Yehezkiel 35 - EipomekAllah arye, Edom mutuku nang wenepnamle ning ati, nyabuk yupu 1 Allah Yahweh, el yupu boyanuka, na Yeheskiel dam, yanuka nyapdeipnukura, kekepse. Ayupu ara, ani. 2 Se, anda ninye sirika arye, deipkiknye ulyame. Ati ara, ance asok erebuka Seir mutuku bukuk tam dilbimince, amutuku noutam unyak nang nirya ati, ‘Allah arye, anggun malye winilulum ning ati, aminyan talak wenebuka opnamsilca,’ nyabuka, laka nyanamlame. 3 Tonda, na Allah arye, anggun Edom tam, weik mutuku noutam ululum nang ati, na yu upniliba, sikti wenepnirye, ikin ning, anggun deice deipnamsine. Na Allah Yahweh arye, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine. Nara, anggun mal olana atonunye unune. Se, anggunda bicoe! Anggun Edom mutuku noutam ululum nang ara, na taruk mikip, anggun tam kum kipdeipsinirye, wenebuka opnamsine. Opsinirye, kum kipdeipsiniba, anggun ululum mutuku ara, kum danamle. Oldemuk upnamlarya! 4 Minop talak doprapce dipdongobuka, wini talak noutam nirya, anggunce weik asik dobuka ululum mutuku nirya ara, na Allah arye, ulubuka bataknamsine. Winipsiniba, anggun mutuku nirya ara, oldem upliba, tunim abuka, kum danamle. Winipsinya deice arye, anggunce nati, ‘Se, elda dipkoprob Allah Yahweh, eluk ululeʼ tenen, biknamlume. 5 Ara, min talak arye, deiyok kouamlumce, anggunce Israel tam nang nirya ati, yu ulamsukce, ‘Anang ara, nun pia like,’ tenebuka ulamlume. Atenena ara, pia kum batakalamlume. Pia tenenauk ulamlume. Tonda, minop talak ara, yuk mutuku nang arye, anggun Israel nang ati, ikin ning boyanuka, sik deice deibikba, ‘Se yata winiptibye do?’ tenen, talima dakalsaklamsukba, bikbik abuka biyik talak ara, anggun Edom mutuku nang arye, Israel nang kum melilamlume. Anggunce, anggun mal olan nang tam kipdoplumba, yuk pera mutuku nang arye, ninye on parang ya dopdakuka, Israel nang weik tonun olamikba, kanye imun weik ulamik. Winimunya ara, malye weike. 6 Ati ara, nara pia dipkoprob kam ununa ati, anyapnusin yupu ara, dipkoprob nong kunupnamle! Nara Allah Yahweh, aning-aning talibuka, deice tam erebuka, Pia Mikip Weik Deiyoknye unune. Narye lo arepnyeura, yuk mutuku nang arye, anggun tam nang ati, weik tonun olyanganamake. Anggun mutuku noutam ap, anggun nong deice ap ara, ining weik banamle. Deiyok ara, anggunce malye-malye winimunya ati, ‘Ninye obibiba, ining banamla ara, teleb ukaʼ tenen, kanye deibuka ulamluma ati, aminyan talak ara, abalul ining ara, anggun doplamsiliba, anggun nong deiceuk banamlarya! 7 Na Allah arye, anggun weik mutuku noutam, Seir mutuku noutam ara, iknapye tam (arah selatan) Edom mutuku ara, narye anggun domlum ning ap, anggun amutuku ululum nang ap, kum kipdeipnamne. Winipniba, tunim abuka kum danamle. Tonda, amutuku unamak nang ara, kum kipdeipnamne. Sik mutuku noutam ara, aminyan talak ninye ton, atam arye otam bana ati, pia kum bobanamake. Anggun mutuku ara, asik oldemuk upnamlarya! 8 Ara, mitik tonun kume! Narye lo arepnyeura, yu nang arye, anggun mutuku nang nirya obikiba, anggun mutuku deice nirya ara, ninye nong bulubuka deiplopnamake. Tonda, mutuku kon deice ap, anggun mutuku mek balamle ak ap, mutuku amu tam, lu mutuku nirya ap, mek sukum ap nirya ara, ninye on parang ya arye, sik tam nang obikirye, deibikiba, sik anang nong diamuk langdipnamlarya! Anggun ululum mutuku-mutuku nirya ara, narye obuka, sirya daknyopura, pia asik oldemuk upnamle. Aminyan talak babye, ninye ton amutuku noutam, pia kum yanuka unamake. Anggun mince dolamlum weik asik noutam ara, ninye ton tuba kum unamake. Tunim anauk upnamlarya! Aning nirya winipnamne deice arye, anggun Edom mutuku nang arye, ‘Se, dipkoprob elda, Allah Yahweh ulule. Elda tonokaʼ tenen, biknamnulume. 9 Narye anggun umunye mutuku ara, kum kipdeipniba, amutuku pia tunim anauk upnamle. Tonda, anggun weik asik doplum mutuku noutam ara, ninye ton pia kum unamake. Narye awinipnya deice arye, anggunce, ‘Se, diba eluk ululaʼ tenen, biknamnulume. Na Allah Yahweh arye, nyapdeipsine. 10 Sik yu nang arye, Israel tam ap, Yudea tam ap, obuka sirya daknin balamik talak ara, anggun Edom mutuku noutam ululum nang arye, nyaplume. ‘Kume, atam bitinye ara, sik Israel yala nang ap, Yehuda yala nang ap, sik unyak mutuku ara, yuk mutuku yu nang arye, akunum obuka sirya dakika ati, nuncuk amutuku tuku nirya, alubuka dopropnamabe. Ati, nun omutuku binuka unamabe,’ tenebuka nyaplume. Nyalamlum bukni, anggunce kum tenilamlum ning ara, anggunce, ‘Amutuku bitinye, talibuka unamap,’ tenelamlum mutuku ara, nara Allah Yahweh, amutuku noutam tuba ulamsirye, ‘Amutuku ara, na ning,’ tenyamse bukni, anggunce nati, kum tenelamnulume. 11 Ati ara, na dipkoprob kam tuba una atouk, na nyapnusin yupu ara, dipkoprob upnamlarya! Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, ayupu nyapdeipsine. Minop talak, anggun Edom mutuku nang arye, ‘Naʼ tenen, nang Israel ap, Yehuda ap ati, yu weik ulamsukba, malye weik winiplume. Tonda, sik talilamik ning nirya ati, ‘Nun dem aning nirya, alubuka doproptibye,’ tenelamlumce, nalibuka lululamlum ning ati, anggunce aning malye weik winilamlum touk, narye yu weik deice arye, anggunti wenebuka opsinirye, ikin ning anggun deice delinamsine! Anggunce, amutuku nang bitinye ati, ‘Nunda anang pia like,’ tenelamuluma ati nyapsine. Ati ara, narye anggun Edom mutuku noutam ululum nang ara, yupu bokdeipsinirye, wenepnamsina deice arye, weik kanye imun ning arepnamsine. Winipnamsina deice arye, anggun Edom mutuku nang nirya arye, ‘Se, Allah elda, dipkoprob pia mikip weiknye ulule. Nun deice ikin ning deibuka wenelamsuka ara, nun deiyok,’ tenepmunce, anggunce nati, moubuka biknamlume. Anggun kwang dakana ati, wenepsinirye, tuba tenenamne. 12 Tonda, aning nirya, narye winipsiniba, anggunce biknamnulume. Ara, na Allah Yahweh arye, anggun minop talak malye nyalamlum yupu ara, narye akunum kekebuka bikamsise. Ati, anggunce Israel yala nang ap, Yehuda yala nang ap ati, malye yupu weik tonun, nyabuka nalilamlum ning nirya ara, na akunum kekepse. Ara, anggunce, ‘Kume, Israel mutuku ulamik nang nirya ara, yuk mutuku nang arye, akunum obuka sirya dakmaka ati, tunim anauk upmala ati, sik talilamik ning ap, sik mutuku tuku ap nirya ara, nuncuk, talye luparabuka, alubuka doproptibye,’ nyalamlume. 13 Aninguk kum bukni, tonda, anggun Edom mutuku nang ara, anggun kanye erena deice arye pia kwalina yupu, na Allah deice nyalilamnulume. Anyalamlum yupu nirya ara, pia weik tonun tabakuka, malye nyanauk, na Allah ati, nyalamnulumba, akunum kekelamsise. 14 Anggunce na Allah ati, malye nyalamnulum yupu ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, ayupu nyapsine. Narye Edom mutuku nirya ara, kum kipdeipnirye, asik oldemuk upnamle. Ara, ‘Ninye yuk mutuku, mutuku sirya, im sirya nirya arye, aning eibicopura, kanye deipnamakʼ tenen, anggun Edom tam nang ati, wenebuka opnamsine. 15 Ara, anggun kwang dakna ati, winipnamsine. Anggun Edom mutuku nang arye, Israel yala nang talilamik ning nirya ati, ‘Kume nuncuk aning alubuka dopropbibirye, nuncuk aning talibibyakarye, kanye deibuka unamabe,’ tenelamlume. Aning nirya ara, na Allah arye, anggun Israel nang ap, Yehuda yala nang ati, bokuka arepsirye, ‘Aning ara, sikcuk pia talinamake. Amutuku ara, sik ning diamuk unamleʼ tenen, arepse. Bukni, anggun Edom mutuku nang arye, na mapu Israel nang, sik mutuku alubuka doproplumba, akunum tunim anauk ubukopura, anggunce kanye deiamlume. Ati, Israel nang ap, sik mutuku ap, pia tunim anauk uamuk touk, narye anggun Edom mutuku nang ati, wenebuka opsinyopura, anggun babye, anggun mutuku noutam babye, pia kum kipdeipsinyopura, asik oldemuk upnamle. Tunim abuka, oldemuk upnamlarya! Narye, kum kipdeipsiniba, tunim anauk upsilyopura, Seir mutuku noutam ap, Edom mutuku noutam ap, unyak nang nirya arye, ‘Se, dipkoprob Allah Yahweh ara, eluk Pia Mikip Weik Deiyoknye ululaʼ tenen, na siuk Yahweh biknamake. |
© 2023, Wycliffe Bible Translators, Inc. All rights reserved.
Wycliffe Bible Translators, Inc.