Yehezkiel 24 - Eipomek

Allah arye, Yerusalem mutuku nang ati, domon yupu deice arye, nyabuk yupu

¹ Nun Israel nang ara, Babel mutuku yin talin nang arye tomopsikce, tapu koubuka, sik mutuku tamubuka bobinamsikce, ikin pil aruklamsikba, daulamupu talak arye dipdongobuka, wini unyap, talak noutam bukni, keting tamun toupne barye (9), wala takubarye (10), tanggal babye takubarye (10) kibuke. Atalakuk, Allah Yahweh arye, na Yehezkiel dam yanuka nyapnuk.

² Se, anda ninye arye deipkiknye ulyame. Arup sum ara, Babel mutuku nirya talibuka, deiyoknye Raja birye, Yerusalem mutuku binuka warekmalce, amutuku nang malye kibuka opnamale. Aning winipnamal sum ati, ance awala ap, atanggal ap ara, adiparyuk laka nyabuka sekeipnulyame.

³ Na kayapu Israel nang, Babel mutuku ululum bukni, sik batakamlumba, Israel mutuku noutam, tuba unyak nang ati, nyapsine. Sikce na yupu kum kekenyakce, nati lik uplyeba, batakaninyake. Ati, anda Yeheskiel, domon yupu tonok ton, na Allah arye, anti nyapkinyeba, ance sik Israel nang ati, nyalbinulam yupu ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, anggunti, winipmanto yupu deice arye, laka nyapnusine. Ara, din yun makau pum tam, mek kwebuka dikdongopmunce, amek makau ara, uku deice deipnamlume.

⁴ Pia teleb domba basam tup kalipdoba, pia teleb ning ara, ayun mek makau pum tam dongopnamlume. Ara domba basam, yan tup kalipdoba ap, taruk tup kalipdoba ap, tonda yoka pia teleb ning ap, amek makau pum tam dongopnamlume. Adomba basam ara, malye ning kum bukni, anggunce weilulum domba kan-kan noutam arye, nong pia teleb ning wibuka deipnululume.

⁵ Domba basam tup ap, yoka ap, amek makau pum tam dongopnulyame. Tonda, aning nirya yuna ati, amek makau amu tam ara, uku deice deibuka yuna ati, yo ton bobuka kolokmince, ayo deice arye, ayun mek makau deipminyak arye, yupminyeba, mek yaruk-yaruk ablirye, tup kalipdoba ap, yoka ap nirya ara, opnulule.

⁶ Aning nirya winipnamlama deiyok ara, ani. Na Allah Yahweh, aning-aning nirya deice tam erebuka, mikip weik ununye birye nyapsine. ‘Anggun Yerusalem mutuku ululum nang kan-kan arye, ninye weika tonun, akunum omluma ati, anggunda bicoe. Se, anggun kanye mouplulume,’ nyapsine. Sikda ninye on nanguk unyake. Bita merekuka, ikin upmal nyapmasile! Amutuku asik dobuka ululum nang ara, tuku arye tilibuka memenyak mek makau, sisilya ulamle atonun upsuka ati, asisilya ara, kum kiploptinge. Domba basam kalipdoba tup, amek makau pum tam dongopmamunye ning ara, tup kalipdoba tonok-tonok lukuka dongonmamunya ani, sirya oplyeura, dopropnululume. Amakau pum tam ton, kum bataknamlume. Bukni, ‘Atuba upmalye tup ara, yatanye birye dopropnul do?’ tenena ati, ninye si sekuka undi ning kum dopnamlume. Talya luparabuka lukmunyak arye, bokuka arepnalume.

⁷ Aning deiyok ara, ani. Yerusalem mutuku asik dobuka unyak ninye arye, ninye weik olamik. Bukni, oltakalamik nang, sik ining ara, amutuku tuku deice kum diklobik. Tonda, tuku deice sakuka kum biyuk. Tuku deice sakamtu toura, butbuta ap, tuku ap arye, aning akunum siknipdongoptue. Aning kum bukni, sikce, ‘Aining, tukwak upnamleʼ tenen, sikce kat keil deiceuk, dikiltaklamikba, tuba aulule. Ati, akeil babye butbuta ap, tuku ap arye, kum siknipdongobuke.

⁸ Dipkoprob ning ara, na dilamse talak ara, olalamik nang, sik ining ara, asukumuk bataklamikba, tukwak ubuk. Aining siknikilongna kumce, tuba uamuka deiyok ara, narye, ‘Aining eipnyeura, sik anang onyak nang ati, aminyan talak kwang dakuka opnamne’ tenen, diltakanune.

⁹ Ati ara, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapsine. ‘Anggun Yerusalem mutuku ululum nang kan-kan arye, ninye weik tonun akunum omluma ati, anggunda bicoe. Se, kanye mouplulume,’ nyapsine. Anggunda, ninye on asik nang ululum mutuku nang ati ara, bita merekuka, ikin upnamsile! Winipmanto ara, narye, anggun wenen ning ati, uku dana ara, yo weik tonun ton ap, kintinip deipnirye, ayo deice deibuka, uku dongopnamsine.

¹⁰ Winipnamne talak ara, weika tonun wenepnamsina ati, winipmanto ning ara, ance uku dan yo, ton ap tabakuka deipnulyame! Winiminyopura, uku pupdogopnulyame! Winipmince, atup kalipropa ara, ‘To nyapnamleʼ tenen, tabakuka dan ning, bumbu ap, toh nyan ning ap, dongopmince, aning nirya ara, teleb kibuka yupnulyame! Yupminyeura, atup kalipdoba yupmaminye mek ara, diklopnulyame! Adomba basam yok ara, dobuka, uku dongopnulyame!

¹¹ Winipminyopura, domba basam tup akunum lukuka yukak deipmince, yun mek makau ara, dobuka uku buk deice uk deipnulyame. Adeiplopmaminye buk, uku dinmalya ani, tin pia weik akunum uplyeura, yaruk-yaruk apnamlule. Ara, ‘Amek makau deice sisilya ulamle ning, akunum uku diplyeura, ayun mek makau tamubuka, urasin teleb upnamleʼ tenen, winipnamlame.

¹² Bukni, sisilya ubuk ning ara, uku arye nirya diplyeba, min kume kum danamle. ‘Amalye ning ara, uku buppu arye kum kiptue,’ tenepsirye, pia piripdese bukni, min kum winipmanto kibuka ati, narye, ‘Dauplye,’ tenepsirye, batakse.

¹³ Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.

¹⁴ Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsine. Ati, na nyapmasin touk, dipkoprob winipsinyeura, aning dipkoprob upnamlarya. Na tenyamse talak akunum kiplyeura, aning nirya winipnamnarya. Anggun malye umunye ning ara, narye kum lubakipnamsine. Tonda, anggun wenen noutam ara, ‘Se, daupmalye, aning ara, akunum bataknulume,’ pia kum nyapnamne. Tonok malye winilamlinye babye, kum bataktinye, anggun nirya wenepnamsine. Tonda kum lyepdopnamsine. Tonda, ‘Se, anggunti ara, bicoe,’ kum tenepnamsine. Anggun malye winilulum ning yala-yala nirya, awininamluma atonun, anggunti wenebuka opnamsine. Nara, Allah Yahweh, aning-aning nirya deice tam erebuka, Pia Mikip Weik Deiyoknye ununye birye, akunum nyapsina ati, aning nirya dipkoprob nong upnamle. Allah arye, na Yeheskiel biti, nyapnuke.

Nabi Yeheskiel, el kil dibuk yupu

¹⁵ Allah Yahweh arye, na Yehezkiel dam yanuka nyapnuk.

¹⁶ “Se, anda ninye arye deipkiknye, an doplumce, kanye deiplum kil ara, kum bikmaminye buk, narye kanye imun ning arepnya deice arye, an kil dopropnamne. Dopropnyeba, akil diplyeura, an malye nyabuka engena meme, tonda an asing maka babye, kum saknamkulule.

¹⁷ Ance, ‘Se, bicoʼ tenen, kanye aryuk tenapnalam bukni, yuk nang, sik aik ninye dibikcopura, sikce ngalukuka, malye weik nyalamak touk, kum winipnalyame. Aning kume. Tonda, an kisok kitina ara, kwiribuka batakmince bana ap, tonda an yan kinikna ning, sandal banang bana ara, kume. Sik kayapu dipmakceba, deipmakirye engelamak atonun, winina kume. Tonda, yuk nang arye, ‘Yuk nang eibikirye, bico tenepnamsiakʼ tenen, kalun ning arye, sik urasin outam kilongona ap, ninye dipmakceba, engebikcak arye, atalak dinyak din ning roti kwaning dilamak touk, an dina meme.” Allah arye nyapnuke.

¹⁸ Nyapnukura, beren tam koproba ara, narye sik amutuku nang, sik dam yanuka, yupu nyapse bukni, asum lukunyan talak ara, na kil dibuk. Dibukura, mapmasa, akunum berekukopura, Allah arye nati, “Winipnalyame,” nyapdeipnuk touk, aninguk winipse.

¹⁹ Winipseba, sik amutuku ninye arye nati, “Naio, ance yata deiyok ati, aning ara, winipnalam do? Ance domlum kil, winiryuk dipmal bukni, engena kumce, tuba banmalame. Ati, awinipmalam ning deiyok, yata ati do? Nun ton laka nyapsilyeme,” nyabuka asipnike.

²⁰ Asipnik buk, narye sikti, nyapse, “Kume, aning ara, Allah Yahweh arye, na dam yanuka, ‘Winipnalyame,’ nyapdeipmanilba, aning ati winipmane,” nyapse.

²¹ Tonda, nyapse. “Allah arye, ‘Ayupu ara, sik Israel nang dam nyapnulyame, nyapdeipmanilba, anggunti yanuka nyapsine. Ara, Allah arye, “Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapsine. Anggunda, Yerusalem mutuku noutam, Allah si erena ati, weik aik dopluma ati, anyaik eibuka, talima erepdalumce kwaliplume. Anggunce, ‘Se, nun mikip deice arye, pia urasin teleb aik akunum dobupu,’ teneplumce, kanye delilulume. Anggunda anyaik doplum ning dilbana atibuk, tuba patapsilyeba, binuka sekelulume. Bukni, na Allah arye, anyaik uluplopnirye, sice kibuka, malye kipdeipnamnarya. Tonda, anggunti, Babel mutuku boyanamse talak ara, anggun mitik mapu ara, Yerusalem mutuku noutam batakamlumak, tuba unyak nang ara, sik mapu ap, kilmapu ap ara, yu nang arye, mal olan deice arye ona ap, parang ya sekna deice arye dipnamake.” Allah arye nyapnuka ati, laka nyapmasine.

²² Ati, Allah arye lo areplyeba, yu nang arye winipsikceura, anggun amutuku ululum Israel yala nang arye, na kil dipmokba, na atalak winipmana eipmalum touk, anggun babye winipnamlume. Allah arye nyabuk. “Ara, kisok kalun ning arye, anggun urasin amu tam kum lelipdanamlulume. Tonda, anggun yan kinikna ning sendal batakna kumce, anggun kinikuka banamlulume. Tonda, ninye dipmakce ati deipmamunce, engelamlum talak dapmaminye roti kwaning ara, pia kum dipnamlume.

²³ Anggun kisok kaluna ara, kwiribuka banang bana ap, tonda anggun sandal batakuka, yan banang bana ap ara, kum winipnamlume. Tonda, anggun mapu obicopura, anggunce malye nyabuka ngalukuka, kum engenamlume. Aning kum bukni, anggun malye winilamluma, dekena ati, anggun nong ara, bol malye kipnamsile. Tonye birye, yuknye biti, ‘Se, nun kanye ikin kipmasile,’ nyabuka, engepmunce yupu nyalanamlume.

²⁴ Anyapman ning nirya ara, winipnamsila ati, nabi Yehezkiel birye, anggun bikna ati, anggun dam winipmalba, anggunce akunum eipmalume. Atalak winilina ati, anggun dam winipmasin ning ara, dolyanamle talak anggun dam yasilyeba, winipnamlume. Ati, nyapmasin ning nirya, akunum dam uplyeura, adeice arye anggunda moubuka biknamlume. Ara, na Allah arye, anggunti nyapdeipsine. Aning nirya winiplyeba, anggun aning winilulum Israel nang arye, ‘Se, aning ara, Allah arye yanuka nyapdeiamsuk touk, akunum winipmasileʼ tenenamlume. Tonda, ‘Se, Allah Yahweh arye, aning-aning nirya deice tam erebuka, Pia Mikip Weik Deiyoknye ulule,’ tenen, moubuka biknamnulume.” Allah arye nyabuk.

²⁵ Allah arye, na Yehezkiel biti, nyamnuk. “Ura, anda ninye arye deipkiknye ulyame. Anggunda, Yerusalem mutuku noutam Allah, na si erena ati, weik aik dopluma ati, anyaik eibuka, talima erepdanuka kwalilulumce, ‘Se, nun mikip deice arye, pia urasin teleb aik akunum dobupu. Yuk nang nirya arye, anyaik eibikcopura, nunti si eresinyake,’ tenelulumce, kanye delilulume. Anggunda anyaik doplum ning dilbana atibuk, tuba patapsilyeba, binuka sekelulume. Bukni, anyaik uluplopnamne. Aninguk kum bukni, anggun mapu ap, kilmapu ap ara, yu nang ati, lo arepnyeba, mal ap, parang ya ap arye, opnamaka ati, narye mapu nirya doropropnamne.” Allah arye, sik Israel nang ati, nyabuk.

²⁶ Nyabukopura, na Yeheskiel biti, Allah arye nyapnuk. “Narye aning winipnamne sum ara, ninye ton awinipmalye kankan arye, Yehezkiel an dam yalirye, aning wininmalyak, el asing arye eiplye ning nirya ara, an dam yanuka, laka nyapnamkile.

²⁷ Asum babye, anda yupu tunim abuka, kum upnamlam bukni, asum ara, ance tamubuka, elce an dam yanamlanye biti, yupu nyapnamlame. Awinipnamlama deice arye, sik Israel nang nirya ati, laka kipdeipnamle. Winipminyeba, sik Israel nang arye nati, utenapnamniyake. ‘Se, Allah Yahweh ara, aning-aning deice tam erebuka, Pia Mikip Weik Deiyoknye ulule, tenebikirye, moubuka biknamake.” Allah arye nyapdeipnukba, na Yeheskiel birye kekepse.