Yehezkiel 25 - Eipomek

Amon mutuku noutam, Allah arye ikin ning arepnamuka ati, nyalin ning nyapdeiamuk yupu

¹ Allah arye, na Yehezkiel dam yanuka nyapdeipnuke.

² Anda ninye arye deipkiknye ulyame! Sik Amon mutuku nang ati dipdemince, sik dam winipnamle ning, laka nyapnulyame.

³ Amon mutuku nang ati, nyapnulyame. Na Allah Yahweh, aning-aning deice tam erebuka, Pia Mikip Weik Deiyoknye ununye birye, nyapdeipsise yupu ara, moubuka kekepnuninyake. Ayupu nyapsine. Anggunce na si eren aik pum tam, Pia Teleb Lek Aik ati, yu nang arye, Yerusalem mutuku, na aik malye kipdeipnik talak ara, anggunce, ‘E, aning ara, eiplume! Nun kanye deipnamabe. Moubuka unyake,’ nyabuka kanye deiamlume. Tonda, aning atonun, yu nang arye, Israel nang ulamik mutuku noutam nirya, malye-malye kipdeibikba, amutuku ninye tunim abikce, ninye una kumce, maning pabuk talak ara, anggunce aning eibuka, kanye deiamlume. Atonun ton, Yehuda yala nang malye kibikce, tapu koubuka, sik mutuku tamubuka, wenena aik dongolbiyik talak ara, anggunce aning eibuka, kanye deiamlume.

⁴ Winyamluma ara, na Allah arye, sik Amon tam nang ati biknyeura, keting yangan tam pata mutuku noutam unyak nang ati, lo arepnyeura, sikda keting yangan tam arye yakirye, anggun Amon tam nang ati, malye kibuka opnamsiyake. Sik ayanganyak nang arye, anggun Amon mutuku nang ululum mutuku noutam, tia dolina tenda aik dobuka, asukumuk unamake. Winibikirye, sik Amon mutuku nang arye, anggun kouamlum yo duk ap, anggunce weilamlum ning, sapi basam do, kambing basam do, moum yung wamlye ning ara, ubula dobuka dipnamake.

⁵ Tonda, anggun noutam bukni, mutuku si Raba mutuku ara, anggun asik dobuka ululum mutuku ara, tamubuka dopropnirye, narye unta basam wein mutuku kipdeipnamne. Tonda, Amon mutuku tam nirya ara, narye tamubuka dopropnyeura, domba basam wein mutuku kipdeipnamne. Winipyeba, anggunce nati, ‘Se, Allah ara, elda, mikip weik deiyoknye ulule,’ tenepnumunce, moubuka biknamnulume.

⁶ Aning nirya ara, talye ati kum nyapsine. Deiyok ara, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye nyapsine. Minop talak babye, wini talak babye, anggun atam ululum nang arye, Israel noutam unyak nang nirya ati, ‘Sikda talye nang uka, dauplye,’ tenelulumce, yaniltakalulume. Anggunce, Israel tam nang ati, ikin ning, sik dam yalyopura, sik Amon tam ulamik nang nirya ara, ‘Merekleʼ tenen, kanye deipmunce, taruk bokuka, mot nyalulume.

⁷ Winibuka ululuma ati ara, na Allah arye, yuk mutuku nang nirya dobuka, anggun deice dipsinirye, lo arepnyeura, anang nirya ara, anggun Amon mutuku nang, anggunce talilalum bona ap, anggunce weilamlum ning ap nirya ara, alubuka dopropnamsiake. Narye anggunti, winipnye deice arye, kum kipdeipnamsine. Winipsiniba, anggun yala nang ton, sirya daklyeura, anggun tuba kum unamlume. Tonda, anggun mutuku tuku ton, kum bataknamsile. Anggun ap, anggun ning nirya ap, kum kipdeipnirye, sirya daknamsine. Winipsinyeba, sikce nati, ‘Se, dipkoprob Allah ara, aning-aning deice tam erebuka, Pia Mikip Weik Deiyoknye ululnye ara, el ukaʼ tenen, moubuka bikinamsiake.

“Moab mutuku nang ati wenepnamne,” nyabuk yupu

⁸ Na Allah Yahweh arye, aning-aning deice tam erebuka, Pia Mikip Weik Deiyoknye ununye birye, ayupu nyapsine. Sik Moab tam unyak yala nang ap, Seir mutuku unyak nang ap ati, ayupu nyapsine. Anggunce, “Kume, Yehuda yala nang babye, ilil kum nang unyake. Sikda, yuk-yuk mutuku nang atonunuk unyake. Nun kanye ara, anggun nirya ilil nang kuma ati, nun amu tam nang atonun unyake,” nyabuka, malye nyabuka akutulamlume.

⁹ Sikce winibuka, Yehuda mutuku nang ati, malye yupu nyalamika ati, na Allah arye dipkoprob nyapne. Moab mutuku tuku wililonak, weik asik dobuka, unyakak nirya ara, opnirye sirya obuka bataknamne. Ara sikce, ‘Amutuku-amutuku ara, pia teleb mutuku. Amutuku unyak mikip nang arye, kalikinamsiake. Nun Moab noutam unyap nang ati, ‘Yuk mutuku yu nang arye yanuka opsicakʼ tenen, kalikinamsiak,’ tenenyake. Tonda, sikce, ‘Nun mutuku noutam, weik asik ton dobububa, amutuku-amutuku nirya ara, mitik mambul bukni, pia mambul mutuku ara, aning,’ tenenyak mutuku ara, narye ulubuka, sice buklopnamne. Ara, Bet-Yesimot mutuku ap, Bahal-Meon mutuku ap, tonda Kiryataim mutuku ara, narye amutuku noutam unyak nang nirya, obuka batalopnamne.

¹⁰ Winipnyopura, na Allah arye, asi nyapman winilye mutuku ap, tonda sik Amon yala nang unyak mutuku ap, opnirye, amutuku nirya dobuka, sik keting yangan tam arye, olyanganamak mutuku unyak nang ati, arenamnarya. Sik Moab tam nirya dobuka, sik keting yangan tam unyak nang, sik taruk deice deipnyeba, sikce amutuku dopropbikirye, sikce, ‘Amutuku-amutuku nirya ara, wini talak nun mutuku koproba kipdeibabe,’ tenebikirye, sik mutuku talibuka unamake. Winibikceura, aminyan talak, yuk mutuku nang, im sirya, mutuku sirya nirya arye, Amon yala nang ati, ton tuba kum tenenamake. Lubakinauk unamake.

¹¹ Aning atonun, na Allah aryuk, sik Moab yala nang babye, sik wenena ati, ikin ning dobuka, sik deice deipnamne. Wenipye deice arye, sik Moab tam nang arye nati, ‘Se, dipkoprob Allah ara, aning-aning deice tam erebuka, Pia Mikip Weik Deiyoknye ulule. Ara, el uka’ tenen, moubuka biknamake.

Allah arye, “Edom mutuku unyak nang ati, wenepnamne,” nyabuk yupu

¹² Na Allah Yahweh arye, aning-aning nirya deice tam erebuka, Pia Mikip Weik Deiyoknye ununye birye, ayupu nyapne. Minop talak, sik Edom tam unyak nang arye, ‘Yehuda yala nang ati, kwang daktibye’ tenen, tuba tenelamika arye, Yehuda yala nang ati, Edom mutuku nang arye, kwang dakik deice arye, akunum malye kibike. Natibuk, pia malye ning kibikba, na yu weik upnuke.

¹³ Sik Edom yala nang arye, aning winibika ati, na Allah Yahweh arye, aning-aning deice tam erebuka, Pia Mikip Weik Deiyoknye ununye birye, ayupu ton nyapsine. Na taruk arye, Edom mutuku nang ara, obuka wenepnamne. Narye amutuku unyak nang ap, sikce weinyak ning nirya ara, obuka kum kipdeipnirye, sirya daknamne. Narye amutuku unyak nang ap, sikce talibuka weinyak kam ning ap nirya ara, kum kipdeipyeba, aik oldemuk upnamle. Ara, narye Moab noutam mutuku si, Teman mutuku noutam ap, anyapce dipdongobuka, Moab mutuku bukni, (arah selatan) mutuku si, Dedan mutuku ap nirya ara, anang babye, sikce weinyak ning babye, parang ya ap, mal ap arye opnyeba, dibice deice arye, kum danamle.

¹⁴ Winipnamne ara, ‘Naʼ tenen, nang, Israel nang sikti, talipnirye, mikip weik arepnyeura, sikce Edom mutuku noutam unyak nang ati, kwang dakuka opnamake. Na Allah, pia yu weik upnuka ati, sik Amon mutuku nang ati, obuka wenepnamne touk, na mapu koproba, Israel nang mikip kipdeipnyeba, sikce Edom mutuku noutam unyak nang opnamake. Winibikceba, sik Moab mutuku noutam unyak nang nirya arye, bikinamake. Ara, sikce, ‘Se, Allah arye, nunti akunum kwang dakmasileʼ tenen, moubuka biknamake. Aning nirya ara, na Allah Yahweh arye, aning-aning deice tam erebuka, Pia Mikip Weik Deiyoknye ununye birye, ayupu nyapmasina ati, aning nirya dipkoprob nong upnamlarya. Na akunum nyapsine. Allah arye nyabuk.

Allah arye, “Pilistin mutuku unyak nang ati, wenepnamne,” nyabuk yupu

¹⁵ Na Allah Yahweh arye, aning-aning deice tam erebuka, Pia Mikip Weik Deiyoknye ununye birye, ayupu nyapne. Sik Pilistin mutuku nang arye, yu kanye bomikce, ‘Nun mal olan nang, Yehuda tam unyak nang ati, kanye deibibuka, tuba-tuba kwang dakuka olyanganamabe. Sikti yu weik upsilye ati, batakna kumce, pia olyanganauk unamabe,’ tenelamik. Adeice, sik Pilistin nang arye, Yehuda mutuku noutam, Israel yala nang ati, pia weik olamik.

¹⁶ Winilamika ati ara, na Allah Yahweh arye aning-aning nirya deice tam erebuka, Pia Mikip Weik Deiyoknye ununye birye, ayupu nyapne. Na taruk arye, sik Pilistin mutuku nang ara, obuka, weik tonun wenepnamne. Sik Pilistin nang bukni, Keret mutuku nang ati, binuka opnirye, kum kipdeipnamne. Tonda, dabu tam weik laut mekwen, el si Laut Mediterania lilun mutuku, tuba kam unmace nang babye, naryuk opnamne.

¹⁷ Narye sikti, yu weik upmanila ati, sik wenena ara, weik ikin ning, sik deice deipnamne. Tonda narye sikti, ‘Aninye kwang daknamne,’ tenepse ning dobuka, sik deice deipnyeura, kanye teleb upnamle. Atalak na yu weik upmanila arye, sikti weik tonun wenepnamne. Winibuka kwang daknyeura, sik Pilistin nang nirya arye, nati, ‘Se, dipkoprob Allah ara, aning-aning deice tam erebuka, Pia Mikip Weik Deiyoknye ulule. Ara, ‘El ukaʼ tenen, moubuka biknamake. Ara, na yu deice arye, sik tibuk weik tonun wenepnirye kwang daknyeura, adeice arye, na Allah ati, ‘Se, elda dipnyeʼ tenen, moubuka biknamake.