Yehezkiel 4 - Eipomek

Yehezkiel bira, yu nang arye, Yerusalem mutuku noutam warikuka uluplopnamika ati, sekuk yupu

¹ Allah arye Yehezkiel biti, lengdar mabuka deice arye nyabuk. Allah arye nyabuk yupu ara, ani. “Se anda ninye koprop aryuk, deipkiknye ulyame. Anda tuku arye memelamak keil tonok dopropmince, an urasin tam deipnulyame. Tonda, winipminyopura, Yerusalem mutuku weik asik dolamik ning, urasin aupmalye touk, akeil urasin deice, gambar puturupdeipnulyame.

² Winipminyopura, Yerusalem mutuku weik asik dolamik sukum ara, yuk mutuku yu nang arye yanuka, warikuka olyanamake ati, Yerusalem mutuku nirya, dana-dana tam aknapdongobuka wareknamake. Ati, sik yin talin nang, urasin atonun puturubuka, akeil deice deipnulyame. Tonda, Yerusalem mutuku dana-dana tam domik cang keil poka dam, tuku weik tonun arye palibuka bukdeipnamlyame. Sik yin talin nang arye, atuku deice welebikirye, apoka deice tam bisibuka koulukikirye, Yerusalem mutuku wariknamak ning ati nyapne. Tonda, sik yanamak yin nang arye, tia ati dopnamak tenda aik urasin ato ning ap, anamin keil urasin deice, gambar sekuka deipnamlame. Tonda, Yerusalem mutuku keil poka bublan pakuka uluplopnamaka ati, cang kat yo kintinip deipnamak ning ap, urasin atonun puturubuka, akeil deice seknulyame. Aning nirya ara, tuku arye memelamak keil urasin deice, puturubuka kintinipmince, deipnulyame.

³ Winipminye talak ara, anamin pata keil otam aupmalibuk, anda atam tuku deice mapminyopura, kat besi arye kintinip deibik pala weik makau, el si panci datar dobuka, anoutam arye tuku deice deipnulyame. Ara winipmanto ning, lak kina ati winipnalyame. Winipnalama deiyok ara, abesi arye kintinip deibik panci datar ara, weik besi poka atonun ulule. Anda atam arye tuku deice mapminyopura, otam upnamle besi panci ap, batu bata keil urasin deice kintinipnalam gambar ning ap, ance winipnalam ning ap, aning pia weik tonun arye “Warikuka dinamlume. Aning winibuka winipnamlama deiyok ara, ‘Sik Israel yala nang nirya moubuka tenebikirye, bikinamakʼ tenen, lak kilin ning atonun upnamle.

^4-5 Aning nirya winibuka deipminyopura, anda an nong kwanim tam kwalipdeipmince, tuku deice mapnulyame. Tuku deice mapminyopura, lak kilina kwang dakna ati, narye sik Israel nang arye, malye winilamik ning nirya, wenena ati ara, an deiceuk deipnamkine. Winibuka an taruk kwanim tam deice mapnalam talak ara, like yupa pia weik, tiga ratus sembilan puluh (390) sum deice arye, ance mapnalame. Tuku deice mapnalam deiyok ara, tonok sum deice arye winibuka mapnalam touk, keting tamun tonok upnamle. Ara, sik Israel yala nang arye, malye ulamikce ning wenena ati, 390 keting tamun deice arye, ikin ning dobuka, sik nong deice deilinamna ara, atonun upnamle. “Ati ara, narye Israel nang ati wenepnamne talak, 390 keting tamun atonun wenepnamne. Anda 390 sum noutam arye, tuku deice mapnalam talak ara, sik malye ulamice ning, an nong deice upnamle. Awinipnalam ning ara, ‘Sik biknamakʼ tenen, lak kina ati,’ ance winipnalame.”

⁶ “Aning nirya akunum winipnimnyopura, atonun bukni, an nong sirik tam tuku deice mapnulyame. Aning winipnalam ning deiyok ara, sik Yehuda yala nang arye, malye ulamice ning kwang dakna ati, winipnalame. Tuku deice mapnalam talak ara, yupa weik, 40 sum deice arye mapnalame. Ara, lak kilina ati, 40 sum deice arye, narye arepkine. An nong sirik tam, tuku deice mapnalama deiyok ara, ani. Ara, narye Yehuda yala nang arye, malye ulamice ning wenepnamne talak ara, 40 keting tamun upnamle. Aning atonun, anda 40 sum noutam nirya ara, tuku deice an sirik tam mapnamlame. Aning ara, lak kina ati, atalak ara, sik malye winilamice ning, an nong deice deipnamkine. Awinipnalam ning ara, ‘Yehuda yala nang arye, sik malye weik winilamik ning, moubuka kel biknamakʼ tenen, lak kina ati, ance tuku deice mapnalame.”

⁷ “Tuku arye, pinibuka memelamak keil deice, Yerusalem mutuku asik donyaka ara, yin talin nang arye wariknamak talak urasin atonun kibuka deipnamle. Ara, gambar kintinibuka deipnamak tam dinulyame. Winipminyopura, yin talin nang arye, ‘Ninye olbinuyap’ tenen, sik taruk deice, ongolamak ning nirya batakikirye, kintinilamak touk, an babye, an taruk deice ongolayam baju kwiribuka bataknalyame. Winipminyopura, narye sik amutuku nang nirya, sik wenena ati winipnamne ning ara, min kum winipmanye talak bukni anda, ‘Allah arye winibuka-winibuka wenepnamsileʼ nyabuka, lak nyapdeipnalame.”

⁸ “Ati anda dipkoprob akeil deice kintinipnalam ning ance dinmaminba, an nong atonun tamubuka taruk kwanim tam arye, aminyan ara sirik taruk tam mapnalam talak ara, narye tapu arye koupdongopnamkine. Winipkinyopura, ance kum tamuptume. Narye, ‘Atalak arye, yuk mutuku yin talin nang aik, Yerusalem mutuku wekuka antanap dongopnamak talak ara ani. Narye, ‘Sik Israel yala nang ap, Yehuda yala nang ap ati, wenepnamne talak ara,” akunum tenepse touk, asukumuk unamlame. ‘Atapu ara, narye kum lopnamne.”

⁹ “Keting tamun weik tonun asukumuk mapnalama anya arye, ance Na anyapnukin ning kintinip deipnalame. Ati wini talak ara adin ning kintinip deipnalame. Ara, gandum ap, jelai ap, kacang merah weik ning ap, tonda kacang merah mitik ning ap, gandum utotoa ning el si cawan ap, sekoi ap, kintinibuka, weik makau dongobuka deipnulyame. Winipmince, din ning patapnamkil talak, aning nirya ansinipmince dongobuka roti kwaning atonun ning dabuka dinalame. Adongobuka dapnalam roti kwaning ara, anda tuku deice mapnalam talak noutam, an taruk kwanim tam mapmince, 390 sum deice arye aninguk dabuka dinalame.”

¹⁰ “Tonok sum deice arye, aroti kwaning dana deiyok ning bokukapmince, dapnalam ning ara, mitik tonunuk 230 gram kintinibuka dapnalame. Akunum dapminyopura, asum-asum nirya ap tonda, ‘Aketing-aketing akunum uplyopura, dipnamne,’ tenepminye touk, ance 230 gramuk bokuka dinalame. Ton aning ara, aning arye deice tam ara, ton dobuka pia kum dinalame.”

¹¹ “An mek nirya babye, pia weik kume. Tonok sum noutam arye, mitik tonun 0.6 liter uk kwebuka dinalame.” Tonda sukunauk unamkile. Ati ara, ance, ‘Aketing-aketing akunum uplyopura, dipnamne,’ tenepminye touk, ance dobuka dinamlame.

¹² Ati ara, asum-asum nirya an tenepminye keting akunum uplyopura, yuk nang nirya dinmakicakuk, ninye arye dei yaplomice ning, akunum sesal lebuk ning dobuka, adeice arye uku sekmince, aning roti kwaning dapnalame. Ance memebuka danalam roti kwaning bun tonok, auku deice arye dapmince, aroti kwaninguk dobuka dinamlame. Roti kwaning koprop, el si jelai arye, dabuka dinamlam touk, aning dabuka dinamlame.”

¹³ “Winipnamlam ning nirya ara, sik Israel nang kel biknamakʼ tenen, lak kilina ati winipnamlam bukni, aning deiyok ara ani. Na Allah Yahweh arye, “Israel nang, anggunce aning ara dinamlum bukni, aning ara pia kum dinamlume. Aning ara, na pia lik ati, aning ara mem ning ulule. Ati, aning dipmunyopura, na dam ton yanuka, na si ton kum erepnutume nyapsise. Aning nyapsise bukni, aminyan talak narye Israel nang wenena ati, anggun mutuku koprop arye dopkwetepsiniba, yuk-yuk mutuku nang arye, anang tomobikirye, yuk pera mutuku bobinuka daunamak talak ara, sik Israel yala nang arye, amem ning atonun ning ton pia kum dinamake.” Allah arye, na Yeheskiel biti nyapnuk.

¹⁴ Allah arye na Yeheskiel biti nyapnukba, narye tamubuka nyapse. Ara, “Se, na ni koproba Allah Yahweh, anda aning-aning nirya deice tam erebuka, mikip weiknye ulyama ati, moropkine! Na nio, na pia mitik talak arye dipdongobuka, wini talak babye, narye malye una deice arye, malye kum kipdeipdase. Ara, kam ulye ning, talye dipmalye ning ap, tonda yuk yu kam ning, ninye arye weilamak kam ning oplobik ning ap ara, aning tup ap, el kalimna ap ara, pia kum dilamsirye, winibabye tuba kum dinune. Allaho, ance, ‘Aning nirya ara, pia kum dinamlume,’ nyamsulum ning ara, pia kum dilamse touk, tuba kum dinune.” Na Yeheskiel birye Allah ati, nyabuka moropse.

¹⁵ Nyapsopura, Allah arye nati nyapnuke, “Telebe, sapi basam, elce din dilamlirye, dei yalamle ning, akunum sesal lebuk ning dobuka, ance aning dobuka, uku sekmince, anyapmakin roti kwaning dabuka dinalame. Tonda, ninye arye yalamak dei sesal lebuk ning dobuka, uku seknamalyam dinin, aning ton dopmince dabuka, kum dinamlame,” nyapnuke.

¹⁶ Nyabukopura, elce ayupu ton nyapnuk “Anda ninye koprop arye deipkiknye ulyame. Narye Yerusalem mutuku nang dinamak din ning nirya ara, kum kipdeipnirye, sirya dakeipnamne. Winibuka akunum kum kipdeipniba, din yala aning-aning nirya ara, kum kipdeipnamne. Winipniba, sik din ning yala-yala nirya ara, sukdopnamle. Winipliba, sikce, “Se tenena ap, ikin una ap ukirye, sik din ap, mek ap nirya ara, kum kipdeipnamne.

¹⁷ Sik aninye nirya ara, din ning nirya ap, mek ap, kum danamle ning ati, sik nirya malye bol bobicopura, sik eipdakirye, ‘Se,’ tenen, ilil upliba, sik kanye talima nirya daksakliba, mambul kanye bobuka unamake. Bukni, winipnamaka deiyok ara, sik malye winilamik ning ap, tupa malye wininyak ning ap, adeice arye ikin ning, sik nong deice deipniba, sik dibuka sirya daknamake.