Yehezkiel 18 - Eipomek

“Diksukumuk ubuka, malye ton kum unyak ninye ara, kam unamak bukni, malyeuk wininyak nang ara, dipnamake,” nyabuk yupu

¹ Ara, Allah el si Yahweh arye, na Yehezkiel biti nyapnuke.

² Sik Israel yala ninye ara, sik mining yala nang ati tenebikirye, yata ati, sikce tuba-tuba adomon yupu nyanyak do? Minop talak arye diprongobuka, wini babye tuba nyanyak domon yupu ara, ani. ‘Sik ni yapu wisi nang ara, anggur tapu duk yung ning dibikcopura, aminyan talak ara, sikce deibikiba, dadeipdanin bakirye, unamak mapu babye, sik si bam bol pum bisik ara, matang tuba lenamle,’ nyanyake. Yata deiyok ati adomon yupu tuba nyanyak do?

³ Ati ara, na Allah tuba kamuk ununye anya arye, nara Allah Yahweh unune. Aning-aning talibuka deice tam, Pia Mikip Weik Erenanye unune. Unirye, na tenepnye touk wininune. Ati, narye nyalinamkin yupu ara, dipkoprob nong upnamle. Minop talak nyalamik domon yupu ara, anggun wini talak ululum Israel ninye arye, tuba kum nyanamlulume, nyapsine.

⁴ Dipkoprop na nyasinye yupu ara, moubuka kekepmunce, biklulume. Ninye nong ap, ninye kam una ap nirya ara, narye tenenun ninguk unyake. Wisi nang babye, sikce deipmakce mapu, mitik mapu nirya babye, ‘Naʼ tenen, ninguk unyake. Tonda, malye upmace ninye tonok ara, dipnamake. Yuk ninye ton kume.

⁵ Dipkoprop nyapsine. Yatanye do nirya, ninye tonoknye birye, dipkoprob pia diksukumuk ululnye bira, na Allah arye, ‘Aning wininamlulume. Aning ara, pia kum wininamlume,’ nyanye yupu ap, pia teleb ubuka un ninguk, wininlulnye bira, kam unamle.

⁶ Aning atonun ning winilulnye bira, el winilul ning ara, ani. Diksukum ululnye bira, Isa Mutuku Dongonye si erenmakirye opmace basam tup kum talilule. Tonda, amutuku unyak Israel ninye arye, ‘Nun ni yapu ukirye melinamsiyak’ tenen, si erenyak isa ap, ninye urasin atonun ubuka memebikirye, si erenyak ning ap ati, el asing kum dililirye, ‘Aning ara, nati melinamnile,’ kum tenelule. Tonda, anye bira, yuk nang, sik domikce kilapu ati, yupu moupdeibuka, ‘Na ap mapnamaname,’ nyabuka, malye kum ulilule. Tonda, yuk kilapu babye, el domlye kil babye, ining balamlye talak, sik dam kum balule. Atonye bira, teleb un ninguk ulule, nyapne.

⁷ Tonda yuk nang arye, el yo bok do, yuk ning do, tia talak ati doprobikirye, dabolamica talak ara, elce sik nong deice, ikin ning ton kum delilule. Yuk nang ati, ikin pil kum dilule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniak ca, tenepnamsil’ tenen, el bona ning pununa ati, areamikce ning ara, ateleb ululnye birye, ubula kum dololule. Sikce el ning tia talak ati dopromice ning, tamubuka arebicopura, elce sik ning tia talak ati, dadeiamlye ning dobuka, adiparyuk tamubuka arelule. Tonda, ateleb ululnye bira, yuk nang ning, talye ubula kum dololule. Tonda, yuk nang din patapliba, elce melibuka arelule. Yuk nang ton, baju kum ati, nong banang ulamice ninye ati, melibuka arelule. Atonye bira, pia telebnye ulule.

⁸ Tonda, teleb ululnye birye, yuk ninye sik patana ati, uang yo bok areplye talak ara, elce aning kum laka nyalule. “Na yo bok dopropmunce, nati tamubuka min kum arepmanumunye talak noutamak ara, uang yo bok ton, tabakuka nyapnamasin touk, yo bok ton tabakuka arepnamnulume. Anggunce, na ning dopromnumunye ninguk kume. Nara, weik tonap dolona ati, weik tabakalona ati, uang yo bok ton tabakuka, weik arye arenamnulume,” pia kum nyalule. Tonda, anye birye, ‘Malye un ning winipnyak’ tenen, kalikdalirye, malye kum ulule. Atonun anye birye, yupu bokolina deiyoknye ulul talak ara, ton tam nang arye, ton tam nang ati, “Winibuka malye upmasiyake,” nyabice ning ara, moubuka kekeplirye, dipkoprob yupu uk, sikti, lipsisikuka bokolilule. Tilila yupu nyana kumce, teleb yupu uk, nyalule.

⁹ Tonda, na Allah arye, sik Israel ninye ati, ‘Aning ara, wininamlulume. Aning ara, pia kum wininamlume,’ nyapdeiamse yupu ara, moubuka kekelule. Narye nyanun yupu nirya ara, moubuka tenelirye, talibuka pil dolule. Tonok ning babye, kum batakalule. Elce, ‘Winipnamne,’ nyalul touk, aninguk dipkoprob winilule. Tenepce arye tilila yupu ton, kum nyalule. Ato winilulnye bira, dipkoprob kam pia unamle, nyapsine. Allah Yahweh arye aning-aning nirya talibuka, deice tam Weik Erena Deiyoknye ulirye, ‘Winipnamne,’ tenelul touk, winilulnye birye nyabuk.

¹⁰ Bukni, tonoknye birye deipnamle mi tonok ara, ninye yupu kekena kum uplirye, yupu bisibuka ninye opliba, sik ining balyopura, amalye uplinya bira, dipkoprob dipnamlarya nyapne.

¹¹ Anye birye, malye ulul ning ara, ani. Diksukum kum winilul bukni, elda, isa si erekirye, opmace basam tup dilule. Tonda elce aisa ati, ‘Na ni yapu unyakce melinamniyak’ tenen, aisa si erelule. Tonda, anye birye yuk nang, sik domikce kilapu ati, yupu moupdeibuka, ‘Na ap maptininye,’ nyabuka, akil yoplyopura, malye ulilule. Atonye bira, el li teleb ulamlinye mi bukni, el tonok ara, malyeuk ulule, nyapne.

¹² Tonda, yuk bona utotoa talina kum nang arye, anye bira el yo bok do, yuk ning do, tia talak ati doprobikirye, sik patan ning dekuka doprobikirye, dabolamica talak ara, elce sik nong deice, ikin ning weik delilule. Tonda yuk nang ati, ikin pil arukulule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniakce, tenepnamsil’ tenen, el ning dekna pununa ati, areamice ning ara, amalye ululnye birye, ubula dololule. Sikce el ning, tia talak ati dopromice ning, tuba tamubuka arebicopura, elce sik ning tamubuka kum arelule. Tonda, amalye ululnye bira, yuk nang, sik ning talye ubula dololule. Tonda, yuk nang din patana ap, baju kum ati, nong banang una ap, ulamice talak ara, elce melibuka kum arelule. Tonda, anye birye, amutuku unyak Israel ninye arye, Isa Mutuku Dongonye si erebikirye, ‘Nun ni yapu ukirye, melinamsiyak’ tenen, aisa urasin atonun ubuka memamice ning ati, el asing dilamlirye, ‘Aning ara, nati melinamnile,’ tenelule. Atonye bira, pia malye weik ulule. Ati, na Allah arye, ‘Aning ara, na pia like,’ tenenun ninguk, winilule.

¹³ Tonda, amalye winilulnye birye, yuk ninye sik patana ati, uang yo bok areplye talak ara, elce ayupu uk, nyalule. “Na uang yo bok dopropmunce, nati tamubuka, min kum arepmanumunye talak noutamak ara, ‘Yo bok ton tabakuka arepnamnulume,’ nyapnamsin touk, uang yo bok tonap tabakuka, weik arye arepnamnulume. Anggunce na yo bok dopropnulum touk kume. Nara, weik arye tonap tabakuka dolona ati, weik arye arenamnulume,” nyalule. Aning ati ara, amalye wininanye kam pia unamle do? Kume, dipkoprob kam pia kum unamle. Na Allah arye, ‘Aning nirya ara, na pia like,’ tenenune. ‘Aning nirya ara, pia malye,’ tenenirye, anggunti, ‘Winina meme,’ nyapdeiamsise ning ara, elce talye mangkau kibuka winilula anya arye, anye bira dipkoprob wenebuka opnyopura, dipnamlarya. Diplyopura, el ining ara, el kisok deice upnamle. El ining ara, el bidamnye nong deiceuk paleplirye banamle. El malye ulula deice arye, wenebuka opnamna anya arye, el dipna deiyok ara, el bidamnye arya.

¹⁴ Tonda, winipmanto ning ton, nyapnusine. Yatanye do nirya, el li yapu arye, malye ulamik ning, kel biklirye, moubuka teniplyopura, ‘Kume, amalye winin ning nirya ara, na dipkoprob kum wininamne,’ teneplirye, diksukumuk winilyopura, anye bira dipkoprop, kam pia unamle.

¹⁵ Atonye birye, diksukumuk ulula anya arye, elda, Isa Mutuku Dongonye si erebikirye, opmace basam tup kum dilule. Tonda, elce amutuku unyak Israel ninye arye, ‘Nun ni yapu unyakce, melinamsiyak’ tenen, si erenyak Isa Mutuku Dongonye ap, aisa urasin atonun memelinyak ning ap ati, el asing kum dilirye, ‘Aning ara, nati melinamnile’ tenen, diba kum tenelule. Tonda, anye birye, yuk nang sik domikce kilapu ati, yupu moupdeiplirye, ‘Na ap mapnamaname,’ nyabuka, malye kum ulilule. Atonye bira, pia telebuk ulule, nyapne.

¹⁶ Tonda, anye birye yuk ninye nirya ati, malye kum ulilule. Atonun, yuk nang arye, el uang yo bok do, yuk ning do, tia talak ati doprobikirye, dabolamica talak ara, elce sikti, ayupu kum nyalule. “Aminyan talak, ‘Dipkoprop aning tamubuka arepnamniak’ tenen, na ning dekna pununa ati, anggun mambul ning arepnululume. Kumopura, na ning tia ati, kum doproptume.” Aning kum nyalul bukni, sik ning dolona kum diparyuk, yuk nang sik patan ning ati, talye mangkau kibuka melilule. Ateleb ululnye birye, ubula kum dololule. Tonda, yuk nang din patapliba, elce melibuka arelule. Yuk nang ara, baju kum ati, nong banang ulamice ninye ati, melibuka arelule. Atonye bira, teleb winilulnye ulule nyapne.

¹⁷ Tonda, ateleb ululnye birye, ‘Malye ton winipnyak’ tenen, pia moubuka kalikdalirye, malye ning tonok ning babye, kum winilule. Tonda, yuk ninye, sik patana ati, uang yo bok areplye talak ara, elce aning kum nyalule. “Na yo bok dopropmunce, nati tamubuka, min kum arepmanumunye talak noutamak ara, ‘Yo bok tonap tabakuka arepnamnulume,’ nyapnamsin touk, uang yo bok ton, tabakuka arepnamnulume. Anggunce na ning dopropnulum ning atonun kume. Nara, uang yo bok, weik arye tonap tabakuka arenamnulume,” pia kum nyalule. Tonda, na Allah arye, anggun Israel ninye ati, ‘Aning ara, wininamlulume. Aning ara, pia kum wininamlume,’ nyapdeiamsise yupu ara, moubuka kekelulume. Narye nyanun yupu nirya ara, moubuka tenemunce, talibuka pil dolulume. Tonok ning babye, kum batakalulume. Ato ululnye bira, el li yapu arye, malye ulamika deiyok ati ara, dipkoprob kum wenepnamna anya arye, kum dipnamle. Elda dipkoprob kam pia unamle. Ati ara, anggun babye, atonun winibuka wininamlulume.

¹⁸ Bukni, yatanye do ninye nirya, el li koprop arye, tilila yupu nyalamuk ning ap, yuk nang ikin ulamik talak, sik yo bok tabakuka, ubula arye dololamuk ning ap, el kayapu nang, sik ning ubula dololamuk ning ap, el yala ninye noutamak, yuk malye winin ning, ayala-yala nirya, winilamuk ning nirya ap ati ara, adeiyok ati dipnamlarya. Anye bira, elcuk malye ulamlya deice arye, wenebuka opnyopura, dipnamlarya. Ara, urdem ati kume. Deiyok ara, el malye winilamuka atia. Na Allah arye nyapsine, nyabuk.

¹⁹ Narye nyapsine. Sik malye unyak nang ara, sik malye unyaka deice aryuk dipnamake. Bukni, anggun Israel ninye arye, nati nyanululum ning ara, yuke. Anggunce nyanululume. ‘Malye ulamlinye birye, el mi deiplyopura, el li biti wenenamle touk, elce deiplye mi babye, wenepnamlyame,’ nyanululume. Bukni, na Allah arye, aning atonun kum nyasunune. Yatanye do nirya, diksukumuk uplirye, na Allah arye sikti, ‘Aning wininamlulume. Aning ara, pia kum wininamlume,’ nyapdeiamse yupu, moubuka kekeplirye, teleb ulyopura, anye bira dipkoprob kam pia unamle. Deiyok ara, elda el li koprop, malye winilamuk touk, kum winilule. Malye winilamlinye birye, el mi deiplyopura, el mi ara, malye ning winina kumce, diksukum koprop ninguk winilula deice arye, kam pia unamle, nyapsine.

²⁰ Bukni, yatanye do nirya, ninye ton malye winin ninguk, weik winiplinye bira, wenebuka opnyopura, dipnauk upnamle. Tonda, sik ni yapu ap, sik nin yapu ap, malye winilamikibuk, sik mapu teleb winilamicopura, sik ni yapu ap, sik nin yapu ap, mince malye winilamikce ning ati, sik mapu ara, kum wenepnamne. Winipniba, sik kum dipnamake. Atouk, yatanye do, yata kil do, sikce deibice mapu, malye winibicopura, amalye winina dekna ati, sik ni yapu ap, sik nin yapu ap ati, kum wenepnamne. Sik mapu malye wininyak ning ati ara, sik ni ap, sik nin ap ara, kum dipnamake. Aning kum bukni, narye dipkoprob nyapsine. Diksukumuk wininamak nang ara, sik teleb un ning, sik deiceuk unamle. Atouk, malyeuk wininyak nang ara, sik malye wininyak ning ara, sik deiceuk unamle. Ninye nirya winilamikce touk, eipnirye, yupu lipsisikuka bokeipnamsine. Na Allah arye nyapne.

²¹ Bukni, sik malyeuk unyak nang arye, ‘Se aning ara, malye ulula ati, bataknuyap’ tenen, bikikirye, sik malye winin ning batakikirye, diksukumuk winibicopura, kam pia unamake. Ara, na Allah arye nyapdeiamsise touk, ‘Aning wininamlulume. Aning ara, pia kum wininamlulume’ nyabuka, nyapdeiamse yupu talibikirye, dipkoprob teleb winin ninguk, winibicopura, aning ara, na eipnirye, yupu bokeipnamsine. Malye winilamik ning batakikce, diksukumuk wininyak ninye ara, kum wenepnamne. Sikda kam pia unamake.

²² Min yuma arye, malye ning ayala-ayala nirya winilamik ning, batakikirye, diksukumuk winibicopura, min arye malye winilamik ning deice ati, yupu lipsisikuka kum bokeipnamne. Sik malye ning, akunum dipkoprob batakikcopura, aning tuba kum tenenamne. Aning kum bukni, sik diksukumuk wininamaka deice arye, kam pia unamake.

²³ Tonda, el malye ninguk winilamlye, adiparyuk diplirye biti, na Allah arye kanye deilinun do? Kume, malye wininyak ninye dibicopura, na kanye kum delinune. Aning ara, ‘Se sik bicoe,’ tenenune. Kume, narye tenenun ara, ani. ‘Sik malye unyak ninye nirya ara, sik malye ning bataktingce, dipkoprob pia diksukumuk ubicopura, kam ulamtinge,’ tenenune. Nara Allah Yahweh, aning-aning nirya talibuka, deice tam Pia Mikip Weik, Erena Deiyoknye unirye, ‘Winipnamne,’ tenepnye touk wininuna anya arye, na nyanye yupu, nong dipkoprob ulule. Nara, Weik Erenanye birye nyapsine.

²⁴ Bukni, ninye ton teleb ninguk, winipnin balamlya ani, aminyan talak ara, aning nirya batakuka, malyeuk uplyopura, kam pia unamle do? Kume, elce diksukum ninguk, winilamlye bukni, aning nirya bataklirye, elda pia malye-malyeuk, unyak ninye winilamak touk, pia winiplinye bira, dipkoprob kam unamle do? Kume, elda kam kum unamle. Teleb ulamlye bukni, tuba tamubuka, malye winin ninguk, deiyok kouplirye, tabakuka weik arye, malye upnin balyopura, min arye teleb winilamuk ning ara, tuba kum tenenamne. Aning kum bukni, malye-malye un ning, yala-yala weik winipnin balye ning ap, nati, ‘Se, na ni koproba, an amu tamuk, pia unamkine,’ nyapnuk bukni, bataknilye ning ap ati, wenebuka opnyopura, dipnamle.

²⁵ Aning-aning nirya ara, laka nyapmasinba, anggunce nati, ‘Se, Allah arye winisilye ning ap, yupu bokolisulul ning ap ara, dipsukum kum winilula ati ara, nun like,’ nyanululume. Winibuka nyanululum bukni, anggun Israel yala ninye ati, narye nyapsine. Nara, malye winin ning tonok babye, kum wininune. Diksukumuk wininune. Ati, malye winilulum ninye ara, anggun atia! Se, anggun Israel ninye ara, yuk nang ati, diksukum ubuka, yupu kum bokolilulume.

²⁶ Arup arye akunum nyapmasin touk, ninye ton teleb ubuka ululnye bukni, aning batakuka, tuba tamubuka, malye winin ninguk talibuka ulyopura, adeice arye dipnamle. Ara, urdem ati kume. Deiyok ara, tuba malye un ninguk winilula anya arye, adiparyuk dipnamle, nyapsine.

²⁷ Bukni, ninye ton malye winilamlye bukni, aning batakuka tuba tamubuka, ‘Se, na malye wininuna ara, batakneba, Allah arye lyepnutue’ tenen, el malye winin ning batakuka, dib teneplirye, diksukumuk winilyopura, el nong, el dib kanye nirya, teleb ubuka, pia kamuk unamle.

²⁸ Ara, urdem ati kum nyapsine. Deiyok ara, el malye winilamlye ning nirya bataklirye, dib teneplyopura, yuk talak babye, pia diksukumuk wininamle anya arye, anye bira, kum dipnamle. El malye winin ning batakuka, teleb winin ninguk, wininamle deice arye, kam pia unamle.

²⁹ Aning nirya ara, narye anggun Israel ninye ati, laka nyasunun bukni, anggun Israel yala nang arye, nati nyanululume. ‘Se, Allah arye nyasulul yupu ap, yupu bokolisulul ning ap ara, nun like. Aning ara, diksukum una kume, tenenyabe,’ nyabuka, malye nyanululume. Nyanululum bukni, narye nyapsine. Nara, malye winin ning, tonok ning babye kum wininune. Pia diksukumuk wininune. Malye ululum ninye ara, anggun atia! Se, anggun Israel ninye ara, yuk nang ati, diksukum ubuka, yupu kum bokolilulume.

³⁰ Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine.

³¹ Ati ara, se anggun Israel yala nango. Anggun malye winimunye ning nirya batakmunce, ‘Allah arye, nun kanye ap, talima ap, winiryuk ning arepsutue’ tenen, nati moronamnulume. Winibuka morolamnumunyopura, winiryuk kanye ap, talima ap, punubuka arepsinyopura, kam pia uptume. Kumopura, yata deiyok ati, ‘Dauaple, nun dipna babye, teleb uka,’ tenelulum do? Anggun Israel yala ninye, dipna ara, na like, nyapsine.

³² Ayupu nyapmasina ara, urdem ati kume. Nara, Allah Yahweh, aning-aning nirya tenepnye touk wininune. Nara, Pia Mikip Weik Erena Deiyoknye unirye, ‘Winipnamne,’ tenepnye touk, wininune anya arye, narye nyapsine. Yatanye do, yata kil do? Tukwak mutuku ninye malye ulamice ati, wenebuka opneba, dibicopura, aning ati na kanye kum delinune. Aning ara, na like. Teleb ning ara, tukwak ninye nirya arye, sik malye wininyak ning bataktingirye, diksukumuk winitingopura, kam pia unamtinge. Aning atouk, anggun Israel ninye babye, anggun malye winimunye ning batakmunce, diksukumuk winimunyopura, kum dipnamlume. Kam pia unamlume. Na Allah Yahweh, im deice tam uninye, aning-aning nirya tenepnye touk wininune. Nara, Pia Mikip Weik Erena Deiyoknye birye, ayupu nyapdeipsine.