Yehezkiel 40 - Eipomek

Yeheskiel Yerusalem mutuku bobiyik yupu.

¹ Ura, sik Babel mutuku nang arye, nun Israel tam nang opsikce, sik mutuku koproba tamubuka bobinamsikba, keting tamun dua puluh lima akunum kibukba, wala ara tonoknye bukni, asum ara, tanggal sepuluh ubuk. Tonda, asum ara, narye tenipetepsirye, ‘E, arup ara, sik Babel mutuku yin nang arye, nun Israel nang weik asik, Yerusalem mutuku yanuka obuka, sice buklopsik sum, akunum yale. Bukni, Yerusalem asik ara, kunum obuksikba, keting tamun empat belas akunum ubukopura, bukmase. Abukmase sum ara, Allah Yahweh el mikip weik deice bukni, lengdar mana atonun deice arye, na bobuka, Yerusalem mutuku tamubuka bobinukba, eipse. Atalak eipsi ning ara ani.

² Atalak ara, Babel mutuku tuba ulamse talak bukni, lengdar atonun mapsirye dinmasiba, Allah arye na bobuka, Israel nang ulamik mutuku noutam bobinuke. Winipnukba, amutuku noutam weik tonun bukamuk mutuku kon deice binuka deipnuke. Atalak ara, narye dana-dana tam dinmasiba, na dam bukni, weik asik atonun ning, weik ning domika, ara weik kota kilamak mutuku atonun ton, iknapnye tam (arah selatan) awamukba eipse.

³ Na bobinuka amutuku kon deice binuka deipnukba, dinmasiba, ninye urasin atonun tonoknye ton, baju ongopmok bukni, kat ning, el si ara tembaka, meldang-dang alamle atonun baju ongobuka, aweik asik wekelbana ati, bisik bublan dam tikmokak eipse. Anye bira, ‘Anye asik ara, el cang ap, el pala ap ara, yata barye ubuk do?’ tenen, kiklilen pina atonun ning ap, tonda kain lenan arye wiamik tapu ap, bopmukak eipse.

⁴ Eipsiba, anye birye nyapnuk. “Se, anda ninye sirika arye deiamkiknye bira, awinipnun ning ati, moubuka dinulyame. Tonda, narye nyapnukin ning ton, pia moubuka kekepmince, pia teninmaminya ani, ‘Deiyok ning ara, ati nyapmaleʼ tenen, biknulyame. Allah arye, ‘Anye, aning nirya kel biknamalʼ tenen, asukum boyanmakile. Eipnulam ning nirya ara, ‘Deiyok aniʼ tenen, akunum bikminyopura, sik Israel yala nang nirya ati, laka nyalbinamlyame,” nyapnuke.

Keting panalyangan tam bisik bublan botopdeiamika ati, sekuk yupu

⁵ Nyapnukba, narye aning nirya dinmasirye, eipse ning ara, ani. Allah el si eren aik dam bukni, bai tam dana-dana tam nirya ara, cang weik keil poka akunum dobuka antanap dongamikba eipse. Dinmasiba, awelnye birye, cang weik kiklin pina bopmuk ning, el cang ara 3.12 meter bopmuk. Abopmok pina arye, ‘Akeil poka el cang ara, tukwak arye dipdongobuka eitam ara, yata barye ubuk do?’ tenen, tukwak arye, akeil poka deice tam kiklinmok. Tonda, ‘Akeil poka ara, el pala weik ning deibuka domik ning, tebal nyalamaka ara, yata barye ubuk do?’ tenen, apoka pala ati kiklinmok. Wininmokba, akeil poka, tukwak arye dipdongobuka deice tam, el cang ara, tonok pina arye kiklipdeyukura, 3.12 meter kibuk. Atonun, apoka el pala babye, tonok pina arye kiklipdeyukura, 3.12 meter kibuk.

⁶ Aning akunum kiklipdeyukopura, abisik bublan kirikuka bikyukce, keting panalyangan tam botopdeiamikce, cang weik aik wekelbana ati, bisik bublan dam wekuk. Ara, bai tam keil poka kirikuka biyukce, cang weik aik wekelbana ati, bai tam arye, aik tam wekelbana bisik ara, anyaik welena ati moropdeiamik ning welebuka biyuk. ‘Acang aik binunʼ tenen, kintinibuk talak ara, anyaik wekenak bisik bublan yanina ati, pala keil memebuka deiamikce domik ning ara, kiklipdeyuk. ‘Apala keil, el lebar yata barye ubuk do?’ tenen, kiklipdeyukura, akeil arye dipdongobuka otam ara, tonok pina arye, kiklipdeyukura, 3.12 meter kibuk.

⁷ Abisik bublan akeil pala deice otam akunum wekukopura, lo mitik tonun tekbarye kintinip deiamik ning ara, binuka eibuk. Ara, kwanim tam ara, lo winilye kintinip deiamik. Tonda atonun, sirik tam babye, lo winilye kintinip deiamik. Alo mitik noutam nirya ara, ‘Anyaik kalikin nang asukumuk tikinamakʼ tenen, kintinip deiamik. Amitik lo yuk-yuk bukni, tonok-tonok kiklipdeyukura, kalikin nang tikinak el pala ara, tonok pina arye kiklipdeyukura, 3.12 meter kibuk. Atonun, kalikin nang tikinak anirye dipdongobuka, aik pum tam otam cang ara, tonok pina arye, kiklipdeyukura, 3.12 meter kibuk. Tonda, ‘Akalikin nang tikinamikak ara, lo yuk-yuk upnamleʼ tenen, alo-alo noutam wililona ati, deibuka dobik abilinga, kiklipdeyukura, abilinga nirya ara, anerye otam bana ati, el pala ara, 2.7 meter ubuk. Tonda, anyasik otam bana ati, memepdeiamik mitik bisik, el si ara lorong, el cang ara (panjang), tonok pina arye kiklipdeyukura, 3.12 meter ubuk. Asukum arye bai tam lakdeiamik atolonga domik ning ara, el pala ara, tonok pina arye kiklipdeyukura, 3.12 meter kibuk. Atolonga deice tiknumurye odinmanumuba, Allah el si eren aik dam otam ara, pala weik lo uamuk tuku eipnumu.

^8-9 Anye bira, anyaik bai tam bukni, bisik bublan pala weik keil deice arye deibuka domikak arye, dipdongobuka, Allah el si eren aik otam eipnumu. Abisik bublan sekelin keil pala ara, pina arye kiklipdeyukura, el cang ara, dumbarye (4) meter kibuk. Abisik bublan sekelin keil pala deice arye deibuka domikak dana-dana tam ara, abilinga ton memepdeibikce domik. Abilinga bitinye ara, pina arye kiklipdeyukura, el bukam ara, tonok meter uk ubuk. Atolong domika deice ninye buknarye dilamikak, Allah el si eren aik otam dinmanba, anyaik dam ara, lo weik uamuk.

¹⁰ Bai tam antanap dongobuka domik keil poka noutam bukni, keting panalyangan tam arye, boteiamik bisik bublan noutam domik cang keil aik pum tam ara, anyaik kalikin nang tiklamikak ara, mitik lo kwanim tam, winilye domika atonun, sirik tam winilye yuk-yuk memepdeibikce domik. Amitik lo nirya ara, tekbarye domik. Amitik lo memepdeibuka domikak ara, sik pala ap (lebar), sik cang ap ara (panjang), neiktoto kibuk. Tonda, amitik lo noutam arye deibuka domik abilinga, el cang ara, atonun kibuk. Ara, anerye otam bana ati, el cang ara, 2.7 meter kibuk.

¹¹ Winibukopura, anye birye acang keil aik domikce noutam arye, otam bana ati memepdeiamik mitik bisik, el si lorong ara, pina arye kiklipdeyukura, el pala ara (lebar), tekbarye, tonda mitik tonun noutam ton ubuka ati, el pala ara, (6.5) meter ubuk. Tonda, anyaik pum tam arye, bai ban bisik ati ara, pina arye kiklipdeyukura, anerye otam bana ati, el cang ara, 5 meter panjang kibuk.

¹² ‘Malye nang arye, Allah el si eren aik talye mangkau wekicakʼ tenen, kalikina ati mitik lo memepdeibikce, domik ning nirya ara, sik lebar ap, panjang ap ara, atonun 3.12 meter kibuk. Ati, amitik lo nirya ara, 3.12 kali 3.12 meter kibuk. Tonda, akalikin nang tikinamikak urasin tam ara, sikce memepdeibuka domik abilinga, bumang kibuka domik. Amitik abilinga, tukwak utam arye dipdongobuka eitam el cang ara, (tinggi) pina arye kiklipdeyukura, setengah meter uk kibuk. Tonda, el bukam babye (tebal) setengah meter uk kibuk.

^13-15 Tonda, anye bira, bai tam arye, Allah el si erena ati aik dam wekelbana ati, bisik bublan cang keil arye deibuka, domik aik el si ara, gapura, aning nirya pina arye deibuka kiklipdeyuk. Anyaik arye otam pala nirya ara, pina arye deibuka kiklipdeyukura, el pala ara, (lebar) dua belas setengah (12.5) meter ubuk. Aning kiklipdeyukopura, anye adiparyuk, acang keil aik noutam, ninye arye balamik bisik, el olyanibuka, owekelban tam, el cang nirya ara, pina arye deibuka kiklipdeyukura, sepuluh (10) meter kibuk. Tonda, acang keil arye deibuka domik aik, bai tam bisik bublan wekelyangan bisik arye dipdongobuka, anyaik noutam ap, anirye dipdongobuka otam atolonga dam, pina arye deibuka kiklipdeyukura, el cang ara, 25 meter kibuk. Anyaik atolonga ara, Allah el si eren aik dam bai tam, lo tuba weik tonun batakamikba uamuk. Alo uamuk ning ara, atolonga noutam mitik tonun wekuk. Tonda, anye birye, alo uamuk aik dam wekelban bisik bublan dana-dana tam ara, cang keil arye deibuka domik abilinga ning ara, tukwak arye dipdongobuka eitam ara, pina arye deibuka kiklipdeyukura, abilinga bitinye ara, el utam arye, dipdongobuka eitam, el cang ara, tiga puluh (30) meter kibuk. Tonda, sirya ara, acang keil arye deibuka domik aik, el si gapura, wekelyangan bisik arye dipdongobuka, pera otam anyaik bai tam lo weik batakamika dam ara, pina arye deibuka kiklipdeyukura, anerye otam cang ara, (panjang) dua puluh lima (25) meter kibuk. Ati, bai tam keil poka dam arye dipdongobuka, acang keil arye deibuka domik aik, el si gapura, anyaik noutam kalikina ati domikce, lo mitik tonun batakamika nirya ap, ninye bisik balamikak ap, anirye dipdongobuka otam, Allah el si erena ati aik dam bukni, lo weik batakamika dam, noutam nirya ara, pina arye deibuka kiklipdeyukura, el cang nirya ara, 25 meter kibuk.

¹⁶ Acang keil arye deibuka, domik aik noutam ara, kalikin nang tiklamikak ara, lo mitik tonun kwanim tam winilye, tonda atonun sirik tam winilye yuk-yuk memepdeibikce domik. Alo mitik tonun nirya ara, empat segi 3.12 meter kali 3.12 meter kibuk. Alo mitik tonun, abilinga piamika eitam ara, bai tam dina ati, mitik tonun kin-kin ton botopdeibik ning ara, el si ara jendela ton, botopdeiamik. Ajendela kin-kin tirikilongona ati, mitik bublan ton memepdeiamikce, tirikilongolamik. Tonda, kalikin nang tikna ati, lo mitik tonun yuk-yuk kintinip deiamikak bukni, anoutam memepdeibuka domik abilinga nirya ara, abilinga taram deice ara, yo si komora ap, tonda el si kelapa yo urasin atonun memebuka domik. Ati, acang keil arye deibuka domik aik, el si gapura aik pum tam, abilinga nirya ara, urasin teleb yo, el si ara korma yo, tonda kelapa yo nyalamak ning, urasin atonun ning memepdeibuka domikba, el urasin pia teleb uamuk.

Allah el si eren aik otam arye atam, bai tam lo weik batakamik sukum, kub-kubak uamuk ning ati, lak nyabuk yupu

¹⁷ Aning-aning nirya akunum kiklibukce, atalak ara, anye birye, acang keil arye deibuka domik aik batakuka, bai tam bobinuka deipnuke. Ara, Allah el si eren aik dam bukni, bai tam lo weik batakamika eilina ati, bobinuka deipnuke. Allah el si eren aik dam bukni, bai tam dana-dana nirya ara, pala keil poka antanap dongobuka domika kup-kup ak nirya ara, mitik aik ton weik tonun domik ning eipse. Anyaik urasin tam ara, pia lo weik batakamikba uamuk. Alo otam ara, Allah el si eren aik uamuk. Amitik aik weik tonun, yuk-yuk wilibuka domik ning ara, yupa weik 30 aik ubuk. Anyaik domika urasin tam ara, ‘Tuku sung-sunga palipsilyakʼ tenen, ninye banamikak ati, keil pala arye tuku deice yangapdeiamikba, akeil deice ara, amsuna tokamne atouk uamukak eipse.

¹⁸ Winyamika ati, Allah el si eren aik dana-dana tam nirya, keil poka antanap dongobuka domik bukni, mitik aik weik domik ning urasin tam ara, ninye ban sukum ati, pala keil memebuka yangapdeibik ning eipse. Akeil amsuna tokamne atonun uamukba eipse ning, el pala ara (lebar), cang keil arye deibuka domik aik, lo weik noutam uamuk touk, akeil pala yangapdeipnin balamika ani, asukum binuka deiamikba, neiktoto uamuk. Aning ton eipse. Akeil pala yangapdeiamikce, tukwak tam amsuna tokamne touk, uamuk ning el si ara, ‘lantai batu bawaʼ nyalamik.

¹⁹ Ninye bana ati, pala keil deiamik deice tiksirye otam dinmasiba, Allah el si eren aik ara, otam uamuk. Anyaik dana-dana tam babye, lo mitik tonun ton batakamika eipse. Alo mitik tonun uamuk kup-kup ak nirya ara, keil poka ton memebuka domikba eipse. Ninye bana ati, keil pala yangapdeiamika deice tikmasak ara, mitik tonun utam uamuk. Allah el si eren aik mening dam lo mitik tonun ton batakamikce, poka antanap dongobuka domik ning ara, mitik tonun erepdeiamikce, domika eipse. Allah el si eren aik dam, lo mitik tonun batakamika otam arye dipdongobuka, atam wekelban bisik dam domik gapura dam, anoutam lo nirya ati, anye birye, pina arye deibuka kiklipdeyuk ara, atam arye otam el cang ara, lima puluh (50) meter kibuk.

Allah el si eren aik dam wekelbana ati, bisik bublan, bai tam keil poka noutam botopdeiamik bukni, dabu tam (ara utara) uamuk ning ati, laka nyabuk yupu

²⁰ Allah el si eren aik bai tam bukni, dana-dana tam nirya, antanap dongobuka keil deibuka poka domik ning wekelbana ati, botopdeiamik bisik bublan bukni, dabu tam (arah utara) domikba uamuk ning babye, anye birye otam binuka, pina arye deibuka, kiklipdeyukura eipse. Awekelbana ati bisik bublan, el si gapura ton, cang weik keil arye deibuka domik aik eipse. Anye birye anyaik el pala ap, el cang ap ati, yuk-yuk kiklipdeyuk.

²¹ Acang keil arye deibuka domik aik ara, Allah el si eren aik bai tam wekelbana ati bisik bublan ara, lo weik batakamikba, dabu tam uamuk ning ara eipse. Aning eipse touk, keting panalyangan tam uamukba eipse ning urasin atonun ubuk. Winibuka ati, acang keil arye deibuka, domik aik pum tam ara, anyaik kalikin nang tikinak ati, lo mitik tonun kintinip deiamika ara, atonun dana-dana tam winilye kibika ati, aning nirya ara, pinbarye uamukba eipse. Tonda, alo mitik tonun nirya ara, atonun empat segi 3.12 meter kali 3.12 meter kibuk. Alo mitik tonun pinbarye bukni, alo-alo noutam wililona ati, deibuka domik abilinga ati kiklipdeyukura, abilinga nirya arye ubuka otam bana ati, el pala ara, 2.7 meter kibuk. Tonda, alo mitik tonun dana-dana tam uamukba, anoutam ninye bana ati, mitik bisik botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala lebar ara, dua belas setengah (12.5) meter kibuk. Ara, otam keting panalyangan tam, cang weik keil arye deibuka domik aik, bai tam arye wekelbana ati, bisik bublan botopdeiamikba uamuk touk, aning babye, dabu tam wekelbana ati, bisik bublan babye, atonun botopdeiamik.

²² Tonda, acang keil arye deibuka domik aik, dabu tam botopdeiamikba, uamuk noutam ara, otam keting panalyangan tam wekelbana ati, bisik bublan botopdeiamik noutam uamuk touk kibuk. Ati, sik kalikin nang tikinak ati, lo ap, alo kup-kup abilinga deice botopdeiamik jendela kin-kin ap, alo mitik tonun wililona ati, anoutam arye domik abilinga nirya ap, abilinga deice arye, korma yo, tonda, el si kelapa yo, urasin atonun memepdeiamik gambar nirya ap ara, urasin atonun uamukba eipse. Ara, dabu tam wekelban bisik bublan, cang weik keil arye deibuka domik aik ap, keting panalyangan tam arye, wekelbana ati botopdeiamikba, uamuk bisik bublan ap, sik kiklina ara, atouk kibuk. Tonda, awekelban bisik bublan welebana ati ara, el tekbarye morona domikce, kintinip deiamik ning eipse. Tonda, acang keil arye, deibuka domik aik akunum biyukopura, lo mitik tonun dana-dana tam uamuka anoutam ara, ninye bana ati, mitik bisik botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. Atonun, dabu tam (arah utara) uamuk ning ara, keting panalyangan tam akunum eipmase ning, el kiklina nirya ara, atouk uamuk. Ati, el cang ara, 25 meter ubuk. El pala (lebar) ara, 12,5 meter kibuk.

²³ Tonda, dabu tam cang keil arye, deibuka domik aik noutam arye kirikuka, bai tam obinmase talak ara, Allah el si eren aik otam uamukba, atam noutam ara, anyaik dam lo weik ton batakamikba, awamuk ning eipse. Tonda, dabu tam bukni, bai tam arye wekelbana ati, bisik bublan arye dipdongobuka, otam Allah el si eren aik dam wekelbana ati, bisik bublan ton domik ning awamukba, anye birye, ‘Anoutam lo weik nirya ara, yata barye meter ubuk do?’ tenen, pina arye deibuka kiklipdeyukura, keting panalyangan tam, lo atonun ubuka ati, el aning cang ara, lima puluh (50) meter panjang kibuk.

Allah el si eren aik dam wekelbana ati, bisik bublan, bai tam keil poka noutam botopdeiamik bukni, iknapnye tam (ara selatan) uamuk ning ati, laka nyabuk yupu

²⁴ Aning nirya akunum eipsopura, anye birye, na bobinuka, Allah el si eren aik dam wekelbana ati, bisik bublan botopdeiamik bukni, iknapnye tam (arah selatan) tam bublan tamuk, bobinuka deipnukba, aning ton eipse. Allah el si eren aik dam, lo weik batakamika dam wekelbana ati, bisik bublan botopdeiamikce, cang weik keil aik domik ning eipse. Anye birye aning ton, pina arye deibuka kiklipdeyukura, eipse. Aning babye, otam keting panalyangan tam bisik bublan babye, tonda, dabu tam bisik bublan babye uamuk touk, aning babye, iknapnye tam babye, el kiklilena nirya ara, atonun dem kibuk. Ati ara, iknapnye tam wekelbana ati, bisik bublan cang keil arye, deibuka domik aik pum tam ara, anyaik kalikin nang tikinak ati lo ara, mitik tonun, dana-dana tam winilye memepdeibika ati, aning nirya ara, pinbarye uamukba eipse. Tonda, alo mitik tonun nirya ara, atonun empat segi 3.12 meter kali 3.12 meter kibuk. Alo mitik tonun pinbarye bukni, alo-alo noutam wililona ati, deibuka dobik abilinga kiklipdeyukura, abilinga nirya ara, anyapce otam bana ati, el pala ara, 2.7 meter kibuk. Tonda, alo mitik tonun dana-dana tam uamuk anoutam, ninye bisik bana ati bisik mitik tonun botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belah setengah (12.5) meter kibuk.

²⁵ Tonda, sik kalikin nang tikinamika ati lo ap, alo kup-kup abilinga deice botopdeiamik jendela kikin ap, alo mitik tonun wililona ati, anoutam arye domik abilinga nirya ap, abilinga deice korma yo, tonda, el si kelapa yo urasin atonun memepdeiamik gambar nirya ap ara, urasin atonun uamukba eipse. Tonda, alo mitik tonun dana-dana tam uamuk noutam ninye bisik bana ati, mitik bisik botopdeiamik ning, el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belah setengah (12.5) meter kibuk. Ati, keting panalyangan tam babye, dabu tam babye, iknapnye tam babye, sik kiklilena nirya ap, urasin nirya ara, atouk uamukba eipse.

²⁶ Awekelban bisik bublan, iknapnye tam cang keil arye deibuka domik aik uamuk ning babye, el wekelbana ati morona ara, tekbarye memepdeiamikce domik ning ton eipse. Tonda, anyaik akunum bise talak ara, anyaik noutam lo weik ton uamukba eipse. Acang keil arye deibuka domik aik noutam babye, sik kalikin nang tikinak lo mitik tonun ap, alo kup-kup abilinga deice botopdeiamik jendela bisik ap, alo mitik tonun wililona ati, anoutam arye domik abilinga nirya ap, abilinga deice ara, korma yo, tonda, el si kelapa yo urasin atonun memepdeiamik gambar nirya ara, yuk-yuk ara cang keil arye, deibuka domik aik pum tam urasin uamuk touk, iknapnye tam ton atonun uamukba eipse. Tonda, alo mitik tonun dana-dana tam uamukba, anoutam ninye bisik bana ati, memepdeiamik bisik el si ara lorong, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belas setengah (12.5) meter kibuk. Ati, keting panalyangan tam botopdeiamik bisik bublan ap, dabu tam wekelbana ati botopdeiamik bisik bublan ap, cang weik keil arye deibuka domik aik ap, anoutam uamukak, ninye balamik sukum nirya ara, sik urasin ap, sik kiklilena ap ara, atouk ubuk.

²⁷ Tonda, iknapnye tam cang keil arye deibuka domik aik noutam arye kirikuka, bai tam obinmase talak ara, Allah el si eren aik otam uamukba, atam noutam ara, anyaik dam noutam mitik tonun lo ton awamukak eipse. Tonda, iknapnye tam (arah selatan) bukni, bai tam arye wekelbana ati, domikce botopdeiamik bisik bublan arye dipdongobuka, otam ara, Allah el si eren aik dam wekelbana ati domikce botopdeiamik bisik bublan ton awamukba, anye birye, ‘Anoutam lo nirya ara, yata wiribuka meter ulul do?’ tenen, pina arye deibuka kiklipdeyukura, alo bukni otam el cang ara lima puluh (50) meter panjang kibuk. Ati ara, bai tam arye wekelbana ati domikce botopdeiamik bublan kirikuka, otam arye dipdongobuka, Allah el si eren aik dam, alo noutam ara, keting panalyangan tam lo uamuk ning ap, dabu tam lo uamuk ning ap, iknapnye tam lo uamuk ning nirya ara, el kiklilen ning ara, neik touk kibuk.

Allah el si eren aik dam, mitik tonun lo weik batakamik ning, wekelban bisik ati, laka nyabuk yupu

²⁸ Aning nirya akunum winibukopura, anye birye lengdar mapmasa deice arye, na bobinuka, Allah el si eren aik dam bobinuka deipnukba, aning ton eipse. Asukum ara, Allah el si eren aik mening dam bana ati, yuk tam bisik arye ubuka, wekelbana ati domikce, bublan ton botopdeiamik bisik memebuka botopdeiamik ning eipse. Awekelbana ati bisik bublan ara, cang keil arye deibuka domik aik ara, iknapnye tam (arah selatan) wekelban bisik bublan ati, pina arye deibuka kiklipdeyukura, el cang ap, el pala ap ara, otam bublan wekelban bisik nirya kiklipmok meter atouk kibuk.

²⁹ Ati, Allah el si eren aik mening dam wekelban bisik bublan ati, cang weik keil arye deibuka domik aik, iknapnye tam (arah selatan) babye, yuk-yuk tam uamuk touk kibuk. Ati, sik kalikin nang tikinak lo mitik tonun domik ning ap, alo kup-kup abilinga deice botopdeiamik jendela bisik ap, alo mitik tonun wililona ati, anuotam arye domik abilinga nirya ap, abilinga deice korma yo, tonda, el si kelapa yo urasin atonun memepdeiamik gambar nirya ara, urasin atonun uamukba eipse. Tonda, alo mitik tonun dana-dana tam uamuk anoutam ninye bisik bana ati, mitik tonun bisik botopdeiamik ning, el si ara lorong, uamukba eipse. Awekelban bisik bublan ati, cang weik keil arye deibuka domik aik, iknapnye tam (arah selatan) babye, el cang ara (panjang), pina arye deibuka kiklipdeyukura, dua puluh lima (25) meter kibuk. El pala ara, dua belas setengah (12.5) meter kibuk. Ati, bai tam arye otam aik wekelyangan bisik bublan bukni, keting panalyangan tam babye, dabu tam babye, iknapnye tam babye, tonda Allah el si eren aik mening dam bukni, iknapye tam babye, el kiklilena ap, el urasin ap ara, atouk kibuk. Tonda, anyaik bai tam abilinga bukni, dana-dana noutam nirya ara, abilinga kin-kin weik uamukba eipse. Aning ara mitik tonun jendela bisik atonun uamuk. Ati, awekelyangan bisik bublan, cang weik keil arye deibuka domik aik, dana-dana tam aik nirya ara, sik kiklilena ap, urasin nirya ara, neik touk uamukak eipse.

³⁰ Bukni, iknapnye tam uamuk ning ara, anyaik bai tam bukni, dana-dana tam nirya ara, mitik tonun atolonga atonun ning ap, tonda imam-imam nang arye din dina ati, mitik aik ap, kintinibuka domik ning eipse. Amitik aik nirya ara, Allah el si eren aik wekelban bisik bublan mening dam bukni, bai tam lo batakamika lilun ara, poka domikce, amitik aik domik. Anye birye anyaik pina arye deibuka kiklipdeyukura, anyaik dam atolonga ara, anyapce ubuka otam pala ara, tiga belas (13) meter kibuk. El cang ara, dua setengah (2.5) meter kibuk.

³¹ Allah el si eren aik mening tam wekelban bisik ati, cang keil arye deibuka domik aik, el urasin tam ara, iknapnye tam bukni, bai tam wekelban bisik ara, lo weik batakamik tam urasin deibuka domik. Acang keil arye deibuka domik aik wekelban bisik ap, tuba tamubuka bai tam lo batakamik noutam bisik ap, abisik bublan dam atam ap, otam ap, dana-dana tam ara, urasin teleb abilinga ton pibuka domik. Abilinga taram deice ara, yo si korma yo urasin atonun gambar memepdeiamik ning ara eipse. Tonda, awekelban bisik bublan dam welebana ati ara, el pinbarye (8) morona memebuka kintinip deiamik ning eipse.

^32-33 Ura, Allah el si eren aik mening dam wekelban bisik bukni, keting panalyangan tam babye, sikce cang weik keil arye deibuka domik aik, yuk-yuk dana-dana tam nirya ara, keting panalyangan tam urasin atouk kibuka domik. Ati, sik kalikin nang tikinak ati, lo mitik tonun memebuka domik ning ap, alo kup-kup abilinga deice botopdeiamik jendela bisik ap, alo mitik tonun wililona ati, anuotam arye domik abilinga nirya ap, abilinga taram deice ara, korma yo, tonda, el si kelapa yo, urasin atonun memepdeiamik gambar nirya ara, urasin atouk uamukba eipse. Tonda, alo mitik tonun dana-dana tam uamukba, anoutam ninye bana ati, mitik tonun mitik bisik el si ara lorong, kintinip deiamik ning ara, anye birye bopmuk pina arye deibuka kiklipdeyukura, el cang ara, dua puluh lima (25) meter panjang kibuk. El pala ara, dua belas setengah (12.5) meter kibuk. Ara, akeil cang arye deibuka domik aik, el nong nirya, el cang ap, pala ap uamuk touk, abisik mitik tonun babye atonun kibuk. Ati, Allah el si eren aik mening dam bukni, bai tam arye aik tam wekelyangan bisik bublan, keting panalyangan tam ara, asum eipmase cang keil arye, deibuka domik aik nirya ara, sik kiklilena ukuran ap, urasin nirya ara, pia neik touk uamukak eipse.

³⁴ Akeil cang arye deibuka domik aik ara, ninye dikdik sena ati, el si ara atolonga nyanyak ning ara, el tikilbana ati, bisik bublan dam bukni, urasin tam ara, bai tam lo weik batakamik tamuk botopdeiamik. Winyamikce, atolonga tikna ati, bisik bublan dam dana-dana tam pibuka domik abilinga, taram deice ara, korma nyalamak yo atam ap, otam ap gambar memebuka diamik. Tonda, bai tam arye, awekelban bisik bublan pum tam welebana ati ara, el pinbarye (8) morona memebuka kintinip deiamik ning eipse. Awekelbana ati bisik botopdeiamik bublan urasin tam ara, keting kumulban tam bukni, Allah si eren aik otam ubukba, atam ara abublan botopdeibik ning eipse.

³⁵ Winibukopura, na lengdar mapmasa deice arye, anye birye na bobinuka, Allah el si eren aik dam wekelbana ati, dabu tam (arah utara) bublan botopdeiamik tam bobinuka deipnuke. Akeil cang arye deibuka domik aik wekelbana ati bisik bublan botopdeiamik bisik babye, otam keting panalyangan tam bisik bublan babye, tonda, keting kumulban tam bisik bublan babye, iknapnye tam botopdeiamik bisik bublan babye, sik kiklilena ap, sik urasin nirya ara, atouk ubukba eipse. Ati ara, dabu tam (arah utara) wekelbana ati bisik bublan botopdeiamikce, keil cang arye deibuka domik aik pum tam ara, anyaik kalikin nang tikinak ati lo ara mitik tonun, kwanim tam winilye memepdeiamik touk, otam sirik tam babye lo winilye memepdeibika ati, aning nirya ara, lo mitik tonun pinbarye uamukba eipse.

³⁶ Tonda, alo mitik tonun nirya ara, atonun empat segi 3.12 meter kali 3.12 meter kibuk. Alo mitik tonun pinbarye bukni, alo-alo noutam wililona ati deibuka, dobik abilinga kiklipdeyukura, abilinga nirya ara, anerye otam bana ati, el pala ara, 2.7 meter kibuk. Tonda, alo mitik tonun dana-dana tam uamuk anoutam ninye bana ati, mitik tonun mitik bisik botopdeiamik ning, el si ara lorong, el cang ara, pina arye deibuka kiklipdeyukura, panjang sepuluh (10) meter kibuk. Tonda, ninye wekelbana ati, bisik bublan el si ara gapura, keil cang arye deibuka domik aik nong nirya ara, atam arye dipdongobuka, otam kup-kup ak pina arye deibuka, kiklipdeyukura, el cang ara, panjang dua puluh lima (25) meter kibuk. El pala ara, dua belas setengah (12.5) meter kibuk.

³⁷ Awekelbana ati bisik bublan, el si ara gapura ara, keil cang arye deibuka domik aik, siryak ninye dikdik senak, el si ara balai nyalamak aik, el bublan botopdeiamik ning ara, Allah el si eren aik dam bukni, bai tam lo weik batakamik tam uk kiamik. Tonda, anyaik bai tam atolonga domikce, el dana-dana tam abilinga pibuka domik ning taram deice ara, yo si korma gambar memamikce, puturubuka deiamik. Aning ara, atam ap, otam ap atonun abilinga pibuka domik. Tonda, awekelban bisik bublan dam welebana ati ara, el pinbarye (8) morona memebuka kintinip deiamik ning eipse.

Allah el si eren aik dam bukni, kam ning opnarye, uku dongon ning kintinilina ati, el si ara mesba, bai tam domik ning ati, nyabuk yupu

³⁸ Awekelbana ati bisik bublan, el si ara, gapura, cang keil arye deibuka domik aik, el bai tam bisik, atolonga dam ara, mitikto aik ton wilibuka domik ning dinmasiba, anyaik atolonga ap, balai nyalamak aik ap, bisik bublan botopdeiamikak eipse. Amitik aik domik ning deiyok, ara, Allah el si erena ati, ‘Ining ning opnarye, aning tup kalebuka, uku dongopnamakʼ tenen, atup mek likdeipnarye, memebuka deiamikakuk eipse.

³⁹ Anyaik bublan dam bukni, atolonga kintinip deiamikak ara, Allah ati teleb aren ning deilinak, el si ara meja dumbarye eipse. Abublan dam welebise talak ara, aik pum tam bukni, kwanim tam ap, tonda sirik tam ap ara, meja bitinye-bitinye nukukabikce, dobuka deiamik ning eipse. Atonun ton, abublan dam bukni, bai tam babye, atam ap, otam ap, yuk meja ton bitinye-bitinye nukukabikce, dumbarye dobuka deiamik ning eipse. Ameja nirya ara, bai tam dumbarye, aik bublan dam bukni, aik pum tam ara, dumbarye ton deiamik, ning nirya ara, pinbarye uamukba eipse. Ura, ameja dobuka deiamika deiyok, ara ani. Ton ning ara, sik Israel nang arye, ‘Allah ara, nun malye winin ning kilipsilirye, aning nirya kum kipdeipnamsilʼ tenen, Allah ati aren ning dobuka, imam nang ati arepniba, anang arye, kam ning opnarye, ameja deice delina ati, pinbarye meja ara, memepdeiamik. Imam pil dona deiyok nang arye, Allah arena ati, pil winilye dolamik. Tonok ning ara, sik Israel yala nang ara, moubuka tenina kumce, mangkau kanye bobuka, malye winilamik ning ara, ‘Allah arye namin kipsilirye, tuba tonap teleb kipdeipsutuʼ tenen, kam ning opnarye arelamik. Bitinye ning ara, sik Israel yala nang ara, ‘Nun akunum teninyap bukni, mandipna kanye bobuka, malye wininyap ning ara, tuba tamubuka, ‘Se, nunce dipkoprob malye ubupuʼ tenen, ikin kanye bobuka, ‘Allah arye namin kipsilirye, nun malye winin ning ap, ikin kanye bon ning nirya ara, kum kipdeipsutuʼ tenen arye, kam ning opnarye, Allah ati arelamik.

⁴⁰ Ati ara, meja-meja nirya ara, pinbarye memebuka deiamik. Ara, anyaik bai tam bukni, atolonga deice welebuka banak ara, meja dumbarye memebuka, kintinip deiamik ning eipse. Atonun bukni, anyaik atolonga deice tam bukni, aik wekelban bisik lilun tam ara, meja dumbarye ton memebuka deiamik ning eipse. Bai tam babye, asik pum tam babye, ameja ara, kwanim tam bitinye, tonda, sirik tam bitinye memebuka deiamik ning eipse.

⁴¹ Ati, anyaik bublan wekel banak babye, kwanim tam meja dumbarye memebuka deiamik touk, otam sirik tam babye, meja dumbarye ton memebuka deiamik. Anirya ara, pinbarye memebuka deiamikak eipse. Ara, Allah aren ning opnarye, boyanuka arepne ning delina ati, meja pinbarye memebuka deiamik ning eipse.

⁴² Tonda, amining dam ton, meja dumbarye ton memebuka deiamik. Ameja dumbarye ara, kat keil dobuka, besi ning, el si ara betel, ato ning arye, akeil sekikce, meja memebuka deibik. Adumbarye keil meja deice ara, Allah el arena ati, kam ning obuka boyanarye, aning tup sekuka kintinipnarye, ameja deice delilamik. Ton ning ara, Allah el si erebuka kina ati, uku dongolamikba, uku arye aning nirya dipnarye, sice bultaklamuk. Ton kam ning ara, Allah ati arelamik bukni, el si erelamikba, sik imam-imam pil dona deiyok nang arye, aning dobuka dilamik. Ameja dumbarye yuk-yuk bukni, nirya ara, utam arye dipdongobuka eitam el cang ara, 80 sentimeter tinggi kiamuk. Tonda, ameja dumbarye, anerye ubuka, otam el pala ara, 53 sentimeter lebar kiamuk. Aning memebuka deiamika ara, Allah el si erena ati, ining ning ngang kotokuka, tup kalebuka dopropnarye, dan ning nirya delinak ati, ameja ara memepdeiamik. Tonda, ameja dumbarye eitam ara, kam ning ona ati alat-alat nirya ara, lelebuka delilamik. Ara, topnong ap, parang ya ap, karpu ap, ato ning dobuka, ameja dumbarye deice delilamik.

⁴³ Tonda, anyaik pum tam ara, abilinga taram nirya antanap dongobuka kat tace ning, el urup ara bitinye kibuka kintinip deiamika deice ara, domba basam opnarye, tup dobuka lalkwetelamik. Atace ning el cang ara, taruk tatang el pala ulamle touk, kiklibuka dolamik. Atace ning, el panjang cang ara, 8 sentimeter kiamuk. Tonda ameja nirya eitam ara, Allah el si erena ap, morona ap ati, Allah ati arelamik kam ning opnarye, aning nong dobuka, tia talak ati, ameja deice delilamik.

⁴⁴ Atalak ara, nara anye birye bobinuka, Allah el si eren aik wekelban bisik ati, cang keil arye deibuka domik aik noutam, kirikuka binumurye otam binuka deipnuke. Ara, Allah el si erena ati, aik mening dam bukni, lo mitik tonun, batakamik noutam bobinukce deipnuke. Asukum ara, cang keil arye deibuka domik aik lilun ara, mitikto aik bitinye wilibuka domik ning ton eipse. Tonok aik ara, dabu tam cang weik bisik wekelbalamik bisik bublan dam, dana-dana tam domik aik, el urasin ara, iknapnye tam (arah selatan) kiamik ning eipse. Bitinye aik ara, keting panalyangan tam, cang weik wekelbalamik bisik bublan dam bukni, anyaik el urasin ara, dabu tam (arah utara) domik aik awamukak, eipse.

⁴⁵ Anye birye, nati nyapnuk. “Anyaik bitinye wilibuka domik ning, deiyok ara ani. Tonok aik, el urasin iknapnye tam (arah selatan) kipdeibik ning ara, sik imam-imam nang kan-kan bukni, Allah el si eren aik, talibikirye, ‘Anyaik pil dona deiyok nang unamakʼ tenen dobik.

⁴⁶ Tonda, otam wilibuka domik aik, el urasin ara, dobuka dabu tam (arah utara) kipdeibikce domik ning ara, sik imam-imam nang kan-kan bukni, sikda Allah ati aren ning, kam ning opnarye, uku sekuka dongolamakak, aning el si ara mesba, aning talibuka, pil dona deiyok nang unyaka ati, ‘Sikda anyaik unamakʼ tenen, domik. Sik imam-imam nang nirya ara, Lewi yala nang kan-kan bukni, ninye si Sadok, el yala nanguk unyake. Ara, Sadok birye deiamukba, dadeipdanin yangalamika ani, deiamik yala nanguk unyake. Ati, sik Sadok yala nang aryuk, Allah dam bitingce, Allah el si eren aik pum tam ap, anyaik dam nirya ara, sik amambul pil talina deiyok nanguk unyake. Yuk Lewi yala nang nirya ara, apil pia kum taliptinge. Tonda, Lewi yala nang, yuk nang nirya ara, Allah el si eren aik pum tam ap, anyaik dam ara, pia kum yatinge. Sadok el yala nang koproba uk yatinge.

⁴⁷ Aning akunum eipsopura, anye birye Allah el si eren aik mening dam, lo mitik tonun batakamika ati, ‘Yata barye meter kibuk do?’ tenen, pina arye deibuka kiklipdeyuk. Kiklipdeyukura, anyaik dana-dana tam nirya, lo uamukak ara, atometer dem kibuk. Ara empat segi atonun ubuka ati, pina arye deibuka kiklipdeyukura, atam nirya ara, anyapce ubuka, otam lebar ara, 53 meter kibuk. Atonun atam nirya, el cang ara, atouk 53 meter kibuk. Tonda, Allah el si erena ap, el morona ap ati, kam ning opnarye, uku dongolamikak ara, anyaik urasin tam memepdeiamikce, domik ning eipse.

Allah el si eren aik ara, Pia Teleb Lek Aik domika ati, nyabuk yupu

⁴⁸ Winibuka na lengdar mapmasa deice arye, anye birye, na nong bobukapnukce, Allah el si eren aik pum bukni, bublan wekelyangalamik bisik, min yuma uamuk aik noutam boyanuka deipnuke. Winibukopura, anyaik wekelbana ati, bisik bublan dana-dana tam pibuka domik abilinga, ‘El bukam tebal ara, yata barye meter ubuk do?’ tenen, pina arye deibuka kiklipdeyuk. Ara kwanim tam ap, sirik tam ap domik abilinga ati, kiklipdeyukura, el bukam tebal ara, dua setengah meter atonun (2.6) kibuk. Tonda, abisik bublan wekenak nirya dipdongobuka, otam kiklipdeyukura, aning el pala ara, lebar 7 meter kibuk. Tonda, abisik bublan wekenak, el dana-dana tam domik abilinga bukni, wekuka otam banak ati, sirik tam ara, pina arye deibuka kiklipdeyukura, abilinga bitinye yuk-yuk bukni, el panjang cang ara 1.3 meter kibuk.

⁴⁹ Allah el si eren aik domik ning, wekelban bisik dam, atolonga domik ning kiklipdeyukura, atam arye dipdongobuka, otam el pala ara, 10.6 meter lebar kibuk. Tonda, anyaik wekelban bisik dam bukni, atolonga atam arye, dipdongobuka otam kiklipdeyukura, el cang ara, 6 meter kibuk. Tonda, anyaik atolonga welebana ati ara, el takubarye (10) moryamikce, kintinip deiamik ning eipse. Tonda, ninye tukwak arye asukum welebuka, anyaik wekelbana ati, bisik dana-dana tam ara, cang weik ayukumna bitinye ikuka domik. Ton ayukumna ara atam, ton ikamik ton ning ara, otam ikuka domik.