Yehezkiel 36 - Eipomek

“Allah arye Israel ninye ati, meliplirye teleb ulinamle,” nyabuk yupu

¹ Allah el si Yahweh arye, nabi Yehezkiel binyak nyabuk. Se, anda ninye sirika arye, deiamkiknye ulyame. Ati, narye nyapkin yupu kekepmince, ance sik Israel ninye unyak mutuku nirya, sik dam nyalbinamlyame. Nyalbiminyopura, sikce na Allah Yahweh, aning-aning nirya talibuka, deice tam unirye, Pia Mikip Weik Deiyoknye ununye, na yupu uk, kekebuka unamake.

² Amutuku dana-dana tam unyak nang nirya yakirye, anggun Israel yala ninye nirya ati, yep-yep asinyake. Sikce nyanyake, ‘Kume, nunce Israel yala ninye obuka, sirya dakupurye, minop talak, sik talibuka ulamik mutuku nirya ara, akunum alubuka dopromubua ati, wini talak ara, nuncuk amutuku noutamak nirya, talibuka unyabe,’ nyabuka, akutusinyake.

³ Ati ara, an Yehezkiel birye, na nyapkise yupu dobuka, aminyan winipnamle ning ati, laka nyalbinamlyame. Ara ani. Se, Allah Yahweh aning-aning nirya talibuka, deice tam Weik Erena Deiyok ululnye birye nyapsile. Sik dana-dana tam ulamik ninye arye, sik Israel yala ninye ati, batakna pia kumce, tuba-tuba olyangalamikce, anggun talilamlum ning, dalubuka dololamikce, anggunti malye kililamikce, anggun Israel yala nang ulamlum mutuku ap, asik nirya ap, dalubuka dololamik. Winilamsikba, yuk mutuku unyak ninye nirya arye, anggun Israel kili sal ati, akutusinyakce, malye yupu ap, minina yupu ap, anggunti nyalamik touk, tuba nyanyake.

⁴ Ati ara, na Allah Yahweh, aning-aning nirya talibuka, deice tam Pia Mikip Weik Deiyoknye birye, anggun Israel yala ninye, mutuku-mutuku nirya ulalumak ati, nyapsine. Wini talak ara, mutuku bukamukak ap, mutuku kon nirya ap, mek obuka balulak nirya ap, lu mutuku ap, asik domikce ulamika ani, ninye yuk nang yayikce, obuka sirya dakikba, asik oldem batakamik asik nirya ap ara, yuk mutuku nang arye, yanuka alapdopsike. Anggun talilamlum ning nirya, dalubuka dololamsikba, yuk ninye nirya arye anggunti, akutubuka nalilamsike.

⁵ Ati, na Allah Yahweh, aning-aning nirya talibuka deice tam, Pia Mikip Weik Deiyoknye birye, nyapnusin yupu kekeplulume. Ara, na weik arye, yu upniliba, sik Israel mutuku dana-dana unyak ninye nirya ap, tonda Edom mutuku unyak ninye nirya ap, anggun nirya ati, yu kanye bobuka nyapsine. Ara, anggun nirya wenebuka opnamsine. Derebuka opnamana deiyok ara, ani. Amutuku ninye nirya ap, Edom mutuku ninye ap arye, ‘Israel yala ninye talinyak mutuku nirya ara, maning teleb ubuka, palamle mutuku anya arye, nun kambing ap, nun domba ap arye, aning dinamaka ati, sik Israel ninye malye kibuka obibyopura, nuncuk amutuku nirya, dobuka talipnamabe’ tenen, kanye deiamikce, yupu sirikamika ani, Israel ninye taleamik mutuku, dalubuka dopromik.

⁶ Winilamika ati, anda nabi Yehezkiel birye, nyapnamlyame. Anggun moubuka kekeplulume. Israel yala ninye ulamik mutuku bukamukak ap, mutuku kon nirya ap, mek obuka balulak nirya ap, lyu mutuku ap, asik domikce, ninye daulamika ani, yuk nang arye, obuka sirya dakikba, asik oldem uamuk asik nirya ap ara, yuk mutuku nang arye, yanuka alapdopsik bukni, Allah Yahweh aning-aning nirya, talibuka deice tam Pia Mikip Weik Deiyoknye ulinye birye, el tenelye touk, dipkoprob winilule. Allah arye nyapmasile. “Sik ulamikak dana-dana tam unyak kili sal, yuk mutuku ninye nirya arye, anggun talilamlum ning nirya, dalubuka dopromsikce, anggunti nalisinyak ati, na Allah arye, amutuku ninye nirya ati, weik arye yu upniliba, wenebuka oplopnamne.

⁷ Aning ara, talye ati kum nyapsine. Na Allah Yahweh unune. Nara, aning-aning nirya talibuka, deice tam Pia Mikip Weik Deiyoknye ununye birye, na tenenye touk, dipkoprob ununa anya arye, Weik Erenanye unune. Ati ara, na Allah Yahweh si deice arye nyapsine. Israel kili sal, sik unyak mutuku dana-dana tam unyak ninye ara, wenebuka oplopneba, yuk mutuku nang nirya arye, sikti, nalibikirye, malya yupu nyabuka, yep-yep anamake.” Allah arye nyapmasile.

“Allah el si Yahweh arye, sik Israel ninye unyak mutuku ati, teleb ulinamle,” nyabuk yupu

⁸ Bukni, anggun Israel yala ninye ati ara, teleb daulamunya ani, aminyan talak, na melipsinya deice arye, anggun mutuku koproba, tamubuka yanuka unamlume. Ati ara, amutuku noutamak ulul mutuku ap, mutuku kon ap, lyu mutuku nirya ap, tonda anggun yo ap, tapu ap aning-aning nirya ara, bongobuka paplirye, kwapu youbuka, duk pia weik moupnamle. Wininamla deiyok ara, ani. Na ninye Israel yala ninye nirya ara, tamubuka yakirye, amutuku noutamakuk unamak ati, nyapne.

⁹ Se, Israel ninye unamak mutuku nirya ara, pia moubuka tenenune. Israel ninye unamak mutuku tuku nirya ara, dipkoprob na melipnamna deice arye, ninye arye, atuku nirya palibuka, sice kiplobikirye, yala ning, aning-aning nirya, teleb kibuka dokonamake.

¹⁰ Tonda, na mapu koproba, Israel yala ninye ati, narye melipniba, sik yupa tonap, pia weik kibuka tapakra banamake. Ninye yupa weik akunum kipdeipniba, sik amutuku weik kibuka ulamikce, aik daklomikba, asik oldem ubuka bipla pamukak nirya ara, ila tuba tamubuka, aik dobuka unamake.

¹¹ Amutuku-amutuku nirya ap, amutuku kon ap, noutamak nirya ara, ninye weik yanuka unamake. Tonda, sikce weinamak kam un ning, ayala-ayala nirya ara, narye tonap tabakuka arepneba, pia weik upra banamle. Winipniba, ninye ap, sikce weinamak ning ap, pia weik upra banamake. Minop talak, mitik teleb ulamlum bukni, aminyan talak ara, aning atonun bukni, weik tonap pia teleb upra banamlume. Ara, ninye arye, mapu deibikiba, weik upra banamake. Aning atonun, sikce weinamak ning babye, pia tabakuka arepre baniba, weik upra banamake. Aning nirya akunum winipnyopura, ninye yuk nang nirya arye, kel kibikirye, ‘Se, sik ni koproba Allah, el si Yahweh ara, dipkopropnye ulule’ tenen, kel biknamniyake.

¹² Na mapu koproba Israel ninye, ayala-ayala nirya ara, anggunda anggun minop talak ulamlum mutuku, ila tuba tamubuka bobinamsine. Winipsinyopura, anggunce amutuku noutamakuk, talibuka unamlume. Unamlum talak noutamak nirya ara, anggunce delinamlum mapu nirya babye, din patana deice arye, ton pia kum dibinamake. Tonda, yuk mutuku ninye arye, anggun mapu kum onamake. Amutuku arepsinyopura, pia telebuk ubuka unamlume.

¹³ Na Allah Yahweh aning-aning nirya talibuka, deice tam Pia Mikip Weik Deiyoknye ununye birye, na tenenye touk, dipkoprob wininunye birye, nyapsine. Yuk mutuku ninye arye, Israel yala ninye ulamik mutuku ati nyanyake. ‘Kume, amutuku noutamak unyak Israel ninye ara, dibinauk unyake. Aning atonun olana ap, ikin kanye bobuka, una ap deice arye, amutuku noutamak ara, ninye dibina weik mutuku ulule. Israel ninye amutuku noutamak unyak talak ara, dipnin bakibuk, ninye yupa pia mitik tonunuk kipri balolule,’ nyabuka, malye yupu nyanyake.

¹⁴ Winibuka nyanyaka ati ara, na Allah Yahweh aning-aning nirya talibuka deice tam ununye, Pia Mikip Weik Deiyoknye birye tenenye touk, narye nyapsine. Wini talak arye dipdongobuka, doryanamle talak noutamak nirya ara, sal do, kilapu do, mapu kilmapu do nirya, din patana ap, olana ap, ikin kanye bouna ap deice arye, Israel ninye kum dipnamake. Aminyan talak babye, pia kum kum danamake. Na si Allah Yahweh, aning-aning nirya deice tam, Pia Mikip Weik Deiyoknye ununye birye nyapsine.

¹⁵ Wini talak arye, dipdongobuka doryanamle talak noutamak nirya ara, sik yuk mutuku nang arye, amutuku unamlum ninye ati, akutubuka kum yep-yep anamsiyake. Yuk mutuku ninye arye, ‘Se, sik Israel ninye ap, sik unyak mutuku ap ara, talye mutuku uk ulule,’ nyabuka kum nalinamsiyake. Atonun yupu tuba nyapsikiba, kum kekenamlume. Amutuku noutamak unamle ning deice arye, Israel ninye ati, malye kum ulinamsile. Tonda, melipsiniba, malye unyak nang arye amutuku noutamak unamlum ninye ati, ton yanuka kum onamsiake. Ayupu nirya ara, na Allah Yahweh, aning-aning nirya deice tam, talibuka Weik Erena Deiyok ununye, narye tenenye touk dipkoprob wininune. Aning ara, dipkoprob nong upnamle ati, nyapsine.

“Allah el si Yahweh arye, sik Israel ninye ati, teleb ulinamle,” nyabuk yupu

¹⁶ Allah Yahweh arye, na Yehezkiel ati nyapnuk.

¹⁷ Se, anda ninye arye deipkiknye koproba ulyame. Israel yala ninye ara, anggun mutuku koproba noutamak ulamik talak ara, sik malye ulamik ning ap, sik malye pil dolamik ning ap deice arye, sikce sik bidamnye ati, malye ulilalamik. Anang winilamik ning nirya ati, narye elilamsirye, ‘Na pia like,’ tenelamse. Ara, kilapu sik ining balamle talak ara, sal arye, ‘Se, aning ara nun like’ tenen, malye kanye bolamak touk, narye sik Israel yala ninye ati tenelamse.

¹⁸ Israel ninye arye, pia malye-malye weik winilamika ati ara, na yu weik ulamnukba, weik wenena ning dobuka, sik anang deice bobuka delilamse. Winibuka wenelamse ning ara, talye ati kume. Ara, amutuku noutamak ulamik nang weika arye olamik ning ap, yuk talye ning ati, ‘Nun ni koproba’ tenen, Isa Mutuku Dongonye si erelamik ning ap ati, narye wenen ning weika arye arelamse. Sik malye winilamik ning dekna ati, wenelamse.

¹⁹ Narye sik anang obuka, wenelamse ning deiyok ara ani. Sik babye malye pil dolamik ning ati, malye weik ulamik touk, ikin ning weik, sik nong deice delilamse. Ati, lo areamseba, yuk mutuku ninye arye, Israel ninye yanuka olyangalamik. Tonda, Israel ninye ati malye kilamikce, sik nirya tapu koubuka, sik mutuku koproba bobinamikba, sikda amutuku noutamak daulamikce, pera mutuku noutam yuk-yuk ulamik. Sik nirya yuk-yuk mutuku noutam bobinamikba, ninye asik nang atonun, binuka ulamik.

²⁰ Yuk pera mutuku datikilbinamikba, yuk-yuk mutuku ninye nirya elilamikce, nyalamik. “Se, sik Israel yala ninye ara, Allah Yahweh elce, ‘Aninye ara, ‘Naʼ tenen, ninye unamak’ tenen, wipdeiamuk bukni, malye ninguk talibuka ulamika ati ara, yuk mutuku nang arye, obuka sirya daklamikce, tapu koubuka yuk pera mutuku boyayike,” nyabuka, malye yupu nyalamik. Yuk mutuku ninye arye, amalye yupu nyalamika deice arye, na si yanilamnikce, malye kililamnike.

²¹ Yuk mutuku ninye nirya arye, Israel ninye malye weik winilamik ning elilamikce, na si koprop malye kililamnika ati ara, ikin kanye bobuka ulamse. Ara, ‘Se, Israel ninye, sik malye unyaka deice arye, na Allah pia malye ton una kumnye bukni, yuk mutuku ninye nirya arye, na si ati, malye-malye weik nyaninyake,’ tenen, mambul kanye bobuka ulamse.

²² Ati ara, an nabi Yehezkiel biti, an deice nyapnukin yupu bobuka, sik Israel ninye ati nyalbinamlyame. Na Allah Yahweh Weik Eitamnye birye, aning-aning nirya talibuka, deice tam, Weik Erena Deiyoknye ununa ati ara, na tenenye touk wininune. Narye anggun dam ton winipnamne ning ara, anggun Israel ninye melina ati kum winipnamne. Anggun Israel ninye ara, anggun balalum mutuku noutamak nirya, malye weik ulamlumba, yuk mutuku ninye elilamikce, na malye una pia kumnye si ati, malye yupu nyabuka, malye ulininyake. Na si ati malye nyaninyaka ati, sik nirya arye, ‘Se, Allah elda weik mambulnye,’ tenebikirye, ‘Kel biknamniyak’ tenen ati, narye weik mambul pil donamne.

²³ Tonda, na Allah weik sisinanye, pia teleb siuk unulul bukni, anggun Israel ninye arye, ninye yuk mutuku nang noutamak umunce, malye weik umunba, sik yuk mutuku nang arye, na Allah si ati, malye yupu nyabuka, malye kilininyake. Ati, narye weik mambul pil dopneba, eibicopura, sik nirya arye, na si ati, ‘Se, dipkoprob Allah elda, weik telebnye anya arye, el si ara weik mambule’ tenen, kel biknamniyake. Tonda, anggun Israel ninye melinamsina deice arye, anggun dam weik mambul ning ton winipniba, ninye yuk mutuku ninye nirya eibikirye, ‘Se, dipkoprob Allah el tonok ulule. Elda aning-aning nirya talibuka, deice tam ulirye, el tenelye touk ulule. Elda Allah Yahweh ulule’ tenen, kel biknamniyake. Ayupu ara, na si Allah Yahweh arye nyapsine. Nara, aning-aning talibuka, deice tam Weik Erena Deiyoknye ununa ati ara, na tenenye touk, dipkoprob wininunye birye nyapsine. Ati, narye anggun dam mambul weik pil dopnirye, lakak kipniba, yuk mutuku kili sal nirya arye, ‘Se, Allah ara, weik mambulnye ulule. El si ara, pia telebuk ulule’ tenen, biknamniyake.

²⁴ Na Allah arye, mambul pil donamna ara, ani. Sik yuk mutuku nang arye, anggun Israel ninye tapu koubuka, yuk-yuk dabobinamsikba, ninye asik nang atonun ulamlum bukni, wini talak ara, narye anggun bobuka, anggun mutuku koproba tamubuka boyanamsine. Dan mutuku do nirya, dabinuka ulamunya babye, narye bulubuka anggun mutuku koproba, tamubuka deipsinirye, anggun mutuku koproba boyanamsine.

²⁵ Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.

²⁶ Tonda, narye anggunti,winiryuk talima ap, winiryuk kanye tenen ning ap, punubuka arepnamsine. Minop talak ara, anggun talima kat keil atonun wamsuk ning ara, dobukapnerye, talima namin kibuka kwepdeipsinirye, pia winiryuk ning punubuka arepnamsine.

²⁷ Winibuka teleb kipdeipsiniba, na yupu kekebuka diba tenepmunce, na amu tamuk unamlume. Ara, na Dib Kanye anggun talima pum tam dongopnamsine. Dongopsinyopura, na Dib Kanye melipsilya deice arye, anggunce, ‘Se, nun ni koproba, Allah arye nyasilye yupu nirya, moubuka kekepnamabe.’ Allah arye, ‘Wininamlulume. Aning ara, kum wininamlulume,’ nyapdeipsilye yupu, ‘Pia moubuka dobolbanamabe’ tenen, kanye lamapdongobuka, telebuk unamlume.

²⁸ Winipmunyopura, narye anggun apu yapu nang ati, areamse mutuku talibuka unamlume. Wini talak arye, dipdongobuka doryanamle talak noutamak nirya ara, anggunda na mapu koproba, ‘Naʼ tenen, kili sal umunba, nara anggun ni koproba Allah, anggun weik deiyoknye unamsine.

²⁹ Narye anggun malye ululum ning nirya ara, kum daneipsinirye, teleb kibuka un ninye uk, kipdeipnamsine. Winipsinyopura, anggun wa wibuka kounamlum ning, jagung atonun ning, el si gandum ara, narye nyapniba, pia teleb kibuka bongobuka paplirye, duk weik mouplibuk, weika arye libuka dinamlume. Duk pia telebuk mounamla ati ara, na mapu anggunda, din ning ton pia kum patanamsile. Kwaning patana li ton kum arenamsine.

³⁰ Tonda, naryuk anggun unamlumak ati, teleb tuku tonap tabakuka arenamsine. Winipsinyopura, anggun wa wibuka kounamlum ning, ayala-ayala nirya ara, teleb ubuka paplirye, duk weik mounamle. Tonda, anggunce duk moulamlye yo, ayala-ayala nirya koupmunba, teleb ubuka bongoplirye, duk weika arye mounamle. Ara, na melinamsina deice arye, nong kipdeipniba, bongoplirye duk mounamle. Winibuka melinamsina deice arye, din ning kanye imun ning ton, pia kum patanamsile. Narye wininamsin ati, sik amutuku-amutuku nirya unamak kili sal nirya arye, anggunti tuba tonap, malye yupu kum nyanamsiyake. Anggun ti ila tuba tonap, kum nalina unamsiyake.

³¹ Wini talak noutamak, pia telebuk upmunyopura, anggun minop talak malye pil dolamlum ning ap, malye winilamlum ning ap, malye kanye tenelamlum ning ap, tamubuka tenipmunce, ‘Se, nunda dipkoprob malye winilamupu,’ tenenamlume. Winipmunyopura, anggun awinilamlum ning nirya ati, ‘Se, dipkoprob nunda, pia malye weik winilamupa deice arye, talima malye nanguk ulamupu’ tenen, tenepmunce, ikin kanye bobuka, tenenamlume.

³² Se, Israel ninye ayala-ayala nirya, narye mambul pil donamsina ara, anggunti kum winipnamne. Anggunce moubuka tenelamlulume. Narye awininamne ning nirya ara, na pia teleb si ati wininamne. Anggun adiparyuk moubuka tenepmunce, ilil unamsile. Ara, anggun malye-malye weik ululum ning ap, malye kanye tenelulum ning ap ati, alye dakdamunce, ilil unamsile. Na Allah arye, anggun Israel yala kili sal nirya ati, nyapsine. Nara talinye kume. Nara, aning-aning nirya talibuka deice tam, Weik Erena Deiyoknye ununa ati ara, na tenenye touk wininune. Ati, narye ayupu nyapmasina ara, dipkoprob nong kunupnamle. Na Allah Yahweh arye nyapsine.

³³ Na Allah Yahweh aning-aning nirya talibuka, deice tam Weik Erena Deiyoknye ununye birye nyapsine. Narye tenenye touk wininune. Anggun Israel ninye arye, malye winilulum ning nirya ara, akunum kum kipdeipnirye, lyepropsinyopura, winipnamsine. Narye nyapniba, anggun minop talak ulamlum mutuku, tamubuka binunamlume. Tonda, yuk mutuku nang arye, anggun asik daklomikba, oldem uamuk mutuku uk tamubuka bimunce, ila tuba tonap anggun asik punubuka dopmunce, anggun mutuku koproba noutamakuk, teleb kibuka unamlume.

³⁴ Tonda, minop talak, yuk pera mutuku nang arye, anggunti tapu koubuka bobinamsikba, daulamlum talak noutamak ara, anggun mutuku koproba talye lo dem awamuk. Atalak ara, ninye yuk nang abisik balamikce, elilamikba, ninye kum ulamikce mutuku atonun uamuk. Winyamukce, amutuku tuku nirya, malye uamukba elilamik bukni, na Allah arye, amutuku tuku ara, ila tuba tamubuka teleb kipdeipniba, anggunce wa wibuka, teleb koun ning kounamlume.

³⁵ Winipnyopura, ninye yuk nang nirya eibikirye, ngalukunamake. Sikce nyanamake. “Se, anango. Amutuku noutamak tuku ara, minop talak malye uamuk bukni, wini talak ara, el urasin yuk upmale. Aning-aning nirya, kum papmanto tuku uamuk bukni, wini talak ara, pia teleb ubuka palule. Ara, Allah arye aning-aning kwepdeiamuk talak, Eden ban mutuku noutamak uamuk touk kipdeipnamle,” nyanamake. “Tonda minop talak, yu nang arye, Israel ninye obuka sirya dakikce, aik nirya daklomikba, asik oldemuk uamuk mutuku nirya ara, wini talak ila tuba punubuka dobikce, ninye diamuk weika arye, langdibuka unyake. Aunamaka deice arye, mikip weik upra banamake,” nyabuka, pia kanye deibikirye, ngalukunamake.

³⁶ Ati, na Allah Yahweh arye, anggun Israel ninye ap, anggun mutuku ap, anggun aik ap, anggun wa tuku ap nirya, ila tuba tamubuka, akunum teleb kipdeipnyopura, sik dana-dana tam unamak ninye, yuk-yuk mutuku nang ap, anggun neika unamlum nang ap arye, aning nirya eibikirye, kel biknamake. Ara, ‘Se, diba sik si erenyak Allah, el si Yahweh ara, pia dipkoprob aulule. Minop talak akunum dakuka bataklomikba, amutuku nirya, oldemuk uamuk bukni, wini talak ara, Allah elcuk ila tamubuka lipsisikuka dopmale. Tonda, tuku sesal lebuka, mikamuk wa wina pia kumce, batakamik mutuku uk, tamubuka teleb updeipmala ati ara, wini talak ara, wa winyake’ tenen, kel kibikirye, na siuk erenamniyake. Anyapmasin yupu nirya ara, dipkoprob na Allah Yahweh arye nyapmasina ati, dipkoprob narye, winipnamne. Talye ati kum nyapsine.

³⁷ Na Allah Yahweh arye, aning-aning nirya talibuka, deice tam Weik Erenanye ununa ati ara, na tenenye touk wininune. Narye, “Se na mapu koproba Israel ninyeo,” nyalamsise. Anggunce nati, ‘Se na ni Allah, nunti melipsilyame,’ nyabuka moronululum ning ara, kekesununa ati ara, narye melinamsine. Narye anggunti nyapsine. Ara, yupu nyapnirye, anggun yupa tonap tabakuka arepsiniba, domba basam poka pum tam dongobikiba, nukmanto kumce, pia weik ulamle touk upnin banamsile. Narye melipsiniba, anggunce mapu deipmunba, dadeipdanin banamak kili sal nirya ara, pia weik upre banamake.

³⁸ Winipmanto ara, minop talak na si eren ati, weik sum uamukba, na si eren ati ninye yuk-yuk danirye domba basam, pia weik bobuka, Yerusalem mutuku uku dongolyangalamikba, domba basam nukmanto kumce, pia weik ulamik touk, narye Israel ninye yupa pia weika kipdeipnamsine. Ninye yupa weik akunum ubikirye, minop talak yuk mutuku yu weik nang, yin bon nang arye, sik asik nirya uluplomikba, oldemuk ulamuk bukni, wini talak ara, amutuku nirya, ila tuba aik punubuka dobikirye, unamake. Ara, ninye yupa weik, kum nukmanto kibuka ulamikirye, amutuku aik nirya, ninye aniryuk langdipnamake. Winipnyopura, yata mutuku ninye do nirya, dipkoprob na Allah Yahweh ati, biknamniyake. Allah arye nyabuk.