Yehezkiel 19 - Eipomek

Ninye dibikceba, mambul kanye bobuka, engena deice arye, mot nyanamake ati, laka nyabuk yupu

¹ Allah Yahweh arye, na Yeheskiel biti nyapnuk. Anda Yeheskiel, Israel mutuku deiyok nang bitinye dipdirika ati, aning tenipmince, engena deice arye nyapnukin mot sekmince nyapnamlume.

² Ara, amot deice arye, amot deice arye nyapnamlume. Se winipmanto ara, anggun Israel nango, anggun capu kil, elda, pia teleb ulamuk. Yuk kilapu nirya ara, mitik teleb bukni, anggun capu kil ara, pia teleb kil ulamuk. Winipmanto ara, bai kam ulamle yu pus, el si singa kus, el mapu teleb kibuka kaleklamle touk, ulamuk. Tonda, asinga kus kil ara, yuk singa kus weike mapmana noutam malamuk. Tonda, elce deiamuk mitik mapu singa kus ara, pia mitik bukni, yuk singa atonun mapu unmana kan-kan noutam arye, el mapu kaleklamukba, teleb kibuka nelamikce, nong weik ubik.

³ Asinga kus, el mi tonok ning ara, pia tuba moubuka, din arebuka weilamukba, nebukce, winiryuk mitik ning ulamukce, mikip weik ubuka ati, elce yuk bai tamak, kam ulamuk ning ton, obuka dina bikamuk. Bikamukce, el lin wisi ulamuk touk, el babye, aning nirya bikuka ulamukce, teleb kibuk. Talye bai tam ulamuk kam ning ton obuka, kum dilamuk. Aninguk kum bukni, tonda elcuk, ninye babye, obuka dilamuk.

⁴ Winibuka ulamuka ati, el ulamuk mutuku dana-dana tam ulamik nang arye, el awinilamuk ning, akunum kekebuka bikikopura, amutuku nang nirya arye, “Se, atam mutuku noutam unyap nang nirya ara, ‘Elce sirya opsilyak’ tenen, “Nun nirya arye, el tomona ati, bulupnamabe,” nyabik. Nyabikce, el tomona ati, tuku pum bisik ton palibuka kintinibika ati, el mangkau kanye bobuka banmokce, atuku pum tam sakukopura, sikce elti, tomobik. Akunum tomobikopura, awel singa kus, adiparyuk tapu deice arye, el nong kitibuka talibikce, tapu koubuka, ‘Bikbik abuka binul’ tenen, el nong tukwak taice ning dongobikce, tapu ap, atalin ning ara, tuba atalebuk touk, bobuka, Israel tam arye batakuka, Mesir mutuku bobinuka, asukumuk deiplobik.

⁵ Asinga kil pus, awel ning el lin birye, ‘Se, na mi ara, dan talak Mesir mutuku tamubuka, nun mutuku koproba, tamubuka yanamle do?’ tenen, dinauk ulamuk bukni, sirya ara, tamubuka kum yayuk talak ara, el lin birye, ‘Se, na mi ara, akunum kum kipnuka atia. Tamubuka, kum yanmanto ulule,’ tenebukce, el tenilamuk ning ara, akunum wangabukce, kum kibuk. Winibukba, el talima daksakukba, malye kanye bobuka ulamuk. Malye kanye bobuka ulamuk bukni, el akil singa kus arye, elce deiamuk singa kus ton, ‘Yuk ning singa mi ton mikip arye nepbukce, el ton biknamle’ tenen, ami ton dobuka, teleb kibuka kaleklamukba, el babye, mikip wel ning ton nebukce, teleb ulamuk.

⁶ Asinga mi ton akunum nebukce, akunum wisi dayukura, el kwitcapu, yuk-yuk singa ap, neika nebik. Winibikopura, mikip akunum ulamik talak ara, sik din ning ati, yuk talye kam ulamuk ning, bai neika eipdanuka, dipnin balamik. Tonda, aninguk kum bukni, amikip weik wel ning ara, ninye babye, obuka dilamuk.

⁷ Ura, pia mikip yim singa kus ara, yu ubukba, yupu weik tonun nyanmok ning ara, anoutam ulamik nang nirya ara, kekebukabikce, ilil weik ulamik. Ara talye ati kuma. Asinga kus arye, amutuku-amutuku noutam nirya ara, ninye arye domik mikip keil asik ara, el si benteng-benteng donyak ning nirya ara, aninye deiyoknye birye, adiparyuk, sik keil arye dolamik aik ulubuka, weik asik akunum uluplobukba, amutuku-amutuku dana-dana tam, mitik tonun asik noutam ulamik nang babye, ‘Se’ tenen, ikin kanye bobuka ulamikba, anye birye, sik mitik asik babye, sirya obuka, ulultaknauk ulamukce, sice bultaklamuk. Ati ara, atam mutuku noutam ulamik nang nirya ara, ilil weik kibuka, sik yok sirem talilamuk.

⁸ Asinga kus ara, yu weik ubukba, malye weik ulamuka ati, amutuku noutam antanapdongobuka, ulamik mutuku nang, dana-dana tam ulamik nang nirya arye, ayu singa kus atonun ulamuk ninye deiyoknye biti, warekuka tomobik. Ara, amutuku-amutuku nang nirya arye, ayu singa kus atonun ulamuknye tomona ati, cang tapu dopkwetebuka tomobik. Winibikopura, ikan youna, el si jaring, pia cang tapu dopkwetebuka, adiparyuk atapu dopkwetebuka, adiparyuk awel singa kus akunum tuku pum tam tomobik.

⁹ Akunum tomobika ati, aning nirya akunum winibikopura, adiparyuk el dobuka singa dongamik pum tam dopkwetebikopura, adiparyuk bobuka, Babel mutuku bobiyikce, Babel mutuku talibuka ninye deiyoknye, Raja dam bobinuka deibik. Abinuka deibikura, sikce, ‘Kume, el yupu nyanamle ning ara, mikip arye kaliklamik. Winilamika deiyok ara ani. Ara, ‘Anye el yupu nyan ning ara, daunyak nang kekebikirye, ‘E, ara dipkoprob yupu nyapmale, tenepnuyak’ tenen, wenen aik pum tamuk, anye tapu koubuka dongobik. Winibika ati ara, sik Israel mutuku noutam, weik mutuku bukuk kon nirya ara, Israel tam nang arye, el yupu ton pia kum kekelamik. Allah arye nyabukba, Yeheskiel birye sekuk.

¹⁰ Allah arye aning akunum nyabukopura, ayupu ton dukdongobuka nyabuk. Ura wini talak ara, yuk domon yupu deice arye nyapnusine. Ara ani. Anggun Israel nang, anggun capu kil ara, anggur tapu winilamuk touk ulamuk. Ara, mitik tonun nemuk bukni, ninye arye, ‘Anggur tapu paplibibirye, aning bobinuka, yuk telebak koupnamap’ tenen, atapu palibikce, bobuka mitik tonun mek pu dobuka, balamuka kup-kup ak, mitik tonun wa ton wibika noutam arye, koubikba tiklamuk. Ura, atapu ara, amek dam koubika ati ara, anggur tapu yo ara, pia teleb kibuka, palamuk taruk uamukce, anggur tapu duk pia moubuka ulamuk. Winibuka pia teleb moulamuka deiyok ara, amek balamuka deice arye, duk teleb kibuka moulamuk. Winilamukba, el taruk ap, duk ap ara, pia weik tonun yamubuka arelamuk.

¹¹ Anggur tapu yo ara, teleb kibuka palamukce, el taruk tonok ning ara, pia cang ap, mikip weik uamuk. Winibuka ati, atalak ara, namin arye cepmanto kum uamuk. Winibuka ulamuka ati, ayo taruk ara, pia ninye deiyoknye, Raja aryuk, ‘Nara amutuku nirya talinuna ati, ayo taruk kat dopropnirye, na teleb kama ati kintinip deipnamak,’ tenebukce doprobuk. Anggur yo taruk tonok pabuka, cang arye tikamuka ara, pia cang weik, mitik taruk ton, weik palamukba, awamuk ning lake ubuka ati, amutuku nang nirya arye elilamik.

¹² Aninye deiyoknye birye, el weik kama talebuka ulamuk bukni, aning anggur tapu nirya ara, Allah el yu weik ubukba, elcuk aning anggur tapu palibuka, tuku pum tam arye, anggur tapu ap, el yating ap welebukce, erebuka tuku deice poubuk. Tuku deice poubuka dopkwetebukba, atalak ara, weik kumanya, keting yangan tam arye, puabuka deice arye, anggur tapu yo deiyok ap, duk pia teleb ning nirya ara, koulubuka, tuku deice sakuk. Winibuk talak ara, anggur tapu yo taruk nirya ap, duk nirya ap ara koulubuk. Winibukopura, anggur tapu yo ap, duk ap, koulubuk ning ara, uku arye yanuka, dibuka sirya dakuk. Allah arye, Yeheskiel biti nyabuk.

¹³ Nyabukba, Yeheskiel birye, dukdongobuka, sik Israel nang ati nyabuk. Wini talak babye, aning atonun, tonda aning anggur tapu yo ara, tuba tonap akunum welebukce, mek pia kum balamuk sukum ara, padan gurun noutam akunum koubukba, aulule. Ara, keil wininga pasir ap, tonda tuku pia kel-kel alamlak ton, Allah arye atonun, akunum kouamuk. Amutuku noutam ara, ninye nirya arye, pia mek patanauk ulule.

¹⁴ Tonda, uku arye anggur tapu dilamuk talak ara, anggur tapu yo noutam arye, deiyok koubuka, uku arye dilamukce, sirya daklamuk. Winilamuk talak ara, anggur tapu deiyok ap, noutam ap, taruk ap, duk nirya ara, uku arye dibuka sirya dakuk. Winibuka ati ara, wini talak ara, sik ninye deiyok nang arye, teleb kama ton, kum memebuka taliptinge. Ara, teleb kat yo arye, kama memeptingba, Raja arye taliptu ura, ninye eibikirye, ‘E, el Rajanye bira, weik pala mutuku talilula ati, el kerajaan talibuka, ulul ning bikilina ati, akama dopmala atia,’ kum nyapnamake. Deiyok nang arye, sik kama bobana ati, kama ton kum memepmanto unyake. Ati ara, nyapmasin yupu nirya ara, amutuku noutam ululum Israel nang nirya arye, ninye dibice talak engelamlum touk, wini talak babye, engena ap, ikin kanye bobuka una deice arye, kanye ikin mot, pia tuba-tuba nyanamlume. Yeheskiel birye, sik Israel nang ati, nyabuk.