Yehezkiel 38 - Eipomek

Magog mutuku ulamuknye, el si Gog biti, Allah arye nyabuk yupu

¹ Allah el si Yahweh arye na Yehezkiel dam yanuka, ayupu nyapnuk.

² Se, anda ninye sirika arye deipkiknye ulyame. An asok erebuka Magog mutuku ninye deiyoknye, el si Gog ululak dipdenulyame. Anye biti, anyapkin yupu laka nyapmince, supnulyame. Anye Gog bira, ninye deiyoknye kibuka, Mesek mutuku ap, Tubal mutuku ap talilule. Ati, Yeheskielo, el dam bimince, ‘Allah arye nyapdeipkile. Narye arepnyeura, ikin ning ton yakiliba, dopropnamlame,’ nyabuka, laka nyapnulyame.

³ Ayupu ara, Allah el si Yahweh, aning-aning nirya talibuka, deice tam erebuka, pia mikip weik ululnye birye, Gog anti nyapdeipmakil yupu ara atia. Se, anda bicoe. Anda ninye deiyoknye kibuka, Mesek mutuku ap, Tubal mutuku ap talibuka ulyame. Nara, an mal pinanye ukunune. Moubuka kekepnilyame!

⁴ Narye anti, ‘El banmalyak batakuka, balye tamubuka, Israel nang unyaka uk dinamleʼ tenen, an banmalam tam bataknulama ati, besi taice ning, an si bama pum tam dongopkinirye, tapu ara kirikdongobukapkinirye, an ap an yin talen nang ap, yuk nang ap, ‘Na tenyamse mutuku mal olalbinamakeʼ tenen, libuka bobinamsine. Ara, ninye olban talak, ‘Mal biksilyakʼ tenen, yin talen nang arye ongonyak kat baju ongobukapmunce, kuda basam ap, kuda balye deice bukuka, ninye olbana ati kintinipnamak yin talen nang ap, talye yin talen nang ap, yupa weik kintinipnamak ning ap, neika binamlume. Tonda anggun nirya arye, ninye olan ning ap, ninye on parang ya ap, ‘Ninye opsicakʼ tenen, sik nong kalikin ning el si perisai, cang ning ap, mitik ning ap, talibikirye, aning nirya kintinibuka bobikirye, sik nirya ara dobuka bobinamlume. Narye menekuka bobasiniba, anggunda na aminyan tam yanamlume.

⁵ An mutuku yin talen nanguk kum binamake. Sik ap, Persia mutuku yin talen nang ap, Etiopia mutuku yin talen nang ap, tonda Put mutuku yin talen nang ap, sikda kisok kaluna ati kat ning, el si topi baja ap, ninye on parang ya ap, kintibikirye, an ap, anang nirya arye, an dam yanuka melipkikirye, sik nirya neika uk, na tenyamse mutuku mal pibinamabe.

⁶ Tonda, Gomer mutuku yu nang, sik tam yin talen nang ap, tonda Bet-Togarma tam mutuku unyak nang, sik yin talen nang ap, an tam nang ap, neika mal olalbinamlume. Ati, an ap neika binamlum nang ara, yupa pia weik tonun an dam yanuka melipkikirye, mal olalbinamlume.

⁷ Ance, ‘Yuk mutuku nang mal olalbinamapʼ tenen, an ap neika mal olalbinamlum nang ati, nyapminba, an ap, yin talen nang yupa weik tonun bulubuka an tam melipnamkiyak nang ap, sik nirya arye, ‘Atalak aryuk olalbinuyap do, yuk talak do?’ tenen, dipkoprob kintinip deipnamlume. Tonda ance sik yuk mutuku yin nang nirya ati, erebuka umince, sik deiyoknye kipminyopura, yupu nyaminyeba, sikda an amu tam upnamake.

⁸ Asum-asum ap, wala ap, yata wiribuka do, mitik tonun ton akunum mapminyopura, narye anti ‘Wini talak winipnamlume, yuk mutuku binuka anang obuka sirya daknamlume,’ nyapnamkine. Aminyan dounamle talak ara, nyapkiniba, atalak ton tonok weik asik dam binamlume. Ara, amutuku ulamak nang ara, minop talak, anggun mal olan nang arye mal olamikak arye inipdobikce, obuka bobinamikba, pera mutuku noutam daulamika ani, keting tamun weik akunum ubukura, lopdeipsiba, tuba tamubuka sik mutuku yayikba, narye teleb kipdeipse. Ara dana-dana tam mutuku noutam, yuk nang ap ansinibuka, daulamepya ani, narye tuba sik weik asik ol dem uamuk bukni, tamubuka yanuka anyasik dobukabikce, Israel mutuku noutam daulamikce, yanuka kanye deibuka tunim abuka, telebuk ulamik. Minop talak ara, anang ara sik mutuku noutam kum ulamik. Pera mutuku noutam yuk-yuk ulamika ani, sik mutuku koproba ara asik oldemuk ulamuk bukni, narye anang bobuka, sik mutuku boyanuka deipseba, sik asik lipsisikuka dobikce daulamika ani, wini talak babye amutuku noutamuk tuba ukirye, talye kanye deibuka telebuk unyake. Wini talak ara, anggun mal olan nang ton kum yanganyake.

⁹ Aminyan talak narye, ‘Mal olalbilulume,’ nyapkinyeba, an ap, an yin nang ap, tonda sik yuk mutuku yin talen nang ap, ara an dam yanuka melipnamkiyak nang ap, anggun nirya neika ansinipmunce, weik kumanya yangalamle touk ubuka, Israel nang unyak mutuku yamunce olbinamlume. Winipmunce, an tam nang ap, anggunti melipnamsiyak nang ap, anggun yin talen nang nirya ara, yupa pia weik, nukmanto kum ubuka binamluma ati, kiklina ara, amutuku nirya ara, dua bum yalirye, kitipdongobuka lilongolamle touk ubuka, amutuku nirya langdipnamlume.

¹⁰ Nara Allah, na si Yahweh, aning-aning nirya talibuka, deice tam erebuka, Pia Mikip Weik Ununye birye nyapkine. An Gog biti nyapkine. Na Allah arye tenyamse talak akunum uplyopura, Gog anda, an talima noutam arye, yu weik tenipmince, ‘Aning pia malye un ning ara winipnune,’ tenipmince kintinipnamlam ning ara, pia malye ning tenibuka kintinipnamlame.

¹¹ An talima noutam arye nyapnamlame. “Ara, yuk mutuku nang ara, weik asik domikce, daunyak mutuku bukni, ‘Nun mal olan nang yanuka opsicakʼ tenen, sik weik asik domik sukum antanapdongobuka dana-dana tam, cang keil poka kum dobuka unyak mutuku ara, nara binuka weknirye oplopnamne,” nyabuka, laka nyalanamlame. Utenepmince, ayupu ton nyalanamlame. “Ura amutuku ara, keil poka dobuka una ap, bublan tirikdongobuka una ap, pia kum unyaka ati, sik ning ara, ‘Kume nunda teleb diparyuk tunim nyabuka unyabe. Tonda nun ninye on ning nirya ara, akunum kintinibuka unyabe,’ tenenyake. Bukni, ance anang ara, sik dam binuka opnamlame.

¹² Ance, winibuka kintininamlyame. ‘Nunda, sik amutuku noutam unyak nang arye delinyak bona ara, nuncuk alubuka dopropnamabe. Winibikceba, amutuku ara asik oldemuk ulamuk bukni, anang ara tuba yanuka, asik dobuka unyake. Aning, sik talinyak ning nirya ara, dopropnamlume. Amutuku yanuka wekelbikirye unamak nang ara, min talak amutuku ulamik bukni, yuk mutuku nang arye, inibuka donokamikba, yuk mutuku nang, dana-dana tam binuka, sik kan-kan dabinuka ulamika ani, tamubuka yayikce, bona ap, kam ulamle ning, sapi ap, domba basam ap, weilamikirye amutuku unamake. Bukni, aminyan talak ara, an ap, an melin nang ap arye, amutuku noutam unyak nang obuka sirya daknamlume. Sik amutuku unyak ninye arye, ‘Kume, nunda tukwak mutuku im sirya, mutuku sirya nirya aupmaliba, nunda, dipkoprob amutuku unyabe,’ tenenyake.

¹³ Syeba mutuku ap, Dedan mutuku ap, Spanyol mutuku noutam bukni, weik asik el si Tarsis mutuku ap, amutuku noutam unyak nang nirya ap, tonda Tarsis mutuku tam bona yuk-yuk ning nirya dekelanyak deiyok nang ap, tonda, anyasik-anyasik dana-dana tam unyak mitik mutuku unyak nang ap arye yanuka asipdenamkiake. “Se anggunda, yin talen nang yupa pia weik bulupmumce, yin bobinamluma deiyok ara, Israel nang sik bona nirya ubula dolona ati binmalum do? Tonda, sik delinyak dekna weik ning, el si emas ap, perak ap, tonda sikce weinyak ning, domba ap, sapi ap nirya ara, ‘Alubuka dopropnamabʼ tenen, binmalum do? Bona yuk-yuk ning nirya, pia weik tonun alubuka dopropnamlum do?” nyabuka asipnamkiyake.

¹⁴ Ati ara, na Allah arye, nyapkine. Anda ninye sirika arye deipkiknye, Yeheskiel, ance anye el si Gog biti, el dam bimince ayupu laka nyalbinulyame. Allah Yahweh, aning-aning nirya talibuka, deice tam erebuka, pia mikip weik ululnye birye, an Gog biti nyapkile. “Kekepnululume! Nara Allah, na mapu koproba, sik Israel nang ara, sik ilil kumce, teleb aryuk tunim nyabuka ukirye, kanye deibuka unyak talak ara, Gog anda kintinipmince, sik dam olalbinamlume.

¹⁵ Ara, anda pia pera sukum dabu tam, arah utara noutam uminyak arye, an ap, an yin talen nang, yupa kum nukmanto nang ap, yuk-yuk mutuku daunyak nang, anti melipnamak nang weik ton ap, Israel nang unyakak minop binuka opnamlyame. Anggun nirya ara, ninye ona kel weik nang arye melipkikiba, anggun neikauk Israel nang unyak mutuku binuka onamlume. Anggun mikip deice arye, anggun nirya ara, kuda basam balye deice bukuka, ‘Israel nang olbana ati, minpola bikbik abuka banamlulume.

¹⁶ An Gog ap, an tam yin talen nang ap arye, na mapu koproba, sik Israel yala nang dam binuka ona ati sik mutuku banamlume. Amutuku banamluma ara, winipmanto weik kumanya ap, mok ap yanulye talak yangalamle touk ubuka, anggun nirya yamunce, Israel nang dam yanuka opnamlume. Na Allah arye tenyamse talak dam akunum kiplyopura, narye an ap, an tam nang ap dopdeipniba, ‘Naʼ tenen, mutuku ap, ‘Naʼ tenen, nang ap, anggunce binuka opnamlume. Narye an deice, Israel nang ati wenepnirye, oplopnyopura, sik dana-dana tam unyak nang yuk-yuk ning nirya, narye winipnamne ning winipniba, eibikcopura, ‘Se, Allah ara, dipkoprob pia mikip weiknye ulule. Elda, malye winin ning pia kumce, pia teleb leknye ulule. Aning ara akunum eibuka bikmabe,’ tenepnikirye, na Allah ati, moubuka biknamniake.

¹⁷ Ati moubuka teniplyame! Minop talak ara, na Allah Yahweh arye, na yupu laka nyalamika deiyok nang, sik nabi-nabi nang arye, Israel nang kan-kan nyalamika deice arye, tonok yanamuknye biti laka nyalamse. Gog anda, anye akunum ulyam do, kum do? Sik Israel tam ulamik nabi nang arye, Israel nang kan-kan arye, keting tamun yupa weik tonun arye ayupu tuba laka nyalamik. Ara, ‘Allah arye, tonok mikip weiknye biti, lo arepliba, anye birye, sik Israel nang ati, yin dobuka olyanamsile. Ayupu ara, na yupu laka nyalamik nang, sik nabi-nabi nang arye, ‘Pia yu ubuka, mikip weiknye anggunti olyanamsile,’ nyabuka, laka kum nyalilamsik do? Kume, na Allah arye, akunum nyalilamsi ning ara, “Doyanamle talak ara, tonok mutukunye ton, na Allah arye nyapdeipnyeura, yalirye Israel mutuku nang yanuka, opnamsile,” nyapdeiamse ning ara, akunum laka nyalamikba, kekelamlume. Aning nirya akunum laka nyalamik. Aning ara, na Allah Yahweh, aning-aning nirya talibuka, deice tam erebuka, mikip weik ununye birye, “Winipnamneʼ',” nyabuka akunum nyapdeiamsa ati, aning ara dipkoprob nong upnamlarya!

Allah arye, aminyan talak Gog obuka, sirya daknamle yupu

¹⁸ Na Allah Yahweh, aning-aning nirya talibuka, deice tam erebuka, pia mikip weik ununye birye nyapsine. Na tenepse talak akunum uplyopura, Gog dobuka deipnirye, lo arepnyeura, Gog birye Israel nang unyakak yanuka, Israel nang weik tonun opnamle. Winipnamle bukni, wini talak, na yu weik upniliba, narye tamubuka Gog biti, kwang dakana ati, weik tonun wenebuka opnamne.

¹⁹ Na pia yu weik deice arye, ‘Se, ‘Naʼ tenen, nang ara bicoe. Sikda na talima nang ati, sikti, kanye delinune. Ati, yata ati, Gog birye, opmal do?’ tenen, Gog elti, mal pipnirye wenepnamne. Ara, wini talak, weik mutuku lulukna ap, kanye imun upnamle ning ap, sik Israel mutuku noutam unyak nang kan-kan winipnamle.

²⁰ Israel nang weik tonun wenebuka opnamne talak ara, talye bai tam kam ulamak ning ap, laut mekwen pum tam ulul ikan nirya ara, im noutam lakuka balamle maka yala nirya ara, bai tam talye kam ulamak ning ap, mitik ning po do, bal do, yan bal do, ayala ning nirya ap, tonda im sirya, mutuku sirya nirya noutam unamak nang nirya babye, na yanuka unamnak eipnikirye, na dam yangana ati, pia ilil weik upliba, yok sirim birbir nyapnamake. Tonda mutuku dup nirya babye tobuka saknamle. Mutuku taram babye, tokna dopnamle. Tonda ninye arye kat keil poka dolamak ning babye daksaknamle.

²¹ Na Allah Yahweh, aning-aning nirya talibuka, deice tam erebuka, pia mikip weiknye birye, ayupu akunum nyapdeipsina ati, aning ara dipkoprob winipnamlarya! Ara, Israel tam bukni, weik bukuk mutuku noutam nirya ara, narye nyapnyeura, yin talina yu nang yakirye, sik ninye on ya boyanuka, el Gog biti, olyanamake. Gog el dam ara, narye kanye imun weik ning arepnyeba, eiplirye ilil pia unamle. Tonda, Gog el yin talin nang nirya ara, sik bidamnye bopmakce mal aryuk, sik kayapu nang mamunuk olanamake.

²² Tonda, narye Gog el kwang dakna ati, el malye ulamuk ning ati yupu bokdeipnirye, wenepnamna deice arye, kanye imun weik uk dina deiyok ning arepnamne. Tonda ninye weik opdakiba, sik ining weik binamle. Tonda weik lim lumtai mok ap, weik uku buk ap, uku dilamle keil, tong weik nyalamle ning, el si ara belerang ap, na Allah arye dobuka, el Gog ap, el yin talen nang ap, el melinyak nang, yuk-yuk mutuku nang ap, yanuka tikamikirye, el ap neika onamak nang ap, sik deice deipnamne.

²³ Aning nirya winipnye deice arye, ‘Yuk-yuk mutuku nang mutuku sirya im sirya nirya ati, na mikip weik ap, mambul pil donun ning ap, malye un ning kumce, pia teleb, lek diamuk unun ning ap, sik nirya biknamakʼ tenen, aning nirya sikti, wenepnirye, peterepnamne. Adeice arye, sikce nati, ‘Se, Allah Yahweh ara, dipkoprob eluk ululeʼ tenen, moubuka biknamniake. Ayupu nirya ara, Allah arye, nabi Yehezkiel dam yanuka nyapdeibukba, kekebukce, laka nyabuka sekuk.