Yehezkiel 27 - Eipomek

Tirus mutuku nang wenebuka opnamuk talak, mot nyana ati, nyabuk yupu

¹ Allah Yahweh arye, na Yehezkiel biti, yanuka nyapnuk. Allah arye nyapnuk yupu ara, ani.

² “Se anda ninye sirika arye, deipkuknye ulyame. Anda, Tirus mutuku noutam unyak nang, sik dipnamak nang ati, kanye imun mot nyabuka, engenamlume.

³ Tirus mutuku ara, weik laut mekwen lilun, pia teleb sukumak ulule. Tirus mutuku unyak nang arye, deken ning yuk-yuk ning nirya dobuka, yuk-yuk pera mutuku unyak nang ati, bobinuka dekenyake. Pera mutuku nang babye, yuk laut mekwen lilunak unyak nang, ‘Anang arye, adeken ning deknamak,’ tenena ati, abona bobiceba, anang nirya arye dekenyake. Ati, anggun Tirus mutuku ululum nang ara, moubuka kekenamlume. Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggun Tirus mutuku nang ati, nyapsine. Anggunda, kwalina pia weik umunce, talye tenen yupu deice arye nyalulume. Anggunce, anggun bidamnye ati, “Nunda urasin, pia telebuk unyabe. Nunda, pia teleb nang unyaba anya arye, pia teleb kanye deibuka unyabe,” akunum nyalulume!

⁴ Tonda, anggunce, ‘Nunda weik laut mekwen noutam, mek dana-dana tam deibuka, antanap dongoamuk mutuku noutam unyaba anya arye, laut mekwen noutam karu weik ulamlak unyabe. Tonda, laut deice arye binuka, dana-dana tam mutuku banauk unyabe. Tonda, nun asik nirya ara, kel weik nang arye, urasin pia teleb aik domsik,” nyabuka, kwalina deice arye nyalulume. Ati, na Allah arye, anggun Tirus mutuku nang ati, winipmanto yupu nyapnusine. Anggunda, weik laut mekwen deice balamle ning, el si ara, kapal laut atouk ululume. Kapal laut dona deiyok nang arye, urasin pia teleb atouk, ubuka dopsik.

⁵ Laut mekwen deice balamle ning, el si kapal laut domsik ning ara, Hermon mutuku dup tikamuk yo, el si ara, aras yo webuka, yo lakase cakuka kintinibikce, adeice arye domsik. Tonda, akapal laut mekwen deice bobana ati, kintinip deipsik cang yo ara, Libanon mutuku deice pamuk keipyal yo webukabikce, sik kapal laut deice ikdeipsik.

⁶ Amekwen deice balamuk kapal, el mek bukna ati yo ara, Basan mutuku noutam kat weik yo tikamuka deice arye, kintinibuka domik. Aning atouk, akapal el ninye tikinak ap, bunak ap, tikuka banak ati, lan yo ara, Siprus mutuku arye, keipyal yo boyanuka domik. Tonda, keipyal yo lamik deice ara, el urasin teleb una ati ara, gaja el yang arye, urasin teleb ning memebuka, aning dobuka, yo labik deice deibuka domik.

⁷ Akapal bana ati, cang yo lapkwetebik kain, el kum barina ati donyak ning, el si ara, layar deice deibuka domik ning ara, pia teleb kain lenan, pia namin deice ara, Mesir mutuku arye, memebuka wiamik ning arye domik. Tonda, acang kain, el urasin teleb una ap, ‘Pera sukum arye, yuk nang akain eibikirye, ‘E, ara amutuku nang yanganmake, tenepnamak,’ tenena ati, akain wibukapnarye, kintinip deiamik ning arye, domik. Tonda, ‘Keting buppu dipsilyakʼ tenen ati, ‘Koa upsutuʼ tenen, yuk cang kain dobuka, tenda aik dolamak ning deice arye, mingne kibuka domik ning ara, Siprus mutuku el kain ara, warna unggu sukun ning deice wibukabikce, aning ton, akapal deice deibuka domik.

⁸ Sik kapal laut mek deice bana ati, yo arye bukna mikip nang ara, Sidon mutuku ap, tonda Arwad mutuku ap arye, yanuka apil talibuka domsik. Tonda, ‘Amutuku otam binamap, otam mutuku ton binamaba anya arye, abisikuk binuyabʼ tenen, laka nyan nang, kel weik bikamik nang ton, sik mutuku nang koproba aryuk, laut mekwen deice kapal bobuka bana ati deiyok nang ara, pia kel weik bikamik nang arye, apil talibuka domsik.

⁹ Akapal aik pum noutam yo, memena nang nirya ara, Gebal mutuku nang, sik pia namin arye dakeiyam asa un nanguk ulamik. ‘Sik anang ara, laut mek arye, nun kapal aik weksilyakʼ tenen, yo pea dobuka, yo lakase noutam denelongolamik. Amutuku-amutuku noutam, laut mekwen deice balamikce, daulamik nang nirya ara, amekwen deice ban kapal damuk yangalamik. Ayangalamika deiyok ara, amutuku noutam delilamlum bona dekna ati, yangalamik.

¹⁰ Persia mutuku ap, Lidia mutuku ap, tonda Libia mutuku noutam ulamik yin talen nang nirya ara, sik Tirus mutuku yin talen nang tamuk kibik. Sik ayin talen nang nirya, sik nong kalikna ati, el si ara kelapye ap, kisok kalun ning kat topi, el si baja ap, kalupnarye, mal olalbalamik. Aning nirya winipnarye, sik amutuku noutam banopura, kat ning tembok-tembok deice babye, lak kibuka delilamik. Aning winilamika deiyok ara, ‘Nun mal olan nang, sik dam binuka, obuka sirya daknamapʼ tenen, aning nirya ara, ongolamik. Tonda, ‘Aning winibibya deice arye, sik anang ara, dipkoprob nang unyake, tenepnamsiyakʼ tenen, winilamik.

¹¹ Arwat mutuku noutam ulamik yin talen nang nirya ara, kat keil deibuka, domik tembok-tembok poka deiceuk, sikce yanuka kaliklamik. Aning atouk, Gamad mutuku noutam deibuka domik cang aik, el si ara, menara-menara damuk yanuka, anyaik welebukabikce, amutuku kaliklamik. Sik akaliklamik nang nirya ara, sik nong taram deice lelina ati, el si perisai ap, tonda sik mal lin ning ap, mal ap nirya ara, akat ning tembok deibuka, domik ning deice lalkwetelamik. Sik anang nirya ara, urasin pia teleb un ning nirya ara, sikce aning nirya kintinip deibikce, sik mutuku noutamuk delilamik. Awililamek ning ara, anggun mutuku urasin teleb kililamik.

¹² Aning winilamik talak ara, sik Tarsus mutuku ulamik nang arye, anggun dam yanuka, anggun deiamlum bona yuk-yuk ning nirya ara, dekelalamlume. Ara, Spanyol mutuku weik tonun uamukba, anggunce yamubuka boyangalamlume. Ara, sikce menenga weik arelamsikce, anggun bona weik dololamik ning ara, perak ap, kat ning besi ap, timah kurun ning ap, timah mirin ning ap, dololamik. Sik amutuku-amutuku nang arye, anggun Tirus mutuku dengna weik ning yala-yala nirya, dekuka, sik mutuku tamubuka bobalamik.

¹³ Aning atouk, anggunce Yunani mutuku nang ap, Tubal mutuku nang ap, Mesek mutuku nang ap nirya ara, anggun Tirus mutuku nang dam yangalamikce, dekelana uk ulamlume. Ara, sik amutuku noutam ulamik nang arye, sik bona yuk-yuk ning nirya boyanarye, dekman ning nirya ap, sik talye pil don nang ap, dobuka yanarye, menenga arepne ning nirya arelamikba, anggun Tirus mutuku nang delilamlum bona yala-yala nirya deklamikba, anggun Tirus mutuku nang arye, deken ning yo bok weik dololamlume. Tonda, urasin pia teleb kat ning, el si perunggu boyanaba, anggunce dekuka dololamlume.

¹⁴ Anggun Tirus mutuku nang arye, delilamlum bona yuk-yuk ning nirya ara, Bet-Togarma mutuku ninye arye, ninye bukuka ban ning, el si kereta kuda ap, tonda kuda basam ap, boyanuka arepnaba, anggun Tirus mutuku nang arye, deiamlum bona deklamik. Tonda, ninye olbana ati, kuda basam ap, keledai basam ap, deice arye deibuka, dekelamik. Ara, Bet-Togarma mutuku nang arye, sik dekna weik ning yanuka arelamikba, anggun Tirus mutuku nang arye, kintinibuka delilamlum bonauk, dobuka bobalamik.

¹⁵ Tonda, Rodus mutuku nang babye, anggun Tirus mutuku nang ap, neika bona deibuka dekelalalume. Tonda winilamlum talak ara, sik mek lilun mutuku, pantai pasir lilun unyak nang nirya, anggun mutuku yangalamikce, anggun delilamlum bona uk yanuka deklamsik. Ara, Gaja basam el yang ap, mirin yo dekna pia weik yo ap, boyanuka dekelamike.

¹⁶ Aning atouk Edom mutuku noutam bona dekna deiyok nang nirya babye, anggunce delilalumce, deklamlum bona weik uamuka anya arye, aning yuk-yuk ning nirya, yanuka deklamsik. Tonda, aning wininyaka deice arye, anggun dam wekesilye ning ara, pia weik ulule. Ara, sik amutuku-amutuku nang nirya arye, arenyak ning ara, pia kat weik ning, el si ara permata ap, kat keil el si ara, Zamrud ap, namin bi kain ap, pia namin unggu kain ap, tonda cang kain el si kain sulam ap, kain lenan pia namin ning ap, kat keil, el si ara koral permata ap, adeice arye delilamik ning ap nirya, boyanarye dekelyangalamsike. Tonda, delima keil, pia teleb bi ning boyanarye dekelamsikba, anggun Tirus mutuku nang arye, yo bok pia weik dololamlume.

¹⁷ Yehuda mutuku nang ap, Israel mutuku nang ap, anggunce deibuka deklamlum ning, dekelyangalamsike. Ara, bona tam-tamup danuka dekelalalume. Sikce arelamsik ning ara, Minit mutuku lilamik gandum ap, madu mong mek ap, ninye kweten minyak zaitun ap, ‘Nun din ning toh nyapnamleʼ tenen, dongolamak ning, el si rempah-rempah ap, aning nirya boyanuka dekelyangalamsikba, anggun Tirus mutuku nang arye, yo bok pia weik dololamlume.

¹⁸ Damasyik mutuku ulamik nang arye, anggun mutuku uk yangalamikba, anggunce delilamlumce, deklamlum bona weik uamuka anya arye, dekna deiyok nang yangalamikce, aning yuk-yuk ning nirya yanuka, deklamsikba, anggunda, yo bok weik dololamlume. Tonda, Helbon mutuku nang arye, kintinip deiamik anggur kanye wangalamak mek ap, tonda domba basam, el potong kurun uamuk ning boyangalamsikce, deklamik.

¹⁹ Tonda, Uzal mutuku arye, anggur mek ton dekelyangalamik. Anggun ti dekelyangalamika deice arye, anggun mutuku kintinip deiamlum bona yala-yala nirya, dekelyangalamsike. Ara, kat ning, el si besi tempa ap, kwei ap, yuk din ning ap, dekelamikba, anggunda yo bok pia weik dololamlume.

²⁰ Aning atonun, Dedan mutuku noutam ulamik nang babye, deibuka deklamlum bona dekna ati, kuda basam deice bana ati, kain pelana boyanarye dekelamsike.

²¹ Arab mutuku nang ap, tonda Kedar mutuku noutam talibuka ulamik weik nang ap, anggun Tirus mutuku nang arye, delilamlum bona dekelyangana ati, sik mutuku arye, domba basam mi ap, yim domba basam weik ning ap, kambing basam ap, boyanarye dekelyangalamik.

²² Tonda, Syeba mutuku nang ap, Raema mutuku nang ap arye, anggun Tirus mutuku nang arye, deiamlum bona dekna ati, toh teleb nyan ning boyangalamik. Ara, din ning toh nyan ning, bumbu-bumbu yala-yala nirya, pia teleb ning ap, dekna weik urasin teleb kat keil yala-yala nirya ap, emas ap, dekelana ati boyanuka deklamikba, anggun Tirus mutuku nang ara, yo bok pia weik dololamlume.

²³ Tonda, Haran mutuku noutam ulamik nang ap, Kane mutuku nang ap, Eden mutuku nang ap, tonda Syeba mutuku nang bukni, Asyur mutuku ulamik nang ap, Kilmad mutuku ulamik nang ap, sik amutuku-amutuku dekna deiyok nang arye, anggun Tirus mutuku nang ap, neika dekelalalume.

²⁴ Sikce boyangalamikce, anggun dam dekelyangalamik ning ara, ani. Ara, baju urasin pia teleb ning ap, bi kain pia teleb unggu ning ap, nong nirya lelilongona ati, cang namin kain ap, tukwak amsuna tonkon ning, el si ara karpet, urasin pia teleb ning ap, tonda tapu mikip ning ap, aning nirya anggun dam boyanuka deklamik.

²⁵ Sik Tirus mutuku dekna ati, libuka bobana ati, laut mekwen deice kapal laut, pia weik ning arye, aning nirya libuka, yuk pera mutuku bobalamikba, amutuku nang deklamik. Ara, Tarsis mutuku kel weik nang arye, kintinibuka domik ning arye, sik Tirus mutuku bona libuka bobalamik. Ati ara, anggun bidamnye wibuka, bona weik tonun lipneaba, akapal nirya ara, ikin aryuk, laut mekwen noutam arye, aning bobalamuk.

²⁶ Amek mekwen deice kapal bobanyak nang arye, sik kapal bobukapsikce, laut pia noutam sukum bobinamsike. Winibuka bobisikopura, weik kumanya mikip, keting yangan tam arye anggunti, mikip asa yayukce opsuke. Kum mikip arye, anggun kapal nirya obuka, sice buklopsukba, laut mek arye dipsuke.

²⁷ Winipmala anya arye, sik dekna ati, lipmalum bona yuk-yuk ning nirya ap, anggun dekna yo bok ap, amek kwen deice kapal boban nang ap, sikce, ‘Abisik bana telebe,’ nyabuka, laka nyana deiyok nang ap, kapal laut, el nong noutam wamlye kin-kin lilsisikin nang ap, bona dekna kel nang ap, sik neika banyak kapal kalikin yin talen nang ap, sik mapu nirya babye, yuk mutuku arye dekelyangan nang ap, sik akapal pum tam wekmik nang nirya ara, mek pum tam wekikce, kum dayike. Aning atonun, na Allah arye, anggun Tirus mutuku nang ati, wenepnamsin talak ara, anggun Tirus nang ap, anggunce talelulum bona nirya ap, anggun mutuku ap, mikip arye obuka, sice buklopnamsine.

²⁸ Atalak ara, sik kapal bobana deiyok nang nirya arye, sik ilil upliba, yupu weik nyabuka ngaluknamake. Ngalukunmak talak ara, amutuku noutam unyak nang kekebikirye, ‘Se,’ tenen, malye nyabuka engenamake.

²⁹ Ura, akapal deiyok nang arye ngalukikiba, winibikcopura, adiparyuk sik yuk nang, kapal noutam pil donyak nang nirya, sik pil batakikcopura, alaut mekwen deice bobanyak nang ap, sik amu tam pil don mapu nirya ap, adiparyuk alaut mekwen lilun otam pantai damuk, binuka tiknamake. Ara, kapal pil don nang ap, ‘Teleb bisik ani,’ nyabuka, laka nyana deiyok nang ap, laut lilun tikmake.

³⁰ Aning nirya, akunum winibikcopura, sik anang nirya arye, anggun mutuku ortam dinmakirye, anggun ikin un ning ati, eibuka engenamake. Tonda sikce, ‘Se, yata ati do?’ tenena ap, kisok taledanuka engenamake. Tonda, sik Israel yala nang winilamak touk, ‘Nun imun kanye bobuka, unmabeʼ tenen, sik anang nong deice ara, tuku butbuta dobuka, sik kisok deice deibikirye, engena ap, tonda nong nirya tuku butbuta damuk bongokirye, engenamake.

³¹ Tonda, sik Tirus nang atibuk tenipdekirye, ‘Se, nun kayapu nang nirya dipnamakeʼ tenen, sik kisok potong nirya ara, kopnamake. Winibikirye, sik urasin teleb baju kwiriplobikirye, malye ning karung koni kain aryuk, pakubukabikirye, anggun Tirus mutuku nang ati tenibuka, malye nyabuka, engenamake. Winilamikirye, sik Tirus mutuku nang atibuk, pia tenibuka, engena ap, malye nyana ap, malye kanye bona apuk, unamake.

³² Aning nirya wininamak talak ara, sik anang arye, aninye weinamaka ati, kanye ikin mot tonok ton nyapnamake. “Se, Tirus mutukuo, sikda weik laut mekwen noutam wekmaka arye, sik kapal dangubukba, mekwen dibuk ning ara, yuk mutuku ton aning atouk, ton winyamuk do? Kume, pia kum winibuke.

³³ Anggun bona nirya ara, yuk pera mutuku arye, laut mekwen deice, kapal laut arye, akunum boyanamlumba, yuk-yuk mutuku danirye boyamumnyopura, laut lilun mutuku nirya ulamik nang arye, kanye pia delilamik. Winilamikce, aning nirya dopdomika deice arye, ninye deiyok Raja-Raja nang nirya ara, bona weik talen nang ulamik.

³⁴ Bukni, wini talak ara, anggun kapal laut nirya ara, akunum laut mekwen noutam wekmalume. Allah arye, anggun nirya ati, akunum obuka, sice buklopmasile. Laut mekwen noutam sukum binuka, deipmasuke. Winipmasuk talak ara, anggun mapu nirya ap, anggunce kapal laut aik pum tam lipmalum bona yuk-yuk ning nirya ara, anggun ap neika laut mekwen dipsukce, laut mekwen noutam sukum datunima abuke.

³⁵ Winipsuka anya arye, sik laut mekwen lilun tam unyak nang nirya ara, anggun winipmasuk ning kekebikopura, ilil pia weik ubukce, ‘Se, aning ara, pia mambuleʼ tenebikce, sirim talibuk. Sik anang talinyak ninye deiyok nang, Raja-Raja babye, awinipmuk ning kekebikirye, ilil kanye bobuka unamake. Tonda, sik urasin deice nirya babye, malye urasin bopnamake. Tonda, ilil weik ubukba, sik urasin malye bobikce, sik nong bol nirya, pia tililing abuk.

³⁶ Tonda, mutuku nirya arye, bona yuk-yuk ning nirya deibuka, dekelanyak pil dona deiyok nang arye, anggun Tirus mutuku nang, akunum obuka, sice buklopsinyopura, aning eibikirye, “Se, anango! Sik Tirus mutuku nang nirya ara, akunum pia kum danmaka atia!” Anggunda, tamubuka, ton teleb kum kipnamsile. Anggun dekamlum ning ap, anggun ap ara, akunum kum danmale,” nyanamake.