Yehezkiel 33 - Eipomek

Allah arye, ninye kalikin nang ati, nyabuk yupu

¹ Allah Yahweh arye, na Yeheskiel dam yanuka nyapdeipnuke. Ayupu ara, ani.

² “Se, anda ninye sirika arye, deipkiknye ulyama ati, an mutuku nang ati, nyapnulyame. Yata mutuku do nirya, tonok mutuku noutam ara, na Allah arye, ton mal olana yu nang dopdeipniba, olyanganamak talak ara, amutuku nang ara, winipnamake. Amutuku ninye arye, ‘Nun mutuku mal olan nang, olyanamsiyakʼ tenen, sik kan-kan arye, kalikna deiyoknye ton wipdeibikiba, akalikinanye birye, pia moubuka dinauk unamle.

³ Akalikin deiyoknye birye, dinmalya ani, amutuku ninye on nang ati, yanganmakiba eiplyopura, el adiparyuk, ‘Anango, nun olyasiyake,’ nyana ati, weik lelim nyan ning, el si terompet arye, pong-pong aplyeba, amutuku ninye arye kekebuka bikikirye, ‘Ura, nun mal olan nang ara, yanganmakʼ tenen, moubuka kalekinamake.

⁴ Bukni, anye birye, aweik lelim nyan ning, pong-pong apliba, amutuku nang kan-kan, ton nang ara, alelim kekepnamak bukni, sikce, ‘Yo daupmalye, kum kintinipnuyabe,’ tenebikirye, talye kanye bobuka ukcopura, sik bidamnye aryuk, malye unyake. Ara, lelim kekepnamak bukni, moubuka kum unamak nang ara, ninye ona ati, yu nang yakirye obikiba, amutuku nang dipnamake. Bukni anang opnamaka deiyok ap, ining ap ara, sik nong deiceuk upnamle. Deiyok ara, ‘Yu nang olyanamsiyakʼ tenen, pong-pong nyan ning, terompet ara, kalikna deiyoknye birye, akunum pong-pong nyabukba, anang kekebik bukni, sik babye moubuka kum winipmeka deice arye, anang arye amutuku nang obikba dibika ati, deiyok ara, sik uka. Sik ining ara, sik deiceuk upnamle.

⁵ Ara talye ati kume. Kalikinanye birye, terompet lelim weik nyapliba kekebik bukni, sikda moubuka una kum deice arye, sik mal olan nang arye, anang obike. Ati, sik ining ara, sik deiceuk upnamle. Bukni, lelim kekebikirye, moubuka unamak nang ara, kanye moubikirye, kintinipting toura, ninye ona ati, yu nang yakirye optinga babye, kum dipnamake. Anang ara, dipkoprob lyepdanamake.

⁶ Bukni, amutuku dam kalikina deiyoknye birye, sik mal olan nang ati, yanganmakiba, eiplye bukni, elce weik lelim nyan ning, terompet kum pong-pong nyaplirye, kum laka nyaplyopura, amutuku nang ara, kum kekebikirye, kanye kum moubikirye, talye kanye bobuka unmakca ani, sik mal olan nang arye yanuka, amutuku nang kan-kan arye, ninye ton opnamake. Obikiba dipnamak nang ara, sik malye tuba ulamik noutam aryuk, obikiba dipnamake. Dipnamak bukni, sik amutuku nang opnamaka deiyok ap, ining ap ara, amutuku kalikina deiyoknye deice arye deipnamne. Ati ara, amutuku nang oplopnamak nang, sik kwang dakna ati ara, na Allah arye, amutuku kalikina deiyoknye, yupu kum laka nyabuknye, el deiceuk deipnamne. Narye elti, ikin ning deipniba dopropnamle.

⁷ Aning atouk, se anda Yeheskiel, ninye sirika arye deipkiknye ulyam bukni, narye anti, ‘Israel yala nang, sik kalikina deiyoknye unamleʼ tenen, akunum wipdeipkine. Dan talak do nirya, na yupu an deice yanuka, ‘Nyapnulyame,’ nyapdeipkiniba, kekepminye talak ara, ancuk sik Israel nang dam bimince, ‘Allah arye ayupu nyapdeipnasile,’ nyabuka, laka nyanamlyame.

⁸ Aning atonun ara, na Allah arye, sik pia malye weik unyak nang nirya ati, ‘Anggun malye weik ululum nango, anggunda opsiniba dipnamlume,’ nyapdeipnye, bukni ance, sik kekenak arye, ‘Anango, anggun malye weik umunya ara, adiparyuk batakmunce, tamubuka teleb un bisikuk binamlume,’ nyabuka, laka kum nyapmunyeba, sik malye wininyak ning kum batakikiba, aminyan yu nang dopdeipniba yakirye, amalye un nang obikiba deibikcopura, sik malye tuba wininamak talak aryuk dipnamake. Bukni, sik winipnamaka deiyoknye bira anca. Sik amutuku nang opnamaka ap, sik ining ap ara, an deiyok uka. Sik dipnamaka kwang dakna ati ara, na Allah arye, an deiceuk deipnamkine. Narye anti, ikin ning deipkiniba dopropnalame.

⁹ Bukni, ance sik pia malye ulamice nang ati, “Anango, kanye mouplulume! Anggun malye ulamlum ning batakmunce, tuba tamubuka, Allah dam yamunce, teleb un bisikuk umunyeba, elce lyenamsile,” nyabuka, laka nyapminbuk, amutuku nang kum kekebikirye, malye tuba winilamikiba, dopdeipnamne yu nang arye, obikib, dipnamake. Dibikcopura, deiyok ap, sik ining ap ara, sik deiceuk upnamle. Narye ikin ning, sik nong deiceuk deipniba aupmale. Bukni, an kalikna deiyoknye deice, ikin ning kum deipnamkine. Ance, “Sik kanye mouplulume, malye winilulum ning ara, bataklulume,” nyabuka, laka nyapminya deice arye, akunum lyepdopnamlame.

Allah arye Israel nang ati, “Anggun malye winilamlum ning ara, anggun deiceuk, ikin ning yasilyeba, dopropnamlume,” nyabuk yupu

¹⁰ Ura, Allah Yahweh arye, na Yehezkiel biti yanuka nyapdeipnuk yupu ara, ani. Se, anda ninye sirika arye, deipkiknye binya arye, sik Israel nang ati nyapnamlame. Ayupu ara, ani. Anggun Israel yala nang arye, nyalulume. “Se nunda, Allah arye, ‘Winipnamlume, aning ara kum winipnamlume,’ nyapdeipsuk yupu ara, moubuka kum kekelamuburye, yaniltanauk unyaba ati, nun kanye talima noutam ara, ikinuk usulule. Nunda, ‘Se yata deiyok ati, malye-malye wininyap do?’ tenen, ikin kanye bobuka unyabe. Tonda adeice arye, nunda pia bol malye dem upnin banyabe. Ikinuk usulula ati, yata winibuka tuba kam uptibye do?’ nyabuka, anggun mamun asilalulume,” nyapnalame.

¹¹ Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.

¹² Nyapminyopura, anda ninye sirika arye deipkiknye birye, ayupu ton tabakuka, an yala nang, Israel nang ati nyapnalame. “Na Allah arye, ‘Aning ara winipnamlume. Aning ara, pia kum winipnamlume,’ nyapdeipsise yupu, ton nang ara, aninguk kekebikirye, moubuka talibikirye, diksukumuk unyake. Bukni, anang arye, na yupu yanibikirye, malye ubicopura, sik mince teleb winilamik ning deice arye, tamubuka kum teleb kipdeipdatingce, kum lyepdatinge. Tonda, sik malye winilamice nang ara, na yupu yanilobikirye, malye wininyak bukni, aning nirya batakikirye, tamubuka na dam yanamak nang ara, diksukumuk wininamake. Ati mince malye winilamik ning ara, namin kipnirye, anang wenebuka kum opnamne. Atonun, mince ton nang ara, na yupu taleamikce, diksukumuk upnin yangalamik bukni, aminyan talak aning nirya batakikirye, tuba ton ap, malye-malye ubicopura, mince teleb ulamik ning deice arye, kam tuba kum unamtinge. Anang ara, wenebuka opnamnarya. Tonda telebuk upnin yangalamlinye bira, aminyan malye upnamlanye bira, tamubuka kum teleb kipdeipnamne.

¹³ Ati na Allah arye nyalin yupu akunum nyapdeipse. ‘Na yupu kekebuka talibikirye, diksukumuk ulamice nang ara, lyepdopnamsine. Kam unamlume,’ nyapse. Bukni, min talak telebuk upnin yangalamlinye bira, aminyan talak teleb ning bataklirye, tuba tamubuka deiyok koubuka, malye winin ninguk uplirye, ‘Kume, daupmalye, tuba malye-malye winiptinye. Min talak telebuk winilamse deice arye, Allah arye aning teniplirye, lyepdopnamnil,’ tenebuka, malyeuk wininamlanye bira, na Allah arye dipkoprob kum lyepdopnamne. Aninguk teninamlanye bira, el walwal arye teninamle. El anye min talak, teleb upnin yangalamuk ning ara, narye ton ap kum tenenamne. Anye bira, na yupu yanibuka, aminyan malye-malye uplyopura, el malye tuba unamle talak ara, dipliba, el dekna ara, dibin ninguk dopdopnamle.

¹⁴ Bukni, narye, ‘Malye-malyeuk winilamlinye bira, wenepniba akunum dipnamle,’ nyapse ning ara, dipkoprob dipnamle! Bukni, amalyeuk winilamlanye bira, aminyan talak, el malye winilamlye ning nirya bataklirye, tamubuka na dam yalirye, na yupu nyalul touk, diksukumuk teleb winiplyopura, el anye bira, kam unamlarya.

¹⁵ Teleb winin ning ara, winipmanto ning ton nyapnusine. Ara, anye, ‘Min dipnamne,’ teniplirye, diksukum winin ning winipnamle ning ara, ani. Elce ninye yuk nang ning alubuka dololye ning, anang ati, ila tamubuka arepnamle. Tonda, aning-aning pataplinye birye, ‘Amio, yo bok tia ati, arepnutumba, aminyan talak aning nirya tamubuka arepnamkine,’ nyabikiba, el anye birye, ‘Yo, yo bok tia arepkitinye bukni, ‘Aning nirya tamubuka arepnamnilamʼ tenen, el lakina ati, abona dobuka, na dam deipniminba, aminyan talak, na yo bok arepniminyopura, abona tamubuka arepnamkine,’ nyalin yupu nyaplyopura, dipkoprob abona dobuka, aning deiyok nang ati, tamubuka arepnamle. Tonda, ninye deiyok nang arye do, na Allah arye do, ‘Aning winipnamlume. Aning ara, pia kum winipnamlume,’ nyapdeipmap yupu, kekeplirye, aninguk talibuka winipnin yanganamlanye bira, aning tenipnirye, anye biti kam una deiyok ning arepnyeura, dipmalya babye, aminyan talak dipkoprob kam pia unamle.

¹⁶ Ati anyapman ning atouk ululnye birye, el mince malye winilamuk ning nirya ara, ton ap kum tenenamne. Anye el malye winilamlye ning nirya batakuka, diksukumuk teleb winilyopura, kam tuba unamle. Tonda, deiyok nang arye do, na Allah arye do, ‘Aning wininamlume. Aning ara, pia kum wininamlume,’ nyapdeipne yupu, moubuka taliplirye, diksukumuk ululnye bira, el malye winilamuk ning, narye kum kipdeipniba, telebuk winilamla deice arye, aminyan talak kam pia unamle.

¹⁷ Aning nirya laka nyapmasin bukni, an mutuku nang, Israel nang arye, ayupu nyanyake. “Kume, Allah Yahweh, elce nunti nyasilye touk, kum ulule. Aning ara, teleb un ning kume. Nunce winilamupu touk tenibuka, kum wenepsulule. ‘Elce tenelye touk yupu bokeipsilirye, wenesulule,’ nyabuka, malye nyaninyake. Bukni, dipkoprob teleb kum winilul ning ara, sik Israel yala nang arye wininanyak nang ara, dipkoprob kum wininyake. Malye ninguk wininyake.

¹⁸ Nyaninyak bukni, narye dipkoprob nyapsine. Yata nang do nirya, na nyanun yupu talibuka, telebuk upnin yangalamika ani, tuba ton ap tamubuka, teleb ning batakuka, malye winin ninguk talibuka, wininyak nang ara, yupu bokdeipnirye, wenepnyopura, dipnamake. Ara, telebuk winipnin yangalamika ani, tuba tamubuka, pia malye ning winiplinye bira, el amalye winipnin yangalamuka deice arye, wenepniba dipnamlarya. Pia kam kum unamle.

¹⁹ Aning atonun, malye-malye winin ninguk talibuka, winipnin yanganamlanye bira, el bidamnye birye, ‘Se, nara malye unune,’ teniplirye, malye ning nirya bataklirye, tamubuka teleb diksukum ninguk winiplyopura, diksukum ning winipnin yangalamlya deice arye, el anye bira, kamuk unamlarya. Deiyok ara, el malye ning nirya batakuka, tamubuka teleb wininamla deice arye, pia kam unamle.

²⁰ Winipnamle bukni, sik Israel mutuku noutam unyak nang arye, ayupu nyanyake. “Kume, Allah Yahweh, elce yupu bokeipsilirye, wenebuka osulul ning ara, teleb winin ning kume. Nun tenenyaba atonun ning, kum winisulule,” nyaninyake. Ati, na Allah arye, anggun Israel nang nirya ati, anggun winilamlum touk, moubuka dipdenirye, yupu bokeipnirye, wenepnamsine.

Weik asik domik ning, ‘Yerusalem mutuku lokuka saknamle,’ nyabika ati, nyabuk yupu

²¹ Babel mutuku nang arye, nun Israel nang obukapsikce, tapu koupdongobuka, sik mutuku tamubuka bobinamsikba, daulamupua ani, keting tamun 11 tahun akunum kibukura, wala 10 deice bukni, awala deiyok koun talak noutam, tanggal 5 kibuk sum ara, tonoknye birye, na dam yanuka yupu nyapdeipnuke. Ara, yu weik nang, Raja Nebukadnesar, el yin talen nang arye, Yerusalem mutuku nang obuka, sirya dakikba, anye tonok kum obika ati, bai sakuka, bikbik abuka, na dam yanmokce nyapnuke. Elce nyapnuk yupu ara, ‘Se, weik asik dolamupuak, kota Yerusalem ara, nun mal olan nang arye, akunum dakuka batakmaka atia!’ nyabuka, laka nyapnuke.

²² Ura, anye min kum yanmok sum, ayupu bobuka, kum laka nyalyanmanuk talak, keting otam kumupnamok keting ara, lukunyan kipnamok talak ara, Allah Yahweh, el mikip weik ara, na kanye talima deice deipnuba, narye, ‘Se, aning ara, yata wiripnamnil do?’ tenen, winipdebuka, Allah arye na yupu tamubuka arepnuke. Mince yupu kum nyapmanto unmasirye, daunmasa ani, alukunyan yanamok talak ara, Allah arye, pil dopnuka deice arye, na yupu tamubuka nyapmanto kipse. Atalak ara, Allah Yahweh arye, yupu nyapdeipnuke.

²³ Allah Yahweh arye, na dam yanuka nyapnuk yupu ara, ani.

²⁴ Se, anda ninye sirika aryuk, deipkiknye ulyame. Anggun Israel mutuku noutam, weik asik ap, mitik asik ap dobuka, ulamlum mutuku asik ara, oldem kibukak bukni, amalye mutuku tuba unyak nang arye nyaninyake. Anggunce, ‘Kume, Abraham bira, tonoknye ulamuk bukni, elce amutuku tuku noutam nirya ara, dopdomukce, amutuku noutam ulamuk. Aulamuk talak ara, elda tonoknye ulamuk bukni, amutuku-amutuku nirya dopdomukce, amutuku noutamuk ulamuk. Bukni, na kanye ara, wini talak unyap nang, nunda anang pia weik unyaba ati, dipkoprob ning ara, ance nunti, amutuku arisiminyeba, amutuku pia talibuka ubirye, nun mutuku koproba kipdopnamabe,’ nyaninyake.

²⁵ Ati ara, ance sik Israel nang ati nyapnamlame. “Na Allah Yahweh, aning-aning nirya talibuka, deice tam erebuka, mikip weik ununye birye nyapkina ati, na yupu nyapdeipkin yupu ara, ance bobuka, sik dam laka nyalbinulyame. Ayupu ara, ani. Narye, ‘Aning ara, na like,’ nyapsise bukni, anggunce tuba malye weik winilulum ning ara, laka nyapnusine. Ara, anggunda ining tuba unmalye ninguk, kwalipmunce, ining kipmanuk dobuka dilulume. Tonda, ‘Nun ni birye melipnamsilʼ tenen, anggunda isa mer siuk erelulumce, ninye on nang ululume. Winipnin yangalamluma deice aryuk, pia mandipna kanye bolamlumce, ‘Amutuku nirya ara, nun mutuku koproba kipnamsilʼ tenen, Allah arye, amutuku tuku dobuka, nunti arepnamsile,’ nyaninyake.

²⁶ Anggunda ninye on parang ya boyanuka, aya arye ninye olulume. Tonda, isa si erelulum talak ara, pia malye-malye winin ning ton winilulume. Awinin ning nirya ara, ‘Na Allah arye, aning nirya ara, na pia likeʼ tenenuna ati, “Aning nirya ara, winina meme!” nyapsise. Bukni, anggunce apia malye winin ning tuba winilulume! Aninguk kum bukni, anggun sal nirya arye, anggun kayapu nang arye, akunum domik kilapu, dukunubuka ubula talye-talyeuk yolulume. Ati, anggun moubuka tenipdelulume! Aning pia malye winin ning nirya winimunya deice arye, na Allah arye, amutuku tuku nirya arepsinyeba, dopropnamlum do? Kume, ara kum winipmanto nyapsine.

²⁷ Ati ara, anda Yeheskiel birye, sik Israel nang ati nyapnamlame. “Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Nara Allah, dipkoprob kam pia unune. Aning dip ulamle touk, narye nyapnusin yupu ara, ‘Se, dipkoprob yupu nyapmasileʼ tenen, kekepnululume. Ara, dan mutuku do nirya, pia weik asik ap, mitik asik ap dolamika ara, wini talak oldem mutuku unyak nang nirya ara, yu nang arye olyakirye, opsikiba, dipnamake. Tonda, ninye weikak kum bukni, pera pata mutuku noutam unyak nang nirya ara, bai tam talye kam ulye yu ning dopdeipniba, anggun dam yanuka, anggun nirya obuka dipnamsile. Tonda, mutuku dup bukukak ap, keil deiya pum tam duknulbiyik nang ap nirya ara, narye kanye imun weikuk dina deiyok ning arepnyeba, anang diplyopura, sik nirya dipnamake.

²⁸ Amutuku noutam nirya ara, na Allah arye kata sukumuk kipdeipniba, anang ton kum unamake. Amutuku-amutuku nirya ara, pia tunim apnamle. Winipnamna deice arye, minop talak sikce, ‘Nun mikip weik arye, amutuku nirya talibuka unyaba,’ tenebuka maknya kintinilamlum ning ara, narye kum kipdeipnamne. Kwalipmanto ning nirya ara, sirya dakuka, kum kipdeipnamne. Aning akunum winiplyopura, Israel mutuku kon bukuka dam nirya ara, tunim anauk uplyeba, anang ton, amutuku bisik mandipna kanye bobuka, kum banamake.

²⁹ Narye, ‘Aning ara, na pia lik ning ati, winina ara, pia meme,’ nyapse ning bukni, amalye ninguk talibuka winilamika ati, adeice arye sik mutuku noutam unyak nang ap, amutuku teleb ning ap, sik asik ap nirya ara, obuka sirya daknyopura, oldemuk kipdeipniba, tunim anauk upnamle. Winipnye deice arye, amutuku nang nirya wenepnamne talak ara, sik nirya arye, ‘Se, aning nirya ara, dipkoprob Allah Yahweh, elcuk winibukaʼ tenen, nati biknamniake.

Aminyan talak ara, sik Israel ninye nirya arye, ‘Se, nun kan-kan nyalamsuknye bira, dipkoprob nabinye ulamuke,’ tenepnamaka ati, nyabuk yupu

³⁰ Allah Yahweh arye, na Yeheskiel biti, nyapdeiamnuk. Se, anda ninye sirika arye, deipkiknye ulyame. An mutuku nang arye, anti yupu nyakikce talak ara, nyalanyake. Ara, sik mutuku noutam, weik asik dobuka ukirye, bai tam poka dam, ara weik cang keil poka tembok dukdongobuka dobik ning dam ap, tonda sik asik yuk-yuk dam ap, bulubuka epdakirye, anti nyalanyake. Tonye birye, tonye biti, sik bidamnye nyalanyake, “Winira yalulume. Arup ara, nun ni koproba Allah Yahweh arye, nyapdeiamsuk yupu, kekena ati, nabi Yeheskiel dam binuka kekepnuyabe,” nyalanyake.

³¹ Dan mutuku do nirya winilamak touk, amutuku unyak nang babye, ‘Mambul weik yupu kekepnuyapʼ tenen, ninye weik tonun bikbik abuka bulubikirye, anang arye, an dam yanuka bunyake. Wininyaka ara, na Allah, na mapu koproba atonun winibikirye, weik tonun an dam yakirye, an yupu nyanamlam ning ara, pia moubuka kekenamake. Amol deice arye kekenyak bukni, ance, “Aning ara, winipnamlume. Aning ara, kum winipnamlume,’ nyabuka, nyapminye ning ara, sikce moubuka talibikirye, kum dobolbanamake. Deiyok ara, sik anang ara, sik si bam bol deice arye, ‘El kanye deipnamsilʼ tenen, kekena teleb yupu nyapnamak bukni, sik talima noutam arye teninamak ning ara, pia yuke. Ara, sikce, ‘Nun tenina deice arye, tilila yupu nyabibiba, yuk nang arye arepsikiba, nun diamuk teleb kipdeipdatibye. Nun dem aryuk, teleb ning dopropnamabe,’ tenenyake.

³² Winipmanto ara, ani. Sikce anti tenekenyaka ara, ‘Anye Yeheskiel bira, mot nyana kel weiknye binya arye, sal ap, kilapu ap, kanye deipdakirye, pia kanye teleb mot nyalanyake. Ati, sikce anti, ‘Kume, elda pia kanye delin ninguk nyalule,’ tenekenyake. Tonda, ‘Elda mot nyana ati, el yupu lelim ara, kekena pia teleb ning nyasulule. Tonda, mot nyana ati, gitar ona kelnye ulule,’ tenenamkiake. Ati ara, ance nyanamlam yupu ara, sikce amul deiceuk kekenamak bukni, moubuka kum tenebikirye, aning kum winipnin banamake.

³³ Ati ara, narye anti, ‘Winipnamkine, anang obuka sirya daknamne. Amutuku nirya malye kipdeipniba, asik oldemuk upnamle,’ anyapmakinak nyanalam yupu nirya ara, dipkoprob nong upnamlarya! Moubuka kekepnulyame. Na Allah arye, anyapmakin yupu nirya ara, dipkoprob yanuka, anggun deice deipnamne! Ati, aning nirya akunum nong uplirye, sik deice deipnyopura, atalak arye, anggun amutuku nang nirya arye, ‘Se, wini talak nunce kibabe. Anye Yeheskiel bira, nun kan-kan noutam ulamuk bukni, elda dipkoprob nabinye ulule. Allah arye, ‘Nyapnulyame,’ nyaplyeba, anye birye, laka nyalyangasulule. Nun dam ulamukce nyalamuk yupu ara, akunum nong kunupmala ati, elda dipkoprob nabi ulule,’ tenebikirye, biknamkiake. Na Allah arye nyapkine, nyabuk.