Yehezkiel 2 - Eipomek

Allah arye, ‘Anye Yehezkiel bira, na yupu laka nyalbinamle’ tenen, yukubuk yupu

¹ Allah el yupu laka nyananye, nabi Yehezkiel birye nyabuk. Allah arye, na Yehezkiel biti nyapnuke. “Se anda ninye arye deipkiknye, anda tikuka kekelaminbuk, narye anti, yupu nyalinamkine,” nyapnuk.

² Ara, Allah arye nati, yupu deiyok koubuka, nyanmanuk talak aniryuk, Allah arye el Dib Kanye arepnukba, na talima noutamak yanuka weknukce, tikeipnuke. Winipnuk talak ara, Allah arye yupu nyapnukba, kekepse. Elce nyapnuk ning ara ani.

³ Anda ninye arye deipkiknye bira, narye wipdeipkina ara, talye ati kume. Israel ninye nirya arye, na yupu yaniptabuka mandipna kanye bobuka, malye weik unyak ninye ati, ‘Sik noutamak ulamince, na yupu dobuka, sikti, peterenalam’ tenen, wipdeipkine. Tonda, minop talak arye diprongobuka, wini talak nirya babye, sik apu yapu arye, na yupu yaniptabuka malye upnin yangalamik touk, wini talak unyak Israel ninye babye, aning atonun tuba wininmake. Narye nyalinye yupu yanibuka wininyake.

⁴ Tonda, dadeipdanin yangalamik ninye babye, wini talak unyak Israel ninye nirya ara, kisok yung kat ubuka unyak ninye anya arye, nati si erebuka kum kininyake. Ati, anti nyalikinye yupu dopropmince aninye ati, peterenalame. Allah el si Yahweh arye, aning nirya talibuka, deice tam ulul Weik Erenanye birye, nyasilye yupu ara, ani. Allah arye tenelul touk, aning-aning nirya talibuka, pil dolule. Allah Yahweh arye wipdeipkuka ati, ‘El yupu peterepnusine,’ nyabuka, peterepra banamlame.

⁵ Anda luba kina kume. Sik Israel ninye nirya ara, kanye kat bonyaka ati ara, na yupu yaniltakanauk unyake. Ati ara, ance peterepra balamin bukni, sikce kekenamkiyak talak babye, an yupu kum kekenamkiyak talak babye atonun, narye melipkinirye, aminyan talak upnamle ning, laka nyan yupu nyapminba, adeice arye, ‘E dipkoprob anye bira, nabi ulule’ tenen, sik kel kipnamkiake. Tonda, ‘Se, dipkoprop, Allah el yupu lak lena deiyoknye, nun noutamakuk ulirye, Allah el yupu nyasulule’ tenen, biknamake.

⁶ Nyabuka nyanamlam bukni, mandipna kanye bobuka, kum kekepkicopura, anda ninye arye deipkiknye ulyama anya arye, sikti, eipmince, ilil una kume. An yupu kekebuka batakica babye, sikce anti, ‘Anda nun like,’ nyabuka, malye yupu nyanamkiyaka babye, ilil una kume. An yupu ati, bisipnamkiyak ninye unyaka atie. Ati sik ulamaka noutamak talye kanye bobuka, na piluk donamlyame. Winipmanto ning ara, ninye ara, sik unyak mutuku ara, tace ning ap, mumundik ninye si tolamle ning ap, ninye on ning aning-aning ap, weik aulula noutamak ulamice talak arye, ilil ulamle touk, anda aning atonun, ilil kum unalame. Aninye ap, ikin ning an nong deice deipnamkiyaka ati, ilil una kume. Pin-pin asa arye kanye deibuka, ilil una kum diparyuk unalame. Luba kilongona kume, sik Israel yala ninye ara, yupu bisipnin yangan ninye unyaka ati nyapkine.

⁷ Ati ara, narye nyapdeipnukin yupu ara, Israel ninye noutamak malye tenebuka, talye mangkau kibuka peterepmin bukni, anang arye kekepnamaka babye, kum kekepnamaka babye, na yupu peterenauk unalame. Aninye ara, kat kanye bokirye, mandipna kanye bobuka, na yupu kekena kum ninye unyaka ati, ance nyanalam yupu ara, kum kekenamkiyake, nyapkine. Aning ara, luba kina kume. Allah arye, Yehezkiel nati nyapnuke.

⁸ Nyabukce, ayupu ton dukgongobuka nyabuk. “Se, ninye arye deiamkiknye, Yehezkiel anda, na Allah arye nyapkin yupu, moubuka kekepnilyame. Israel ninye arye, sik kanye talima erebuka mandipna unyak atonun, anda atonun kum unalame. Kat kanye bona meme. Ninye arye, sik mapu din ning arepnuce talak ara, kanye deibikirye, si akuka minopce dilamak touk, unalame. Ara, narye na yupu nyapkinyopura, na nyapkinye yupu nirya, adiparyuk kekebuka, kanye deipmince, ayupu dopropnamlyame. Tonok ning babye, kum bataknamlyame.” Allah arye, Yehezkiel nati nyapnuke.

⁹ Nyapnuk talak aryuk, narye dinmasibuk, taruk ton na dam donokmok. Ataruk pum bisik ara, mitik buku atonun ning ton, kitibuka bopmuk.

¹⁰ Ara, abuku atonun ning, kitipmok ning ara, na dam akunum deibukopura, narye dipdesibuk dana tam, dana tam nirya, alip tam ap, amu tam ap, nirya sekamik ning diamuk uamuk. Asekna ning deice sekamuk yupu ara, bouku sukubuka weik engenyak yupu ap, ikin upnamle yupu ap, mambul kanye bobuka nyalamak yupu ap, imun kanye bobuka engelamak yupu ap, sekdeiamuk ning upmokak eipse.