Yehezkiel 39 - Eipomek

Allah arye, “Mesek mutuku ap, Tubal mutuku ap, ninye deiyoknye Gog, opnamne,” nyabuk yupu

¹ Allah arye, na Yeheskiel biti nyapnuk. “Anda ninye sirika arye deipkiknye, Mesek mutuku ap, Tubal mutuku ati, ninye deiyok kibuka, taleamuknye, el si Gog biti, ‘Kanye imun ning an dam upnamkile,’ binuka laka nyapnulyame. Tonda, Allah, el si Yahweh, aning-aning nirya talibuka, deice tam erebuka, Pia Mikip Weik Ululnye birye, nyapkile. ‘Na Allah Yahweh, an onanye akunum winipkine. Anda, Mesek mutuku ap, Tubal mutuku ap ati, ninye deiyok kibuka, taleamlumnye bira, narye anti wenebuka opnamkine!

² Anda, ‘Winipnamne,’ teneplum bukni, na Allah arye, pil dopnamna deice arye, an teneplum ning batakmince, ‘Na tenepse ning winipnamnilamʼ tenen, tamubuka boyanamkine. Tonda anda, pia pera sukum, arah utara, dabu tam ulyam bukni, narye an boyakinirye, Israel nang unyak noutam bukuk mutuku-mutuku damuk boyanamkine. Deiyok ara, ance sik Israel nang ati olyanamlyame!

³ Winipnamlam bukni, Israel nang unyak amutuku noutam akunum yaminyopura, narye, ‘Anye bira, tuba ninye kum olbitueʼ tenen, an kwanim tam taruk opkiniba, an yin talipmaminye ning ara, yamubuka saknamkile. Tonda, narye an sirik taruk opkiniba, an mal bopmaminye ning nirya babye, yamubuka tuku deice saknamkile.

⁴ Gog an ap, an yin nang ap, anti melipnamkiyak nang ap, sik nirya ara, Israel mutuku dup noutam aryuk, obikiba dipnamlume. Dipmunyeba, anggun nong teleb kibuka kum weipnamsiyak bukni, ‘Anang ara, pia malye ulamikʼ tenen, tuku deice uk batakikiba, narye sik nong dobuka, lyupmalye ning tup dilamle maka yuk-yuk ning nirya ap, talye bai tam kam unyak ning nirya ap, sik deice deipnyeura, anggun nong nirya dipsikirye, sirya daknamsiyake.

⁵ Nara, Allah Yahweh, aning-aning nirya talibuka, deice tam erebuka, pia mikip weik ununye birye, ayupu akunum nyapdeipmakina ati, dipkoprob nong upnamlarya! An ap, an tam kipdopnamkiyak yin talen nang ap nirya ara, yuk nang arye anggunti opsikiba, tukwak saknamlume. Ara, ninye arye, wa wilamakak do, talye dauamlye tuku pala mutuku do, tuku deice uk sakuka pulbimunce, dipnamlume. Ninye arye kum weipnamsiyake.

⁶ Tonda sik mutuku koproba, el si Magog mutuku noutam ara, narye sik Magog mutuku ap, amutuku unyak nang ap, dabu tam weik laut mekwen lilun mutuku unyak nang nirya ara, sik deice, uku buk dinipdongopniba, amutuku-amutuku ap, aninye ap dipnamle. Sik amutuku unyak nang arye, ‘Nunda teleb aryuk, kanye deibuka, tunim abuka unyabe,’ tenenyak bukni, narye kanye imun ning arepnamne. Ati ara, winipnyeba, sik amutuku nang nirya arye, ‘Se, Allah Yahweh ara, eluk pia mikip weiknye ululeʼ tenen, kel biknamniake.

⁷ Tonda, Israel nang kan-kan noutam ara, na ap, na si ap ara, pia teleb, lek unun ning ara, laka kipdeipnamna deice arye, moubuka biknamniake. Minop talak, Israel nang malye ulamik deice arye, na ap, na si ap ati, malye kipdeipnik bukni, aminyan talak, Gog tam nirya akunum obuka sirya daknyopura, na ap, na lek si ap ara, ton ap malye kum kipdeipnamniyake. Aninguk kum bukni, winipnyeba, yata mutuku nang do nirya, sikce, ‘Se, Israel yala nang, sik si erenyak Allah, el si Yahweh ara, dipkoprob pia leknye ulule. El Yahweh ara, aning-aning nirya talibuka, deice tam erebuka, pia mikip weiknye ulule. El ap, sik Israel nang ap neika unyakeʼ tenen, na si moubuka biknamniake.

⁸ Ati nara Allah Yahweh, aning-aning nirya talibuka, deice tam erebuka, pia mikip weik ununye birye, ayupu akunum nyapsina ati, narye tenyamse ning ap, ‘Dotalak yanamle,’ nyapsise talak ap, na akunum nyapdeipse sum ara, dipkoprob dam akunum yanmal atia!

⁹ Narye Gog ap, el yin talen nang ap, sikti, melinamak nang ap nirya, akunum obuka sirya daknyopura, Israel mutuku noutam ara, ninye olana ton kum unamake. Atalak ara, Israel nang, sik dolamik asik unyakak arye ubuka, sik mutuku dana-dana tam nirya bukni, bai tam bikirye, mal olanmakirye bomikce ning yuk-yuk ning nirya, oplopsiba sik mal olan nang arye akunum batakmakce ning ara, tuku deice bulubuka deipnamake. Abulubuka deipnamak ninye on ning ara, ani. Ara, ninye on parang ya ap, yin ap, mal ap, ‘Ninye opsicakʼ tenen, nong leilin ning, el si cang perisai ap, mitik perisai ap, tonda ninye on kama ap, ninye on cang yo taice ap, aning nirya bulubuka, uku dongona ati bulubuka delilyanganamake. Aning ara, pia weik upnamla ati, tekbarye keting tamun deice arye, aning-aning bulubuka deibikirye, uku dongolyanganamaka atia.

¹⁰ Ati ara, sik Israel nang arye uku dongona ati yo ara, bai kum dolbinmake. Tonda, ‘Nun aik yo patapsilʼ tenen, yo kan-kan ton kum wepnamake. Tonda, sik wa win dam kum bol banamake. Sik mal olan nang arye, ninye ona ati bomikce ning nirya, pia weik aupnamla ati, Israel nang arye, aninguk bulubuka, deibikca deice aryuk, sik asik yo ati, uku donamake. Tonda, God mutuku nang ap, sik melilamik nang ap arye, Israel nang, sik ning nirya alubuka dololamik ning, ara Israel nang, sik bona nirya ubula dopromik ning ati, kwang daknamsiyake. Ara, Gog ap, el yin nang ap, sik ning nirya ara doropnamak bukni, atalak ara, Israel nang arye, sik Gog tam nang taleamik ning nirya, tamubuka alubikirye dopropnamake. Na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapdeiamsa ati, aning nirya dipkoprob nong upnamlarya!

Gog weipnamik ning ati, nyabuk yupu

¹¹ Allah el si Yahweh arye, ayupu ton nyabuk. ‘Aning ara, dipkoprob upnamle,’ nyapman talak akunum dam uplyopura, Israel mutuku noutam ara, narye anye Gog, el weinak ati tuku ara, keting wekelbalamle tam, weik laut mekwen, el si Mediterania otam, atam ara keting panalyangan tam ara, weik mekwen ton, el si Kam Una Kum laut (tonda Laut Mekwen Dinanye), danoutam uk upnamle. Amutuku si ara, ‘Lu Mutuku Bisik Banyakak,’ weinyakakuk arepnamne. Ara Gog ap, el yin talen nang nirya, sik melilamik yuk mutuku yin nang ap, akunum omikba, weinamakak ara, amutuku lu noutamuk binuka weipnamaka ati, aweipnamakak ara, pia pala weik upnamle. Ati, ninye asik nang arye, ‘Alu mutuku noutam luparabuka binuyabʼ tenen, piripting bukni, asukum kum binmanto upnamake. Anang weipnamakak amutuku si ara, atalak arye dipdongobuka, dounamle talak ara, ninye arye amutuku ati, ‘Hamona mutuku,’ nyanamake. Tonda, ‘Gog tam nang, sik Weina Lu Mutukuʼ nyanamake.

¹² Wala tatekbarye deice, sik Israel nang arye, Gog ap, el yin nang ap, akunum obikba, sik nong deiplobik ning nirya, bulubuka dobikirye, tuku lukuka weinamsiyake. Winibikca deice arye, Israel nang unyak mutuku tuku noutam nirya ara, tuba teleb kipdeipnamsiake. Ara pia malye ning kum kipdeibikirye, ton kume kum danamle. Telebuk upnamle.

¹³ Israel mutuku noutam unyak nang nirya arye, yanuka melibikiba, aoplomik nang, sik nong nirya ara, dobuka weipnamake. Aweipnamaka ati, aminyan talak narye tenyamse talakuk, anggunti deken ning ara, dobuka arepnyeura, yuk nang nirya arye anggunti, Deiyok, sik apil domika ara, pia telebe, sikda teleb nang unyake,’ nyabuka Israel nang nirya ati, si erenamake. Ara, na pia teleb ap, mikip weik ap, mambul weik ununa ap ara, ‘Ninye nirya eibikirye biknamakʼ tenen, narye aning nirya melibuka peterepnamne. Tonda, nara Allah Yahweh, aning-aning nirya talibuka, eitam erebuka, mikip weik ununye birye, ‘Aning ara winipnamneʼ tenen, akunum nyapsine ati, aning dipkoprob nong upnamlarya!

¹⁴ Israel nang arye, yata barye nang ton, sikti, pil arepnyeura, Israel mutuku noutam dipra bakirye ninye obuka, tuku deice batakamik, nang nong ton, tuba aupmal do, kum do?’ tenen, epnin binamake. Ara, ‘Nun mutuku nirya, malye ning kum kipdeibinbirye, tuba teleb kipdeipnamapʼ tenena atia. Atuku deice ninye diamikce nong aupmalyeba eibikcopura, sik nong dobuka, bobinuka adiparyuk tuku pum weipnamake. Ara, ‘Amutuku tuku noutam tuba teleb kipdeipnamapʼ tenen, Gog ap, el tam kipdomik nang ap, sik diamikce nong tomobuka, adiparyuk weinauk upnamake.

¹⁵ Aeipnin banmakce talak, tonok sum ara, ton batakna kum, ninye yok tonok ning babye tuba aupmalyeba, aninye yoka eibikcopura, ayoka uamlyak ara, bikilinamake. Abikeipnamak ning ara, ninye wein nang arye, aning eibikirye, yanuka ayok dobuka, adiparyuk tonok mutuku noutamuk, Hamona mutuku, ara, ‘Gog tam nang, sik Weina Lu Mutukuʼ weilbanamake.

¹⁶ Aning winibikce deice arye, malye ning ton, Israel mutuku tuku deice kum upnamle. Telebuk kipdeipnamake. Amutuku banak ara, weik asik tonok, el si Hamona mutuku, domikak aulule. Tonda, amutuku asik ati ara, el si ara, ‘Gok tam nang, sik weina Lu Mutukuʼ nyanamake.

¹⁷ Ura, anda ninye sirika arye deipkiknye, nara Allah Yahweh arye anti, yupu ton nyapnukine. Nara Allah Yahweh, aning-aning nirya talibuka, deice tam erebuka, mikip weik ununye birye, nyapkine. Ance, tukwak mutuku ulul maka yala-yala nirya ap, talye bai tam ara kam ulamle ning nirya ap ati, ‘Sik nirya ara, dana-dana tam nirya arye, bulubuka asukumuk yangalulume,’ nyapnamlume. Winipminyeba, dan tam mutuku unyak nang nirya, bulubuka yakirye, Israel mutuku noutam sik dina ati, na Allah arye, ninye tup ap, ninye ining ap, sikti, kintinip deipmak ning yanuka dipnamake. Aning kintinip deipnamsin ning ara, winipmanto ara, Israel nang arye, na si erebuka kina ati, domba opnarye, nati arelamnik ning atonun winipnamle bukni, pia weik ning ati, kintinibuka arepnamne.

¹⁸ Amaka ap, abai tam kam ulamle ning ap, yakirye, mambul weik ulamik nang, sik nong dinamake. Ara, mal olana kel weik nang ap, pia mikip weik ulamik yin talilamik nang ap, tukwak mutuku ninye deiyok kiamikce nang, yuk-yuk talilamik deiyok nang ap, sik deiamikba, sik nong tup ap, tonda anang sik ining ap, yanuka dipnamake. Winipmanto ara, adiamik nang, sik nong dinamak ning ara, yim kambing basam ap, domba basam mapu ap, kambing basam ap, sapi basam ap, tonda, Basan mutuku pia bita teleb sukum arye weinyak domba ara, nong weik unyak ning atonun ubuka dinamake.

¹⁹ Narye sik maka ap, bai tam kam ulul ning ap yakirye, dinamak ning ara, naryuk kintinip deipnamsine. Winipnyopura, arepsinyeba, sikce meta weik tonun dinamake. Meta weik dibikiba, weik tonun boupnamle. Aning atonun, ninye ining babye dobuka dipnamake. Adibikca deice arye boupliba, dukmanto upnamake. Tonda sik ining dobuka dibikiba, sik kanye ara, walwal upnamle. (Ara ninye arye kanye wangalamak anggur yu mek dibikiba, kanye wangalamle touk upnamake.) Awinipnamaka ara, narye na si erebuka kina ap, si erena ati, weik kwalina kwalin sum atouk, din ning weik tonun kintinip deipnamsin talak ati nyapsine.

²⁰ Narye sik maka ap, bai tam kam ulamle ning ati, din kintinip deipnaman ning dibikirye, weik tonun boupnamle. Ara, kuda basam ap, kuda basam arye tapu kirikuka linmakiba, tuku deice balamle yin talen nang ap, mal olana kel weik nang ap, yin talin nang yuk-yuk nang nirya, Israel ninye arye oplopmakce nang, sik nong dobuka dipnamake. Aning nirya ara, nara Allah, na si Yahweh arye, aning-aning nirya talibuka, deice tam erebuka, pia mikip weik ununye birye nyapmasina ati, aning ara dipkoprob nong upnamlarya! Ayupu akunum nyapdeipsine. Allah el si Yahweh arye yupu nyabuk.

²¹ Na pia teleb unun ap, pia mikip weik arye wininun ning ap, atalak ara, tukwak nang sik kan-kan noutam arye, lak sukum kipdeipniba, tukwak mutuku unyak nang yala yuk-yuk, dana-dana tam unyak nang arye eipnamake. Tonda, na Allah arye, ninye sik malye winin ning ati, pia diksukum ubuka, yupu bokdeipnirye, sik malye ning ati wenenun nang ara, pil dopnyeba, ninye nirya arye eibicopura, biknamniake. Tonda, na taruk mikip arye, sik deice ikin ning arenamne ning ara, aning babye, sik nirya arye, lak sukum arye eibikirye, biknamniake.

²² Atalak ara, anggun Israel nang, anggun pununanye Israel birye deibukba, dadeipdanin yangalamika ani, atalak kam tuba unamak Israel yala nang ara, nati moubuka biknamniake. Ara, na pil donamne ning eibikirye, ‘Se, Allah Yahweh, elda mikip weik ulule. El ti ara, el siuk erenamabeʼ tenen, biknikirye, atalak arye dipdongobuka dounamle talak noutam nirya ara, nati moubuka biknamniake. Sikce, ‘E, nun ni koproba Allah Yahweh ara, el tonok ululeʼ tenen, biknamniake.

²³ Tonda, sik tukwak nang yuk yala nang nirya ara, moubuka biknamake. ‘Ara, yu nang arye Israel nang obikce, tapu koubuka yuk pera mutuku bobinamika deiyok ning ara, yuk ning ton kume. Israel nang, sik kanye aryuk, Allah dam malye-malye weik ulamikce, narye nyalilamse yupu yanibuka, malye un ninguk talibuka ulamika ati, kanye imun ning, sik deice yayuke. ‘Ninye yuk-yuk nang nirya ara, aning tenebikirye, biknamake. Sik Israel nang arye malye ulamika ati, narye sik wenena ati akunum batakamsirye, sikti, kum kaleklamse. Ati, sik mal olan nang arye yanuka olamikce, yanibuka malye kilamik.

²⁴ Sik bidamnye arye, malye winin ning ap, tonda pia alye un ning ap, winilamika deice arye, aning malye weik winilamika touk, na babye, sik dam malye ning ulamika dekna ara, amalye ulamik ning ato ninguk dobuka, ikin ning areamse. Winipsirye, sikti, akunum batakdongamse.

²⁵ Ati ara, nara Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Wini talak ara, narye sik Israel yala nang, sik pununanye Yakub birye deiamukba, dadeipdanin yangalamikce, aunyak nang ati, bico tenenamne. Winibuka tenipnyopura, anang mince pia teleb ulamik touk, tuba ton ap teleb kipdeipnamsine. Tonda, Israel yala nang nirya ara, sik malye ulamik ning ati, adiparyuk sik dekena ati, wenebuka optinirye, sirya dakmatinye bukni, aning kumce, bicoe tenepnirye, sikti, tuba tonap telebuk kipdeipnamne. Sik nirya ara, telebuk unamake. Tonda, ‘Tukwak nang arye na ap, na si ap ati, malye nyapninyakʼ tenen, na pia teleb ununa ap, na pia lek si ati, moubuka tenipnirye, kaliknyopura, sikce na si ati malye kum nyapnamniake. Na siuk pia erenamniake.

²⁶ Aning nirya akunum winipnyopura, sik Israel nang yuk-yuk nang nirya ara, sik teleb aryuk, ninye olana kumce, tunim abuka, sik mutuku noutam kanye deibuka unamak talak ara, tonoknye babye, sik dam yalirye, sik deice ikin ning ton kum deipnamle! Aning nirya deice arye, sik Israel nang arye, minop talak na dam malye ulamik ning ap, sik bidamang arye, sik bidamnye atibuk, alye dakdanamaka ara, luba kibikba, narye aning nirya kum kipdeipnamnarya! Tonda, yuk mutuku nang arye anggun dam, ilil kum kililnamsiake. Teleb kanye deibuka unamake.

²⁷ Aunamaka ara, ani. Ara, na Allah arye, sik Israel nang dobuka yuk mutuku mal olan nang ap, yuk yala nang, pera mutuku unyak nang ap, sik kan-kan donokamsiba, binuka ikin weik daulamik Israel nang nirya ara, tamubuka sik mutuku uk boyanamne. Israel nang lobukapnirye, tamubuka boyanirye, tuba ton teleb kipdeipnamsina deice arye, nara Allah, na pia teleb ap, mikip weik ap, weik lek ning ap ara, yuk mutuku nang nirya eibikirye, ‘Seʼ tenen, moubuka biknamniake. Aning nirya ara, narye sik damuk lak kipdeipnamne. Ura, aning nirya winiplya deice arye, Israel nang, sik malye ulamikce, alye daklamik ning nirya ara, adiparyuk lubakipnamkiake.

²⁸ Winipnyopura, na mapu sik Israel nang arye, ‘Se, Allah Yahweh ara, aning-aning talibuka, deice tam erebuka, pia mikip weiknye ululeʼ tenen, biknamniake. Atalak ara, na siuk erenamniake. Aning deiyok ara, narye sik dobuka, yuk pera mutuku nang ulamika kan-kan donoknamse. Bukni wini talak ara, narye sik anang tamubuka, sik mutuku uk boyanuka deipnamne. Sik anang ara, tonoknye babye, yuk mutuku nang kan-kan, bataknyeba, kum unamake.

²⁹ Aning winipnamne talak arye, dipdongobuka, dounamle talak nirya ara, narye sik Israel yala nang ara, pia kum bataknamne. Aning kum bukni, na dam unulul Pia Teleb, Lek Dip Kanye ara, sik Israel nang deice dopdeipniba, elce sikti, tuba melinauk unamle. Tonda elce kum bataknamle. Aning nirya ara, na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapsine. Ati, aning nirya nong upnamlarya! Allah arye Yehezkiel dam yanuka nyabuk.