Yehezkiel 37 - Eipomek

Israel ninye yok weik uamuk mutuku ati, nyabuk yupu

¹ Allah el si Yahweh arye, nati el mikip arepnuk. Atalak ara, Allah el Dib Kanye mikip, na nong deice yanuka bukukce, na bobuka ninye diplamik nang, yok delilbalamik mutuku, lyuak binuka deipnuk. Bobinuka deipnuk talak ara, dinmasiba, amutuku lyu nirya ara, ninye yok aryuk langdilamukak eipse.

² Allah el Dib Kanye arye, melibuka bobanmanuka ani, amutuku lyu nirya, bobanmanukba eipsa ara, diplamik nang yok nyelelamuk ninguk, pia weik arye aulamukba, na asing arye eipse.

³ Atalak ara, Allah el si Yahweh arye, nati nyapnuke. “Se, anda ninye sirika arye, deiamkiknye anya arye, ance tenipdenulyame. Aselal lebuka nyelelul ninye yok nirya ara, ‘Tamubuka kam buklulume,’ nyaptibyopura, kam bukting do, kum do?” nyabuka asipdenuk. Nyapnukba, narye tamubuka nyapse. “Allah Yahweh aning-aning nirya, talibuka deice tam Weik Erena Deiyoknye umince, ‘Winipnamne,’ tenelyam touk, wininilyama ati ara, ance asipdenilam ning ara, pia dipkoprob an tonok ara kele. Nara, na walwale,” nyapse.

⁴ Nyapsopura, Allah Yahweh arye nati nyapnuk. “Nyapmanilama ati, anda na yupu laka nyana deiyoknye ulyama anya arye, na yupu dopropmince, sik yok nyelelul ning nirya ati, ‘Allah arye nyasilye yupu moubuka kekeplulume,’ nyapnulyame,” nyapnuke.

⁵ Nyapnukce, ayupu nyapdeipnuk. “Na Allah Yahweh, aning-aning nirya talibuka, deice tam Weik Erena Deiyoknye unirye, ‘Winipnamne,’ tenepnye touk, wininuna anya arye, narye pupun dayuk ninye yok ati nyapne, ‘Anggun isin pupsinyopura, anggun yok nirya, tuba tamubuka kam bukuka, kam unamlume,’ nyapmasine.

⁶ Tonda, narye anggun milmil ap, tup ap, tonok dukdongobuka, kitipdongopsinirye, anggun bol makuka kitipnamsine. Winipsinyopura, na mikip arye, isin pupsinyopura, kam unamlume. Winipmunyopura, anggunce na Allah Yahweh ati, dib tenebuka biknamnulume. Ara, ‘Se, Allah Yahweh ara, dipkoprob ulule’ tenen, biknamlume.” Allah Yahweh arye, na Yehezkiel biti nyapdeipnukba, kekepse.

⁷ Ati, na Yehezkiel birye, pupun danamuk ninye yok nirya ati, Allah Yahweh arye nyapmanuk touk nyapse. Na ayupu tuba nyanmase talak aniryuk, kekenmasiba, sik yok pupun danamuk ning nirya, yuk-yukak uamuka, atalak aryuk deiyok koubuka, tonok dukuldongonameka ati, ayok lelim ara, weik arye dirik-dirik abik. Weik arye nyeleng-nyeleng abikce, tuba tamubuka neika yanuka, dukdongobuka nong dukdongopdayikba, mince ulamik touk, nong yuk-yuk dukuldongolanmekba eipse.

⁸ Wininmok talak ara, narye, ‘Yata wiripnamal do?’ tenen, moubuka dinmasiba, ayok nirya ara, milmil ap, tup ap, tamubuka dukdongobukce, nong nirya kipdeibuk. Winibuk bukni, sik nong nirya ara, isin min kum arebuk.

⁹ Winibuka, isin kum arepmok ati, Allah arye nati nyapnuke. “Se, anda ninye sirika arye, deiamkiknye ati nyapkine. Ance isin punanye bak, nyapnulyame. Pupun danamuk ninye nong nirya, isin dongona ati ara, winipnulyame. Allah Yahweh aning nirya talibuka, deice tam Weik Erenanye ulirye, ‘Winipnamne’ tenelul touk winilule. Elce nyapsile. Otam ap, eitam ap, outam ap, aulul kumanya nirya, dana-dana tam nirya ara, yamunce, minop talak oltaklamik ninye, sik pupun danamuk ning, yanuka weknulyame. Wini talak, sik nong dukdongobuka nong kipman deiamik ning nirya, nong pum bisik yanuka, pupminba, sik nong nirya buppu upliba, tuba tamubuka kam buknamake,” nyapnuke.

¹⁰ Ayupu nyapdeipnuka ati, Allah Yahweh arye, ‘Winipnamlyame,’ nyapmanuk touk, narye winipse. Akumanye nirya arye, aninye sik nong pum bisik yanuka pubukopura, kam bukuka tikik. Kam bukikopura, sik yupa-yupa ara, pia weik ubuk. Winibuka akunum winibukopura, ninye yupa deiyok tonok kibuka, nukman kumce, pia weik kibuk.

¹¹ Winibik talak ara, Allah arye nati nyapnuk. Se, anda ninye sirika arye deiamkiknye bira, na yupu kekepnilyame. Aning ara ance moubuka biknulyame. Apun danamuk ninye yok nirya ara, an kayapu Israel yala ninye nirya daunyake. Israel ninye ayala-ayala nirya unyak ninye arye nyanyake. “Se, nun yok ara, akunum pun dasuke. Allah arye akunum luba kipsuke ati, dorupnin banamle talak nirya ara, yatanye birye lyepsuturye, lopdeipsutu do? Kum ati ara, nunda talyeuk unamabe. Yo mungkaba dakaltaklamak atouk unamabe. Tonap, ‘Yatanye birye lyepnamsil do?’ tenen, pia kum tenenamabe.” Israel ninye arye nyanyake.

¹² Winibuka nyanyaka ati, narye nyapnukin yupu dobuka, ‘Naʼ tenen, ninye, sik Israel ninye ati, laka nyapnalyame. Ayupu nyapnalyame. “Na Allah Yahweh, aning nirya talibuka, deice tam Weik Erenanye unirye, ‘Winipnamne,’ tenepnye touk wininuna anya arye, anggun diplamlumba, tuku palibuka weilamsika nirya ara, bublan kukuka, kam bukeipnamsine. Na Allah arye, ‘Naʼ tenen, ninye ati, aunyak noutamak arye dobuka, anggunti areamsise mutuku noutamak, tuba tamubuka bobisinirye, deipnamsine. Amutuku tuba tamubuka arepsiniba, anggun amutuku noutamuk unamlume.”

¹³ “Narye aning nirya winipsiniba, ‘Naʼ tenen, ninye, anggun Israel ninye nirya kel biknamlume. Ara, tuku lukamsikak bublan kukipnirye, kam bukipsiniba, kam bukmunce, aning nirya eipmunce, ‘Se, nun ni koproba Allah Yahweh ara, dipkoprob ulule’ tenen, nati dib tenebuka biknamnulume.

¹⁴ Tonda, narye anggun nong noutam pupsinyopura, na Dib Kanye anggun nong noutam deipsinyopura, isin weksilirye, kam bukdopnamlume. Winipsinirye anggun mutuku koproba uk tamubuka bobisiniba, binamle. Winipsinyopura, anggunce na Allah Yahweh ati dib tenebuka biknamnulume. Ara, se, nun ni Allah Yahweh ara, dipkoprop, ‘Wininamsine,’ nyapsuk touk, akunum wininmasile anya arye, ‘Aminyan talak babye, nun melina ati, pil donamsile’ tenen, biknamnulume.” Allah arye nyabuk.

‘Yehuda yala ninye ap, Israel yala ninye ap, dukdongobuka tonok unamaka’ tenen ati, nyabuk yupu

¹⁵ Allah el si Yahweh arye, na Yehezkiel ati nyapnuke.

¹⁶ Anda ninye tukwak nang arye deipkiknye bira, winipnalyame. Kama tonok dopropmince, ayo kama deice ara, ayupu seknulyame. Ara, “Yehuda arye deiamukba, dadeipdanin yangalamik ninye ap, tonda wini talak kili sal ap, neika unyak kili sal ani,” nyabuka sekeipnamlyame. Winipmince, yuk kama ton dobuka, akama bol deice ara, ayupu seknalyame. Ara, “Epraim yala nang, sik kama ara ani. Yusup birye deiamukba, dadeipdanin yangalamik ninye ap, tonda wini talak sik neika unyak ninye ap ani,” nyabuka sekdeipnamlyame.

¹⁷ Akunum sekminyopura, akama bitinye dobuka, tonok tam taruk arye talipnulyame.

¹⁸ Winipminba, an kayapu, sik neika umunye nang eibikirye, “Aning winipluma deiyok ara, yata ati winiplum do?” nyabuka asipdenamkiyake.

¹⁹ Asipdekicopura, nyapnalyame. “Kume, Allah el si Yahweh, aning nirya talibuka, deice tam Weik Erenanye ulirye, ‘Winipnamne,’ tenelul touk winilule. Elce nyasulule. ‘Na Allah arye winipnamsine. Efraim el kama ap, Yehuda el kama ap, neikak deipnamne. Deiyok ara, Efraim yala ninye ap, Yusup birye deiamukba, dadeipdanin yangalamikba, sik ap neika unyak ninye nirya ap dopropnirye, Yehuda yala ninye ap, sik ap neika unyak ninye ap, tonok yala kipdeipnamsine. Ara, Yehuda ap, Israel ap, tonok yala kipdeipnamsina ati nyapsine.’ Allah arye nyapmasile, nyabuka, laka nyapnalyame.” Allah arye, na Yehezkiel ati, nyapdeipnuk. Nyapnukce, ayupu ton nyapnuke.

²⁰ Akama bitinye bol deice, ayupu akunum sekmince, tonok tam taruk talipminyopura, ayupu ton nyapnalyame.

²¹ Allah el si Yahweh arye, aning nirya talibuka, deice tam Weik Erenanye birye nyasulule. Na mapu Israel ninye yala nirya ara, yuk-yuk mutuku ninye noutamak biyikce, dabinuka ulamica ani, aninye nirya tonokak, bulubuka deipnirye, anggunti areamsise mutuku tamubuka delilyanamsine. Tonok mutuku noutamuk unamlume.

²² Winipnamne talak ara, sik nirya ara, tonok yala atonun ukirye, Israel mutuku uk unamake. Ati, sik aninye deiyok talibuka una ati, ninye deiyoknye, Raja, tonoknye aryuk, Israel yala ninye nirya talinamle. Sik aninye uk bokukabikirye, mutuku yuk-yuk talibuka kum unamake. Israel yala ninye ap, Yehuda yala ninye ap, mince bokuka yuk-yuk ulamik bukni, aminyan doryanamle talak noutamak ara, tonok mutuku noutamuk, tonok yala kibuka unamake. Sik Raja ara, tonoknye birye talinamle.

²³ Tonda, minop talak ara, Isa Mutuku Dongonye si erelamikce, malye un ning weik arye, winilamik bukni, atalak arye diprongobuka dounamle talak noutamak nirya ara, aning nirya tuba tonap kum wininamake. Isa Mutuku Dongonye si erebikirye, malye un ning ton kum ubikirye, malye kum updeipdanamake. Na Allah arye, ‘Like,’ tenenun ning nirya kum wininamake. Atonun talye ning yupu nyana ap, kanye bona kum ning, ninye arye kintinibuka deibikirye, si erelamak ning ara, sikce kum erenamake. Tonda, na Allah ati, batakaninyakce, pia malye-malye weik ulamik ning ara, tonap kum wininamake. Bukni, aning nirya ara, narye kum kipdeipnirye, aninye nirya teleb kipdeipniba, sikti, lyepropnamne. Winipnyopura, sikda na mapu koprop unamake. Nara, sik ni koproba Allah unamne.

²⁴ Tonda, na pil donanye Daud el yalanye wibuka deipnebuk, sik nirya talibuka ninye deiyoknye unamle. Winipmanto ara, domba basam weik unyak bukni, sik domba weina deiyoknye tonok ulirye, el domba nirya tonok kibuka deiplirye, teleb ubuka weilamle atonun, Israel ninye ayala-ayala nirya ara, sik deiyoknye tonok dem unamle. Elce Israel ninye nirya talinamle talak ara, sikce teleb un ninguk wininamake. Ara, na Allah arye, ‘Aning ara wininamlume, aning ara kum wininamlulume,’ nyapdeiamse ninguk talibuka unamake. Na yupu nirya moubuka kekenamake.

²⁵ Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.

²⁶ Na Allah ap, sik Israel ninye nirya ap, ansinibuka telebuk una ati, nyalina yupu tonok ning nyapdeipnamne. Ayupu ara, pia min kume kum danamle yupu anya arye, pia aunamle. Winipnyopura, narye sikti, pia melibuka kaliklamniba, pia telebuk unamake. Nara, sik dam unirye, sikti, melinamna deice arye, sik yupa weik arye, tonap tabakuka upre banamke. Aunamak mutuku noutamuk, na si eren aik dopdeipniba, pia ati asukumuk unamle. Na siuk pia erenamniyake.

²⁷ Winipnyopura, nara sik ap, pia neika unamabe. Nara sik ni koproba Allah unamne. Sikda pia na mapu koprop, ‘Naʼ tenen, ninye unamake.

²⁸ Na si erena ati, pia teleb aik ara, na mapu Israel ninye sik unamak mutuku noutamak aunamle. Anyaik ara, pia aunamle. Na nyapmasin touk akunum winipnyopura, sik yuk-yuk mutuku unyak ninye nirya arye aning eibikirye, na Allah Yahweh dib tenebuka biknamake. Ara, ‘Se, Israel ninye sik malye unyak ning kum kipdeiplirye, sikti, teleb kibuka delilul Allah ara, Allah Yahweh elcuk teleb kibuka delisilule,’ tenebikirye, biknamniyake. Allah arye, na Yehezkiel ti nyapnuke.