Yehezkiel 29 - Eipomek

Mesir mutuku noutam nirya ara, Allah arye ikin ning arebuka deice arye, wenebuka oplobuk yupu

¹ Babel mutuku nang arye obisipsikce, tapu koubukapsikce, bobisikba, keting tamun ara, takubarye noutam ubukba, wala babye takubarye kibukba, tanggal dua belas sum, akunum yayukopura, atalak ara, Allah Yahweh arye, na Yehezkiel dam yanuka nyapnuk.

² Se, anda Yeheskiel, ninye sirika arye deipkiknye ulyame. Ance ninye deiyoknye, Mesir mutuku nirya talibuka, ninye deiyoknye, Raja ululnye biti, nyapnulyame. “Allah arye, ‘An ap, Mesir mutuku unyak nang nirya ap, anggun nong deice, ikin ning weik tonun deipnamsile,’ nyapnulyame,” nyabuk. Tonda, nyapnamlyame.

³ “Allah el si Yahweh, aning-aning talibuka, deice tam erebuka, Pia Mikip Weik Deiyoknye birye, ayupu ton nyapkile. Ara, ninye deiyoknye Raja Mesir biti, ayupu binuka nyapnulyame,” nyapdeipmanile. An Firaun bira, an kanye talima noutam ara, utenelyame. ‘Kume, na mikip pia weiknye, ununa anya arye, weik laut mekwen pum tam ulamle mikip weik ning, Nil mek pum tam malamle yu weik buaya atonun, unune. Nara, aninguk tenebuka nyanune. ‘Kume, weik balamle mek, el si Nil mek ara, naryuk kwepdeipse. Na kanye delina ati, Nil mek kwepdeipse. Nil mek deiyoknye bira natia,’ nyabuka ance nyabuka, an talima erelalyame.

⁴ Nyalyam bukni, na Allah arye, weik tonun wenepnamkina anya arye, winipmanto yupu nyapkine. Ninye arye, ikan tomolamak touk, nara, ikan tomon ning, el si mata kaiel, an si bama noutam deipnamkine. Winipkiniba, ikan mitik ning nirya ara, weik Nil mek balamle noutam arye banyak bukni, aning dobuka, an bol deice kat ulamle ning, el si ara, ikan karasakuk palilyanganamake. Winipkicopura, narye an nong mek pum tam arye, tomobuka kata sukum boyanuka, lakak deipnamkine. Winipkinye talak ara, Nil mek pum tam balamle mitik ikan ara, an nong deice ikan karasak palipnamkila nirya ap, an nong ap, kata sukum boyanuka, deipnamkine.

⁵ Winipkinyopura, an nong ap, aikan ap nirya dobuka, mek pia kum sukum, padan gurun noutamuk donoknamsine. Winipsinyopura, an ap, ikan ap ara, ninye kum sukum noutam arye sakuka unamlume. Yuk nang arye ton, anggunti, ‘Sik Mesir nang ara pia malye weik nang,’ tenen, anggun nong nirya ara, bulubuka, tuku lukikirye, teleb kibuka kum weipnamsiyake. Anggun nong nirya ara, narye dobuka arepsinyeba, anggun yanina ati, tukwak talye bai tam kam ulul ning ap, talye lakuka balamle maka ap arye, anggun nong dipnamsile.

⁶ Ura, aning winiplya deice arye, atalak sik Mesir mutuku noutam, tuba unamak nang nirya arye, na Allah ati, ‘Se, Allah Yahweh, elda aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamniake. Ara talye ati, kume. Deiyok ara, Israel nang arye, sik mesir mutuku nang ati, ‘Nun mal olan nang olyanamsiyak talak ara, Mesir mutuku nang arye yanuka, nunti kalikuka melipnamsiake,’ tenelamsik bukni, anggunda, kum meliamlume. Winipmanto ara, ninye arye, kama patapne talak ara, kat yo dona kum bukni, pia mitang ning, mal pina atonun ning bobikirye, balamikiba, sakuka opdatinga atonun, anggunda, ato nang ulamluma atia. Anggunda, mitang nang anya arye, Israel nang pia kum melilnamluma ati, nyapsine.

⁷ Winipmanto ara, Israel nang, sik mal olan nang yangalamik talak ara, sik mitang ati, ‘Yuk mutuku nang arye melipsitinge,’ tenelamikce, ‘Melipsitingʼ tenen, sik taruk talipdeyik bukni, sik Mesir nang sik taruk yok cebuk. Israel nang sakikba, sik takunya ap, taruk ap ara, cebuk. Tonda, Israel nang arye, ‘Binuka sakuka opdanuayapʼ tenen, sik Mesir mutuku nang dam melibuka talipdeyik bukni, sik yan ceplumba, Israel nang, sik yan mitang ubuk ati, kwin-kwining abuka, sakmanto ulamik. Ati, anggun urasin ara, winipmanto ara, ninye arye, pia mitang kama talipmakiba, cebuka olamle atonun nang ululume.

⁸ Ati ara, Na Allah Yahweh, aning-aning talibuka, deice tam erebuka, Pia Mikip Weik Deiyoknye birye, anggun Mesir nang ati nyapsine. Narye, yuk mutuku yin talen nang dopdeipniba, mal olan ning, parang ya, tace ning boyanuka, anggun mutuku noutam unyak nang ap, sik Mesir nang arye talibuka weinyak kam ning ap, anirya ara, obuka sirya daknamake.

⁹ Aning winipnyeba, sik amutuku nang arye, anggun ning nirya, akunum kum kipdeipsicopura, anggun Mesir mutuku noutam nirya ara, ninye yupu ton, kum kekepnamake. Pia tunim anauk upnamle. Winipliba, Mesir mutuku nang arye, na Allah Yahweh ati, ‘Se, Allah Yahweh elda, aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamake. Aning ara, talye ati kume. Deiyok ara, an Mesir mutuku ninye deiyoknye Firaun ap, an amu tam ulamik nang ap arye, ‘Kume weik balamle mek, el si Nil mek ara, naryuk kwepdeipse. Amek ara, na ninguk ulule. Naryuk amek talenune,’ nyabuka, kwalipluma ati, weik tonun wenebuka, oplopnamsine.

¹⁰ Ati ara, na Allah ara, an mal olananye atonun unune. Tonda, Nil mek balamle mek nirya babye, na yu tenepsirye, wenepnamsine. Narye sikti, wenebuka oplopnirye, sirya daknyopura, aning nirya, kum kipdeipnamne. Mesir mutuku noutam aulul ning nirya ara, kum kipdeipnirye, obuka sice buklopnamne. Ninye ton, amutuku noutam kum unamake. Winipnyopura, ninye nirya arye, ‘Se, Allah Yahweh elda, aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamake. Dipkoprob Mesir mutuku wililonak, dana-dana tam arye noutam nirya ara, malye kipdeipnamne. Ara, pia dabu tam, arah utara Migdol mutuku uamukak arye dipdongobuka, anyapce ubuka dipdongobuka, iknapye tam, arah selatan, Aswan mutuku uamukak babye, tonda Sudan mutuku otam-atam noutam bokolona tam nirya ara, malye kipnirye, kum kipdeipniba, asik oldem upnamle.

¹¹ Amutuku-amutuku noutam nirya ara, ninye babye, yuk talye kam ulamle ning babye, ton kum banamake. Ara, like yupa weik, keting tamun 40 tahun noutam nirya ara, amutuku noutam, ninye ap, yuk ning ap ton, pia kum banamake. Tonda, pia kum unamake. Amutuku ara, asik oldem unamle.

¹² Ura, yuk-yuk mutuku ton, malye kipdeipniba, asik oldemuk upnamak bukni, narye Mesir mutuku nirya ara, aning winipnamna deice arye, obuka sice buklopnamne. Yuk mutuku ara, mitik tonunuk winipnamne bukni, Mesir mutuku ara, pia kanye ikin upliba, kum danamle. Tonda, Mesir mutuku noutam ara, minop talak weik asik domikce, ninye weik daulamik bukni, keting tamun 40 tahun noutam nirya ara, pia asik oldem upnamle. Yuk mutuku weik asik dolamikak ton, malye kipdeipniba, mitik tonun ton, tunim anauk upnamak bukni, Mesir mutuku noutam ara, kanye imun weik upnamle. Tonda winipnyeba, lo ton arepnirye, donokniba, yuk mutuku nang arye, Mesir mutuku unyak nang nirya tamobikirye, pera sukum ton bobinamake. Sik mutuku koproba ara, oubuka sice buklopnamlarya.

¹³ Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, aning ton nyapsine. Keting tamun 40 tahun akunum uplye talak ara, Mesir mutuku nang nirya yaksenyeba, yuk-yuk pera mutuku noutam donokamse nang ara, aminyan talak tuba tamubuka, ton ap narye bulubukapnirye, boyanuka, anggun mutuku, mambul weik mutuku delilyanamsine.

¹⁴ Winipnirye, anggun unamlum sukum nirya, teleb kipdeipnamsine. Tonda, anggun unamlum tam ara, anggun mutuku koproba nuksiniba, Mesir mutuku uk ulamluma ara, eitam iknapye dam tam, arah selatan, anggun ulamlum mutuku noutam, tuba tonap unamlume. Ara, weik asik deiyok kibuka ulamluma ara, Patros mutuku unamlum bukni, wini talak ara, anggunda mitang nang, amu tamuk unamlume. Mambul weik mutuku nang, kum unamlume.

¹⁵ Tukwak mutuku noutam, yuk-yuk mutuku nang arye, weik deiyok talibuka, mikip unamaka nirya ara, Mesir nang anggunda, mikip mitang nanguk kipdeipsiniba, amu tam atouk unamlume. Tonda, anggunce deiyok kibuka, yuk mutuku nang ati, kum malye kibuka talepnamlume. Aning atouk, anggun talima erebuka, maknya kintinipmunce, sik yuk nang ati, pia kum talinamlume. Ara mitik kipdeipsinyopura, yuk mutuku nang kum talibuka unamlume. Amu tamuk unamlume.

¹⁶ Israel mutuku nang ara, aminyan talak ikin uplyopura, ‘Se, sik Mesir mutuku nang, sikcuk nun ton yanuka melipsiktingce, lyepdopsitinge,’ nyabuka, tuba ton ap, pia kum moronamake. Deiyok ara, aminyan talak ara, Israel nang arye, tamubuka tenebikirye, ‘Se, nun mal olan nang yangalamik talak ara, nunce, ‘Se, Mesir mutuku nang aryuk, melibuka lyepdopsitinge,’ tenebupu talak ara, malye weik ububa anya arye, aning ara ton ap kum winipnamabe. Atalak ara, yata ning deiyok ati, ‘Mesir nang, sikce nun ton yanuka melipsululume,’ nyabuka, morolamupu do? Aning ara, walwal arye wamupube,’ tenenamake. Atalak ara, Israel nang arye, ‘Kume, Allah Yahweh elda aning-aning talibuka, deice tam erebuka, pia mikip weiknye ululeʼ tenen, nati, pia moubuka biknamniake.

Raja Nebukadnesar birye, Mesir mutuku opnamuka ati, nyabuk yupu

¹⁷ Babel mutuku nang arye, nun Israel nang opsikce, nun bobinamsikba, neika ulamupua ani, keting tamun 27 tahun, akunum kibuk talak bukni, wala tonok ning, tanggal 1 deice arye, asum kibuk talak ara, Allah Yahweh arye, na Yeheskiel dam yanuka nyapnuke.

¹⁸ Anda, ninye sirika arye deipkiknye ulyame. Ayupu nyapkine. Babel mutuku ninye deiyoknye, Raja Nebukadnesar birye, el yin talin nang, Tirus mutuku warikil yangana ati, mikip weik nang dobuka deiamukba, Tirus mutuku binuka ikin pil weik dolamik. Ara, ‘Tirus mutuku nang ati, obuka sirya daknamapʼ tenen, ikin pil weik dolamikce pirilelamike. Winilamika deice arye, ayin talin nang, mal olana weik anya arye, sik kisok deice kat kalun kalulamik arye, sik kisok potong nirya kum kibukce, delo uk kibuk. Tonda, ikin ning weik tonun, tomobuka bobinamik anya arye, sik takunya deice ara, ikin ning takubuka yangalamika deice arye, sik takunya deice bola kobuk. Winilamik bukni, Babel mutuku Rajanye ap, el yin talin nang ap arye, Tirus mutuku noutam pil weik dolamik bukni, sik babye dolona ara, dekna teleb ning ton kum doprobik. Talya piluk dolamik.

¹⁹ Ati ara, na Allah Yahweh, aning-aning nirya talibuka, erebuka deice tam unirye, mikip weik ununye birye, nyapne. Narye Mesir mutuku nirya ara, alubuka dopropnirye, Raja Nebukadnesar biti arepyeba, amutuku nang arye, talinyak bona nirya ara, alubuka bobinamle. Ara, el yin talin nang arye, sik deken ning arena atonun ati, dopropnamake. Mesir mutuku nang arye, talibuka unyak teleb ning nirya ara, tonok ton kum bataknamake. Ton ning ara, alubuka dopropnamake. Ton ning ara, malye kipdeibikirye, asukumuk bataknamake. Aning-aning yuk-yuk ning nirya ara, dalubuka doropnamaka deice arye, Nebukadnesar, el yin talen nang, sik deken ning atouk deknamlarya.

²⁰ Deiyok ara, na Allah arye, Raja Nebukadnesar biti, ‘Mesir mutuku nirya obukaplirye, malye kipdeipnamleʼ tenen, elti, wipdeipsiba, Mesir mutuku wenena ati, na tenepse ning ara, el Nebukadnesar ap, el yin nang ap, sikcuk pil dolamnike. Sikce weik pil dolamnika ati, sik deken ning ara, Nebukadnesar arepnamne. Nara, Allah Yahweh, aning-aning nirya talibuka, deice tam erebuka unirye, pia mikip weik ununye birye, nyapsina anya arye, aning nirya ara, dipkoprob nong upnamlarya.

²¹ Aning nirya akunum winipnamne talak ara, atalak dam uplyopura, na pil dopnamna deice arye, Israel nang nirya ara, mikip kipdeipnamne. Winipmanto ara, sapi basam kisok deice taice ning belelamlarye, cang belepnin balamle touk, Israel nang ati, mikip kipdeipnamne. Tonda narye melipkiniba, Yeheskiel anda, Israel nang dam, yupu talye mangkau nyaminyeba, sikce an yupu kekenamkiyake. Aning nirya winipnye deice arye, sik anang nirya arye, ‘Se, dipkoprob, aning-aning nirya talibuka, deice tam erebuka ulirye, pia mikip weik ululnye bira, ara Allah Yahweh el uka,’ tenepnikirye, nati moubuka biknamniake.