Yehezkiel 31 - Eipomek

Allah arye, winipmanto yupu deice arye, “Mesir mutuku talibuka, ninye deiyoknye Firaun ap, el yin talen nang ap ara, Libanon mutuku tiklamle keiyal yo, cang weik atonun ulamik,” nyabuk yupu

¹ Babel mutuku nang arye, nun Israel nang obukapsikce, tapu koubuka, sik pera mutuku sisa tamubuka bobinamsikba, sik amu tam daulamupua ani, keting tamun 11 tahun, akunum kibukba, wala winilye deice bukni, tanggal 1 kibuk sum ara, Allah Yahweh arye, na Yeheskiel dam yanuka nyapnuke.

² Se, anda ninye sirika arye, deipkiknye ulyame. Mesir mutuku talibuka ulula deiyoknye Firaun ap, elce talibukba unyak nang ap nirya ati, nyapnulyame. Dipkoprob Firaun anda, mikip weiknye ulyame. Yuk nang, an atonun nang ton, pia kum unyake. Bukni, an pia mikip weik uminya deice arye, an kanye talima erebuka, kwalinauk ulyame. Ati, yatanye ton, ance kanye erebuka kwalilamlam touk, ulul do? Kume, pia kum unyake.

³ Ati, Asyur mutuku ton moubuka tenipdenulyame. Winipmanto ara, anda Libanon mutuku tiklamle yo, ara keipyal yo atonun, yo ulyame. Ayo el taruk ara, pia moubuka teleb ulirye, el bok ara, pia weik talilule. Keipyal yo el nong tikilul ning ara, ton kwalina kumce, pia diksukum, im dup noutam, dua damuk tikilule.

⁴ Akeipyal yo tekukak ara, mek weik aubukak anya arye, tukwak amutuku tam, weik balamle mek, atuku noutam biyukce, ayo el din arebukba, ayo el yating nirya namin kibukce, ayo nong ara, pia telebuk ulamuk. Tonda, amek arye, yuk mitik yo tekukak babye balamuk bukni, ayo arebuk mek ara, mitik tonunuk areamukba, ayo ara, mitik telebuk ulule.

⁵ Keipyal yo dam ara, mek weik aubuka deice arye, ayo el deiyok ara, weik tonun nebukce, cang weik tikuk. Winibukce, el taruk ap, bok ap ara, pia weik ubuk. Amutuku yo tikilulak nirya ara, mitik bukni, keipyal yo tonok ara, pia cang weik yo tikuk.

⁶ Maka yala-yala nirya, ayo taruk deiceuk, aik dobuka manyake. Tukwak mutuku kam unyak ning nirya ara, ayo deiyok damuk wekenyakce, mi deibuka unyake. Tonda, mutuku nirya unyak nang ara, keting buppu weik uplyopura, ‘Keting koa buknuyapʼ tenen, ayo tekukak amu tamuk wekelyangakirye, kanye deibuka bulyanganyake. Ara, mambul kum mutuku nang kume. Ayo deiyok dam bulyanganyak nang ara, dipkoprob pia mambul weik nang unyake.

⁷ Keipyal yo tekukak ara, nong pia weik nebukce, el moubuka urasin pia teleb kat yo tikuk. Ayo el taruk ara, cang weik yo tikuk. El yating ara, tuku amu tam noutam wekukce, mek weik biyuka noutamuk biyukba, ayo arye mek weik dilule.

⁸ Allah arye minop talak kwepdeibuk mutuku, Eden mutuku tikamuk keipyal yo ara, Libanon mutuku tikuk keipyal yo atonun kume. Libanon mutuku keipyal yo ara, urasin pia teleb ubuk. Tonda, yuk mutuku tikuk yo, el si Sanobar yo ara, taruk weik ton aulul bukni, elti dektinga babye, pia kume. Libanon keipyal yo ara, el taruk cang ara, weik anya arye, yuk yo ton atonun kum ulule. Eden mutuku tikuk yo ara, Allah arye kwepdeiamuk bukni, Libanon mutuku tiklamle yo ara, el kamo urasin atonun, yuk yo ton pia kum ulule. Libanon tikilul yo ara, urasin pia teleb ninge.

⁹ Narye, ‘Libanon keipyal yo ara, el nong urasin ap, el bok una ap, winibuka tiknamle,’ tenyamse touk kwepdeipsiba, pia teleb ubuka tikuk. Eden lo mutuku tikuk yo nirya ara, Allah arye kwepdeiamukce, Eden mutuku noutamuk deiamuk. Bukni, Libanon tiklamle yo ara, urasin pia teleb tikilula anya arye, Eden mutuku tiklamuk yo nirya ara, Libanon keipyal yo ati, ‘Se, el urasin pia teleb ulamle touk, nun ton upsetuʼ tenen, talima uk dilamlirye, pia mal pinyake.

¹⁰ Ati ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapne. Libanon keipyal yo, el nong weik tonun nelamla deice arye, el nong deice tam ara, dua kan-kan ap, deice tam ap, tikilule. El kamo teleb uplirye, el cang ara, pia cang weik ulula anya arye, ayo el kanye talima ereplirye, ayo deiceuk, maknya kintiniplirye, kwalibuka dilalule.

¹¹ El kanye talima ereplirye, kwalibuka dilalula anya arye, aning ati ara, narye, ‘Aning ara, na lik,ʼ tenebuka bataknirye, tonok mutuku ninye deiyoknye, yuk mutuku-mutuku nirya deice tam uplirye, talilulnye, el dam dobuka arepnamne. Winipniba, el winilamlya atonun wenena ati, ikin ning el nong deice deipnamne. Na babye, akeipyal yo akunum batakse.

¹² Yin talen nang, yu weik nang, amutuku kum bukni, otam mutuku nang ara, bico tenena kum nang yakirye, ayo webikirye, batakanyake. Ara winipmanto, ninye arye weik mutuku deice welebikirye, weik tonun nemlye yo webuka batakikiba, talye poulbalamle atonun upnamle. Weik mutuku amu tam babye, cang yo webikiba, ayo taruk alu mutuku deice poulbilirye, lu wamlyak poulbalamliba, batakanyake. Tonda, dan mutuku do nirya, weik mek balamlak ara, acang yo weplobikiba, ayo taruk ara, seklobikiba, amek noutam sakuka poulbalamle. Aning atonun upnamle. Winipliba, tukwak nang mutuku sirya, im sirya nirya, ayo el dam wekelyangalamak nang ara, ‘Ayo deiyok dam kum buknyabe,’ tenebikirye, ayo batakuka bindopnamake.

¹³ Maka yuk-yuk ning nirya yakirye, ayo wepmakiba, yo deiyok poulbinmalya deice ara, yanuka buknamake. Tonda, ayo wepmakiba, el taruk poulbinmalya deice ara, talye tukwak kam ulamle ning nirya arye, ayo taruk dam, sik aik dobikirye, asukumuk manyake.

¹⁴ Aning nirya winipnamle deice arye, aminyan talak ara, ayo el nong weik nemukce, weik cang im dup tekamuka atonun, yuk yo ton aminyan talak, ton kum tiknamle. Tonda, mek weik aupnamle bukni, atouk yo ton, amek dam weik tonun, kum nepnamle. Ayo sik deice tam ara, dua kan-kan noutam welebuka, pia kum upnamle. Aning kum winipnamla deiyok ara, ani. Ara, ayo nirya ara, talye tukwak nang dibikceba, tukwak poulbalamak atouk, tuku pum tamuk poulbinamle. Tonda ninye dibiceura, dibin nang unyakak, el si Sheol, asukumuk banyaka atonun, wininamake.

¹⁵ Narye Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine. Ayo weplopsiba, tukwak poulbinamukce, tuku pum tam bukni, ninye dibiceura, dibin nang unyakak, el si Sheol, asukumuk binamuk talak ara, na Allah arye, tuku amu tam balamle mek, tirikdongopsiba, ceprobukba, tukwak nang nirya ara, ‘Seʼ tenen, malye kanye bobikce, engelamik. Tonda, tuku pum tam biyuk mek nirya ara, bublan tirikdongopsiba, amek biyukak uamuk ning ap, amutuku uamuk ning babye engebik. Winibuka akunum winipsirye, mitik mek biyuk bisik nirya tirikdongopsiba, ceprobukba, amek ton ap kum balule. Akeipyal yo webikba, tukwak poulbinamuka deice arye, Libanon mutuku noutam bukuk mutuku konak nirya ara, ‘Seʼ tenen, malye kanye bobikce, engebikba, narye amutuku nirya, deice kuna arepsiba, pia kunukuk. Winibukba, amutuku noutam tiklamuk yo kan-kan nirya ara, mun-mun dakuka, kum dayuk.

¹⁶ Tonda, ayo webikba, ninye diplamaka atonun ubukce, poulbinamuk talak ara, tukwak nang mutuku sirya, im sirya nirya ara, akeipyal yo, el tukwak sakuk talak, lelim nyabukba, kekebikce, ‘Seʼ tenen, yok birbir abuk. Ara, narye ninye dibikceba, akunum dibice nang, tuku pum tam unyakak, el si Sheol noutam, ayo ap, akunum diamik nang ap, atuku pum tam dongosiba, neika ulamik. Tonda, Eden mutuku noutam tikamuk yo ap, Libanon mutuku tikamuk yo ap nirya ara, mek weik aubuka deice arye, telebuk ulamik bukni, sik babye ninye diplamaka atonun ubuka, tukwak poulbinamikak arye, keipyal yo akunum kum kibuka anya arye, engelamikba, narye sik talima melipsiba, tuba ton ap kanye deibik.

¹⁷ Keipyal yo dobuka, Sheol mutuku donokuka dongopse talak ara, yuk nang ap, neika tuku pum tam wekik. Ara, ninye arye mal olan talak noutam arye, olamik nang, el ubuka atouk, ninye dipnarye, banyak mutuku uk, Sheol mutuku binuka ulamik. Tonda, min talak ara, ninye mutuku sirya, im sirya nirya, weik keipyal yo damuk bulubuka wekelyangalamik nang babye, tuku pum tam ninye dipnarye, banyak mutuku uk, Sheol mutuku binuka ulamik. Anang ara, minop talak, sikce, ‘E aweik yo ap, nun ap, neikauk binapna, yanapna, asukumuk neika teleb kibuka unamabe,’ tenelamik nang ulamika ati, sik babye Sheol mutuku uk, binuka ulamik.

¹⁸ Se, anda weik cang keipyal yo atouk ulyamnye, Firaun bira, yuk nang ton, an pia mikip weik ulamlum touk ulamik do? Kume, an tonok, pia mikip ap, urasin teleb ap, ulamlum touk, yuk nang ton kum ulamik. Winipmanto ara, aweik keipyal yo ara, el tonok, pia cang ap, urasin pia teleb ap, kat ap ulamuk touk, Eden mutuku noutam babye, ayo atonun ning ton, kum uamuk. Eden mutuku uamuk yo yuk-yuk ning nirya ara, mitik tonun teleb uamuk bukni, Lebanon mutuku weik cang keipyal yo atouk ara, kum uamuk. Bukni, wini talak ara, anda weplobikiba, ninye dipnarye banyak mutuku uk, Sheol mutuku uk binuka, pia ati daunamlame. Eden mutuku noutam uamuk yo babye, akunum kum dayuka anya arye, ayo babye, Sheol mutuku uk aulule. Tonda, asukum ara, Allah ati, diba tenena kum nang, sikda Allah ap, neika kum upting nang anya arye, akunum deiamikba, sik babye Sheol mutuku uk unamaka anya arye, sik ap, an ap, neika amutuku unamlume. Tonda, ninye olalamik talak ara, ton yin talin nang oltakalamikba, ‘Aning ara, nun likʼ tenen, sik nong kum weilamik bukni, talye deliltakalamik nang ara, sik babye, Sheol mutuku, pia amu tamuk, unyaka anya arye, adiplamik nang ap, an ap neika unamlume. Ura, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapne. Winipmanto yupu ara, ‘Weik cang Libanon mutuku keipyal yo,’ nyapmana ara, nong noutam ning ara, Mesir mutuku ninye deiyok ulamuknye ap, el yin talen nang, yupa kum nukmanto nang ap ati, nyapsine. Sik nirya ara, ninye dipnarye, binuka unyak mutuku, Sheol mutuku uk, pia ati daunamake. Na Allah Yahweh arye, ayupu akunum nyapdeipsine.