Yehezkiel 32 - Eipomek

Mesir mutuku taleamuk Raja ati, weik mek pum tam ulamle Buaya bal deice ati, kiklibika ati yupu

¹ Babel mutuku nang arye, nun Israel nang obukapsikce, tapu koupdongobuka, sik mutuku koproba tamubuka bobinamsikba, daulamupua ani, keting tamun 12 tahun akunum kibukba, wala 12 deice bukni, awala deiyok koun sum, tanggal 1 kibuk sum ara, Allah Yahweh arye, na Yeheskiel dam yanuka nyapdeipnuke.

² Se anda ninye sirika arye deipkiknye ulyame. Ance Mesir mutuku ninye deiyoknye, Raja Firaun biti, ‘Se, Allah arye wenepnamkila ati, opkiliba, ninye arye tuku palibuka weipkikirye, kanye ikin mot nyanamaka ati, anda bicoe,’ nyabuka, yupu mikip arye nyabuka, wenepnulyame. Na yupu nyapdeipkin ning ara, ance Raja Mesir dam binuka nyapnulyame. Ara ani. Firaun ance, ‘Ninye mutuku sirya, im sirya nirya daunyakba, anggun kan-kan arye, nara yu weik pus, el si singa mikip weik ulamle touknye ununeʼ tenen, kanye erelanyakce, mutuku sirya, im sirya nirya unyak nang ati, ‘Sikda na amu tamuk unamake,’ tenelulume. Bukni, winipmanto ara, anda buaya bal, laut mekwen lilun ulamle ning, el si ara buaya, mekwen pum bisik balamak touk ulyame. An yan arye mekwen pum tam yanibuka baminba, amnyok mek nirya bol pilamle touk ulamle. Anda aning atonunye ulyame.

³ Na Allah Yahweh arye, aning-aning nirya talibuka, deice tam erebuka, pia mikip weiknye birye nyapkine. Ninye mutuku sirya, im sirya nirya bulubuka, wekelbikirye, dinamak talak ara, narye anggunti, ikan yangabuka don ning arepnyeba, ninye weik tonun, aning dobikiba, aning pum tam wekminba, aning arye, an adiparyuk tomopnamkiyake. Atalak narye anti, namin kipkiniba, asukum weik bulupmakce nang nirya ara, na ikan yangabuka don ning arye, mekwen pum tam arye, an nong erebuka, dopkikirye, kata binuka deipnamkiyake.

⁴ Winipminba, narye an dobuka, tuku kata deice binuka deipnamkine. Ara, narye an dobuka, kata sukum donoknamkine. Winipkinye talak ara, narye nyapniba, maka yuk-yuk ning nirya ara, ‘Aning nong dipnuyapʼ tenen, an nong deice, amubuka bulyanganamkiyake. Tonda, tukwak mutuku, im sirya, mutuku sirya nirya ara, talye kam unyak ning nirya, ‘Aning nong dibuka, sirya daknamabeʼ tenen, an nong deice bukuka dibikirye, sirya daknamkiyake.

⁵ An nong dipkikirye, sekukapkikirye, bataknamkiyak ning ara, narye dobuka mutuku deice nirya ap, mutuku bukuka lilun tam nirya ap ara, donokiniba, an nong sekdoba aryuk langdiplirye, amutuku nirya ara, lyunauk unamkile.

⁶ An ining ara, tuku deice nirya diklopniba sakuka balamlirye, welebanmalya ani, mutuku deice ton banamle. Tonda, mek pu doplirye, balamle mek nirya ara, an ininguk kipliba, langdipnamle.

⁷ Narye an opkinirye, kum kipdeipnamkin talak ara, im tam arye, siknipdongopnamne. Tonda kurya nirya ara, singipdongopniba kunuklirye, dirina ton kum danamle. Narye keting ara, dua weik arepnyeba, dua arye lipdongopnamle. Wala dirina babye, kum danamla ati, ninye arye kum eilinamake.

⁸ Dipkoprob, atalak ara, narye im tam ubukce, dirina ulul ning nirya ara, tangap dongopniba, dirina kum danamle. Tonda, narye an unamlam tukwak mutuku sirya, im sirya nirya ara, pia kunukmiting nyan ninguk arepkiniba, kunauk upnamkile. Nara Allah Yahweh, aning-aning nirya erebuka, deice tam Pia Mikip Weik Deiyoknye ununye birye, akunum nyapdeipse.

⁹ Atalak narye an opkinirye sirya oplopnamkine. Aobuka tapu koupkinirye, yuk-yuk mutuku bana ati, bobanamkin talak ara, bobuka yuk pera mutuku nang, an kel bikina kum nang, sik dam bobikiniba, eibikirye, ‘Se, aning ara, kanye imunʼ tenebuka, sik yuk-yuk mutuku sirya, im sirya nirya unyak nang babye, sik kanye pum tam ara, ilil upliba, sik nong nirya yok birbir anamle.

¹⁰ Dipkoprob, narye aning nirya, anti winipnamkin talak ara, anang yuk-yuk nang nirya eibikirye, ‘Se, anye bira, el wenena ati, kanye imun ning dopropmala adano,’ nyabuka, ilil weik upnamle. Tonda, mutuku sirya, im sirya nirya unyak Raja-Raja ara, narye an dam ati winipnamne ning eipnamake. Narye, ‘Anang nirya eibikirye, biknamakʼ tenen, ninye on parang ya, ereptalibuka bobanamkin talak ara, aning nirya eipnamkiake. Eibikcopura, sik Raja-Raja ap, sik amutuku nang ap ara, narye an dam winipnamne ning eipnamake. Eibikirye, sikce, ‘Se, anye bira, el wenena ati, kanye imun ning dopropmala adano,’ nyabuka, ilil weik upnamle. Tonda, mutuku sirya, im sirya, nirya unyak Raja-Raja ara, ilil upliba, sik yok sirimtalipnamle. Narye anti obuka sirya daknamkin talak ara, sik anang nirya arye, ‘Se, nun babye, wenepsilirye, opsiliba, dipnamap do?’ tenen, ilil weik unamake.

¹¹ Aning nirya laka nyapkina ara, talye ati kum nyapkine. Deiyok ara, ani. Nara Allah Yahweh arye, aning-aning nirya talibuka, deice tam erebuka, mikip weik ununye birye nyapsina ati, narye anyapmasin ning nirya ara, dipkoprob upnamlarya! Anda, Mesir mutuku ninye deiyok kibuka taleamlumnye biti nyapkine. Babel mutuku taleamuk ninye deiyoknye birye, ‘Mesir mutuku ninye deiyoknye opnamneʼ tenen, el ninye on ya doplirye, an dam yanuka opnamkile!

¹² Na Allah arye, ‘Winipnalyame,’ nyapniba, Babel mutuku pia yu weik unyak yin talen nang, pia malye nang ati yakirye, anda Mesir mutuku Raja ap, an mapu silip ap, an tam nang yupa pia weik daunyak nang ap, an yin talen nang nirya ap ara, ninye on ya bonyak nang ara, yanuka alupdopnamsiyake. Yuk mutuku yin talin nang, sik yu ara, mitik tonun bukni, Babel mutuku yin talen nang ara, sik yu pia weik unyake. Winibikirye, an taleamlum nang nirya opnamake. Tonda, anggun Mesir mutuku nang arye, ‘Nunda bona utotoa weik talen nang unyakce, mikip weik nang unyabe,’ tenen, dipdanuka maknya kintinilalumce, taleamlum ning nirya ara, anang arye aning-aning nirya, malye kibikirye, kum kibuka, sice buklopnamake!

¹³ Tonda, anggunce weilamlum kam ning yuk-yuk ning nirya ara, sik mek dina ati, mek lilunak bobanyakak ap, daunyakak ap nirya adiparyuk, aweilulum ning nirya narye oplopnirye, kum kipdeipnamne. Awinipnamna deice arye, anang babye, talye kam unyak ning babye, amek dam ton ap binuka, mambul kum kiriknamake. Ninye ap, ninye arye weinyak ning ap ara, kum danamla ati, amek nirya ara, mek yoka dem upnamlarya.

¹⁴ Aning nirya winipnamna deice arye, an mutuku noutam balul mek nirya ara, narye mirin kipdeipniba, teleb upnamle. Tonda amek nirya ara, teleb kipdeipniba, minyak mek likdanarye balamak touk, sik mek namin arye bikbik abuka banamle. Aning ara, na Allah Yahweh aning-aning nirya talibuka, deice tam erebuka, pia mikip weiknye unirye, ayupu akunum nyapdeipsina ati, dipkoprob nong kunupnamle.

¹⁵ Dipkoprob nyapne. Atalak ara, narye Mesir mutuku ara, asik oldemuk kipdeipnamne. Tonda, narye Mesir mutuku unamak nang nirya babye, kum kipdeipnamne. Winipniba amutuku noutam teleb wamlye ning, akunum kum kipdeipyopura, amutuku nirya ara, tunim apnamle. Adeice ara, sikce nati, ‘Se, Allah Yahweh ara, el uk mikip weik ulula ati, aning nirya taleluleʼ tenen, biknamniake.

¹⁶ Atalak ara, ninye dibikiba, sik kayapu nang arye, imun kanye bobuka, weik tonun engebikirye, ninye weibikce talak nyanyak mot atonun, mikip weik deice mot nyanamake. Ati ara, amutuku kilapu, sik neika ansinibikirye, amot ara nyanamake. Amutuku kilapu, sikcuk kum bukni, yuk-yuk mutuku noutam, daunyak kilapu nirya ara, amot neika ansinibuka nyanamake. Ara, Mesir mutuku ap, Mesir mutuku unyak nang ap, sik yin talen nang yupa pia weik ati, ‘Se, bicoe,’ tenebikirye, anang wein mot nyanamake. Tonda, amutuku-amutuku noutam unamak kilapu nirya ara, Mesir mutuku noutam unyak nang ati ara, amot nyanamake. Ura, na Allah Yahweh, aning-aning nirya talibuka, deice tam erebuka, mikip weik ununye birye, ayupu ara nyapdeipsina ati, dipkoprob nong kunupnamle, nyapsine.

Dibinyak nang unyak mutuku ati, nyabuk yupu

¹⁷ Nun tomobuka Babel mutuku delilbinamsika ati, daulamupu ani, keting tamun ara, dua belas tahun mabupu talak, wala ara tonok noutam, tanggal lima belas yayuk sum ara, Allah Yahweh arye, na dam yanuka nyapnuk yupu ara, ani.

¹⁸ Se, Yehezkiel anda ninye sirika arye deipkiknye ulyame. An ap, yuk mambul weik mutuku unyak nang, sik kilapu ap, anggunce Mesir mutuku nang ap, sik yin talen nang yupa kum nukmanto nirya ap ati, tenipmunce engenamlume. Ara, sik Mesir mutuku nang nirya ati, sik nirya babye dibuka, akunum diamik nang arye tuku pum tam mutuku, el si Sheol, wekelbanyak nang damuk, boyanuka dopkwetepniba, wekelbanamaka ati, nyapsine.

¹⁹ An Yeheskiel birye, sik Mesir mutuku nang ati, nyabuka asipdenulyame. Anggun bidamnye arye, anggun bidamnye ati, ‘Nunda pia urasin teleb nang unyabe,’ tenelalulum do? Dipkoprob, yuk mutuku noutam ara, urasin teleb nang ton, daunyak bukni, sikda mitik tonun uka. Anggun Mesir mutuku nang ara, urasin pia teleb-teleb ululume. Bukni, wini talak ara, ninye dibikiba, tuku pum tam banyak mutuku, el si Sheol, asukumuk binuka unamlume. Winipminyeba, Allah ati diba kum tenenyak nang, el dam yanmanto kum unyaka ati, sik adiamik nang unyakak ara, anggun Mesir mutuku nang ap, diba kum tenebik bukni, mince akunum diamik nang ap, neika unyakak binuka unamlume.

²⁰ Mesir mutuku noutam unyak nang babye, yuk mutuku nang mal olanak arye obikiba, weik tonun dipnamake. Dipnamak bukni, sik oplopnamak nang arye, adipnamak nang teleb kibuka kum weipnamake. Aning kum bukni, ‘Aning ara, nun likʼ tenen, tuku deiceuk deiplopnamake. Na Allah arye lo arepnyeura, Mesir mutuku nang babye, mal olanak arye obikiba, sik Mesir mutuku nang ap, yuk mutuku nang ap, neika obikiba dipnamlume. Dipkoprob nyapsine. Narye ninye on parang ya, akunum kintinibuka deipsa ati, anyapmasin yupu nirya ara, dipkoprob nong upnamlarya! Mesir nang ati, mal olanak arye obikiba, weik tonun dipnamake.

²¹ Pia malye kibuka, mikip weik ninye olamik deiyok nang ap, sikti, melilamik yin talen nang ap arye, Mesir mutuku nang obikiba, dibikirye wekelbanyakak, el si Sheol binamak mutuku bicopura, atalak ara, sik eibikirye yupu talipnamake. Sikce nyapnamak yupu ara, ani. Ara, ‘Allah ati diba kum tenelamik nang ara, mal olanak arye parang ya arye obikba, akunum dipmakirye, wini talak sikda asukumuk mapnamake. Ati akunuma.

^22-23 Asyur mutuku yin talin nang ap, sik amutuku ulamik nang babye, min arye dipneura, weilamikba, asukumuk yayikce aunyake. Asukum manyaka dana-dana tam dukdongobuka, deipmekak diamik nang ton, asukumuk unyake. Sik anang nirya ara, mal olanmeka ani, obikba diamik. Sik diamik nang ara, tuku palibuka wiamik bukni, sikda pia malye-malye weik ulamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk daulamik nang ati, yu ubukba, malye weik winilamik ning ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk.

^24-25 Tonda, Elam mutuku yin talin nang ap, sik amutuku ulamik nang babye, min arye ninye olanak arye obikba dipneura, weilamikak, asukumuk yayikce aunyake. Asukum manyaka dana-dana tam, dukdongobuka deipmekak, diamik nang ton, asukumuk unyake. Sik anang nirya ara, mal olanmeka ani, obikura diamik. Sik nirya ara, Allah ati diba tenena kum nang ati, deiamikba, asukumuk Sheol mutuku yayik. Sik Elam mutuku diamik nang ara, tuku palibuka wiamik bukni, sikda pia malye-malye weik ulamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu kibuka, malye weik ulamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk. Bukni, sik yuk nang mal olanak arye opniura, dipnarye, wekelbalamikakuk, Sheol mutuku biyik. Ati ara, Elam mutuku nang ap, amutuku akunum min arye yayik nang ap, sik nirya babye, alye dakdayik.

²⁶ Mesek mutuku ap, Tubal mutuku ap, sik yin talin nang ap, sik amutuku bitinye ulamik nang babye, min arye dipneura, weilamikba, asukumuk yayikce, aunyake. Asukumuk manyaka, dana-dana tam dukdongobuka, diamikak weiamik nang ton, asukumuk unyake. Sik anang nirya ara, mal olanmeka ani, obikak diamik. Sik diamik nang ara, tuku palibuka wiamik bukni, sikda Allah diba kum tenelamikce, pia malye-malye weik winilamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu ubuka, malye weik winilamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk.

²⁷ Sik Elam mutuku akunum diamik nang ara, teleb kibuka kum weibik. Ara, minop talak, mikip weik yin talen nang, malye kibuka, teleb kibuka ulamik bukni, ninye olan talak, yuk nang arye anang obikura, dibikba weibik talak ara, teleb nang ulamika ati, sik yin taleamikce, bolamik ning, ninye onlan parang ya ap, sik nong lelilan ning, el si perisai ap, aning kipman pakubuka wiamik. Winyamik touk, sik Elam mutuku nang ara, sikce atonunuk ubuka kum winilamika ati, mambul weik yin talen nang ap, tonokakuk kum weibik. Bukni, sik min talak mambul weik yin nang, sik weipnamikak ara, sik bolamik parang ya dobuka, ayin nang sik kisok erebuka, kisok amu tam deibikce, sik perisai ara, sik nong deice moubuka deibikce wiamik. Sik Elam mutuku yin nang arye, sik amu tam ulamik nang ati, sik kam tuba ulamik talak ara, pia malye nang ulamika ati, winilamikba, sik talye daulamik nang nirya arye, ayin nang ati ilil ulamuk. Ati sik babye Sheol mutuku amu tamuk weibikura, aunyake.

²⁸ Ati ara, sik Mesir mutuku nang ara, sik anang teleb kibuka, kum weilamik touk ubuka, Sheol amu tamuk weipnamsiyake. Tonda anggunda, Allah ati diba tenena kum nang ulamluma ati, diba tenena kum nang weinyaka kan-kanuk, weibikiba, asukumuk binuka unamlume. Tonda, asukumuk, sik mal olanak arye opsikce, teleb kibuka weina kum bukni, tuku deice tukwakuk deiplopsika ati, weipsikiba, anggunda Sheol pum tamuk binuka unamlume.

²⁹ Edom mutuku nang ap, tonda anggun mutuku ninye deiyok kibuka taleamik Raja nang ap, anggun amu tam pil dona ati, deiyok kilamik nang ap, sik nirya babye weiamikba, asukumuk Sheol mutuku binuka unyake. Min talak sikda, pia mikip weik yin talen nang ulamik bukni, mikip ulamika babye, ninye olan talak, yuk nang arye aweik nang obikba, wini talak ara, dibuka ninye dibin nang unyakak, Sheol mutuku biyikba, sik ap, Allah diba tenena kum nang ap, sik neika Sheol mutuku pum tam, tonokakuk unyake.

³⁰ Asukumuk, dabu tam, (arah utara) mutuku ulamikce, ninye deiyok kibuka taleamik nang ap, tonda Sidon mutuku ulamik nang ap, sikce talibuka ulamikak, min talak sik yu weik ulamik nang ati, sik mikip deice arye, malye winilamik ning ati, yuk nang nirya arye, ilil ulamuk. Bukni, wini talak ara, sikda asukumuk unyaka ati, sikda alye weik dakalanyake. Ara, Allah ati diba tenena kum nang ap, ninye olan talak, ninye on parang ya arye oplobikce, tuku deice deliltakalamik nang ap, tonokak ukirye, alye dakalanyake.

³¹ Mesir mutuku taleamuka deiyoknye, Firaun ap, el yin talen nang ap nirya ara, mal olanak arye obikba, akunum diamik nang unyakak, Sheol mutuku dam bikiba, minop talak arye, yuk-yuk mutuku ulamikce, mikip pia weik deiyok nang ap, yin talin nang ap, mal olalamik talak arye akunum obikba dibikirye, asukumuk wekelbanyak nang ap, neika epdanamake. Atalak ara, Firaun birye aning eiplyopura, el kanye deipnamle. Ara Firaun ap, el yin talen nang nirya ap, el tam nang ap, min arye akunum omikba, diamik nang nirya ara, ‘Se, nunda kume, yuk mutuku nang ton, amalye mutuku Sheol mutuku, sik babye asukum wekenyaka ati, dakwapyeʼ tenen, el kanye pum tam ara, melipdanamle. Ayupu ara, na Allah Yahweh, aning-aning nirya talibuka, deice tam erebuka, pia mikip weiknye birye, akunum nyapdeipsina ati, aning ara, dipkoprob nong kunupnamlarya.

³² Na Allah arye, Mesir mutuku talibuka ulamuknye biti, wenepnirye, Sheol mutuku dongopnamna deiyok ara, ani. Ara, el Firaun birye, el mutuku dana-dana tam ulamik nang nirya ati, elce yu weik ulamukba, sik nirya arye elti, ilil weik ulamuk. Ati, narye elti, kwang daknamne. Ati ara, el ap, el yin talen nang yupa pia weik ap, el mutuku nang ap, yuk mutuku yu nang arye, sik nirya mal olanak arye, obikiba dipnamake. Dibikcopura, Allah diba kum tenyamik nang ap, yuk mutuku nang arye, mal olalamik talak, yin talin nang olamikce, ‘Anang nun lik anya arye, sik tam nang arye, alye dakanamakʼ tenen, sik nong weina kumce, tuku deiceuk deliltakalamik nang ap, akunum dipnarye, wekelbalamikakuk, Sheol mutuku bikiba, Firaun ap, el amu tam ulamik Mesir mutuku nang yupa pia weik, asukumuk neika unamake. Ayupu ara, na Allah Yahweh, aning-aning nirya talibuka, deice tam erebuka, pia mikip weik ununye birye, ayupu dipkoprob akunum nyapdeipna ati, nong kunupnamlarya.