, tonda malaikat urasin atonun ning, el si ara Kerub arye, memepdeiamik. Aning ara, anyaik abilinga taram deice nirya memebuka, deiamikba uamuk touk, abublan deice ton memepdeiamik. Tonda, anyaik urasin tam bukni, bai tam ara, tonok ning el si ara, tirai yo deice arye memepdeiamik. Atirai deiamika deiyok ara, ‘Talye daunyak nang arye, Pia Teleb Lek Aik pum tam uamuk ning nirya eibikcakʼ tenen, atirai arye, bisik bublan dam lelipdongamik.

²⁶ Pia Teleb Lek Aik bai tam atolonga dam, abilinga pibuka domik ning deice ara, malaikat urasin atonun ning, el si ara Kerub ap, korma yo urasin atonun ap, puturubukabikce domik. Tonda, aning atonun, mitik tonun otam domik aik, el bai tam abilinga deice ara, Kerub ap, korma yo urasin atonun ap, puturubikce deiamik. Tonda, abai tam domik abilinga deice nirya ara, mitik bisik el si ara, jendela-jendela ton botopdeiamikce domik. Tonda, Teleb Lek Aik bisik bublan dam ap, mitik tonun otam domik aik, jendela botopdeiamik bisik dam nirya ara, ‘Talye nang arye, anyaik pum tam ulul ning eibikcakʼ tenen, lelilongon ning, el si ara, terai arye memepdeibikce, lelipdongamik.