Yehezkiel 28 - Eipomek

Allah arye, “Tirus mutuku talibuka ulamuk ninye deiyoknye, Raja wenepnamne,” nyabuk yupu

¹ Allah el si Yahweh arye, na Yeheskiel dam yanuka nyamnuk.

² “Se, anda ninye sirika arye deipkiknye, ance Tirus mutuku ninye deiyoknye biti, laka nyapnulyame. Ara, “Nara Allah Yahweh, aning-aning nirya talibuka, deice tam erebuka, weik erebuka mikip ununye birye, nyapdeipnun yupu ara, ninye deiyoknye Tirus mutuku Raja ati, ayupu laka nyapnulyame. Ara, Tirus mutuku Raja anda, an kanye pum tam erepluma deice arye, nyaplume. Nara, Allah atonunye unune. Narye weik laut mekwen noutam, mekwen dana-dana tam antanap dongobuk mutuku, pulau deice tikniba, talye ninye arye, na si erenamniyake,’ teneplumce, nyapmalum ning ara, talye yupu deice arye nyaplume. Bukni, dipkoprob ning ara, anda, Allah atonunye pia kume, anda talye tukwaknye dem ulyame. Aning moubuka tenipnulyame.

³ Anda, tuba ton ap, moubuka tenipdenulyame. Dipkoprob anda kel weik bikinanye ulyame. Minop talak ulamuknye, nabi Daniel, el kel bikamuka ara, weik bukni, elda mitik tonun, bukni, anda dipkoprob weik tonun kel bikalume. Yuk talye nang arye, kel kum bikting ning, Allah arye duknulul ning, kel kum bikinyak bukni, anda mitik tonun dewa-dewa (isa-isa) atonun ning ulyama ati, ance aning-aning akunum kel bikalume. Yuk ning arye, anti kum duknulule.

⁴ Kel weik bikamlum ning ap, ‘Teleb una ara, ani,’ moubuka tenelyamce, nong noutam ning ton kel bikamluma deice arye, tukwak ning nirya dolomince, bona talinanye akunum ulyame. Tonda dekna weik ning, el si emas ap, perak ap, ‘Aning nirya ara, na ning koproba ululeʼ tenen, weika arye dopropmince, aning, ‘Naʼ tenen deilin aik noutam, akunum delilyamak, pia weika arye upmale.

⁵ Aninguk kum bukni, tonda kel weik bikamluma ati, aning-aning nirya dobuka, aning bulubuka, deiplum ning, tuba tamubuka yuk mutuku nang ati, dekeminya deice arye, weik bona talinanye akunum ulyame. Aning nirya winiminya deice arye, ‘Nara weik bona talinanye ununeʼ tenen, an kanye pum tam erelalyame.

⁶ Aning ati ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, nyapkine. ‘Anda, Tirus mutuku nirya talibuka, ninye deiyok Raja kibuka talilyamnye birye, ‘Na kanye pum tam ara, Allah atonunye unune. Nara dipkoprob kel weik bikamse ati, Allah el tenelye touk, na babye atonun teninune,’ nyabuka kwalilyame. Ara, ance, ‘Nara Allah atonunye, kel weiknye unune,’ tenelyama atia.

⁷ Winibuka tenelyama anya arye, narye dipkoprob nyapkine. Na Allah arye, yuk pera mutuku ninye asik nang boyanyeba, anti olyanganamkiyake. Ton mutuku nang ara, yu weik nang unyak bukni, narye an deice boyanuka deipnamkin mutuku nang ara, pia yu weik nang ukirye, yuk mutuku nang nirya ati ara, bico pia kum tenenyake. Yuk mutuku nang ati, adiparyuk yu weik arye, obuka sirya dakan nanguk, unyake. Ayu nang dobuka, an deice deipkinyopura, sik mal olan ning ap, ninye on parang ya, tatce ning ap boyakirye, warikuka opnamkiake. Winibikirye, an kel weik bikluma deice arye, urasin pia teleb ning, bulubuka delilamlum ning ap, an aik noutam bulubuka deiplumce, deklamlum urasin teleb ning nirya babye, sice buklobikirye, malye kipdeipnamake.

⁸ Winibikcopura, an nong babye, opkiceba, dipminyopura, yuk nang arye, an nong dobuka weipkikceura, akunum diamik nang biyik mutuku, weik cang pum noutam binuka unamlame. Winipkicopura, laut mekwen deice ban nang, ninye obikceba, dibikirye ulamice sukum ara, laut mekwen pum tam noutamuk, binuka unamlame.

⁹ Winipnamkiyaka ati ara, yuk pera mutuku nang arye, an opnukice ning ati, ance, ‘Kume, nara Allah atonunye unune,’ nyapnalam do? Kume, sikce anti, akunum bikika ati, anti opnamkiyak nang ati, ance, ‘Kume, nara Allah atonun unune,’ nyaptuma babye, sik anang arye dipkoprob akunum bikike. Ara, ‘Elda, Allah atonunye kum bukni, talye tukwaknye ululeʼ tenen, moubuka akunum bikike.

¹⁰ Dipkoprob nyapkine. Ninye asik nang arye, ‘Anye bira, Allah el ‘Naʼ tenenanye kum anya arye, elda sik den ban bol deice tam sekenyak nang atonun kume. Ati, elda talye luparabuka optibye,’ tenepkikirye, an nong opkikiba, dipnalame. Nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye unirye, ayupu ara, nyapdeipkina anya arye, aning nirya ara, na laka nyapmakin touk, dipkoprob upnamlarya! Ara, ‘Na Allah Yahweh arye, nyapkina atia.

Tirus mutuku talibuka ulamuk Raja, ninye deiyoknye obik yupu

¹¹ Na Yeheskiel birye nyapsine. Aninguk kum bukni, Allah el si Yahweh arye, na Yeheskiel dam ati yanuka, nyapmanil yupu ara, ani.

¹² Se anda ninye sirika arye, deipkiknye ulyame, ance, ‘Seʼ tenen, kanye imun mot, Tirus mutuku talibuka, Raja ninye deiyoknye biti, tenepmince, engena deice arye, mot nyapnulyame. Nara, Allah Yahweh, aning-aning nirya talibuka, deice tam weik erebuka, Pia Mikip Weik Deiyoknye ununye birye, nyapdeipnusin yupu ara, kekepmince, laka nyapnulyame. Ara, an minop talak ara, pia teleb ninye deiyoknye ulamlume. Tonda, anda pia urasin telebnye ulamlumce, aning-aning weik tonun, kel bikamlume. Atalak ara, anda pia telebuk ulamlume.

¹³ An ulamlum mutuku ara, Eden mutuku ulamlume. Ara, Allah elce, pia teleb palamle ning, yuk-yuk ning nirya kouamukak ulamlume. An baju deice ara, urasin pia teleb dekna weik keil arye, taplakuka wiamikba, aning ongolamlume. Ara, Yaspis keil ining bi ning ap, Krisolit keil ap, Yaspis keil poron ning ap, Pirus keil permata ap, Krisopras keil ap, Neferit keil ap, Lasurit keil ap, ining bi keil ap, Tonda akeil noutam aknapdongobik ning ara, pia teleb emasuk, uamuk. Tonda, urasin teleb ning aryuk, puturubukabikce, kintinibuka deibik ning ara, pia telebuk uamuk. Aning nirya ara, an kwepdeipkuk talak aryuk, aning kintinibuka deibuke.

¹⁴ Na Allah arye, an nong dobuka, pia mikip weik malaikat, el si Kerub atonun kipdeipkise. Ara, na Allah un dam, malye ning pia kum ululak, pia teleb lek mutuku deice deipkise. Tonda, amutuku deipkiseba, bisik balamlumak nirya ara, dirina pia weik keil deipseba, el dirina ara uku palamle touk, pia dekna weik meldang-dang alamuk keil deipse noutamuk balamlume.

¹⁵ Narye, an kwepdeipkisiba, minop talak ulamlum talak nirya ara, an kanye aryuk tenebuka, malye un ning ton, kum winilamlume. Pia teleb ninguk winilamlume. Bukni, aminyan talak ara, an kanye aryuk, malye ning ton tenilamluma deice arye, malye winilamlumba, eibuka bikamkise.

¹⁶ An Raja ap, an tam nang ap, anggun bona weik bulubuka, deialumce deklamluma deice arye, malye un ning weik winipmalumce, anggun amu tam unyak nang ati, yaniplobuka ikin ning, sik nong deice deiamlume. Winilamluma ati ara, an diksukum winina kum ati, na Allah un dam yanmanto kum ulamlume. Ati, narye anti, ‘Anye bira, pia malye anya arye, na like,’ tenepsirye, na un dam, pia lek sukum arye, yakuka donokise. Min talak ara, pia teleb mutuku kalikna ati, kwepdeiamkisiba, ulamlum ning ara, akunum kum kipdeipkinirye, narye nyapdeipsiba, im deice malaikat, el si Kerub arye, anti yakuka, bai tam dokwetepkukba, urasin teleb dekna weik ning, meldang-dang alamle keil dam ara, ton ap tuba pia kum unamlame.

¹⁷ An nong bol urasin pia teleb upkuka deice arye, kanye pum tam erebuka kwalilyame. Tonda, an kanye pum tam erebuka, kwalilyama deice arye, ‘Pia urasin teleb ton tabakuka winipnamnarya,’ tenyamlum bukni, malye kipdeipdaluma deice arye, an pia moubuka, kel bikamlum ning nirya ara, akunum pia malye kipdeipdalume. Ati ara, narye an nong tukwak dopkwetepkisiba saklumba, sik mutuku sirya, im sirya nirya unyak Raja ninye deiyok nang, sik asing dinak arye winipkisiba, sik nirya arye, an malye winilamlum ning ara, akunum eibuka bikike.

¹⁸ An ap, an tam nang ap arye, malye pil weik dobuka, malye un ning winipnamlum ning ap, tonda, bona dekemince, ‘Naʼ tenen arye, tilila yupu nyalamlum ning ap, dukunubuka winiminye ning ap, tonda aning nirya winilamluma deice arye, anggun isa si erena ati, kintinip deiplumak nirya ara, malye kipdeiamlume. Ati ara, anggun wenena ati, narye uku dopkwetepsiba, anggun weik asik dobuka, ulamlum mutuku nirya ara, uku arye dibuka, sirya dakukce, anggun asik ap, anggun nong nirya ap, dibukba, atu atonun upsukba, ninye dana-dana tam nang nirya arye, eipsike.

¹⁹ Sik dana-dana tam unyak nang, mutuku sirya, im sirya nirya, anggun Tirus mutuku nang ati, biksik nang ara, aning winibukba, eipsikce lukdayikce, yok berber abukba, sik kanye ikin weik unyake. Anggun Tirus mutuku nang ara, anggun kam ulamunya sirya talak ara, kanye imun ninguk, anggun dam akunum yanuka upnamsile. Ati, Raja an ap, an amu tam unyak nang ap ara, ton ap pia kum unamlume. Pia, kum kipdeipnamsine.

Allah arye, Sidon mutuku nang ati, aminyan talak ikin ning deipnamuk ning ati, nyabuk yupu

²⁰ Aminyan talak ara, Allah el si Yahweh arye, na Yeheskiel dam yanuka, nyapnuke.

²¹ Se, an Yezekiel bira, ninye sirika arye deipkiknye, an urasin ara, Sidon mutuku dimince, aminyan talak ara, ikin ning, anggun nong deice deipnamsin ning ati, narye nyapdeipkinye touk, ance tamubuka, ‘Anggunti supnamsile,’ nyapnulyame.

²² Tonda, na Allah Yahweh, aning-aning nirya talibuka, deice tam weik tonun erebuka, Pia Mikip Weik Deiyoknye birye, anyapkin yupu ara, ance, Sidon mutuku nang ati, nyapnulyame. Ara, Sik Sidon mutuku nang ara, nara sik mal olananye ununa anya arye, sikce biknuninyake. Sik dam yanukam laka kipnirye, sik wenena ning dobuka, sik nong deice deipnyopura, winipnamna deice arye, dipkoprob sikce biknikirye, ‘Se, Allah ara, dipkoprob aning-aning nirya ara, el mikip deice arye, talilula anya arye, elcuk ninye mutuku sirya, im sirya nirya, sik weik deiyoknye ulule. Tonda, amutuku unyak nang nirya arye, na mikip weik ununa ap, na malye una pia kumce, pia teleb leknye ununa ap ara, moubuka biknamake. Ara, narye sik dam kanye imun weik ning deipnamna deice arye, atalak arye biknamake.

²³ Aning ara, talye ati kum nyapne. Deiyok ara, sik dam ara, kanye imun weik uk ton, dopdeipnamna atia. Tonda, sik mal olan nang ara, dana-dana tam arye yakirye, obikiba, sik ining ara, bisikak uk, sakuka poupnamle. Ninye ara, mal olan ning ara, pia yu weik ya arye, obikceba, ninye weik tonun, sik weik asik noutam dipnamake. Aning nirya winipnamne deice arye, nara Allah Yahweh, na mikip deice aryuk, ninye mutuku sirya, im sirya nirya, sik weik deiyoknye unune. Aning ara, sikce biknamake.

Allah arye, “Israel nang tamubuka teleb kipdeipnamne,” nyabuk yupu

²⁴ Aminyan talak ara, Israel yala nang ara, sik dam dana-dana tam unamak nang nirya arye, anggunti kum mal pinamsiyake. Winipmanto ara, taice ning nong noutam wekmalirye, lebum-lebum alamle touk, sik dana-dana tam unyak nang arye, ton ap mal pibikiba, ilil weik upnaba, talima uk, dilamsuk ning ara, tuba tonap, uk kum dinamsile. Min arye, sik dana-dana tam ulamik nang arye, ‘Sik Israel nang ara, malye ninguk wininyake,’ tenebuka nalibuka malye weik ulamikba, ‘Naʼ tenen nang, ikinuk ulamik bukni, narye aning nirya winipnamna deice arye, sikce, ‘Se, dipkoprob Allah Yahweh, el mikip deice aryuk, ninye mutuku sirya, im sirya nirya, sik weik deiyoknye ulule,’ tenen, biknamake.

²⁵ Nara Allah, na si Yahweh arye nyapsine. Nara, aning-aning nirya talibuka, deice tam erebuka, Pia Mikip Weik Deiyoknye ununa anya arye, narye nyapsine. Minop talak, narye Israel nang, yuk-yuk mutuku donoksiba, sik mal olan nang arye, tapu koubuka bobinamik bukni, narye sik biyik nang bulubuka, sik mutuku uk boyanuka, tuba asukumuk deipnirye, na pia teleb lek ning ap, telebuk kunuknak ap, sik talima pum noutam deipniba, telebuk ubicopura, yuk-yuk yala nang, dana-dana tam nirya arye, eibicopura, bikinamake. Na mikip ara, sik dam akunum pil dopnamna deice arye, biknamake. Tonda, winipyopura, na si erebuka, na amu tam pil donanye Yakub biti, ‘Amutuku dobuka arepnamkine,’ nyabuka, nyalin yupu deice elti, arepse mutuku uk, elce deiamukba, dadeipdanin yangalamika ani, wini talak unyak Israel nang ati, amutuku nirya arepnyopura, tuba tamubuka, sik mutuku uk, yanuka unamake.

²⁶ Israel nang amutuku unamak talak nirya ara, olana kumce, kanye deibikirye, pia telebuk ukirye, sik aik dobuka ukirye, sik anggur wa wibuka unamake. Minop talak, anggunti, ‘Israel yala nang ara, malye nanguk unyake, dakwapye,’ nyabuka, amutuku dana-dana tam ulamikce, mal olyangalamik nang nirya ara, narye wenebuka oplopnamne. Winipnamna ati, Israel nang, sik amutuku unamak talak nirya ara, ninye ilil una kumce, kanye deibuka, pia telebuk unamake. Atalak ara, Israel yala nang nirya arye, nati, ‘Se, Allah el si Yahweh, dipkoprob el mikip deice arye, aning-aning nirya talibuka, el mikip weik deice arye, nun ninye deiyoknye ulule,’ tenenamniyake. Utenepnikirye, ‘Allah el akunumaʼ tenen, biknamniake.