Yehezkiel 21 - Eipomek

Allah arye, “Na ya bopnirye, Yerusalem mutuku nang wenebuka opnamne,” nyabuk yupu

¹ Allah el si Yahweh arye, na Yeheskiel dam yanuka nyapnuk yupu ara, ani.

² Se, anda ninye arye deipkiknye ulyame. Ance Yerusalem mutuku domik tam dipdemince amutuku ati, wenen yupu nyapnulyame. Ara, narye sikti, ikin ning arepyeba, Israel nang ap, Israel nang dam unyak tam nirya ap, na si erena ati domik aik ap ati, sik wenena ati, malye kipdeipnamne. Winipnamne ati, yupu laka nyanamlyame. Aning ara, ance nyapnulyame. ‘Allah arye wenepnamsileʼ nyabuka, laka nyapnulyame. Winipminyeura, sik Israel mutuku noutam unyak nang nirya bikinamake.

³ Tonda, sik Israel mutuku noutam unyak nang ati, ayupu nyapnulyame. “Na Allah Yahweh ara, wini talak anggun olana atonunye winipnusine. Winipmanto ara, na ninye on parang ya libukadeipse ning ara, kupdopnirye, talibuka malye ninguk, talibuka wininyak nang babye, pia diksukum wininyak nang babye, anggun nirya wenena ati, anggunda, oltaknauk upnamsine.

⁴ Ara, talye ati kum nyapsine. Kume, Israel mutuku unyak nang nirya kan-kan arye, malye wininyak nang babye, diksukum kibuka, teleb wininyak nang babye, weika arye opnamne. Winipnamne ati, na ninye on parang ya dopropnirye, dabu tam (arah utara) unyak nang arye dipdongobuka, iknapye mutuku tam (arah selatan) unyak nang nirya ara, opnirye sirya daknamne.

⁵ Winipnyeura, adeice arye, ninye mutuku sirya, im sirya nirya arye, moubuka bikinamake. Ara, nati biknamaka ara, ani. Ara, ‘Se, Allah Yahweh ara, el tonoknye ululeʼ tenen, bikinamake. Tonda, ‘Allah el ya lina pum tam arye, el parang ya doproplirye, kupdopnamle ning ara, aya tamubuka, el aik lin ning pum tam, tamubuka kum lipdongopnamle. Ninye wenebuka, onauk upnamlarya’ tenen, moubuka bikinamake.

⁶ Tonda, ninye arye deipkiknye, an Yeheskiel bira, ‘Se,’ nyabuka, malye nyabuka ngalukunamlyame. Ara winipmanto, ninye ton weik kanye imun upmalya ati, talima daksakmalyeba, ‘Se,’ nyabuka, ngaluklirye, malye nyalamle atonun, an babye atonun winipmince, sik dam malye nyabuka ngalukuminyakarye, pia engenauk unalame.

⁷ Winiminye ati, sik Israel nang wekmakirye, yupu kekebikceura, sikce anti asipdenamkiake. Ara, ngalukuka malye nyabuka engepminyeba, Israel nang arye, ‘Se, yata deiyok ati, ngalukuka malye nyanmalam do?’ nyabuka asipkikceura, ance sik anang ati, nyapnulyame. Kume, dotalak ara, kanye ikin yupu ton boyasikceura, kekepnamaba atia. Ayupu nirya yanuka nyabikceura, kekepnamak nang ara, ‘Se, yata wiriptibye do?’ tenen, ikin kanye bobuka, sik talima dakalsanamle. Tonda, sik anang nirya ara, taruk mitang uplyeba, daksaknamle. Sik kanye bobuka unyak nang nirya ara, kum kipnamle. Tonda, sik anang yok sirim taliplya deice arye, sik yok babye, sirim talibuka, mikip kum upnamle. Sik kanye tenen ning ap, sik kisok yung ap ara, mek atonun uplyeba, pia mikip kum upnamle. ‘Weik ikin ning yanamle,’ nyapmasina ara, pia dipkoprob yanamle. Anggun dibinauk unamlume. Aning yalyopura, aning nirya ara, winipnamle. Na Allah Yahweh, aning-aning deice tam erebuka, Pia Mikip Weik Deiyoknya ununye birye, akunum nyapdeipsine. Allah arye, na Yeheskiel biti nyapnuke. Nyapnukopura, yupu tonap dukdongobuka nyapnuk.

⁸ Allah, el si Yahweh arye, na Yeheskiel dam yanuka nyapnuk ning ara, ani.

⁹ Anda ninye arye deipkiknye ulyame. Dotalak upnamle ning ati, ance sik Israel nang dam laka nyapnulyame. Anyapnalam yupu ara, atia. Ayupu ara, na Allah arye nyapsine. Anggun nirya dipdelulume! Ninye on ya akunum kintineipne. Acang parang ya ara, el si akunum ketebuka kintinip deipse. ‘El urasin tam yu upnamle’ tenen, akunum kekepse.

¹⁰ Aya ara, akunum kitibuka deipse ning, narye atam nang nirya opnamne. Tonda, narye aya ara, akunum kitibuka deipse ati, aya dopropnyopura, el si ara perereng ablirye, mile daklamle atonun upnamle. Na kayapu nirya, wenen ning yanamle ning ati, anggunda teleb kanye kum bobuka unamlume. Minop talak ara, anggun malye winilamlum ning ati, winipmanto ara, talye yo taruk arye bokuka wenepsise bukni, anggunda, ‘Deiyok aning ara, mambul kume, dauplye,’ tenelamlumce, bikamlumcuk, ulamlume. Aning deice arye, moubuka kum bikamlume.

¹¹ Anggun wenena ati ara, narye cang parang ya ara, akunum ketebuka deipse ati, ‘Perereng ablirye, mile dang-dang apnamleʼ tenen, akunum pil dopse. Apil dopse deiyok ara, ‘Yu nang arye, aparang ya dobikirye, Israel nang sik wenen ati, ninye weika arye onamakeʼ tenen, aya akunum kintinip deipse. Aparang ya ketebuka, si akunum lupdeipse ati, narye aya dobuka, ‘Sik yu nang arye, Israel yala nang ati, opnamakʼ tenen, akunum arepse.

¹² Aning ati ara, ninye arye deipkiknye, Yeheskiel anda, ngalukuka malye nyamince, weik arye engenamlyame. Aparang ya ara, na mapu koproba, Israel nang ap, sik talina ati, ninye deiyok talibuka, unyak deiyok-deiyok nang ap, anggun nirya ona ati, aparang ya akunum kintinipse. Israel nang talibuka unyak deiyok nang ap, sik amu tam talinyak nang, anirya ap ara, sik yu nang ara, aya arye lukuka obikceba, dipnamake. Ati Yeheskiel, anda ‘Seʼ tenen, malye kanye bopmince, bikilina ati, anggun Israel nang ulamlum touk, an keil deiceuk taruk arye, opdanulyame. Winipminyeba, ninye nirya eibikirye, ‘Se, kanye imun ning yanamsila ati, el ikin kanye bobuka egenmale,ʼ tenebuka, biknamkiake.

¹³ Aning ara, talye ati kum nyapsine. Deiyok ara, ani. Anggun moubuka tenipnamlulume! Winipmanto ning ara, talye yo taruk arye, butuku palamle bukni, ‘Aning ara, dauplye, nun malye winin ning kum bataknuyabeʼ teneplumce, biknulumura, aning deice arye, aminyan talak ara, anggun wenena ati, weik kanye imun ning ton, tabakuka kum arepnamsin do? Kume, dipkoprob narye ‘Naʼ tenen, nang, na mapu koproba ululum bukni, anggun Israel nang ati, weik ikin ning arye winipdenamsine. Narye anggun deice, weik ikin ning deipnyeba, doropnamlume. Aning ara, na Allah Yahweh, aning-aning deice tam erebuka, Pia Mikip Weik Ununye birye, akunum nyapdeipsin ati, aning ara, dipkoprob nong kum upnamle.

¹⁴ Aning ati ara, anda ninye arye deipkiknye Yeheskiel, ance dotalak winipnalamle ning ati, na yupu bobuka, laka nyalbinamlyame. An taruk tatang bokminyeba, ninye nirya arye, ‘E, nun mal olan nang arye opnusika ati, el kanye deipmale,’ tenenamak tenena ati, bikilina ati, aning ara, laka nyapnulyame. Sikce, ‘Se, weik ikin ning yanamsile, tenepnamakʼ tenen, winipminyeba, atalak aryuk, na kintinipse cang parang ya arye dobuka, ninye ona deiyok kipnamle. Narye lo arepnyeura, yu nang arye, aya ara, like bitinye do, like winilyeto, dua sampai tiga kali lipat, aninguk tuba-tuba dopra kukabikirye, Israel nang pia weik oplopnamake. Aning ara, tonok tam noutam aryuk kume, dana-dana tam arye, yu nang, aparang ya dopra kukabikirye, Israel nang weik opnamake.

¹⁵ Ninye on nang arye, sik warikdongobuka yakceura, aparang ya arye, na mapu koproba, deiyok koubuka, opnin banmaceura, sik Israel mutuku unyak nang mikip-mikip unyak nang ara, mitang kipdeiplyeba, talima daksaknamle. Atalak ara, ninye weika arye obikceba, tukwak sakuka poulbikirye, dipnamake. Anggun nirya eipnalume! Anggun ululum mutuku nirya ara, anggun weik asik wekelbana ati bisik, cang keil poka bublan dam ara, narye yu yin nang deipnyeba, ninye on nang kintinipnamake. Amutuku nang, weika arye opnamak ati, sik yin nang arye, na ninye on ya erebuka talibiceba, aya si ara, perereng alamle touk upnamle. Ara, aparang ya, narye kintinip deiamseba, pereng-pereng alul ning ara, ninye opnamak ati, winipse.

¹⁶ Winipmanto ara, narye aparang ya talibuka opnamak yin nang ati, nyapnamne. ‘Aparang ya si, yu pia ulul ya ara, anggun tenepmalum touk, kwanim tam ap, sirik tam ap, tonda, dana-dana tam nirya tamupdemunyakarye, ninye weik opmunce, bobuka binululume!’ nyapnamne.

¹⁷ Ninye weik akunum obikceura, na Allah babye, kanye deipnirye, na taruk bokbokapnamne. Winipnamne ara, na yu kum upnamnile. Anggun malye ululum nang, weika arye, akunum wenebuka opnyeura, na kanye yu weik tenenun ning ara, kum kipnamnile. Aning nirya ara, pia dipkoprob nong upnamlarya! Na Allah Yahweh, aning-aning deice tam erebuka Pia Mikip Weik Deiyoknye Ununa ati, ayupu akunum nyapsina ati, dipkoprob aning nirya ara, nong upnamle nyapsine. Allah arye, na Yeheskiel biti, ayupu nirya nyapnuke.

Raja Babel, el cang parang ya ati, nyabuk yupu

¹⁸ Allah Yahweh arye, na Yeheskiel dam yanuka nyapnuk yupu ara, yuk ning ton ani.

¹⁹ Yeheskiel, anda ninye arye deipkiknye ulyame. Raja Babel birye, ‘Israel nang opnamne’ tenen, ninye on parang ya bobuka yanamle. El ap, el yin nang ap ara, tonok mutuku arye batakuka, amutuku yanganamak bukni, anda sik anang yanganamaka ati, bisik bitinye kintinip deiplyame. Dan tam arye, bisik bitinye kwaleknak uk, bikilin ning ati, ‘Atam weik asik lu bisik ara, ani. Otam weik asik lu bisik ara, ani,’ nyabuka, yo lakase deice, laka nyan yupu sekmince, iknalyame.

²⁰ Tonok bisik ara, otam weik asik si ara, Raba mutuku tam arye, Amon mutuku nang unyakak, binuka banamle. Tonda, yuk tam lu bisik ara, Yehuda mutuku tam noutam bukni, Yerusalem weik asik binuka banamle. Yerusalem mutuku dana-dana tam ara, ‘Yuk mutuku nang arye, olyasicak’ tenen, sikce weik cang keil poka dobuka, antanap dongobuka deibik noutam, Yerusalem weik asik ati nyapne. Amutuku bisik yanamle. Ati, ance yo lakase deice arye, bisik bitinye kintinipminye ning ara, abisik kwaleknak uk, bikilina ati, yanuka deipnulyame.

²¹ Aning ara, talye ati kume. Deiyok ara, Babel mutuku nang, sik deiyoknye, Raja Babel bira, abisik ap, otam bisik ap, kwa sukumak, tikuka kintinipmale. Raja Babel bira, abisik bitinye kwa lekelanak binuka tiklirye, el si erenamle ning si tenipdelirye, ‘Dan tam bisik binun do? Peterepnutuʼ tenen, merye kibuka moropnamle. Raja el mal bopmalye ning ara, ‘Yata wiribuka tukwak ton saknul do?’ tenen, binuka deiplirye, mal leleklopnamle. Tonda, Raja Babel birye, ninye urasin atonun, kibuka memebukce, si erelul isa ati, “Na binun bisik ara, laka peterepnilyame,’’ nyabuka moropnamle. Amoropnulya ati ara, domba ato ning oplirye, nong noutam wamlye ning ara, talima dobuka bataklirye, moubuka dipdelirye, ‘E, winipnamne,’ tenebuka, moubuka biknamle.

²² Adeice arye, Yerusalem mutuku tam ati, sirik taruk arye bokuka, talipmalye ning deice lakakipnamle! Awinipnamle ning ara, Raja Babel birye, Yerusalem mutuku olbinulya atia. Winiplyeba, Raja birye, “Mal olalbinuyabe,” nyaplyeba, sik yanganamaka, yan lelim ara, weik nyabice kekepnamake. Atalak ara, Raja birye, el yin talin nang ati, sikda, anyaik dobuka ukirye, bai tam bisik arye domik bublan (pintu gerbang), tirikdongobik ning, binuka dakuka donokon ning ap, cang poka deice welena ati, cang yo moromna welen ning ap, poka dam tuku palibuka delinamak ning ap ati, “Anggunda aning-aning moubuka kintinip deipnululume,” nyapnamle. Winiplyeba, sik anang arye, anyasik domikirye, cang keil poka dopdongomikce ning ara, tuba libuka yan deibikiba, langdiplye deice arye, akeil poka deice welebuka bikirye, ninye olbinamake.

²³ Bukni, sik Yerusalem mutuku unamak nang arye, aning nirya eibikcopura, ‘Kume, aning ara, tilila ati unmale. Ara, kanye imun ning yanamsila ati, kum uple. Raja Babel birye, el si erena isa, asipdenamle ning ap, elce mirye nyanmalye ning ap, adeice arye winipmalba, el deice lakakipmal ning ara, talye ati winilule,’ tenenamake. Tonda, sikce, ‘Kume, nun ap, Raja Babel ap, pia mikip nyalin yupu deice arye, Raja Babel an ap, nun israel nang ap ara, kum olanamabe. Teleb arye unamabe. Akunum nyapdapu ati, Raja Babel birye nunti, kum yanuka opnamsile. Weik ikin ning ara, nun dam ton kum yasutue,’ tenenamake. Bukni, na Allah arye, sikce malye-malye weik ulamik ning ati, tonap laka nyapnamne deice arye, aminyan kanye tenebikirye, moubuka bikinamake. ‘Se, dipkoprop, nun malye weik ulamupu bukni, wini talak ara, Allah arye wenebuka opnusileʼ tenen, moubuka bikinamake. Anggunce, ‘Se, aning nirya ara, Allah arye nun wenena ati, akunum winipmasilʼ tenen, moubuka bikinamake. Aning nirya winiplyeura, Babel mutuku Rajanye birye, Yerusalem mutuku bilirye, amutuku nang nirya, malye kiplye ning ara, binuka tomoplyeura, elce anggun tapu koupsilirye, el mutuku bobinuka deiplyeura, ikin ning weik, anggun nong deice delinamsile.

²⁴ Aning ati ara, nara Allah Yahweh, anggun si erelulum Allah, aning-aning nirya, deice tam erebuka, Pia Mikip Weik Deiyoknye ununa ati, narye anggunti nyapsine. “Anggunce malye-malye weika winilalum ning nirya ara, akunum laka uplyeba, anggun kanye arye tenepnamlume, yuk nang nirya babye, amalye ulamlum ning nirya ara, bikinyake. Anggun winilulum ning noutam nirya ara, dipkoprob weik malye winin ninguk, akunum lake upmalyeba, ninye nirya arye bikinyake. Anggunce malye weik winilalum ning, wini talak ara, tuba tonap akunum moubuka tenepmaluma ati, wini talak ara, na tenepse talak akunum upmala ati, anggun wenena ati, narye dobuka, anggun mal olan nang ati lo arepsinnyeura, sikce malye kibuka opsikirye, sirya dakmasiake. Anggunda tapu koupdongopsikirye, sik mutuku bobinuka deipnamsiake.”

²⁵ Se, an Israel mutuku nirya talibuka unmalam ninye deiyoknye, Raja bira, anda pia malye ninguk talibuka ulyama ati, anda, ‘Na like,ʼ tenekunune. Anda na yupu moubuka, kum talibuka winimince, batakalyama ati, an wenen sum akunum yanmale. An pia malye winiminye ning ara, weik akunum kibuka ati, an weik wenen sum ara, akunum yale. Ati asum ara, wenepkinirye, sirya akunum daknamkine.

²⁶ Aning ati ara, na Allah Yahweh unune. Nara aning-aning nirya, deice tam erebuka, Pia Mikip Weik Deiyoknye unirye, ayupu nyapsine. “Sik Babel mutuku yin talin nang arye, Israel mutuku nang ati, Raja kibuka talilulnye, el kisok cang kain arye koulogonyak ning ara, kwiribuka donoknulyame. Tonda, ‘Anye Raja usul’ tenen, el kisok deice dekna weik ning, emas arye moubuka, deiamik ning babye, kwiribuka donoknulyame. Yata ning do nirya, min arye aulamuk touk, tuba kum upnamsile. Wini talak ara, aulye ning nirya ara, pia yuk kipdeipnamsine. Ati wini talak, sik amu tam unyak nang ara, erepdeipsinyeba, ninye deiyok nang unamake. Tonda, wini talak erebuka deiamikba, ninye deiyok kinyak nang ara, narye amu tam kipdeipnamsine.

²⁷ Naryuk, Yerusalem asik dobuka unyak mutuku nirya ara, dakuka bataknirye, sice buklopnamne. Amutuku dana-dana nirya ara, ulubuka daklopnyopura, sice atonun kipdeipnyeba, aik olauk upnamlarya. Aning winipnamle ara, minop talak arye dipdongobuka, noutam talak babye, wini talak nirya babye, uluplobikceba, aik oldiamuk upnamle ning ara, pia min arye ton kum winibuke. Narye amutuku ati, pia malye kipdeipyeura, dapia aunmalya ani, aminyan talak ara, narye tenyamsenye yanamlarya. Anye bira, ‘Amutuku nirya talipnamleʼ tenen, akunum min arye wipdeiamse ati, el yalyopura, narye el tibuk arepnamne. Naryuk, Yerusalem mutuku ara, dobuka awipdeiamsinye, el deiceuk deipnamne.” Allah Yahweh arye nyabuk.

‘Allah el ninye on ya bobuka, sik Amon nang ati opnamle,ʼ nyabuk yupu

²⁸ Allah arye nyabuk. “Se, Esra anda, ninye arye deipkiknye ulyame. Narye nyapnukin yupu ara, bobuka yuk daunyak nang ati, laka nyanamlyame. Ance sik Amon tam unyak nang nirya ati, laka nyapnalam yupu ara, ani. ‘Nun ni koproba Allah Yahweh, elda aning-aning nirya deice tam erebuka, Pia Mikip Weik Deiyoknye birye, nyapsile. Anggun Amon yala nang arye, Yerusalem mutuku unyak nang ati, pia malye-malye nyan yupu weik nyalamlumce, sik nong deice, ikin weik ning delilalume. Ati ara, Allah arye anggunti, ninye on parang ya ara, akunum kintinibuke! Elce, ninye ona ati, parang ya ara, akunum koubuke. Aparang ya ara, elce ninye opnamle ati, akunum ketebuka deibuk parang ya, el si yu ara, liman obuka, bebeya laklamle touk ulule. Aya arye, ninye pia weika arye oplopnamle!

²⁹ Tonda, sik Israel mutuku nang, tilila yupu nyanyak nang arye, anggunti, talye yupu weika arye nyapsike. Ara, sik nabi palsu nang arye, ‘Kume, anyapmap yupu ara, Allah aryuk arepsukba, lengdar mapmuka deice arye, akunum nyapmasilak, kekepmabe. Israel nang ati ara, winibuka-winibuka winipnamsile,’ nyabuka, laka nyalamik bukni, sikce nyalamik yupu nirya ara, nong kum upnamle. Aning atonun ton, sik nabi palsu nang ara, isa ap yupu talilanyak nang do, isa merye sik deiyok nang do, sik dam binuka, asipdeyikba, anang sik isa mikip deice arye, ‘Aning ton, aning ton dipkoprob winipnamsile,’ nyalamik bukni, anang babye, talye tilila yupu deice aryuk nyalamik. Aning ati ara, Allah arye, lo areplyeba, anggun olan tam nang arye, ninye on parang ya dobikirye, yanuka, sik tilila yupu nyalamik nang ap, tilila yupu kekelamik nang ap ati, oplopnamake. Atalak ara, Allah arye, lo areplyeba, sik mal olan nang arye, parang ya bobikirye, sik pia malye-malye weik wininyak nang ara, ngang yok sekuka bataknamake. Sik pia malye weik wininyak ning ati, weik wenen sum ara, akunum yale. Ati, asum deice ara, Allah arye, amalye weik unyak nang ati, wenelirye, sirya akunum dakanamle. Allah arye anggunti, sirya ning wenepnamsile.

³⁰ Se, anggun Israel yala yin talin nang ara, anggun ninye on parang ya ara, tamubuka ya lilongona pum tamuk, lipdongpnamlume! Anggunce yuk mutuku nang ati, opmanto talak ara, akunum kum kipmale. Deiyok ara, na Allah arye, anggun apu yapu arye deiamsik mutuku unyak nang ati, adiparyuk obuka wenepnamne.

³¹ Na Allah arye, sik amutuku unyak nang ati, pia yu weik unilyeba, uku buk dilamle touk unulul ati, sik wenena ati, weik kanye imun ning, anggun dekena ning, arepnamsin ning ara, dobuka anggun deice deipnyeura, ikin weik unamsile. Tonda, narye anggun dobuka, pia weik yu nang deice deipnamsine. Ara, sikda ninye ona walwal nang kume. Bukni, sikda mince ninye ona ati, kel weik bikamik nang deice dobuka arepsinyeba, opnamsiake.

³² Anggun wenena ati, winipnamsina ati ara, winipmanto ara, winirye kouamuk yo dibuka sirya dakalul touk, ayu weik nang arye, anggunti onauk unamsiyake. Opsiceura, anggun ining ara, anggun mutuku noutamuk saknamle. Obuka, sirya daksikceura, aminyan talak tonoknye babye, anggunti ton tuba kum tenenamsiake. Aning nyapmasin yupu nirya ara, dipkoprob nong upnamlarya. Nara, Allah Yahweh, aning-aning deice tam erebuka, Pia Mikip Weik Deiyoknye birye, ayupu akunum nyapdeipmasina ati, anyapdeiapmasin touk, dipkoprob nong kunupnamle.