Yehezkiel 30 - Eipomek

Allah arye Mesir mutuku nang, sik nong deice ikin ning deipnamla ati, nyabuk yupu

¹ Allah el si Yahweh arye, na dam yayukce, ayupu nyamnuk.

² Se, anda ninye sirika arye deipkiknye ulyame. Tonda, ance aminyan winipnamle ning ati, laka nyapnamlyame. Ara, Mesir mutuku nang kekenamakak ara, ance nyapnulyame. Ayupu ara, Allah Yahweh aning-aning nirya talibuka, deice tam erebuka, pia mikip weiknye birye nyapmasil yupu ara, ani. Weik kanye, imun kanye bon sum yanamle anya arye, anggun nirya arye, ‘Se,’ nyabuka, malye nyana ap, engena ap, mambul kanye bona ap, unamlume. Aning ara, biknamlulume.

³ Anggun moubuka teninamlume. Kanye imun weik sum akunum dam upmale. Ara, talye sum kum bukni, Allah Yahweh arye tenyamuk sum yanamle ati nyapsine. Aning ara, moubuka teninamlume. Winira weik ikin ning deipnamle sum ara, ninye mutuku sirya, im sirya nirya, sik malye ulamik ning ati, wenebuka opnamle anya arye, asum ara, ‘Dua kunukmiting,’ nyaplyopura, adiparyuk dua arye pia kunuknamle.

⁴ Mesir mutuku nang ara, narye lo arepniba, sik mal olan nang yakirye, ninye on parang ya boyanuka, warikil yasikirye, ninye weik obikcopura, anggunce eipmunyeura, Mesir mutuku noutam unamlum nang ap, Etiopia mutuku nang nirya ap ara, ilil weik upsiliba, anggun yok birbir apnamsile. Atalak ara, Mesir mutuku noutam ara, Allah arye oplyopura, ninye weik tonun dipnamake. Winibikcopura, Mesir mutuku noutam talinamak dekna weik bona nirya ara, alubuka bobinamake. Tonda, sik amutuku unyak nang arye, sik weik asik noutam dolamik ning nirya ara, anggun mal olan nang arye uluplobikirye, atu buklopnamake. Aning nirya kum kipdeipnamakca.

⁵ Atalak ara, sik yuk mutuku arye yanganamak olana deiyok nang arye, Mesir mutuku ap, sik melina ati yanganamak nang ap, obikcopura, ninye weik tonun dipnamake. Ara, Mesir yin talin nang melina ati yanganamak nang ara, Etiopia mutuku yin talen nang ap, Put mutuku yin talen nang ap, tonda Lut mutuku yin talen nang ap, Arab mutuku noutam unyak nang, sik yin talen nang ap, Libia mutuku yin talen nang ap, nirya ara, Mesir nang ap, obikcopura, neika dipnamake.

⁶ Na Allah Yahweh arye nyapsine. Aning ninye weik olan talak ara, yata mutuku nang do nirya, Mesir mutuku nang ati melipnamak nang nirya ara, yu weik olyanamak nang arye, obikirye sirya dakikiba, dipnamake. Dibikcopura, Mesir mutuku nang arye, sik bidamnye ati, ‘Nunda pia mikip weik nang unyabe,’ nyabuka, kwalibikirye, sik si erenyak ning ara, kum kipdeipnamne. Winipnyopura, Mesir mutuku dana-dana tam nirya noutam ara, ninye weik dipnamake. Ara, dabu tam noutam, Mikdol mutuku, arah utara tam arye, dipdongobuka, Aswan mutuku arah selatan tam, iknapi tam ap, Mesir mutuku nang ap nirya ara, obuka sirya dakikiba, dipnamake. Na Allah Yahweh, aning-aning nirya talibuka, deice tam erebuka, pia mikip weiknye birye, ayupu nyapsina anya arye, aning nirya ara, dipkoprob upnamlarya nyapne.

⁷ Na Allah Yahweh arye, lo arepnyopura, yuk pera mutuku, yu nang arye yakirye, opdakiba, Mesir mutuku nang nirya ap, sik melin nang ap, kum kipdeipniba, ninye yupu ton, pia kum nyanamake. Amutuku-amutuku nirya, pia malye kipdeipsinyopura, anggun mutuku nirya ara, asik oldemuk upnamle. Yuk mutuku-mutuku ton oplopnamne bukni, amutuku ara, mitik tonun malye upnamle. Bukni, Mesir mutuku weik asik donyakak nirya ara, ulubuka atu buklopnamake. Ninye tonok ton pia kum unamake. Yuk-yuk mutuku malye kipdeipnamne ning ara, mitik tonun malye upnamle.

⁸ Aning winipnirye, Mesir mutuku wamlye ning nirya uku dongopniba, weik uku arye diplyeba, adeice arye sikce bikinamake. Ara, “Allah Yahweh, aning-aning nirya talibuka, deice tam erebuka, pia mikip weiknye ululeʼ tenen, nati biknamniake. Ara, Mesir mutuku uku dongopniba, dipnamle ning ap, Mesir mutuku melin nang ap, sik obuka, sirya daknamne ning eibicopura, adeice arye biknamniake.

⁹ Atalak kanye imun ning, akunum uplyopura, narye yupu nyalbana ati, ninye weik dopdeipniba, weik balamle mek deice balamle kapal, mek bukna yo deice arye, Sudan mutuku bikiba, sik Etiopia nang eibicopura, sik laka nyapnamak yupu kekebikcopura, sikda, ‘Se, aminyan talak yata upnamsil do?’ tenen, ilil pia weik upnamle. Tonda, na dopdeipnamne nang arye, ‘Mesir mutuku unyak nang ara, akunum obukabikce sirya dakik,’ nyabuka laka nyabicopura, sik Sudan mutuku unyak nang ara, pia imun kanye bobikirye, ilil ati yok birbir apnamle. Anggun kekeplulume! Anyapmasin yupu ara, dipkoprob nong upnamla anya arye, anggun moubuka kekepnamlume! Narye atalak winipnamle ning, akunum kintinipsa ati, na tenepse talak kunum uplyopura, aning nirya dipkoprob upnamlarya nyapsine.

¹⁰ Na Allah Yahweh aning-aning nirya talibuka, deice tam erebuka, mikip weiknye birye nyapne. Narye, Babel mutuku noutam nirya talibuka ulula deiyoknye, Raja Nebukadnesar dopdeipniba, Mesir mutuku noutam unyak nang ap, yin talen nang ap nirya ara, opsilyakarye, kum kipdeipnamle.

¹¹ Nebukadnesar bira, yuk mutuku nang ati, bico tenena kum ulamle touk, el amu tam unyak nang, Babel mutuku nang nirya ara, pia yu weik nang unyake. Yuk mutuku nang babye, yu weik nang unyak bukni, sikda mitik tonun uka. Babel nang ara, dipkoprob yu pia weik unyaka anya arye, Nebukadnesar birye, ninye weik dopdopliba, el ap sik neika yakirye, Mesir mutuku unyak nang nirya ara, sikce obuka sirya daknamaka ati, yanamake. Amutuku yakirye, Mesir nang nirya ona ati, ninye on ya arye obikceba, amutuku noutam nirya ara, ninye weik obikiba, dipnamake. Sikce oplopnamak ninye nong ara, pia weik dana-dana tam, laka kibuka deibikiba, amutuku langdipnamle.

¹² Narye, nyapniba, Nil mek nirya ara, cepdeipnamne. Winipnyopura, sik din mek ap, sik koulamak ning, mek dikilongon ning ap ara, kum kipnin banamle. Winiplyopura, sik din ning babye, kum kipnin banamle. Nil mek lilun noutam ulul wa tuku nirya ara, yu weik nang dopdeipniba, atuku nirya alubuka dopropnamake. Winipnirye, Mesir mutuku nirya ap, amutuku noutam unyak nang ap ara, malye weik kipdeipnyeba, Mesir mutuku nirya ara, malye weik upnamle. Nara, Allah Yahweh arye, ayupu nyapmasina anya arye, aning nirya ara, dipkoprob nong upnamlarya!

¹³ Aning ara, na Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Mesir mutuku noutam mambul weik asik domik ning, el si Memfis mutuku noutam unyak nang arye, isa si erenyake. Isa si erena ati, ninye urasin atonun ning puturubuka, isa si erenyak ning ap, tonda aisa ap babye, aning nirya kum kipdeipnamne. Winipnyopura, tonda Mesir mutuku noutam ara, ninye deiyok nang, Raja nang ton kum kipdeipniba, ninye deiyok nang babye, pia kum unamake. Aning winiplya deice arye, Mesir mutuku noutam unyak nang nirya ara bikikirye, sik ilil pia weik unamle.

¹⁴ Aning atonun, na Allah arye, Mesir mutuku arah selatan, iknapye tam ara, Nil mek lilun wamlye mutuku, el si Patros mutuku noutam wamlye ning nirya ara, kum kipdeipnamne. Winipnyeura, oldemuk upnamle. Tonda, Nil mek bukni, keting panalyangan tam, weik asik domik ning, el si Soan mutuku ara, uku dongopniba, amutuku dibuka sirya daknamle. Atonun, weik asik domik ning, el si kota Tebe mutuku ara, amutuku unyak nang arye, malye ulamik ning ati, sik wenena ati, ikin ning dobuka, sik nong deice deipnamne. Tonda, Tebe mutuku talilamak bona nirya babye, kum kipdeipnamne.

¹⁵ Winipnirye, na yu weik teninun ning ara dobuka, Pelusium mutuku nang deice deipnamne. Amutuku ara, sik Mesir mutuku nang arye, ‘Nun mal olan nang olyanganamsiyak talak ara, Pelusium mutuku yin talen nang eibicopura, minopce laka nyanamsiyakeʼ tenelamikce, anyasik, Mesir mutuku bukni, weik laut mekwen, el si Mediterania dam dolamik. Ara, Mesir mutuku sik kalikna ati dolamik. Tonda, Tebes mutuku ninye yupa weik unyak bukni, weik tonun opnyeba, sik babye ton kam kum upnamake.

¹⁶ Dipkoprob na Allah arye, winipmanto ara, weik uku dilamle atonun, narye kanye imun weik ning, Mesir mutuku noutam nirya deipnyopura, Pelusium mutuku unyak nang ara, malye nyabuka, engebikirye, donamake. Mesir mutuku noutam ara, Tebe mutuku weik keil arye, poka dobik ning nirya ara, sik mal olan nang yakirye, aning el si benteng ulubuka bataknamake. Winibikiba, weik asik el si, Memfis mutuku unyak nang ara, keting noutam talak babye, ninye mal olan nang yanuka, obikcopura, Memfis mutuku nang, ilil pia weik upnamle.

¹⁷ On mutuku ap, Pi-Beset mutuku ap, sik deiyok nang arye wel nang, mikip weik yin talen nang wipdeiamik nang ara, Nebukadnesar birye, amutuku olyalopura, awel nang nirya, mal obikceba dipnamake. Winibikirye, anyasik bitinye noutam tuba kam unamak nang ap, kilapu ap nirya ara, Babel mutuku nang arye, anang tapu koubikirye, sik mutuku tamubuka bobinuka, wenen aik dongopnamake.

¹⁸ Mesir mutuku nang arye, ‘Asia tam arye, nun mal olan nang, mal piyanamsiyakʼ tenen, Nil mek lilun bukni, keting panalyangan tam domik asik, el si Tapanes mutuku, keting noutam talak bukni, weik dua arepnyeura yalyopura, amutuku nirya kunuknamle. Mesir mutuku nang ara, mikip weik unyak bukni, narye sik mikip kum kipdeipnirye, mitang nang dem unamake. Atalak arye dipdongobuka, dounamle talak ara, Mesir mutuku nang ara, mikip weik nang tuba kum unamake. Sik mikip ulamika ati, kanye deiamikce, maknya kintinibuka ulamik bukni, narye sik mikip kum kipdeipnamne. Tahpanes mutuku ara, mirin dua arye kunukmiting alulak ara, na Allah arye arepnyeura, inipdongopnamle. Aning winiplye talak ara, sik mal olan nang yakirye, anyasik dana-dana tam ulamle mitik asik nirya ara, obuka sirya dakikirye, amutuku-amutuku kam tuba unyak nang, sal ap, kilapu ap nirya ara, tomobikirye tapu koubuka, sik pera mutuku tamubuka bobinuka, pia wenen aik dongolbinamake.

¹⁹ Aning nirya, akunum nyapmasin touk, na Allah arye, Mesir mutuku nang malye ulamik ning wenena ati, pia weik ikin ning dobuka sik deice deipniba, eipnamaka deice arye, sikce, ‘Se, dipkoprob Allah ara, Yahweh ulule,’ tenebikirye, nati biknamniake.

Mesir mutuku, aning-aning deiyok talibuka ulamik ning nirya, kum danamuk ning ati, laka nyabuk yupu

²⁰ Babel mutuku nang arye, nun Israel nang obukapsikce, tapu koubuka, sik mutuku tamubuka bobinamsikba, daulamupua ani, keting tamun 11 tahun akunum kibukba, wala tonok deice bukni, tanggal 7 kibuk sum ara, Allah Yahweh arye, na Yeheskiel dam yanuka nyapnuke.

²¹ Se anda ninye sirika arye, deipkiknye ulyame. Mesir mutuku talibuka ulamuknye, Raja Firaun, el mikip taruk ara, narye, akunum yok cebuka deipsirye, el mikip kum kipdeipse. Tonda dipdelulume, ninye yuk nang arye, el meliptingba, tamubuka kum teleb uptue. Winipmanto ara, ninye taruk cepmatuba, yuk nang arye ataruk kitiptingba, aminyan nipturye, teleb akunum uptopura, el ninye on ya tuba tonap taliptue. Bukni, na Allah arye, Firaun, el mikip nirya ara, akunum kum kipdeipse.

²² Ati ara, na Allah Yahweh, aning-aning nirya talibuka, deice tam erebuka, mikip weik ununye birye nyapsine. Moubuka kekepnunilyame. Mesir mutuku taleamuknye, el si Firaun biti, na Allah arye, ‘Anye na likʼ tenen, yu tenepse. Winibuka tenepse ati, anye weik tonun wenebuka oplopnamne. Winipmanto ara, el taruk yok bitinye ara, cebuka bataknamne. Ara, yum ulul taruk ap, mince ceplopse taruk ap, bitinye cepnamne. Winipniba, anye el taleamuk ninye ona ati, parang ya ara, batakliba, tukwak saknamle.

²³ Mesir mutuku nang nirya ara, narye inibuka donokniba, yuk mutuku nang ulamice mutuku uk, binuka unamake. Tonda, Mesir mutuku nang nirya bokdeipniba, yuk nang unyak mutuku-mutuku, sikce dabinuka unamake.

²⁴ Winapnamna ati ara, Babel mutuku deiyok talibuka ululnye biti, narye mikip weik kipdeipnamne. Na mikip weik ninye on ya ara, Babel mutuku ninye deiyoknye arepnamne. Bukni, Mesir mutuku talibuka ulula deiyoknye Firaun, el mikip ara, kum kipdeipnamne. Winipniba, ninye weik oplirye, dila weik upliba, asik bukikirye, bisik kum balamaka atonun, malye nyabuka ngalukuka engenamle. Babel mutuku ninye deiyoknye damuk, malye nyabuka engebuka unamle.

²⁵ Dipkoprob nyapne. Babel mutuku noutam ara, ninye deiyok kibuka talibuk Rajanye biti, narye mikip kipdeipnamne. Bukni, Mesir mutuku noutam ara, ninye deiyok kibuka talibuknye, Firaun bira, elda mitang kipdeipnamne. Winipnyopura, na mikip weik ninye on ya ara, Babel mutuku ninye deiyoknye arepnyeura, elce aparang ya boyanuka, Mesir mutuku nang nirya oplopnamla atia. Winipnyopura, Mesir mutuku nang arye, ‘Se, el Allah ara, dipkoprob Yahweh ululeʼ tenen, nati biknamniake.

²⁶ Mesir mutuku nang nirya ara, sik mutuku noutam arye, narye yakuka donokniba, sik yuk nang yala-yala nirya noutam binuka unamake. Aning atonun, yuk mutuku nang ulamice mutuku-mutuku nirya, dabinuka neika unamake. Sik yuk, sik mutuku noutamuk kum unamake. Winipnamna deice arye, sik Mesir mutuku nang arye, ‘Se, el Allah ara, dipkoprob Yahweh ululeʼ tenen, nati biknamniake.