Yehezkiel 22 - Eipomek

“Yerusalem asik ara, pia malye mutuku ulule,” nyabuk yupu

¹ Allah arye, na Yeheskiel dam ayupu yanuka nyapdeipnuke.

² Se, anda ninye arye deipkiknye ulyame. Anda akunum kintinipmalam do? Kum do? Ara, Yerusalem mutuku noutam ara, ninye pia weika arye olamika ati, ining weik ubuk mutuku ulule. Ninye on nang amutuku unyakak ati, sik wenena ati, yupu bokolina ati, yupu nyana ara, akunum kintinipmalamce, nyapnulam do? Ance kintinipmaminyopura, sik Yerusalem mutuku noutam malye wininyak ning ara, laka kibuka nyapminyopura, adeice arye sik malye ulamik ning nirya, tuba tonap tamubuka biknamake.

³ Ance sik anang ati binuka nyapnulyame. “Ayupu ara, Allah Yahweh, aning-aning deice tam talibuka, mikip weiknye birye nyapsuke.” Anggun Yerusalem mutuku ululum nang, anggun kan-kan noutam unyak nang bukni, anggunce olulume. Winiluluma ati ara, narye oplopnamsine. Aning atonun ton, anggunce talye ning ati, ‘Nun ni,’ teneplumce, aisa ati, ninye urasin atonun memebuka delilulum ning, si ereluluma deice arye, anggun nonguk malye kilalulume. Aning ati, weik arye wenepnamsine.

⁴ Anggun mutuku noutam arye, ninye talye omunya ap, tonda talye ning memebuka delimunce, aisa si eremunya deice arye, anggun nong deice malye kililalulume. Ati weik arye wenepsinye deice arye, anggun nirya ara, dipnamlume. Anggun kam una ati lo ara, mitik tonunuk upnamsile. Anggun nirya obuka sirya dakmanto sum ara, akunum dam uple. Anggunda, keting tamun yata barye ton, kam tuba ululum bukni, anggun kam unamlum talak ara, akunum sirya dakmanto upmale. Ati narye wenepsinyeba, ikin weik uplyeura, yuk mutuku unyak nang ati nyapdeipnyeura, anggun Yerusalem mutuku ululum nang ati, malye-malye kibuka nalisikirye, akutunamsiake. Yuk mutuku nang nirya arye, ‘Kume, sik Israel yala nang ara, mambul nang kume, unyakeʼ nyabuka nalinamsiyake.

⁵ Anggun dam unyak nang ap, tonda anggun dam kum unyak bukni, perak unyak nang arye, malye kibuka akutubikirye, nalinamsiyake. Ara, anggun Yerusalem mutuku ululum nang babye, anggun siuk akunum malye kipdanmaluma ati, wininamsiake. Tonda, yuk mutuku nang weika arye, akunum kekebuka bikamsike. Anggun ululum mutuku, Yerusalem noutam ara, malye una ap, yupu deice nyalana ap, ninye olana ap uk, akunum winiluluma ati nyapsine.

⁶ Anggun moubuka dipdelulume! Anggun mutuku nirya talibuka ulamikce, Raja kibuka taleamik deiyok nang nirya ara, sik mikip aulamuk touk, sik mikip deice aryuk, ninye weika arye oltakalamik touk, wini talak babye, tuba aninguk wininyake.

⁷ Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.

⁸ Tonda, na Allah, si erena ati, teleb kibuka kintinip deipse ning, ‘Naʼ tenen, ning nirya ara, anggunce, ‘Kume, aning ara, mambul kume, talye ning uka,ʼ teneplumce, aning moubuka kum taliplumce, nati si kum erelulume. Tonda, na Allah arye, ‘Asum ara, talye pil dona kum aryuk, na si erena ati, dikdik senamlume,’ nyapdeipsise bukni, na si ren sum,’ nyabuka, wipdipse sum, Sabat sum babye, anggun dikdik sena kum aryuk, asum deice arye nati, kum si erenululume.

⁹ Anggun Yerusalem mutuku ululum nang kan-kan arye, ton mutuku nang arye, yuk nang ati, “Sikda malye unyak nang,” nyabuka, tilila yupu deice arye nyabikiba, anggun mutuku weik deiyok nang arye, anang ati wenebuka onyake. Tonda, yuk nang ara, talye ning isa si erena ati, kam ning obukabikirye, bai mutuku deice welebikirye, aning tup ning ara, dobuka dinyake. Tonda, yuk nang ara, alye una kum aryuk, ninye kum winipmanto ning, pia malye ubikirye, talye-talye yolanauk unyake.

¹⁰ Ton nang ara, Yerusalem mutuku unyak nang ara, sik ni yapu arye domik kilapu dobuka, neika mabikirye, ubula yolanyake. Tonda, samai ulamik kilapu ap, neika manyake. Awinyaka deice arye, sik babye, sik nonguk malye kililanyake.

¹¹ Tonda, Yerusalem mutuku unyak nang ara, sik kayapu nang domice kilapu ap, tonda sik deiamlinye birye, domlye kil ap, neika manyake. Ton nang ara, sik ni koproba arye, deiamlye kilmu, sik weit koproba ap, tonda sik ni yapu tonok nang arye deiamikce kilapu ap neika tonok manyake.

¹² Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.

¹³ Ati, wini talak ara, anggun eiplume! Anggun malye winilulum touk dekna ning ara, opnamsine. Na Allah taruk erebuka talipne. Ara, amutuku noutam unyak nang ara, sikce onyaka ati dekna ara, sikuk opnamne. Allah arye, na Yeheskiel biti, nyapnuke.

Allah arye, “Wenen ning dobuka, dipkoprob Israel nang deice yanuka deipnamsine,” nyabuk yupu

¹⁴ Allah arye nyabuk. “Narye sik malye unyak ning nirya ati, akunum wenepnye talak ara, sik mikip una ap, sik taruk mikip una ap ara, tonap kum winipnamsile. Na Allah Yahweh arye, aning-aning nirya deice tam erebuka, Pia Mikip Weik Deiyoknye ununye birye, akunum nyapsin ati, narye anggun wenena ati, aning ara, dipkoprob nong kunupnamle,” nyapsine.

¹⁵ Narye, Yerusalem mutuku ululum nang ara, yakuka donoksinyeba, yuk mutuku nang unyakak binuka unamlume. Tonda, narye wenepnamsin deice arye, yuk mutuku tam noutam ara, dana-dana tam nang unyakak noutam arye, dabinuka unamlume. Winipnamsina deice arye, narye anggun malye winimunye ning nirya, mitik-mitika arye, kum kipdeipnamsine.

¹⁶ Winipsinyebuk, yuk mutuku nang nirya arye, Yerusalem mutuku ati ara, malye nyabuka, akutukirye, nalinamake. Winibikceura, anggun Yerusalem mutuku ululum nang ara, alye weik dakdanalume. Aning eipmunyopura, bita biknamlume. Na Allah Yahweh arye, “Winipnamne,” nyalin yupu deice arye, nyapsin yupu nirya ara, dipkoprob winipnyeba, nong kunupnamsile. Aning eibuka bikmunye, deice arye, anggunce nati, ‘Se Allah ara, mikip weiknye ulula ati, el tenelye touk, aninguk ululeʼ tenen, moubuka biknamnulume. Allah arye nyabuk.

Uku arye dibuka, sirya daknamle ning ati, nyabuk yupu

¹⁷ Allah Yahweh arye, na Yeheskiel dam yanuka ayupu nyapnuk.

¹⁸ “Se, anda ninye arye deipkiknye ulyame. Sik Israel yala nang nirya ati ara, narye, ‘Kume, sik nirya ara, teleb nang kum unyake,’ tenenune. Winipmanto, ninye arye, ‘Emas pia teleb ning kintinipnamab,’ tenebikirye, ‘Malye ning nirya tabakuka, teleb ulamle ning ara, tembaga do, timah do, besi do, mirin timah do, kum denepnamabe,ʼ tenebikirye, emas ap, malye ning ap, tabakuka uamlyebuk, uku dongobiceba, uku arye dilamya ani, amalye ning nirya diplayak arye, tukwak saklyeura, bobuka dolkwetenyake. Amalye kum uplyeura, emas urasin pia teleb kibuka memenyake. Winilamak touk, narye anggun Israel yala nang ati, atonun winipnamsine. Anggun wenena ati, ikin ning anggun nong deice deiamse bukni, adeice arye malye ning dopkwetepmanto ninguk wininyake.

^19-20 Ati, atalak ara, na Allah Yahweh, aning-aning nirya erebuka, deice tam kibuka, Pia Mikip Weik Deiyoknye ununye birye, nyapsine. Anggun Israel nang ara, emas noutam malye ning ap tabakuka aupmalye bukni, uku diplyeba, urasin teleb kum ning ton, kum danalamle touk ulule. Winipmanto ara, ninye arye, ‘Emas pia teleb uptueʼ tenen, uku dongobiceba, diplyeura, aminyan yuk malye ning palipmalye ning nirya, perak ap, perunggu ap, besi ap, mirin timah ap, kurun timah ap nirya, tukwak uplyeba, dobuka dolkwetenyak touk, narye anggunti winipnamsine. Na weik yu ara, uku buk dilamle touk unulul ning ara, anggun deice deipnamsine. Narye anggun Israel nang ati, yu weik upmanila ati, uku arye malye ning dilul touk, narye anggunti bulubuka, Yerusalem mutuku noutam dipsinirye, weik ikin ning, anggun nong deice deipsinyopura, ikin kanye bopmunya deice arye, anggun malye ululum ning nirya, kum kipnin banamle.

²¹ Dipkoprob, narye sik nirya ara, tamubuka Yerusalem mutuku uk, deipnyopura, narye anggunti yu unilyeba, uku buk ulamle touk unulul ning ara, anggun deice deibuka wenepnamsine. Winipmanto ara, kat ning dobuka, uku dongobiceba, malye wamlye ning dilolamle atonun, kibuka winipnamsine.

²² Emas do, perak do, ‘Malye ning palyamlye ning kum danamleʼ tenen, uku dongobiceba, amalye ning uku dilolamle atonun, anggun Israel nang ara, Yerusalem mutuku noutam arye, anggun nong deice, weik ikin ning deipnamsine. Winipsinyeba, adeice arye, anggun malye winilulum ning, kum kipnin balamyeura, adeice arye biknamlume. Winipyeura, anggun malye winiulum ning ara, batakmunce, tamubuka telebuk wininamlume. Adeice arye, anggunce, ‘Se, aning ara, malye weik winilamupu ati, Allah Yahweh arye, yu ubukba, ikin ning, nun deice deipsuk ati, doprobupuʼ tenen, bita biknamlume. Allah arye nyabuk.

Israel nang talibuka, ulamik nang arye, malye winilamik ati, sekik yupu

²³ Allah arye, na Yeheskiel dam yanuka ayupu nyapnuke.

²⁴ Se, anda ninye arye deipkiknye ulyame. Ance sik Israel nang ati, ayupu nyapnulyame. Sik unyak mutuku noutam ara, malye wininyak nang unyaka ati, na yu unululce sik wenena ati, anggun ululum mutuku noutam ara, mok ton pia kum cenamle.

²⁵ Sik mutuku noutam, deiyok kibuka talinyak nang arye, malye un nang ara, ani. Sik kanye aryuk, ‘Aning ara, winiptinye,’ tenenyak ninguk, sik Israel yala nang noutam ara, aninguk talye lubparabuka wininyake. Sik adeiyok nang ara, winipmanto, weik yu singa kus arye, el dina obuka, si tobuka boplirye, weik yupu nyalamle atonun unyake. Deiyok ara, sik Israel yala ninye deiyok nang arye, sik tam nang ton onyake. Oplobikirye, sik obikce nang arye talilamikce bona nirya ara, ubula alubuka dolonyake. Winibice deice arye sik obice nang domikce kilapu ara, youwakuk unyake.

²⁶ Tonda, Israel mutuku noutam talibuka, na si eren pil donyak imam nang arye, “Aning wininamlume, aning ara, pia kum wininamlume,” nyapdeiamse ning ara, sikce moubuka kum talinyake. Narye nyapdeiamse yupu atonun, kum peterenyak bukni, aning yaniplobuka, yuk ninguk peterenyake. Tonda, na si eren aik pum tam noutam una ati, ‘Aning ara, ‘Naʼ tenen, ningʼ tenen, wipdeiamse teleb ning nirya ara, malye kilinyake. Sik imam nang arye, ‘Aning ara malye ning, aning ara teleb ning,’ nyabuka, teleb kibuka lakak arye, kum peterenyake. Tonda, yuk-yuk wibuka kum delinyake. Tonda sik anang arye, Israel nang anggunti, ‘Allah el kanye ara, awinin ning ara, malye kilisulul, bukni, aning winina ara, teleb kililsulu,’ nyabuka kum peterenyaka ati, sik Israel nang ara, walwaluk unyake. Tonda, sik imam nang arye, ‘Asum ara, Allah el si eren sum, Sabat sum akunum yanmasila ati, talye pil kum dopnuyabe. Dikdik sebuka, Allah atibuk tenenamabe,ʼ moubuka kum tenenyakce batakanyake. Wininyaka deice arye, sik anang ap, sik daunyak Israel yala nang nirya babye, na Allah ati, si kum ereninyake. Tonda, malye kininyake.

²⁷ Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.

²⁸ Tonda, sik amalye unyak deiyok nang melina ati, Israel mutuku noutam unyak nabi-nabi nang arye, tilila yupu ap, talye nyaltakna yupu ap, weika arye nyanyake. Ara, sik deiyok kibuka talinyak nang, malye winipmace ning ara, tuba aupmalyebuk, sik melina ati, tilila yupu nyanyake. Winipmanto ara, aik pum tam ara, malye ning weik aupmalyebuk, ninye arye, ‘Anyaik ara urasin teleb unamleʼ tenen, bai tam abilinga deice arye, kurun cat likuka deibikirye, teleb kilamle touk sikce lelinyake. Adeiyok nang arye malye winipmace ning siknilongona ati, sik nabi nang, tilila yupu deice arye, ‘Kume, Allah arye arepsukba, nun lengdar mabupu deice arye, aning winibuka eipmabe. Tonda, Allah el Pia Teleb Lek Dip Kanye arye nyapmasil ati, winipnamabe,’ nyabuka, tilila yupu dem nyanyake. Bukni, sikce nyanyak yupu nirya ara, talye yupu uk nyaltakanyake. Sik anang arye, Allah Yahweh, aning-aning nirya deice tam erebuka, Pia Mikip Weik Ululnye birye, nyapsuka ati, el si deice arye, ‘Aning ara winipnamle, aning ara kum winipnamle nyabuka, talye nyaltakanyake. Bukni ayupu ara, na Allah arye, aning-aning deice tam erebuka, Pia Mikip Weik Ununye birye, pia kum nyapse. Tonda, narye sik anang dam, kum nyapmanye yupu nyanyake.

²⁹ Tonda, anggun Israel mutuku noutam ululum nang arye, amalye winin ning ton winilulume. Ara, ton nang arye, ‘Bona talibuka unamapʼ tenebikirye, yuk nang ati, ‘Anggun adiparyuk, yo bok weik arepsilyame. Kum arepsiminyeura, ikin ning weik, anggun nong deice delinamsiabe,ʼ nyabuka, ubula aryuk uang weik dolonyake. Tonda, sik anang ara, talye yupu deice nyaplobikirye, yuk nang talinyak ning ubula dolonyake. Sikce, bona pia kum talinyak nang, talye kankan unyak nang ati, melipting bukni, aning kumce, anggun deice ikin ning deibuka, daralongona deice arye, yo bok ton ubula dolonyake. Tonda, karin mutuku arye yanuka, ninye asik nang ara, sik Israel mutuku noutam unyak nang ati, ‘Anggun adiparyuk, yo bok weik arepsululume. Kum arepsumunyeura, ikin ning weik, sik nong deice deilinamsiabe,ʼ nyabuka, ubula aryuk uang weik dolonyake. Sik anang ara, ninye asik nanguk unyaka ati, yata yupu ton nyaptingba, sik ning tamubuka dopropting do? Kume, aning ara pia kum winipmanto.

³⁰ Na Allah arye, ‘Israel nang, sik kan-kan noutam ara, tonok telebnye ton auptuba, anye birye, amutuku dana-dana mutuku antanap dongobuka, domik cang keil poka, yu nang arye lulutaklamik ning ara, yupu nyaptuba, atam nang arye, aning lipsisikuka doptinge. Tonda, elce yupu nyaptuba, sik malye wininyak ning ara, bataknirye, telebuk ubtingba, aninye kum wenepnamneʼ tenenune. Bukni, atonunye ton, pia kum ululba kum eipse. Winipmanto ara, ‘Anye wipdeiptinyeba, elce min arye domikce cang keil poka dakuka sakamlibuk, elce tamubuka doplirye, mikip kipdeibuka, el anye birye amutuku talebuka, teleb kibuka winiptopura, narye amutuku nirya ati, weik ikin ning arena kumce, obuka sirya kum daktinye,’ tenenune. Bukni, wini talak ara, atonye pia kum ulule.

³¹ Ati wini talak ara, narye anggun Israel tam ululum nang ati, yu unulul ning ara, dobuka, sik deice aryuk, dipkoprob deipnamne. Winipmanto ara, sik anang unyak ning nirya ati, na yu uku buk dilamle atonun unulul ning ara, sik deice deipnyeba diplyeura, sik nirya kum danamake. Sik malye-malye weik winilamik atonun kibuka, ikin ning weika arye, sik kisok deice deipnamnarya. Nara Allah Yahweh, aning nirya deice tam erebuka, Pia Mikip Weik Deiyoknye ununa ati, naryuk ayupu akunum nyapmasina ati, aning nirya ara, dipkoprob nong kunupnamle.