Yehezkiel 34 - Eipomek

Israel mutuku noutam peteren nang ati, winipmanto nyabuk yupu

¹ Allah Yahweh arye, na Yehezkiel dam yanuka nyapnuk. Nyapnuk yupu ara, ani.

² “Se anda ninye sirika aryuk deipkikba ulyamnye, Yehezkiel ance, sik Israel mutuku noutam ukirye, ninye deiyok nang ap, weik nang ap, peterena deiyok nang ati, nyapnulyame. Ara, na Allah Yahweh arye, nyapsine. ‘Se, anggun Israel mutuku noutam ululum ninye deiyok nang nirya ara, anggun kanye aryuk, kum tenelalulum do? Anggunda, domba weina deiyok nang atonun ululum bukni, angguncuk, anggun patan ninguk tenibuka, anggun din ninguk, kintinibuka dilulume. Bukni, anggun domba basam atonun nang ara, anggunce, ‘Dauplye,’ teneplumce, batakalulume. Ati, anggun deiyok nang arye, anggun domba basam atonun nang atibuk, pia kum teneplulumce, sik din ning, pia kum arelulume. Dipkoprob teleb winin ning ara, domba weina deiyok nang arye, sik domba basamuk tenibuka, sik patan ning arenyake.

³ Tonda, Israel nang arye, domba arebikceba, sik deiyok nang arye, adomba basam kalimna dobuka, pia teleb ning meta ap, tup teleb ning ap, domba basam bola ap, ‘Baju wipnamapʼ tenen, domba potong alubuka dopropmunce, anggun baju ongon ninguk dobuka, baju wibukapmunce, ongopnamlume. Tonda, winipmunce, el adomba basam teleb kibuka nelamle ning ara, anggun dem obuka dilulume. Amalye ning nirya winilulum bukni, anggunda domba basam ati, yupu nyabuka, pia moubuka kum weimunce, din ning ton kum arelulume.

⁴ Domba basam mitang ning ara, anggunce moubuka kum weimunce, tuba ton ap, mikip kum kipdeiplume. Tonda uk dinmalye domba basam, pia kum kwetelulume. Atonun, suse dilamle domba basam, moubuka el suse ara, moubuka kum kwetelulume. Tonda, saklyeba, yan cepliba, uk dilamle ning ara, yan cepmalye ning kitibuka, kum kwetelulume. Atonun ton, domba basam balirye, bisik kirikilul ning ara, anggunce, ‘Se, nun domba basam, dan sukum ulul do?’ tenen, dawangamlye ning ara, moubuka eibukapmunce, tamubuka kum boyangalulume. Tonda, domba basam tunim apmalye ning ara, ‘Dan sukum unmal do?’ tenen, pia kum elbalulume. Aning kum bukni, sik adomba basam nirya ara, yu deice ap, domba nong on deice ap, malye kanye bobuka unaryuk, adomba basam ati, malye ubuka weilulume.

⁵ Anggun Israel yala ninye deiyok nang ara, winibuka, pia malyeuk winilamluma ati, Israel nang, sik domba basam atonun unyaka ati, sik weina deiyok nang ton pia kum ati, sik adomba basam atonun nang nirya ara, bikbik abuka, bai tam yuk-yuk dabindomik ning ara, adomba basam nirya ara, talye bai tam daukirye, yu pia weik ulamle kam ning arye, adomba ara, talye luparabuka, obuka dilamikce, sirya dakmanto ulamik. Mangsa basam atonun ulamik.

⁶ Ati ara, na domba basam atonun nang, Israel nang nirya ara, bai sakuka, bikbik abuka, cang weik mutuku dup nirya ap, mutuku deice ap, bindomikce, dana-dana tam daulamik. Sik adomba atonun nang arye, ‘Amutuku-amutuku binuyabʼ tenen, moubuka tenina kumce, talye kanye bobuka, amutuku noutam nirya ara, nyabuka balamika ani, amutuku nirya ara balamik. Ati, winilamik talak ara, ninye tonok nang babye, ton moubuka kum tenipdeyukce, ‘Se, adomba basam atonun nang ara, dan sukum unyak do?’ tenen, sikti kum elamik.

⁷ Ati ara, se anggun Israel mutuku noutam, ninye deiyok nang kibuka, peteren nang ululum nango, na Allah Yahweh, aning-aning nirya talibuka, deice tam erebuka, mikip weik ununye birye, anggunti nyapsine.

⁸ Nara, dipkoprob pia kam ununa atonun, na nyapnusin yupu ara, dipkoprob nong upnamlarya! Anggunda, pia mounamlulume! Ara, na domba basam nirya ara, bai tam kam ulamle yu ning arye yangakirye, akunum obuka dilonyake. Ara, anggun moubuka weina deiyok nang ara, pia kum ati, na domba basam atonun nang nirya ara, dana-dana tam akunum bindopnakarye, sik bisik kiriklamik. Tonda, sik ninye deiyok nang nirya ara, ‘Naʼ tenen, nang, domba basam atonun nang, sik bisik kiriklamikba, talye sukum balamika nirya ara, ebuka kum boyangalamlume. Deiyok ara, anggunda, anggun ning atibuk tenilamlumce, ulalume. Anggunce, anggun bidamnye ati, din ning arelalulum bukni, na domba basam atonun nang ati, moubuka kum weimunce, pia kum arelulume.

⁹ Winibuka, malye weik winilamluma ati, ‘Se, anggun Israel yala nang ninye deiyok nango, nara Allah, aning-aning nirya talipsirye, Pia Mikip Weik Deiyoknye birye, nyapnusin yupu ara, pia moubuka kekepnamlume.

¹⁰ Anggun kanye mouplulume! Ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, nara anggun Israel nang ati, ninye deiyok kibuka ululum nang ara, nara anggun mal olananye akunum ununa ati, anggunti wenepsinirye, weik ikin ning, anggun deice deipnamsine. Ati, na domba basam nirya ara, adiparyuk, anggun dam arye tamubuka dopropnamake. Tonda winipnirye, na domba basam atonun nang ara, yata wiribuka talak arye ikin ulamika ati, anggun ninye deiyok nang arye, malye winilamunya deice arye winibuka ati, anggun dekna ati, wenepnamsine. Anggun Israel tam deiyok nang arye ton, na domba basam atonun nang, tuba kum kalikuka weinamlume. Anggunti ton, akunum bataknamsine. Anggun bidamnye arye, anggun patan ning ati, kum arelanamlume. Anggun ninye deiyok nang arye, na domba atonun nang, malye kipdeipluma ati, narye anang lyepropnirye, tuba tonap teleb kipdeipnamne. Winipnyopura, anggun ninye deiyok nang arye, anggun din ning atonun ubuka, tuba kum obuka dinamlume.

Winipmanto ara, ‘Allah arye el domba basam lyeproplirye, tuba tonap teleb kipdeipnamle,’ nyabuk yupu

¹¹ Aning nirya nyapmasina ara, talye ati kum nyapsine. Deiyok ara, ani. Na Allah Yahweh aning-aning nirya talibuka, deice tam erebuka, Pia Mikip Weik Deiyoknye ununye birye nyapsine. Ara, na babye, na domba basam atonun nang nirya ara, ebukaplirye, dobuka delilyanamne. Winipnirye, naryuk weinamne.

¹² Winipmanto ara, domba basam deiyoknye birye, el domba basam bai tam sakuka, dabinuka wangamlirye, tunim nyaplipa ani, ‘Dan sukum banmak do?’ tenen, ebukaplirye, bulupdeiplirye, tuba tamubukaplirye, teleb ubuka weilamle touk, narye, ‘Naʼ tenen, nang, Israel nang ati, winipnamne. Domba basam atonun, naryuk sikti, weinamne. Sik na domba basam atonun nang ara, sik dana-dana tam balamikce, sik bisik kirikamikba, daunyak mutuku noutam, daunyakak nirya arye, tamubuka boyanirye, tonok telebakuk dobuka deipnamne. Sik kirikamikce, dana-dana tam tunim apnik talak ara, weik dua ap, weik kunukna talak noutam ara, weik imun kanye talak arye, kirikuka tunim apnika ati, nyapne.

¹³ Aning dipkoprob ara, narye sik amutuku dana-dana tam nirya daunyak mutuku nang ap, yuk ninye asik nang mutuku nirya ap, ansinibuka daunyak Israel nang nirya ara, tamubuka boyanamne. Winipnyopura, bulupdeipnirye, sik mutuku uk, tamubuka bobinamne. Winipnamne talak ara, narye mutuku dup ap, Israel mutuku lilun tam ap, dobuka deipnirye, teleb ubuka weinamne. Tonda, sik pia teleb namin maning dam ap, mek teleb balamle mek dam ap, asukumuk dopdeipniba unamak talak ara, moubuka peterelamnirye, ‘Winamlume,’ nyalinamne.

¹⁴ Dipkoprop nyapne. Ara, narye sik aninye unamakak ara, pia maning teleb ubuka palul mutuku noutamuk, binuka kintinip deipnamne. Tonda, iknapye tam ap, Israel mutuku lilun tam ap, kintinip deipnamne. Abobinuka deipnamne mutuku ara, teleb ubuka, namin arye, dikdik sebuka unamake. Tonda, sik adomba basam, Israel mutuku kon deice arye, maning teleb namin arye dinamake.

¹⁵ Wininamak talak ara, naryuk, domba weina deiyoknye kibukapnirye, adomba basam ara weinamne. Winipnirye, ‘Winiplulume!’ nyapdeipnyeura, sik dakeiam asa arye, dikdik sebuka unamak mutuku nirya ara, kintinip deipnamne. Ati, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapsina ati, aning nirya ara, dipkoprob nong kunupnamle.

¹⁶ Atalak ara, dabinuka wangapdayik domba basam nirya ara, elbinamne. Tonda, ‘Seʼ tenen, kanye teniplirye, daulye ning babye, boyanamne. Tonda, suse dilamle ning ara, boyanirye, kitibuka kwetepnamne. Uk dilamlye ning babye, boyanirye, kwetepnamne. Bukni, meta teleb domba basam ap, mikip weik domba basam ap nirya ara, oplopnirye, kum kilinamne. ‘Winipnamne,’ tenyamse ning ara, naryuk, adomba basam weina deiyoknye unirye, pia teleb kibuka weinamnarya!

¹⁷ Moubuka kekepnululume, na domba basam atonun nang nirya ati, nyapsine! Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, domba basam weina deiyok nang arye, anggun domba basam nirya ap, yim basam ap, kil basam ap, kambing basam ap dipdekirye, teleb ning wibuka ‘Naʼ tenen, deibikirye, malye ning obuka winilamak touk, narye sik Israel nang nirya ara, yuk-yuk dipdenirye, pia teleb ning, yuk wibuka deipnamne. Malye ning babye, yuk wibuka deipnamne. Ara, yupu bokdeipsinirye, yuk-yuk wibuka deipnamsine.

¹⁸ Moubuka teninamlume. Ara, moubuka pia teleb ning dilulum ning ara, teleb bukni, tonda, anggun adiparyuk, bita mitik tonun, teleb ning babye, yata ning ati, anggun mikip arye yanibuka siknilulumce, abita malye kililulum do? Atonun, teleb mek puak arye, pia teleb mek dilulumce, sirya dakmanto ululum ning ara, mitik teleb bukni, amek puak tuba aupmalye, teleb mek uamlyak ara, yata ning deiyok ati, anggunce kum dinamlum ning babye, teleb mek pu aupmal bukni, anggun yan mek liklamlumba, malye kililulum do? Anggun ninye deiyok nang arye, aning atonun, tuba winilulume!

¹⁹ Tonda, na domba basam yuk-yuk ning nirya ara, pia yaniltalulum mutmuta ara, dinauk unamak ning ara, teleb do, malye do? Aning atonun, teleb mek bukni, anggunce mek pum anggun yan dongobuka, anggun yan mek likilongomunce, malye batakalulum ning ara, na domba basam arye dinamak ning ara, aning babye, teleb winilulum do? Kum aning babye malyeuk winilulume!

²⁰ Ati ara, naryuk, Allah Yahweh aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapne. Se, domba basam pia teleb ning ara, na adiparyuk yanuka bokeipnirye, domba basam nong teleb ubuka mikip wamlye ning yuk, nong bol malye wamlye ning ap, wipnirye yuk-yuk deipnamne.

²¹ Winipnamna deiyok ara, ani. Nong pia teleb domba basam arye, mitang domba basam ati, dokdonokuka otam-atam donoknamle. Ara sik takunya otam-atam dipdongobuka donoknamle. Winilamlum talak ara, sik kisok deice tiklamle ning, el si ara yang arye, mitang unmalye basam lukululume. Winimunya deice arye, sik mitang domba basam nirya ara, yuk-yuk mutuku dana-dana tam, bikbik abuka bindobikba, tunim abik.

²² Winibuka malye winilulum bukni, naryuk, na domba basam nirya ara, lyepropnirye, tamubuka boyanyopura, tuba teleb kipdeipnamne. Winipniba, anggun mikip domba atonun ululum deiyok nang arye, amitang domba basam atonun nang nirya ara, yu kanye bobuka, malye-malye winilamlum ning ara, ton ap pia kum wininamlume. Deiyok ara, narye na domba basam nirya ara, moubuka dipdenirye, yu pia weik malye winin ning, yuk wipdeipnirye, teleb ning babye, yuk wibuka boknirye, telebakuk deipnamne. Anggun nirya ati, moubuka dipdenirye, anggun winilamlum touk, yupu bokeipnamsina ati nyapsine. Wininamne deice arye, na domba atouk nang ara, aminyan talak tuba ton ap, malye kum kipdeipnamlume. Telebuk unamake.

²³ Aning nirya winipnamne talak ara, narye ninye deiyoknye Raja tonokuk, ‘Sik aninye nirya taliplirye, yupu nyanamleʼ tenen, na amu tam pil teleb kibuka dolulnye, el si Daud, domba deiyoknye atouk kipnirye, elti wibuka, sik dam deipnyopura, elcuk, ‘Naʼ tenen, nang, Israel yala nang talibuka, Raja kiplirye, yupu nyapnamle. Domba basam weina deiyoknye telebuk ulamle touk, Daud babye, ‘Naʼ tenen, nang, Israel yala nang nirya taliplirye, sik din ning teleb ninguk arepnamle. Areplirye, ‘Adomba telebuk unamakʼ tenen, anang ati, teleb kibuka kalikinamlule. Elti wipdeipyeba, Raja Daud, elcuk, na domba basam atonun nang nirya ara, ninye deiyok kiplirye, teleb kibuka weinamle.

²⁴ Atalak ara, nara Allah, na si Yahweh ara, anggun ni koproba Allah unamne. Tonda, ninye deiyoknye Raja Daud, na amu tam pil donululnye bira, wibuka anggun deice deipniba, elda ninye deiyoknye ulirye, aninye nirya talibuka, sik yupu nyana deiyoknye, pia unamle. Aning nirya ara, na Yahweh arye, Pia Mikip Weik Deiyoknye ununye birye, akunum nyapmasina ati, aning nirya, dipkoprob nong upnamlarya! Aning ara, na Allah Yahweh arye, ayupu akunum nyapdeipsine.

²⁵ Ati ara, nara pia mikip weiknye birye, sikda na amu tam mitang nang unyaka ati, na kanye aryuk, sik kalikuka melina ati, ‘Winipnamsine,’ nyabuka, nyalin yupu deice arye, anggunti teleb kipdeipnamsine. Winipnyopura, sikda olana kumce, kanye deibuka, pia teleb kibuka unamake. Ara, amutuku noutam, sikce talibuka wininamak ning nirya ati, teleb kipdeipnamne. Tonda, amutuku noutam bai tam yu unyak kam ning nirya, kum kilina atonun, narye anggun mal olan nang, dana-dana tam nirya yakuka dopkwetepnirye, kum kipdeipyopura, anggun ‘Naʼ tenen nang ara, dan mutuku do nirya, bai tam do, pata mutuku noutam do, weik asik tam do, kanye deibuka, pia telebuk unamake. Amutuku-amutuku noutam nirya babye, ilil una kumce, teleb aryuk manamake.

²⁶ Ati ara, narye sik amutuku unamak nang ap, sik unamakak ap ara, pia teleb kipdeipnamne. Winipnirye adiparyuk narye, ‘Asukumuk unamne,’ tenyamse mutuku konak ara, pia teleb kipdeipnamne. Amutuku unamak talak arye, mek pataplyopura, narye mok li arepnyeura, mok weik tonun cenamle. Winipnamne deice arye, anggun ap, anggun mutuku ap ara, telebuk unamle.

²⁷ Narye mok arepnyopura, mok cepliba, amutuku noutam tiknamle yo, yuk-yuk ning nirya ara, duk mounauk unamle. Sikce wa wibuka kounyak ning nirya ara, pabukablirye, teleb kibuka nonguk unamle. Winiplyopura, sik anang nirya, dakeiam asa arye dakuka, ilil una kumce, teleb kanye deibuka, sik mutuku tuku noutam unamake. Winilamikca ani, na mapu koproba Israel nang, ninye arye tapu koun ati tapu, el si rantai bulukulamak touk, narye sik yuk ninye asik nang mutuku binuka deiamikiba, adiparyuk loplopniba, kanye pia deipnamake. Anggun mal olan nang obuka, sirya daknamne atia. Winapnamne deice arye, akunum winipnyopura, sik anang nirya arye nati, ‘Se, diba elda dipkoprob Allah Yahweh ululeʼ tenen, biknamniake.

²⁸ Winipnamne talak ara, dana-dana tam mutuku noutam, nati walwal tenepnikirye, nati diba kum tenebikirye, na kum bikinamniyak nang ara, tuba ton ap, ‘Naʼ tenen, nang dam yanuka obikirye, sik bona nirya, alubuka kum dopropnamake. Aninguk kum bukni, tonda, yuk talye bai tam ara, yu weik kam ulul ning arye, yanuka kum obuka, ‘Naʼ tenen, nang kum dinamake. Atalak ara, ‘Naʼ tenen, nang nirya ara, pia teleb kanyeuk bobuka unamake. Ton ninye arye, ton ninye ati, pia ilil kum kilinamake. Kanye deibuka, neikauk unamake.

²⁹ Tonda, ‘Sik nirya ara, din patana pia kum unamakʼ tenen, narye sik wa wina ati, tuku nirya, pia sukun tuku noutam arepnamne. Winipniba, sik wa wibuka koubikiba, nong weik upnamlarya. Sik ti, din patana talak ton, pia sik dam, amutuku noutam kum yanganamle. Aning atonun, dana-dana tam nang, sik yuk mutuku noutam daunyak nang ton yakirye, ‘Israel nang ara, nun like. Sikda malye nang dem unyaka ati, bona patan nanguk unyake,’ nyabuka, nalibuka malye yupu ton, pia kum nyanamake.

³⁰ Aning nirya winipnamna deice arye, ‘Naʼ tenen, nang, Israel nang nirya arye bikinamake. Ara, anggun Israel nang nirya, ‘Naʼ tenen, nang nirya arye, nati moubuka biknamniyake. Ara, ‘E, dipkoprob, Allah el si Yahweh ara, nun ni koproba Allah ulule. Elcuk nunti, pia melibuka kalikisulule. Nunda, nun apu koproba, Israel birye deibukba, dadeipdanin yangalamika ani, yanuka deipsikba, atam unyap nang ara, Allah Yahweh, el ‘Naʼ tenen, nang unyabe. Elcuk nunti, pia melibuka kalikisulule,’ tenebikirye, biknamake. Ati nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti akunum nyapsina ati, aning nirya ara, dipkoprob nong upnamlarya, nyapsine.

³¹ Na Allah arye nyapsine. Diba, anggunda na domba basam atonun nang ululuma ati, na mapu koproba ululume. Winibuka umunyeba, narye anggun patanmasilye ning nirya aresunune. Ati, anggunda dipkoprob anyak arye, nara anggun ni koproba, Allah unune. Ati nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti ayupu akunum nyapdeipsine.