Yehezkiel 26 - Eipomek

Tirus mutuku noutam, Allah arye aminyan ikin ning arepnamuka ati, nyalina yupu nyabuk

¹ Babel mutuku bobisikura, ulamupua ani, keting tamun 11 tahun akunum kibuk talak ara, tonok wala deiyok koubuk sum, tanggal satu 1 kibuk sum ara, Allah Yahweh arye, na dam yanuka, ayupu nyapnuk.

² Anda, ninye tukwak nang arye deipkiknye, moubuka kekepnulyame. Tirus mutuku noutam unyak nang nirya arye, kanye weik deipmakce, Yerusalem mutuku nang ati, nyapnamake. “Se anango, anggunda bita dilulume! Ninye mutuku sirya, im sirya nirya, unyak nang arye, patalamuk bona dobuka, asukum arye, yuk pera mutuku weik tonun, dolkwetelamikba, dopromik. Yerusalem ara, dekna weik deiyok arye, yuk mutuku-mutuku weik donoklamikak bukni, wini talak ara, yuk mutuku yu yin nang arye, Yerusalem weik asik akunum ulubuka batakmakba, anyaik domik cang poka wekelban bisik bublan memamik bisik bublan ara, el si ara, Pintu Gerbang ara, akunum uluplobik. Ati, nun min arye talye lukparabuka, Yerusalem mutuku wektibye. Tonda, wini talak ara, sik dana-dana tam mutuku noutam unyak nang arye, nun Tirus mutuku unyabakbuk, yakirye, aning-aning nirya winibikceura, nunda bona talin nang unamabe,’ nyabik.

³ Winibuka nyapluma ati, na Allah Yahweh arye, aning-aning nirya deice tam erebuka, mikip weik ununye birye, ayupu nyapne. Anggun Tirus mutuku ululum nang, anggunti na yu weik upmanil deice arye nyapsine. Anggunda, na on nang atonun ululuma ati, nyapsine. Laut mekwen deice ombak mikip weik yangalamle atonun arye, narye yuk mutuku nang ton, dobuka deipnyeba, anggun Tirus mutuku ululum nang nirya, warikil yanganamsiake. Sik anang yanganamaka ara, anggunti olyanganamsiake.

⁴ Sik yuk mutuku nang olyakceura, anggun Tirus mutuku nang arye, cang keil poka doplum ning ap, ‘Yu nang olyanganamak talak, teleb kipdeiptinyeʼ tenen, keil poka deice dolulum cang weik aik nirya ara, ulubuka, sice buklopnamake. Anggunce weik asik domlum ning nirya ara, uluplobikceba, sice buklopnamak ning ap, anggun tuku ara, narye kum kipdeipnyeba, amutuku nirya ara, keiluk laka belepnamle.

⁵ Tirus mutuku ara, weik laut mekwen lilun uamuk mutuku ati, sik asik nirya alubuka, sice buklopnamak ning, narye kum kipdeipnyeura, keiluk beleplyeba, sik ikan don nang arye, sik ikan tomon ning, el si jala ara, amutuku keil belebuka, deice lapnamake. Na Allah Yahweh, aning-aning nirya deice tam erebuka, Pia Mikip Weik Deiyoknye birye nyapsina ati, anyapmasin ning ara, dipkoprob winipnamlarya. Tirus mutuku noutam ubuk ning ap, ninye ap nirya ara, ninye yuk mutuku nang arye, talye upula lukparabuka dopropnamake.

⁶ Tirus mutuku mek lilun bukni, mitik tuku uamuk tam, asik dobuka unyak nang nirya ara, yuk mutuku mal olan nang arye yu uplyeba, parang ya bobuka, Tirus mutuku nang obikceba dipnamake. Winibikceura, sik Tirus mutuku tuba kam unmakce nang arye, ‘Se, dipkoprob Allah ara, mikip weiknye ulule. El uka,’ tenebikirye, na Allah ati biknamake.

⁷ Anyapmasin yupu nirya ara, talye ati kum nyapsine. Deiyok ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye birye nyapsine. Narye, Babel mutuku nirya talibuka, ninye deiyoknye, Raja Nebukadnesar, Babel mutuku arye boyanyeba, anggun Tirus mutuku ululum nang ati, yanuka wareknamsiake. Ara, Raja mikip weiknye birye, el yin talin nang ap, tonda Kuda basam balye deice bukuka, ninye olbalammik yin talin nang ap, kereta perang deice bukuka, olban nang ap bobuka, sik Tirus mutuku nang ati, olyanganamsile. Elce yin talin nang, pia weik bobuka olyanamle.

⁸ Ninye yupa weik, laut mek lilun kum bukni, Tirus mutuku lu tam, weik asik dobuka ululum nang nirya ara, opdanamak talak arye, ninye weik obikceba, dipnamlume. Anggun mal olan nang arye, amutuku antanap dongobuka, dolulum cang poka dam ara, tuku palibuka deibikirye, aning deice welebikirye, parang ya ap, mal ap arye opnamsiake. Tonda, weik keil poka domlum ning babye, tuku palibuka erepdeibikirye, aning arye welebuka, anggun kilmapu opnamsiake. Tonda, sik Babel mutuku yin talin nang arye, ‘Mal dobikceba, taramak biksilyakʼ tenen, lelin ning, el si ara perisai kintibikirye, ongopnamaka ati, anggun Tirus nang arye, mal dopmunya babye, kum biknamle.

⁹ Ninye deiyoknye Raja Babelnye birye nyaplyeba, el yin talin nang arye, anggun Tirus mutuku weik cang keil poka doplum ning nirya ara, akeil poka dolulum ning, weik ikin ning arye bobikirye, sik keil poka dam lokdokikirye, ulubuka bataknamake. Tonda, ‘Yu nang mal olyasikirye, minop arye eipnamapʼ tenen, sik poka deice weik cang keil aik ton, doplum ning nirya ara, kapak ya ap, besi ning ap arye, ulubuka bataknamake.

¹⁰ Sik ninye mal olbana ati, kintinipnamak kuda basam yupa ara, pia weik ati, atalak mal olbakirye, bikbik abuka, tuku deice bakceba, tuku deice butbuta weleplirye, anggun unamlum mutuku nirya ara, liplirye singnipnamsile. Tonda, kuda basam balye deice bukuka, binamak nang ap, kereta perang deice bukuka, olalbinamak nang arye, anggun Tirus mutuku weik asik dobuka, ululumak weknuca ati, bikbik abuka banmace, lelim nyaplye deice arye, weik keil poka dobik ning nirya ara, long-long apnamle. Aning winipnamle ara, anggunce akunum weik keil poka doplum ning ap, bublan botamlum ning ap, akunum uluplopmakirye, amutuku weknuca ati, lelim weik nyapnamake.

¹¹ Kuda basam balye deice bukuka, balamak yin nang arye, anggun mutuku noutam bisik banmakirye, malye kipdeipnamake. Tonda, amutuku noutam unamak nang nirya ara, yin talin nang arye, parang ya ap, ya ap, bobuka bikirye, obikceba, dipnamake. Tonda, anggun weik cang keil aik mikip kilongona ati, weik kat ayukumna arye, ikuka dolulum aik nirya ara, ulubuka batakikceura, acang ayukumna sakuka pouplirye, buta kiplopnamake.

¹² Tonda, sik Babel mutuku nang arye, anggun Tirus mutuku nang arye talibuka deiplum dekna weik bona ap, anggunce, ‘Aminyan ara, deknamapʼ tenen, ‘Naʼ tenen deiplum ning nirya, alubuka dopropnamsiake. Tonda, anggun weik cang keil poka doplum ning ap, pia urasin teleb aik doplum ning ap nirya ara, ulubuka bataksikirye, sice buklopnamsiake. Winibikceura, anyasik domikce keil ap, aik abilinga yo ap, sice buklopnamak ning ap nirya ara, dobuka laut mekwen noutamuk donoknamake.

¹³ Aning nirya winipnamak ning deice arye, narye anggun mot nyamlum ning ap, mot nyana ati, bung-bung ana, el si kecapi ap, yuk ning ap ara, yupu seknyeba, pia tunimapnamle. Ninye arye ton, kum kekenamsiake.

¹⁴ Na Allah arye, anggun mutuku ning nirya, kum kipdeipnirye, bataknamne ning ara, talye keil yo uk beleplirye, tuku dem uplyeba, ikan don nang arye, sik ikan don ning, el si jala ara, akeil deice mikinamake. Amutuku weik asik ara, tonap ton tamubuka, kum dopnamake. Anyapmasin yupu ara, dipkoprob nong upnamle. Aning ara, talye kum nyapsine. Deiyok ara, na Allah, mikip weik ununye birye nyapsine. Tonda, na Allah Yahweh, aning-aning nirya deice tam erebuka, Pia Mikip Weik Deioyoknye birye, akunum nyapmasina ati, aning nirya dipkoprob nong kunupnamle.

¹⁵ Allah arye, aning akunum nyabukopura, ayupu ton dukdongobuka nyabuk. Nara, Allah Yahweh aning-aning nirya deice tam erebuka, Pia Mikip Weik Deioyoknye ununye birye, anggun Tirus mutuku nang ati, nyapsine. Anggun Tirus mutuku nang, weik laut mekwen lilun tam unyak nang nirya ara, mambul kanye bobuka, ‘Se,’ tenebikirye, ilil pia weik uplyeba, sik nong nirya dopkirikdanamake. Tonda, Babel mutuku yin talin nang arye, sik tam nang weik obuka malye kibikceba, eibikcopura, mambul kanye bopnamake. Tonda, sik tam nang obikirye, batakikceura, tuba kam ulamikce nang arye, malye nyabuka, engenmakceba, laut kup-kup tam unyak nang kekebikirye, ‘Se,’ nyabuka, ilil weik unamake.

¹⁶ Aning nirya winiplyeba, eibikirye, bikikcak arye, mek kup-kup talibuka unyak deiyok nang, sik laut lilun unyak Raja-Raja nang nirya ara, sik weik bona talinyak ning batakikirye, sik ninye deiyok nang ongonyak baju, urasin pia teleb juba, kwiribuka bataknamake. Tonda, sik baju urasin teleb kibuka wiamikce ning ara, kwiribuka donokikirye, sik nong nirya, sirem taliplya deice buknamake. Atalak ara, sik ilil pia weik uplyeba, yupu nyana kumce, talye tunim abuka bukikirye, anggun Tirus nang, ikin weik upnamsil ning ara, eibikirye ‘Se,’ nyabuka ngaluknamsiake.

¹⁷ Aning winiplyeura, sik Raja-Raja nang arye ninye dipmakceba, deipmakirye, malye kanye bobuka nyalamak mot, anggun Tirus mutuku nang ati nyapnamsiake. ‘Se, Sikda, weik laut mekwen deice balamlum nang arye, laut lilun, weik teleb asik domlumak, yuk mutuku nang nirya arye, bikamikce, se, sikda weik mambul mutuku nang. Amutuku ara, pia telebe,’ tenelamsik bukni, anggun ulamlum mutuku ap, dolalum asik ap, weilamlum ning nirya ap ara, akunum kum kipmale. Anggun weik laut mekwen deice arye, mek bukna yo, el si weik kapal laut domlum ning nirya wekuka, laut mekwen pum tam balamlumak, yuk mutuku nang arye anggunti, ilil ulamuk. Ara, anggunce laut mekwen deice balamluma deice arye, sik yuk mutuku-mutuku daulamik nang nirya ara, anggun Tirus tam nang ati, ilil weik ulamuk.

¹⁸ Bukni, wini talak ara, anggunce talibuka mikip weik winilamlum ning nirya ara, akunum kum kipmale. Sik Babel mutuku yin talin nang arye, anggunti, akunum malye kipsikce, anggun ning nirya ara, akunum sice buklopsikce, kum daneipsike. Winipsika ati, wini talak, laut mekwen lilun unyak nang nirya ara, ilil weik uple. Asum arye, mek kup-kup unyak nang nirya ara, aning winiplyeba, bikikirye ilil pia weik ati, anggun nong nirya sirim talipnamsile. Tonda, weik imun kanye bopmakirye, lukulanamake. Tonda, anggun nong nirya, sirim talipnamsile.

¹⁹ Nara, Allah Yahweh, aning-aning nirya deice tam erebuka, Pia Mikip Weik Deiyoknye birye nyapsine. Narye Tirus mutuku noutam nirya, kum daneipnyeura, anggun mutuku ara, ninye kum ulamne mutuku atonun, lo dem upnamle. Anggun mutuku nirya ara, aik oldiamuk upnamle. Tonda, narye weik laut mekwen mek dobuka, anggun deice deipsinyopura, laut mek pum tam dobuka deipnyeura, anggun mutuku ning nirya ara, laut mekwen arye siknipdongopnamsile.

²⁰ Atalak ara, narye winipnamne. Anggun nong ara, dopdeipsinyeba, minop talak akunum dibilamik nang, sik kanye binuka ulamlye ak deipnyeura, unamlume. Narye anggun nong dobuka, ninye dibin nang, sik mutuku pia tuku pum tam binuka bataksinyeba, asukumuk pia daunamlume. Anggun mutuku ara, ninye arye aik ulubuka batakikceura, pia lo dem ulamle atonun mutuku upnamle. Anggunce talibuka ulamlum mutuku ara, ila tamubuka, lipsisikuka kum dopnamake. Anggunda, ila tamubuka, yamunce, kam kum unamlume. Tonda, kam tuba unmakce nang arye, anggun urasin ton, pia kum eipnamsiake.

²¹ Anggun Tirus mutuku noutam ululum nang ati, narye anggun wenena ati, aning nirya winipnamsin ning ara, weik imun kanye bon ning, pia kum tenipmanto ikin ning, anggun deice deipnyeura, yuk kam unamak nang arye biknamake. Biknamak bukni, sikda, tonap pia kum eipnamake. Tonda amutuku tuba kam unmakce nang arye, ‘Se, sik Tirus mutuku ulamik nang ara, dan sukum unyak do?’ tenen, anggunti epnamsiak bukni, pia kum eipnamake. Nara Allah Yahweh, aning-aning nirya, deice tam erebuka, Pia Mikip Weik Deiyoknye ununye birye nyapsina ati, aning nirya ara, dipkoprob nong kunupnamle, pia kum bataknamle. Allah Yahweh arye nyabuk.