Yehezkiel 20 - Eipomek

Mesir mutuku noutam, malye winilamik ning ati, nyabuk yupu

¹ Keting tamun tekbarye bukni, wala pamubarye akunum ubukopura, tanggal sepuluh deice arye, atalak aryuk Israel nang, sik ninye deiyok talibuka ulamik nang ton, bokuka na Yeheskiel dam yanuka, yupu nyapnik. Deiyok ara, sikce, “Naio, Allah Yahweh arye, yata yupu nyapnusil do? Ance lak nyapdeipsutume,” nyabuka, na dam yanuka, morona ati yayik.

² Sikda, na dam akunum bulyayikopura, Allah Yahweh arye nyapnukba, na adiparyuk kekenmase. Allah arye nyapnuk yupu ara, ani.

³ “An Yehezkiel bira, ninye koproba aryuk deipkikba, ulyamnye, ance sik Israel yala nang, sik ninye deiyok nang nirya ati, ayupu nyapdeipnulyame. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, nyapsine. Anggunda, yata deiyok ning ati, ayanuka yupu nyabuka moropmalum do? Anggunda, talye luba kibuka, na dam yanuka, ‘Allah ati moropnuyapʼ tenen, yanamlum do? Kume, nara Allah, pia kam ununye birye, dipkoprob nyapsine. Anggun yanuka moropmanulum yupu ara, kekepsinirye, pia kum nyapdeipnamsine! Nara Allah Yahweh, aning-aning nirya talibuka, deice tam erebuka Pia Mikip Weik Deiyoknye ununye birye, akunum nyapsina anya arye, pia dipkoprob nyapne.

⁴ Ati, Yeheskiel anda, ninye koproba aryuk, deipkiknye aryuk, sik malye-malye weik winilamik ning ati, wenen yupu nyapmince, ‘Allah arye weik tonun wenebuka opnamsilca!’ nyabuka, sikti, laka nyapnulyame. Ara, min talak narye, ‘Aning ara, pia kum wininamlume. Awinin ning ara, pia meme,’ nyapdeipse bukni, Israel nang nirya, anggun apu yapu koproba arye, aninguk pia malye weik winilamik ning ara, ance ton ap tabakukapmince, sik kekena ati, moubuka lak nyapdeipnulyame.

⁵ Tonda, nyapnulyame. Anggun ni koproba Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye akunum nyapdeipmasil yupu ara, ani. Ara, min talak, narye sik Israel nang nirya ati, ‘Anggunda, ‘Naʼ tenen, nang unamlumʼ tenen, wibuka dopdeipsisirye, sikti, erepdeipsirye, dipkoprob nyalin yupu deice arye, anggun apu yapu nang ati nyapse. Ara, anggun apu koproba, Yakub birye deibukba, dadeipdanin yangalamik nang ara, Mesir mutuku noutam ikin pia weik ulamik talak ara, narye anggun bikna ati, nyapsise. Nara Allah, na si koproba ara, Yahweh unune. Anggunda, ‘Naʼ tenen, nang unamluma anya arye, nara anggun ni koproba Allah unamsine,’ nyabuka, nyalin yupu deice arye, lak kipdeipsise. Ati, narye anggun Israel nang atibuk nyapse ning ara, ‘Dipkoprob nara anggun ni koproba, Allah Yahweh unune,’ nyapse.

⁶ Atalak adiparyuk, narye nyalin yupu deice arye, akunuma nyapdeipse. Ara, ‘Mesir mutuku noutam, ikin weik ulamlum bukni, bobuka narye tenyamsirye, kintinyamsise mutuku noutam, bobisinirye, amutuku arepnamsine. Amutuku noutam ara, yata ning do nirya, pia teleb ning yala-yala nirya aubuk mutuku ulula anya arye, pia telebak, bona weik talin mutuku ulule. Yuk-yuk mutuku nirya ara, mitik tonun teleb ulul bukni, amutuku ara, pia teleb weik mutuku, bona weik mutuku ulule. Anggun dolona ati, amutuku akunum wibuka kintinip deiamsisa anya arye, amutuku arepnamsine,’ nyamse.

⁷ Tonda, ayupu ton nyapse. “Ati ara, sik Israel nang nirya, anggunce talye isa si erepmunce, aning ati, kanye deiplumce, si erelulum patung-patung nirya ara, dobuka bataklopnamlume. Aning nirya ati ara, pia mem ning ati, aning ara, pia na like. Moubuka tenipdelulume! Sik Mesir mutuku unyak nang arye, talye ning, isa mer si erenyak ning, anggun ton melibuka erepmunyopura, na dam ton pia kum yanuka moropnutume! Tonda, narye anggunti, kum melipnamsine. Nara anggun deiyoknye Allah unirye nyapsine.”

⁸ Ayupu nirya, mikip arye nyapse bukni, sikce na nyapse yupu kekena pia kumce, ‘Allah arye nyapsilye yupu kum wininamabeʼ tenen, nati bataknike. Winipnyopura, anggun kan-kan noutam arye, tonoknye babye, sikce si erelamik isa si, patung-patung pia malye winilamik ning ara, kum batikik. Tonda, sikce, ‘Aisa si erenamapʼ tenen, kanye deibuka, delilamik patung-patung nirya babye, pia kum batakamik. Sikce Mesir mutuku noutam ulamik talak arye, isa mer si erelamik ning, el si berhala-hala nirya ara, kum batakamik. Atalye ning kum batakamika ati, narye, ‘Ura, sik Mesir mutuku noutam tuba unmak talak ara, narye sik Israel yala nang wenebuka, pia ikin ning, sik nong deice deipnamne. Sik malye wininyak ning ati, na yu weik unilye ning ara, sik nong deice deipnirye, sikti, weik tonun wenepnamne,’ tenipsirye kintinip deiamse.

⁹ Bukni, aning nirya ara, kum kipdeipsirye batakse. Bataksa deiyok ara, ani. Ara, ‘Kume, ‘Naʼ tenen, nang ati, yu weik arye wenepyeura, sik amutuku noutam unyak nang ap, amutuku dana-dana unyak nang nirya ap, aning eibicopura, na si malye-malye nyapnikirye, nalipnicakʼ tenen batakamse. Mesir mutuku nang ap, amutuku dana-dana tam ulamik nang ap ara, narye ‘Naʼ tenen, nang, Israel nang lobukapsirye, Mesir mutuku tam arye bobisirnye, teleb kibuka lyepdeipse nang ara, eibika deice arye, ‘Se, Allah ara, dipkoprob mambul weiknye ululeʼ tenelamikce, nati bikamnik.

¹⁰ ‘Na ti biknamniyakʼ tenen, sik Israel nang lyepropsirye, Mesir mutuku noutam arye boyanuka, ninye ap, mek ap, kum sukum, pata weik lu mutuku, el si padang pasir bobinamse.

¹¹ Israel nang bobuka, padang pasir noutam delilbisopura, naryuk sikti, “Aning ara, wininamlume. Aning ara, pia kum wininamlume,” nyapsirye yupu arepse. Tonda aning atonun, narye, ‘Anggunda winipnamlume, winipnamlume. Aning talibuka umunyopura, narye melipsinyeba, teleb kibuka, tuba kam unamlume,’ nyapdeipse yupu, ton lak kipdeipse.

¹² Aninguk kum bukni, tonda, anggun bikna ati ara, sik Sabat sum ton wibuka arepse. Ara, ‘Allah aryuk, nun malye winin ning kum kipdeipsilirye, pia teleb kilinamsilʼ tenen, ‘Bikinamakʼ tenen ati, weik sum, pil dona kum aryuk, dikdik sebuka, na si eren sum, asum si, Sabat sum arepse. Ara, pia weik sum, ‘Sabat sum ara, moubukapmunce, aning ara, na Yahweh arye, sik malye winin ning kilipnirye, sik teleb ulina ati, sik lakina talak atiaʼ tenen, “Sabat sum moubuka kitinamlume,” nyapdeipse.

¹³ Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.

¹⁴ Utenebuka kintinipse bukni, atenepse ning nirya ara, kum kipsirye, batakse. Ara, ‘Na si malye kipdakcakʼ tenen, batakse. Aning nirya batakse deiyok ara, ani. Ara, ‘Kume, ‘Naʼ tenen, nang ati, yu weik arye wenepnyopura, sik Mesir mutuku noutam, neika unyak nang ap, amutuku dana-dana unyak nang nirya ap, aning eibikirye, na si malye-malye nyapnikirye, nalipnamnicakʼ tenen, batakamse. Mesir mutuku nang ap, amutuku dana-dana tam ulamik nang ap ara, narye ‘Naʼ tenen, nang, sik Israel nang lopdeipnirye, Mesir mutuku noutam arye dobuka, bobinirye, teleb kibuka lyepdeipnamne ning ara, eibikca deice arye, ‘Se, Allah ara dipkoprob mambul weiknye ululeʼ tenebikirye, nati biknamniakʼ tenen, batakse.

¹⁵ Tonda, ani. Akata mutuku padang pasir noutam balamik talak noutam babye, narye sik Israel nang ati, ayupu ton nyapse. Ara, “Kume, anggun Israel nang ara, ‘Mesir mutuku noutam arye bobuka, pia teleb mutuku bobinuka arepnamsine,’ nyabuka, nyalin yupu arye nyapsise bukni, wini talak ara, amutuku bobinuka, kum arepnamsine. Anggun pia teleb una ati, amutuku kintinip deiamse mutuku tuku dam ara, arepsinyeba, kum wekuka unamlume. Akintinip deiamsise mutuku noutam ara, teleb ning yuk-yuk nirya, weik aupmala anya arye, amutuku ara, dipkoprob bona talibuka un mutuku ulula anya arye, pia teleb mutuku ulule. Yuk-yuk mutuku nirya ara, mitik teleb bukni, amutuku nirya ara, teleb pia weik mutuku ulule.

¹⁶ Narye, “Apia teleb mutuku kum binamlume,” nyapse deiyok ara, ani. Ara, sik Israel nang nirya arye, ‘Allah nyasilye yupu, nun lik,’ tenelamikce, na yupu moubuka kekena kumce, yaniltanauk ulamnike. Tonda narye, “Aning winina ara, teleb ning, aning winina ara, pia mem ning. Anggun nirya arye, ayupu moubuka talipmunce, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, sikce, ‘Aning ara, mambul weik,’ tenena kumce, asum noutam arye, malye pia weik winilamikce, malye ulamik. Winilamika deiyok ara, sik kanye talima noutam ara, talye ning isa si erenauk tenelamikce, aning atibuk, kanye deibuka, malye weik winilamika atia.

¹⁷ Dipkoprop pia malye weik winilamik bukni, narye tamubuka, sikti, pia bico upnuke. Winbuk upnukba, narye sik Israel nang nirya ati, weik kata mutuku, padang pasir mutuku noutam arye, sik wenena ati, narye obuka, kum sirya dakse.

¹⁸ Aning kum bukni, Israel nang, sik apu yapu arye deibikba, dadeipdanin yangalamik nang bukni, sik wel nang ati ara, weik kata mutuku, padang pasir tuba ulamik talak ara, awenen yupu nyapdeipse. Ayupu ara, ani. “Ura, anggun apu yapu ap, anggun ni yapu ap, anggun nin yapu ap arye, min talak dorapce, dipdongobuka, anoutam talak malye weik ulamik ning ara, anggun wel nang arye, ‘Aning ara, nun babye wininamabe,’ tenebuka, aninguk talibuka, pia kum wininamlume,” nyapse. Tonda, anggun apu yapu arye, ‘Winipnamabe, teleb winin ning ani, malye winin ning ani,’ nyabuka, aninguk talibuka, sikce winilamik ning nirya ara, anggun wel ululum nang arye, aning winina ara, pia meme. Tonda, anggun apu yapu arye, talye ning ati, si erelamik isa si eren ning, patung-patung dobuka, si erelulumce, anggun malye kililalulume. Aning ara, pia meme. Winipmunyopura, na si kum erepnutume.

¹⁹ Deiyok ara, nara anggun ni koproba Allah, Yahweh unune. Na aununa ati, narye, “Aning ara, wininamlume. Aning ara, pia kum wininamlume,” nyapdeipsise yupu ap, “Teleb un ning ara ani, malye un ning ara ani,” nyapdeipsise yupu, atibuk moubuka talipmunce, unamlume.

²⁰ Tonda, pia weik sum, Sabat sum ati ara, anggunce, ‘Se, asum ara, Allah el si eren sum anya arye, weik sum ululeʼ tenen, moubuka tenipmunce, asum noutam ara, talye pil dona kum aryuk, nati si erenamnulume. Aning nirya awininamluma deiyok, ‘Ara na ap, anggun ap, neika teleb unamapʼ tenen, nyalina yupu nyalilana ati ara, asum lakin sum aunamsile. Tonda, anggunce, ‘Se, Allah Yahweh ara, dipkoprob nun ni koproba Allah ulule. El siuk erenamabe,’ tenenamlum tenen ati, ayupu nyapdeipsine.

²¹ Nyapse bukni, wini talak, sik wel nang arye winilamik. Sik atalak wel Israel nang nirya arye, aweik kata mutuku noutam, padang pasir mutuku noutam arye, tuba ulamik talak nirya ara, ‘Allah nyapsilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina malye ning,” nyapdeipse yupu nirya ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,’ nyapdeiamse yupu nirya ap ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik winilamikce, malye ulalamik. Malye weik ulamika ati ara, narye, ‘Ura akunuma, akata mutuku noutam aryuk, sik malye winin ning ati, yu weik upnilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.

²² Kintinipse bukni, atenepse ning nirya ara, kum winipsirye batakse. Deiyok ara, ‘Na si malye kipdeipnikcakʼ tenen, batakse. Aning nirya bataksa deiyok ara, ‘Kume, ‘Naʼ tenen, nang ati, yu weik arye wenenyopura, sik Mesir mutuku noutam, neika unyak nang ap, amutuku dana-dana unyak nang nirya ap, aning eibikirye, na si malye-malye nyapnikirye, nalipnamniyakʼ tenen, batakamse. Mesir mutuku nang ap, amutuku dana-dana tam ulamik nang ap ara, narye, ‘Naʼ tenen nang, Israel nang lopdeipnirye, Mesir mutuku noutam arye dobuka, bobinirye, teleb kipdeipnamne ning ara, eibikca deice arye, ‘Se, Allah ara, dipkoprob mambul weiknye ululeʼ tenebikirye, nati biknamakʼ tenen, batakse.

²³ Anang obuka, kum sirya dakse bukni, sik amutuku noutam ara, padang pasir mutuku tuba unmek talak arye, sikti, nyapse. Dipkoprob, na si deice arye, nyalin yupu arye nyapse. Ara, “Kume, anggun atalak ululum nang nirya ara, yakuka dopkwetepniba, mutuku sirya, im sirya nirya, dana-dana tam unyak nang noutam arye binuka, daunamlume. Yuk-yuk pera mutuku nang ap, neika unamlume. Narye dopkwetepsinyopura, anggunda dana-dana tam mutuku noutamuk, binuka unamlume. Tonok sukum neika kum unamlume,” nyapdeipse

²⁴ Ara talye ati kume. Aning nyapsa deiyok ara, ani. Sik Israel nang nirya ara, ‘Allah arye nyasilye yupu ara, nun like,’ tenelamikce, na yupu moubuka kekena kumce, yaniltanauk ulamike. Tonda narye, “Aning ara, winina teleb ning, aning ara winina mem ning,” nyapdeipse yupu ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, bataklamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning mambul weik,’ tenena kumce, asum noutam arye, pia malye weik winilamikce, malye ulamik. Tonda, anggun apu yapu arye, talye ning ati, si erelamik isa si eren ning, patung-patung dobuka, si erelamik ning atibuk, sik babye, ‘Aisa aryuk melipnamsiakʼ tenen, dilamikce, aning siuk erelamik.

²⁵ Aning pia winilamika ati ara, narye sik anang ati, ‘Dauplye,’ tenyamsirye, sikti, bataksa deice arye, sik anang arye, mem yupu talye-talye ninguk talibuka ulamik. Ara, sikti, ‘Wininmabe, aning ara, kum wininamabe, teleb winin ning ani,’ nyalamik ning bukni, talye-talye ninguk talibuka ulamik. Talya ninguk talibuka ulamik bukni, ayupu nirya ara, teleb un yupu kume. Atalye yupu moubuka taleamika babye, adeice arye kam kum upnamake.

²⁶ Tonda, sik anang ati, ‘Dauplye,’ tenyamsirye, batakse deice arye, sik babye, ‘Winipnamabe,’ tenebik ning talibuka ulamik. Winilamika deice arye, sikti, malye kililalamik. Ara, sik babye, min talak deiamik mapu dobuka, talye isa si erena ati, obikce, uku dongolamik. Narye lo arepsiba, apia malye ning talibuka ulamik deiyok ara, ani. Ara, ‘Narye kanye imun weik ning dobuka, sik nong deice deipnirye, yu weik arye, anang wenebuka oplopnamne,’ tenyamsa ati, winipse. Winipse ning nirya deiyok ara, ani. Ara, ‘Weik tonun sik anang wenebuka oplyeura, sik tuba kam unamak nang arye, ‘Se, Allah ara, dipkoprob, Yahweh ululeʼ tenen, ‘Biknamakʼ tenen ati, anang bataksirye, lo arepsiba, sik bidamnye aryuk, malye weik winilamik. Allah arye Yeheskiel biti, lak nyabuk.

²⁷ Nyabukopura, ayupu ton dukdongobuka nyabuk. Aning nirya ati ara, diba, Yehezkiel anda, ninye sirika arye deipkiknye ulyame. Ati, ance sik Israel yala nang nirya ati, lak nyalbinulyame. Ara, ance, ‘Anggun ni koproba Allah, el si Yahweh arye nyapsilye.' Ura, na Allah Yahweh ara, aning-aning nirya talibuka, deice tam erebuka, pia mikip weik ununye birye nyapsine. Ara, sik Israel yala nang, anggun apu yapu nang arye winilamik ning ton, nati, ‘Allah ara, nun like. El nyapsilye yupu, pia kum kekenamabe,’ nyabuka batakamnikce, malye yupu weik nyalamnik. Sikce na ap, na yupu ap ati, moubuka kum taleamikce, bataklamnik. Na si ati, malye kipdeipnikce, na siuk kum erelamnike. Sikce malye weik winilamik ning ara, ani.

²⁸ Ara, narye sik anang ati, “Narye anggun dobuka, pia teleb mutuku bobinamsine,” nyabuka, nyalin yupu deice arye nyapdeiamse mutuku noutam bobinamse. Amutuku noutam arye bobinuka deipsopura, sikce, ‘Naʼ tenen, kumce, amutuku noutam arye dilamikak, weik cang mutuku kon bukamukak eibikce, adiparyuk isa si erena ati, kam ning obuka, arelbalamikak, eipseura, yu weik ulamnukba, ‘Na pia lik,’ tenyamse. Tonda, atonun, yata yala tikamuk yo do nirya, taruk ap, pia weik tonun uamuk yo eibikopura, sik adiparyuk amutuku dam kam ning obuka, beyanarye uku dongobuka, isa si erelamik. Tonda, atalye si erena ati, siltong teleb ning ton dobuka, uku dongolamikce, isa ati morolamikce, ‘Nun arenamap ning ati, weik arye kanye deipnamsilʼ tenen, anggur duk purubuka kintinibik mek dobuka, aning deice dikiltaklamik.

²⁹ Mutuku kon nirya ara, isa ati, teleb aren ning arelbalamikce, isa si eremunya ati, nara atalak arye anggunti, nyabuka asipdese. ‘'Anggunda, dan weik cang mutuku kon deice balamlum do?” nyabuka asilelamse. Winibuka nyapse ati ara, atalak arye dipdongobuka, wini talak babye, yupu deice arye, aning arelamik ning, cang weik mutuku kon nirya ati, ‘Bamaʼ nyalamik touk, tuba ayupu nyanyake.

³⁰ Ati, anda Yeheskiel birye, sik Israel yala nang nirya ati, ayupu nyalbinulyame. Anggun ni koproba Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, anggun Israel nang ati, nyapsile. Ara, anggun yata ati, malye-malye winin ninguk ara, talibuka wininamlum do? Anggun apu yapu nang arye, malye ning talibuka, malye weik winilamik touk, anggun babye atonun, wininamlum do, kum do? Ara, na Allah arye, ‘Aning ara, pia mem ning, na pia likʼ tenenun ning ati, ‘Aning ara, winina meme,’ nyapse bukni, anggun apu yapu arye, aninguk talibuka, malye winilamik touk, anggun atalak ululum nang babye, isa ati si erenamlum do? Diksukum bisik batakuka, talye bisikuk balamlumce, isa mer atibuk erebuka balamlumce, aninguk tenepmunce, na si ati, malye weik kipdeipnamnulum do?

³¹ Aning ara, talye ati kum nyapsine. Anggunce, atalak babye, isa uk talibuka ulamlumce, kam ning opnarye, aning bobuka arelyanganmalum ning ap, tonda anggun mapu koproba obuka bopnarye, isa si erena ati, uku dongobuka arelamlum deice arye, pia malye wininmalume. Dotalak arye dipdongobuka, wini talak babye, tuba winimunya deice arye, anggunce malye kipdanmaluma ati, na dam ton pia kum yanamlume. Isa si eremunya deice arye, malye kipdalum ati, pia na like. Ati ara, anggun Israel yala nang ara, ilil tenena kumce, ‘Allah arye aminyan winipnamle ning ton, lak nyapsutueʼ tenen, na dam yanuka moroptuma babye, kekepnamsin do? Ara, kum winipmanto. Kume, nara Allah, pia kam ununa ati, na dipkoprob nyapsine. Nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapsine. Anggunda, na dam kum yanuka moropnutume. Anggunce, ‘Se, elce nunti, lak nyapsutueʼ tenen, moroptuma babye, kum kekenamsine.

³² Anggun kanye talima pum tam arye, ‘Se, nun dana-dana tam unyak nang nirya, sik yuk-yuk yala nang ap, yuk pera mutuku nang ap nirya arye, talye ning yo ap, keil ap, isa ap atibuk, si erelamik touk, nun babye winiptibyeʼ tenen, patapsilyeba, nyanululum ning ara, dipkoprob kum upnamle, nyapsine. Kume, anggun atenepmalumce, wininmalum ning nirya ara, aminyan talak, dipkoprob nong pia kum upnamle. Allah arye nyabuk.

Allah arye, ikin ning delina ap, tonda bikna ap ati, nyabuk yupu

³³ Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.

³⁴ Wini talak ara, anggun Israel nang ara, yuk-yuk mutuku nang noutam ansinibuka ululum bukni, aminyan talak ara, na pia mikip deice arye winipnyeba, anggun nirya bulubuka boyanamsine. Ara, na taruk mikip ap, na yu weik upmanilye deice arye, anggun nirya bulubuka deipsinirye, ila tamubuka bobuka, anggun mutuku koproba yanuka, bulubuka deipnamsine.

³⁵ Winipse ning ara, narye anggun adiparyuk bobuka, ninye ap, mek ap, pia kumak, weik pata mutuku dabinuka deipnamsine. Abobuka delilbinamsin mutuku dana-dana tam ara, yuk yala nang ton daunyake. Winipnamsina deiyok ara ani. Ara, anggun malye weik ulamlum ning yupu bokolin ati, ninye yupu lipsisikuka bokeipnamsine. Ara, pera sukum aryuk kume. Anggun ap, na ap neika bukibirye, urasin dilabirye, narye yupu bokdeipsinirye, anggun malye-malye ulamlum ning nirya ara, lake kipdeipsinirye, wenena ning anggun deice deipnamsine.

³⁶ Aning ara, narye anggun apu yapu nang arye, malye ulamik ning ati, Mesir mutuku dam bukni, ninye kumak, weik pata mutuku ulamik ati, Sinai mutuku noutam, anggun ninye yupu lipsisikuka bokeipsise touk, annggun atibuk, yupu bokdeipsinirye, wenepnamsine. Nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine ati, aning nirya ara, dipkoprob nong upnamle nyapsine.

³⁷ Atalak ara, narye anggunti ara, na mikip deice arye wibuka, yuk-yuk bulupdeipnamsine. Ara, domba basam weina deiyok nang arye, sik kama erebikceba, sik domba basam dam baceba, sik deiyok nang, ‘Aning ara, ‘Naʼ tenen ning, aning ara bobuka opnirye, uku dapnamne. Aning ara, oplopnamne,’ tenelamak touk, narye anggun nirya ati, wenebuka yuk-yuk bokeipnamsine. Tonda, na yupu deice arye, ‘Winipnamlume, winipnamlume. Winibuka winipmunyeura, narye anggunti, winibuka melipnamsine. Ton nang ara, na yupu moubuka kum winipmunyeura, wenepnamsine,’ nyabuka bokeipnamsine. Narye anggun nirya ati, nuknamsine. Winipnyopura, narye nyalamsise yupu, mikip arye, ‘Anggunda, ayupu moubuka kekepmunce, aninguk talebuka wininamlume,’ nyapnamsene. Narye nyapnamsin yupu, moubuka bikmunce, talinamlume.

³⁸ Aning atonun, anggun anang kan-kan nirya arye, na yupu ati, ‘Nun like. Aning kum winipnamabe,’ tenenyak nang ap, na yupu yanibikce yu nang nirya ara, sik ninye asik nang atonun unyak kan-kan arye wibuka, dopnirye, Israel nang unyak mutuku dam deipnamne. Sikce nati, ‘Nun lik,’ tenenyak nang ara, tiya talak ati, na dam deipnamne bukni, sik anang ara, Israel yala nang aminyan talak unamak mutuku noutam ara, pia kum binuka unamake. Anang ara, wenepnirye, yakdonoknamne. Winipnyeura, anggun tuba aunamlum Israel yala nang arye, nati, ‘Se, nun ni Allah ara, dipkoprob Yahweh ulule. Elda dipkoprob tonokaʼ tenen, biknamnulume.

³⁹ Ura, anggun tuba malye-malye ululum Israel yala nang ara, moubuka kekepnululume! Nara Allah Yahweh, aning-aning nirya talibuka, deice tam erebuka Pia Mikip Weik Deiyoknye ununye birye nyapsine. Se, anggun Israel mutuku noutam tuba malye winilulum nango, anggun kanye aryuk. Ara, anggunce tenepmunye touk, ‘Malye-malye winina ap, isa si erena ap, tuba wininamabe,’ teneplum ning ara, dauplye. Anggunda, talye luba kibuka dukdongobuka, aninguk wininamlume! Bukni, na yupu batakmunce, tonap kum kekepmunyeura, tuba-tuba na si yanimunce, na mapu koproba kum unamluma ati, na si tuba malye kum kipdeipnamnulume. Tonda, anggunce isa si erena ati, kam ning obuka, arelyangalalum ning ap, isa si erena ati, patung memebuka delilamlum ning ap arye, ‘Naʼ tenen nang kum unamluma ati, na pia teleb lek si ati, tuba malye-malye nyabuka, malye kum kipdeipnamnulume. Aminyan talak ara, narye anggunti wenebuka opnamsine atia.

⁴⁰ Aning ara, talye kum nyapsine. Deiyok ara, ani. Dipkoprob, ‘Naʼ tenen mutuku, pia teleb lek mutuku deice ara, Israel mutuku kon koproba ara, na mutuku ulula ati, pia lek diamuk teleb mutuku bukukak kon ara, sik Israel yala nang, diksukum unyak nang nirya arye, natibuk si erenamniake. Na amu tamuk ukirye, na piluk dolamnikirye, na siuk erenamniyake. Amutuku noutam ara, narye sik nirya ati, ‘Naʼ tenen nang, ‘Pia unamakʼ tenen, anggunti kanye pia delinamsine. Tonda, anggun arye, ‘Allah el si erenamapʼ tenen talak nirya ara, narye, “Winamlume,” nyapsiniba, anggunce, sik pia teleb aren ning bobuka, na si erena ati arelyanganamnulume. Atonun, anggun arye kam ning obuka, uku dongobuka, arelyanganalum ning ap, anggun kanye aryuk, ‘Allah ati arepnamabe,’ tenepmunce, nati arelyanganamnulum ning nirya ara, narye dopropnamne. Winipnamluma ati ara, narye anggunti, kanye deibuka, ‘Pia teleb tenenamsine.

⁴¹ Narye anggun bobuka, pia teleb sukum deipnamsin talak ara, min talak anggun bai sakuka, yuk-yuk mutuku dana-dana tam, dabinamlum mutuku noutamuk, dobuka boyanamsine. Winipnamsin talak ara, anggunda yata mutuku, im sirya, mutuku sirya nirya noutam arye, yuk-yuk yala nang, kanye wisibuka unamlum noutam arye, anggun dobuka, Israel koproba tam, boyanuka bulupdeipnamsine. Anggun Israel nang nirya bulupdeipsinyeba, unamlum mutuku noutam, akunum umunyeura, na kanye deipnamsine. Winipmanto ara, ninye arye kam ning obuka, uku dabikceba, uku buk arye, meta ap, tup ap, diplyeura, nintong teleb ning welepnirye, ninye nirya kekebikirye, weik tonun kanye deilinyak touk, narye anggunti, kanye deibuka dopropnamsine. Ati, amutuku dana-dana tam unamak nang, yuk yala-yala nirya arye, anggunti eibicopura, biknamake. Ara, ‘Se, Allah el pia teleb ulula ara, anggun anang anggun talima noutam babye, akunum deibuka ati, sikce pia teleb akunum deibuk. Ati, Allah elda pia dipkoprob telebnyeuk ulule. Elda pia teleb leknye ulule,’ tenepnikirye, moubuka biknamniake.

⁴² Tonda, min talak, narye anggun apu yapu nang ati, nyalin yupu deice arye, “Pia teleb mutuku arepnamsine,” nyabuka, nyalin yupu deice kintinyamsise mutuku noutam, akunum boyanuka bulup deipsinyeura, anggun Israel yala ululum nang nirya arye, nati biknamnulume. Ara, ‘Se, nun ni Allah, elda dipkoprob Yahweh ulule,’ tenen, biknamnulume.

⁴³ Amutuku noutam binuka deipsinyeura, daunamlum talak ara, anggun Israel yala nang, min talak pia malye-malye lwiniamlum ning atibuk, tamubuka teninamlume. Tenipnamlum ning ara, anggunda, ‘Se, nunce malye-malye weik winilampu ning ap, isa si erelamupu ning ap, mem ning talibuka malye winilampu deice arye, nun bidamnye atibuk, malye weik kilalamupuba, Allah el dam kum yanmanto ulamupu. Ati nunda, atalak ara, dipkoprob pia malye nang ulamlumpu,’ tenenamlume.

⁴⁴ Bukni, narye na si teleb kilina ati ara, anggun malye winilamlum ning ati biknirye, anggun malye winin ning kum kipsinirye, tuba tamubuka teleb kipdeipsinyopura, anggunce nati, moubuka biknamnulume. Ara, anggunce, ‘Se elda dipkoprob Yahweh ulule,’ tenen, biknamnulume. Anggun pia malye winilamlum ning ap, malye kilalamlum ning ap ati, adiparyuk wenebuka opsilirye, sirya daknamsiting bukni, aning kum winipsise. Na si teleb ulina ati ara, anggunti, akunum biksirye, tuba tonap teleb kipdeipnamsine. Winipsinyeura, anggun Israel yala nang nirya arye, nati moubuka biknamnulume. Ura, anggun Israel mutuku noutam unamlum nang nirya arye, ‘Se akunuma, nun ni koproba Allah Yahweh ara, aning-aning nirya talibuka, deice tam erebuka, Pia Mikip Weik Deiyoknye ululnye birye ulule! El tonok ulule,’ tenepmunce, moubuka biknamnulume. Na Allah Yahweh arye, akunum nyapmasina ati, aning nirya ara, dipkoprob nong upnamle nyapsine. Allah arye Yeheskiel biti, ayupu nirya nyabuk.

⁴⁵ Ura, aminyan talak ara, Allah Yahweh arye, na Yehezkiel dam yanuka nyapnuk yupu ton ani.

⁴⁶ Allah Yahweh arye nyapnuk. Se Yehezkiel anda, ninye sirika arye deipkiknye ulyame. Anda an nong tamubuka iknapye tam, arah selatan dinulyame. Winipmince, sik iknapye tam, arah selatan unyak nang ati, na nyapnukin yupu dobuka, weik yupu deice arye nyapnulyame. Ara, aminyan winipnamle ning ati, lak nyapnulyame. Tonda, mek mitik uamuk mutuku, el si Negeb mutuku noutam unyak nang ati, na wenen yupu bobuka, lak nyapnulyame.

⁴⁷ Amutuku Negeb bai mutuku unyak nang ati nyapnulyame. Ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, nyapsinye yupu moubuka kekepnalume! Moubuka kekepnululume! Ara, narye amutuku noutam uku seknyeba, uku buk pia weika arye dinamle. Uku weik arye dinamle talak ara, amutuku noutam aubuk yo nirya ara uku buk arye dibuka sirya daknamle. Ara, akunum koulubuk yo ap, teleb tuba imbik tikuk yo nirya ara, dinauk unamle. Auku buk, pia mikip weik tonun, tuba-tuba dinamle ning ara, ninye arye pia kum tangapmanto unamle. Apia dinuk ulamlya, uku buk ara, dibuka bokdalirye, amutuku noutam iknapye tam deiyok koubuka, diplirye, dabu tam mutuku outam nirya ara, dinamle. Winiplyeba, amutuku noutam unamak nang nirya ara, sik urasin ara, uku buk arye dipnamle.

⁴⁸ Atalak ara, sik tukwak nang mutuku sirya, im sirya nirya arye eibikirye, bikinamake. Ara, anang nirya arye, nati, ‘Se, Allah Yahweh aryuk, auku ara, elcuk dinipmoe,’ tenepnamake. Tonda, ninye yuk nang arye ton, auku buk dipnamle ning ara, pia kum tangapnamake. Allah arye na Yeheskiel biti, nyapnukba kekepse.

⁴⁹ Nyapnukura, na Yeheskiel birye, ikin kanye bopsirye, narye tamubuka nyapse. “Se, na ni koproba Allah Yahweh, anda aning-aning nirya talipmince, deice tam erebuka, Pia Mikip Weik Deiyoknye ulyamnye, yuk nang arye nati, ‘Se,’ tenepnikirye, nyaninyake. Sikce, ‘Anda aning ara, winibuka nyana ara, meme! El anye Yeheskiel bira, winipmanto yupu deice aryuk, tuba nyasulule! Ayupu deiyok ara, nun kum teneptibye ati, dauplyeʼ nyabuka, nyek-nyek aninyake, na nio. Yeheskiel birye, Allah ati nyabuk.