Yehezkiel 3 - Eipomek

¹ Yehezkiel birye nyabuk. Allah arye nati nyapnuk. “Se, ninye arye deipkiknye bira, an dinmalamba, akitipse buku ninye wenena yupu buku ara, an dobuka diplyame. Ara, an dipmince, Israel yala ninye unyak mutuku nirya bimince, ayupu nyalbinamlyame,” nyapnuke.

² Nyapnuka ati, ‘Abuku dipnun’ tenen, si akuka yokeipnukba, abuku dobuka, na si pum bisik dongopnukba, narye akitibuk buku dipse.

³ Abuku arepnamanuk talak ara, ayupu tonap dukdongobuka nyapnuk. “Se, anda tukwak mutukunye ulyama anya arye, abuku dobuka diplyame,” nyapnuk. Nyapnuk talak ara, ‘Aning ara, kum dipnun do?’ tenepse bukni, aning dobuka dinmase talak ara, mong yung mekto teleb lelamle atonun lepnuke. Na mun pum tam, akunum malbinuk talak ara, boupnuke. Abuku dobuka dipsopura, mong mek yung teleb lelamle atonun lepnuke.

⁴ Winipse talak ara, el Allah arye nati, tonap tamubuka nyapnuk. “Ninye arye deipkikba, tukwak mutuku ulyamnye, ance an kayapu Israel yala ninye unyak mutuku nirya ara, anyapmakin yupu nirya dobuka, sikti, ‘Allah arye nyapnuka,’ nyabuka peterepra banamlyame.

⁵ Na Allah arye, ‘Yuk pera mutuku ninye ati nyalbinamle’ tenen, kum wibuka dopdeipkine. ‘Anda, Israel ninye dam peterelbinamlam’ tenen, nyapmakina anya arye, aninye ara, ikin yupu, an kum kekepmanto yupu kum nyanyake. Sikce, nyanamkiyak yupu ara, ance, ‘E, sik nyanyak yupu ara, ‘Deiyok ani’ tenen, kekebuka, kum biknamne,’ kum tenepnamlyame. Sik nyapnamkiyak yupu ara, an yupu koproba anya.

⁶ Ati ara, narye an wipdeipkince, dopdeipnamakin mutuku ara, yupu kekena kum mutuku nang kume. Yuk mutuku yupu nyanyak kili sal kum bukni, an babye nyalyam yupu uk, nyanyak ninye unyaka anya arye, narye nyanamkin yupu bobuka, sik Israel yala ninye ati, peterelbinamlyame. Israel yala ninye arye, an nyanalam yupu kum kekenamkiyak bukni, yuk pera mutuku ninye dam dopdeipkitinyopura, sik yuk mutuku yupu nyanyak nang arye, na yupu moubuka kekeptinge. Bukni, ‘Naʼ tenen, ninye anya arye, kum kekenamake.

⁷ ‘Na nyanye yupu kekepnitinge,’ tenenamlam bukni, an kayapu Israel yala ninye ara, an nyanamlam yupu, pia kum kekenamkiyake. Ara, talye ati kume. Sikda, na Allah arye nyanye yupu babye, pia kum kekeninyake. Sik Israel ninye nirya ara, kanye tenina, kat kibuka anye arye, mandipna kanye bobuka, tatdayuk ninye unyakce, ‘Nun like,’ nyanyaka ati, na yupu babye, kekena kum unyake, nyapkine.” Allah arye Yehezkiel biti, laka nyabuk.

⁸ Nyabukura, ayupu ton nyapnuk. “Israel ninye, sik kanye ara, pia kat ubukba, keil kisok bobuka unyaka anya arye, wini talak ara, narye anti, ilil una pia kumce, bisina weiknye, akunum kipdeipkine. An babye atonun mandipna ubuka, pil kum batakmantonye una deiyok ning, akunum deipkiniba, winibuka ulamince, sikti, pia mikip arye peterenamlyame. Sik mandipna kanye bobuka unyak atonun, ubuka unamlyame. Ilil una kumce, na yupu dobuka, peterenauk unamlyame.

⁹ Bisibuka winilamak touk, an babye, atonun kipdeipkine. Winibuka wininamlama deiyok ara, sik Israel ninye arye, an yupu yaniptapnamkiyaka ati, ance keil kat bulamla atonun uminyopura, sikce anti kum bisipnamkiyake. Ati, sikce lik tenebuka, yu upliba, anti nyapkikirye, pia malye kanye bonamkiyaka babye, ance, ‘Se, yata wiriptinye do?’ tenen, ilil asa kum unamlyame. Sik Israel yala ninye ara, nati, ‘Nun like’ tenen, na yupu yanininyak ninye ati nyapkine,” Allah arye, na Yehezkiel ati nyapnuke.

¹⁰ Atalak aniryuk, Allah arye ayupu tonap dukdongobuka nyapnuk. “Se, anda ninye arye deipkikba, tukwaknye ulyame. Ati, anyanamkin yupu nirya ara, an amul arye kekebuka, pia moubuka tenipmince, ‘Se, aning ara, Allah arye nyapnuka,’ tenebuka unalame. Na nyanamkin yupu nirya ara, an kanye noutamak delinamlyame. Pia moubuka akunum talepminyopura, aminyan sik dam laka nyalbinamlyame.

¹¹ Ati wini talak ara, an yala nang ap, an kayapu Israel yala ninye ap, Babel mutuku yin talin nang arye, sirya obikce, tapu koubuka delilyayikba, Babel mutuku noutamak daunyak mutuku bimince, narye anti, nyalinamkin yupu nirya ara, sik kekena ati, peterelbinamlame. Sik ti nyanamlyame. ‘Allah el si Yahweh, aning nirya talibuka deice tam, Weik Erena Deiyoknye ulirye, el tenelul touk ululnye birye, nyapnuk yupu ara, ani,’ nyabuka peterelbinamlame. Ara, sikce an yupu kekenamkiyak talak babye, sikce an yupu kum kekebikirye, batakanamkiak talak babye, peterenauk wininamlyame. ‘Kum kekepmaniyak ati, bataknamne,’ pia kum tenenamlyame.” Allah arye, na Yehezkiel, nati nyapnuke.

¹² Nyalongoyuk talak aryuk, Allah el Dib Kanye arye, na dobuka ereipnuke. Winipnuk talak arye, na balye tam arye, yupu weik asa arye ton nyabukce, lelim weik lenmokba kekepse. Nun ni Allah, anda im deice tam ulyam mutuku ara, ei unyak malaikat nirya arye, an si erebikirye, ‘Allah ara, pia telebuk ulule, nyanamak’ tenen, patanulule.

¹³ Tonda, narye weik lelim kekenmase ning ara, sik kam un ning nirya arye, bol pipdanmekce, lelim weik nyanmok anyak kekepse. Tonda, sik yan serek nirya babye, liman lelim weik arye lelamle atonun, lenmokba kekepse. Winipmanto ara, mutuku lulukna luluklirye, lelim weik lelamle atonun nyabukba, kekepse.

¹⁴ Lelim weik kekepse talak ara, Allah el Dib Kanye arye na dobuka, welebinukce, yukak binuka deipnukopura, adiparyuk Allah Yahweh, el mikip, na kanye talima pumak moubuka talipnuke. Winipnuk talak ara, na kanye pun tam ara, ‘Yata deiyok ati do?’ tenen, na kanye boktopnukce, malye kanye bobuka engepsirye, mitik anun ton, teniltonauk tuba upnuk.

¹⁵ Aning nirya winipse talak ara, talye karin arye, Babel mutuku yin talin nang arye, Yudea mutuku noutamak ulamik ninye omikce, bobuka delilyanamikba, ulamik mutuku, mek si Kebar mek lilun bobinukba unmase. Tonda, amutuku si ara, Tel-Abib mutuku nyalamikak yanuka unmase. Amutuku bobinuka deipnukopura, daunmasi bukni, amutuku uk like tekbarye (7) sum, aninye ap neika ulamupu. Atalak noutamak ara, mambul ning eipmase ning ap, Allah el Dib Kanye arye bobinmanuk ning nirya ap ati, kanye bona kum, ‘Yata wiripmanil do?’ tenen, teniltonauk unmase. Yupu kum tanmasirye, talye unmase.

Allah el si Yahweh arye, ‘Anye bira, Israel ninye talibuka ulamlirye, kalikinamle’ tenen, Yehezkiel biti, wipdeibuk yupu

¹⁶ Like tekbarye (7) sum, akunum mapsa talak ara, Allah el si Yahweh arye, nati yupu nyalyanukce, nyapnuke.

¹⁷ Allah Yahweh arye nyapnuk yupu ara, ani. Se, anda ninye arye deipkikba, tukwak mutuku ulyamnye bira, narye an wipdeipmakina ara, talye ati kume. Nara an ap neika ansinibuka ulamnimirye, anda Israel yala ninye, sik kalikna deiyoknye unamlame. Ara, narye, nyapkinye yupu kekepminyopura, adiparyuk ayupu dobuka, Israel ninye ati melipmince, nyanamlame. Ara, talye yupu ati kuma. Yatato yupu do nirya, wenen ning do, ikin ning do, kanye imun ning do, narye anti mambul yupu arepkinye talak ara, laka nyapkinyopura, ance ayupu dobuka, adiparyuk sik Israel ninye ati, laka nyanamlyame.

¹⁸ Mambul yupu nyanalama anya arye, winipmanto ara, narye malye ulamice ninye ati ara, narye sikti, “Malye tuba winiminyopura, wenebuka opsiniba, dipkoprob dipnamlumca,” nyabuka, wenena yupu deice arye nyanamne. Bukni, ayupu nyapnyopura, ance amalye un ninye ara, ‘Sik malye unyak ning bataktinge’ tenen, sikti, kum nyapminyopura, sik malye unmace diparyuk dibikiba, sik malye una ati wenepnamne. Bukni ance, ‘Allah arye sik malye unyak ninye oplyak’ tenen, ayupu kum nyapminyopura, an babye wenepnamkine. Sik malye unyak ninye, malye kanye bobuka dipnamaka deiyok ara, an nong deiceuk deipnamkine. “Sik dipnamaka deiyok ara, an uka,” nyabuka wenepnamkine.

¹⁹ Bukni, sik malye un ninye ati ara, anda moubuka kalikdanamlyame. Amalye unyak ninye ati, “Se, na kayapu, anggunce tuba malye ulamunye ani, Allah arye anggun malye umunya ati, wenebuka opnamsil,” nyabuka, sikti, melibuka peterepmince, wenepminyopura, teleb uka. Wenepminye bukni, sikce an yupu kum kekebikirye, batakikcopura, narye sikti, wenebuka opnamne. ‘Sik malye ning bataktingopura, kamuk uptinge,’ bukni, kumopura, dipnauk upnamake. Winibuka dipnamak bukni, an tonok ara, kam unalame. Ara, urdem ati kume. Narye nyapkinye touk, amalye unyak ninye ati, kalikmince, ‘Allah arye opsilyak’ tenen, akunum wenepminyopura, ayupu nyanamlama deice arye, lyepdanamlame. Ara, narye, ‘Winipnalame,’ nyalikinye yupu uk kekebuka, unamlama ati ara, kum dipnalame.

²⁰ Tonda, yata ninye do nirya, diksukumuk ulamikca ani, aning batakikirye, tuba tamubuka malye winin ninguk ubicopura, narye, “Aning ara, kum wininamlyame,” nyapdeipkise yupu tuba winipminyopura, “Dipkoprop wenebuka opnamsine,” nyapne bukni, na yupu batakuka kum kekepnicopura, sik dipkoprob dipnamake. Bukni, malye ubikiba, narye nyakinye touk, ance, “Na kayapu, anggun malye winilulum ning bataktume. Kumopura, Allah arye wenebuka opsilyake,” nyabuka, akilisal ati, wenebuka kum peterepminyopura, sik malye wininyak ning noutamak arye, talye kanye bobuka dipnamake. Sik malye wininyak ning dekna ati, dipnamak bukni, ance, “Aning bataklulume,” kum nyapminyopura, sik dipnamak ara, an nong deice deipnamkine. Tonda, minop talak sikce teleb winin ning, winilamik ning ara, tuba tamubuka tonap, pia kum tenenamne. Aning deice arye, sikce sik bidamnye ati, kum melipdatinge. Bukni, ance amalye unyak ninye ati, ‘Allah arye wenebuka opsilyak’ tenen, dipnilibuka, wenena yupu kum nyapminyopura, sik dipnamak ninye ining saknamle ning ara, an nong deiceuk upnamkilarya. Winibuka wenepnamkin ati, batakana kum diparyuk, Israel ninye ati, pia wenebuka peterenamlyame.

²¹ Bukni, ance malye unyak ninye ati ara, ‘Sikda tonap malye winibicak’ tenen, ance moubuka dipnilibuka, wenenamlyame. Winipminba, ayupu kekebikirye, sik malye winin ning nirya batakicopura, aninye dipkoprop, kamuk ton tuba unamake. Ara, narye nyapdeipne yupu kekebikca deice arye, pia kam unamake. Ton ning ara, anda kamuk unalame. Ara, urdem ati kume. Deiyok ara, narye nyapkinye touk, ayupu nyanamlama deice arye, lyepdanalame. Ara, narye, “Winipnalame,” nyalikinye touk, winipminyopura, kum dipnalame. Allah arye, Yehezkiel biti nyabuk.

Allah arye, Yehezkiel bobuka, ninye kum mutuku, weik lyuak dopdeibukba, luba dayuk yupu

²² Yehezkiel birye nyabuk. Atalak ara, Allah el si Yahweh arye, el mikip na talima ak daraptalipnuke. Winipnuk talak ara, nyapnuke. “Ati ara, an bukmince, otam mutuku ara, lyu weik ubuk mutuku bilyame. Winipminyopura, narye mambul yupu ton nyapnamakine.” Allah arye nyapnuke.

²³ Nyapnukopura, bukdopsirye, el nyanmanuk mutuku, weik lyu mutuku binuka dinmasibuk, dipkoprob Allah Yahweh, el dirina ara, pia weik upmokba eipse. Ara, na Kebar mek lelun unmase talak uamuk touk dirina weik upmokba eipsirye, el si erena ati, ‘Talye luprabuka, kum dipdenun’ tenen, na urasin nirya kanupdongobuka, tuku deice mapsa.

²⁴ Winipse bukni, atalak ara, Allah el Dib Kanye, na talimak wekelyanukce, mikip ubuka tikeipnuke. Tikeipnuk talak ara, elce nati nyapnuk yupu ara, ani. “An mutuku koprobauk, tamubuka bimince, an aik pum tamuk, bublan tirikdongobuka, unalame. Talye luprabuka, bai tam balsusuna kume,” nyapnuk.

²⁵ Tonda elce nyapnuk yupu ara, ani. Se, anda tukwak ninye arye deipkiknye bira, yu nang arye, an tongobuka tapu koupnamkiyake. Koupkicopura, ance ton kupsakuka, yuk ninye dam ton kum banamlame. Anyaik pum tamuk pia unamlame.

²⁶ Tonda, ance Allah el yupu yaniltan ninye noutamak unamlama ati, na im deice arye, luptalina deiyok ning, an sitang deice deipkiniba, luba talipnamkile. Luba talipkilyopura, yupu ton pia kum tanamlame. An sitang ara, an si bam bol pum bisik deice tam ara, denepdongopkiliba, yupu tapmanto kum unamkile. Ara, talye ati kume. Israel ninye arye, malye ulamice ning ati, ance “Winina meme,” nyabuka, ‘Wenena yupu ton nyapmince, sik malye unyak ning bataknamak’ tenen, ‘Na Allah ati moropniminyak’ tenen, luba talin ning arepkiniba, yupu tapmanto kum unalame. Sik Israel yala ninye ara, na yupu yanibuka, malye kininyakce, mandipna kanye bona weik ninye unyaka atia.

²⁷ Winipnamkil bukni, yuk talak ara, narye yupu nyana deiyok ning, tuba tonap arepkiniba, tamubuka yupu nyaminyopura, narye mambul yupu ton arepkiniba, ance awenena yupu dobuka, sik Israel ninye ati, nyanamlyame. Sik ti nyanamlame. Allah el si Yahweh, aning-aning nirya deice tam talibuka, Weik Erena Deiyoknye ulula anya arye, elce, ‘Winipnamne,’ tenelul touk winilule. ‘Anye birye nyapnuk yupu ara, atia,’ nyabuka, peterenamlyame. Ayupu nyanamlam bukni, sik Israel yala ninye nirya ara, pia malye tenebuka, kanye talima kat nang ukirye, na yupu yaniltakan ninyeuk unyake. Ati, ton tam ninye ara, ance nyanamlam yupu moubuka kekenamake. Bukni, ton tam nang ara, na Allah arye nyapdeipkiniba, nyanalam yupu moubuka kum kekenamkiyake. Winibicopura, ance, ‘Anggun mandipna kanye boubuka, ninye yupu kum kekeluluma ara, bataklulume. Allah el yupu kekeplulume,’ an mikip asa arye, nyana kume. Sik kanye aryuk tenebikirye, wininamake ara, sik bidamnye daunamake. Sikda ninye yupu kekena kum unyaka anya arye, dawininamake. Na Allah arye, an Yehezkiel ati nyapkine. Allah arye nyapnuk.