Yehezkiel 17 - Eipomek

Allah arye, anggur tapu yo ap, Rajawali maka yala-yala ap nirya ati, winipmanto nyabuk yupu

¹ Allah Yahweh arye, na Yeheskiel dam yanuka nyapnuk.

² “Se, Yeheskiel anda ninye koproba aryuk, deipkiknye ulyame. Narye nyakinyeba, ance sik Israel mutuku noutam unyak nang nirya ati, domon yupu deice arye nyalbinamlame. Ara, talye nang arye, ‘Deiyok ani,’ tenen, talye luba kibuka, kum nyating yupu ap, tonda, mambul deiyok yupu lak nyan ning ap, lak nyalbinamlame. Ara, narye ayupu, winipmanto yupu nyapdeipkiniba, ancuk anang ati, nyalbinamlyame.

³ Ati, narye nyapnukin yupu ara, ani. Nara Allah Yahweh, aning-aning nirya talibuka, deice tam erebuka, pia mikip weiknye unirye, anggun nirya ati, ayupu nyapdeipsine. Aning ara, ani. Weik maka yala tonok, el si Rajawali maka ara, pia weik deiyok maka ulule. El potong ara, pia teleb ubuk maka ap, tonda el pol ara, weik pala ap, weik cang arye mikip ulule. Amaka, el pol ara, warna-warna weik, urasin pia teleb ning ulule. Amaka ara, lakuka banmoka ani, Libanon mutuku kon lakuka bulbiyuk. Libanon mutuku kon lakuka bulbinmoka ani, amutuku kon arye, weik cang keipyal yo deice binuka, tonok yo taruk ton, pia teleb ning sekdobuk.

⁴ Ura, Rajawali maka akunum keipyal yo taruk deice tam ning sekdobukopura, adiparyuk amutuku noutam ulamik nang arye, bona deibuka deililamikak bobuka boyayuk. Aweik asik domikak ara, dekna kel nang weik ulamike.

⁵ Ayo taruk asukumuk deibukopura, amutuku noutam ulamik nang, sikce winibuk koulamik yo taruk ton doprobuk. ‘Rajawali maka arye, aning winiryuk yo koupnamle’ tenen, akunum kintinip deiamukak yanuka, winiryuk yo koubuk. Ara, pia tuku teleb uamukak yanuka koubuk. Akoubukak ara, mek ton pia cena kume, banauk ulamuk.

⁶ Ayo taruk sekuka koubuk ning ara, anggur tapu kibukce, tukwak amu tam papnarye, asukumuk tikuk bukni, cang kume. Bumang tikukce, amutuku nirya, el tapu ara, weik tonun bilikuka biyuk. Akoubuk anggur tapu taruk ara, akunum tonok ning ara, el bok ara, Rajawali maka dam eitam welebuka tikuk. Tonda, el yating pulpula nirya babye, tuku noutam mikip arye wekukce, talibuk. Anggur tapu akunum pabukura, el taruk nirya winiryuk ninguk kibuk.

⁷ Aning akunum winibuk talak ara, ton yuk Raja wali maka ton, el pol pala weik maka ap, tonda el nong potong ara, pia bukam weik uamuk maka yayuk. Winibuka yayukopura, atalak akouamuk anggur tapu yating pulpula ap, el taruk ap, winiryuk yayuk Rajawali maka dam biyuk. Ara, ‘Amaka arye, mek kwebuka, dikilongonamnil’ tenen, kintinip deibuk. Min Raja wali maka arye, atapu koubuka, wa win dam arye, atapu bobuka, yuk wa win dam koubuk.

⁸ Rajawali maka arye, anggur tapu yo bobuka, tuku pia teleb sukum tuku dam ap, teleb balamuk mek ap, uamukak binuka, koubuka deiyok, ara, ‘Anggur tapu arye, el taruk ap, tapu ap, el yo bok ap, el duk moupnamle ning ap, pia teleb unamle’ tenen, tuku teleb sukum koubuk. Tonda, ‘El duk ara, pia teleb kibuka, tuba-tuba mounauk unamle’ tenen, anggur tapu bobuka, tuku ap, mek ap, uamukak koubuk. Allah arye, na Yeheskiel biti, nyapnuke.

⁹ Nyabukopura, ayupu dukdongobuka nyapnuk. Ati, nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, asipdekine. Tenipdenulyame. Akoubuk anggur tapu ara, pia kam ubukce, weik uptu do, kum do? Aning kumopura, min talak yanamuk Rajawali maka arye, ayo el yating pulpula nirya, kum ubuk do? Aning atonun, winipnutu ura, anggur duk babye, kum sesal sepnamle do? 12 Tonda aning atonun, el tapu taruk koproba babye, kum cebuka batakukbuk, yalakukce, kum koulubuk do? Atalak ara, anggur tapu yating kwinina ati ara, ninye mikip nang ton, kum pataptue. Tonda, pia mikip yin talin nang ton, kum pataptue. Talye diparyuk, el yating pulpula kwinibuka bataktinge.

¹⁰ Tonda, tenipdenamlulume. Ara, Rajawali maka bitinye ning arye, anggur tapu kwinibuka, yuk wa win dam kouplyopura, asukumuk dipkoprob, el yating pulpula arye, tuku pum tam weklirye talibuka, mikip upnamle do? Teleb kipdeiplirye, adiparyuk kam upturye, pabuka weik upnamle do, kum do? Tonda, dabu tam arye, weik keting deibuka, buppu arye koululamle touk do? Atapu kum daksaktu do? Kume, anggur tapu, koubikak aryuk, adiparyuk koulubuka kum datue. Aning nirya ara, anggun walwal bukni, na Allah arye, bikinune.

Allah arye, Rajawali maka ap, anggur tapu ap ati, winipmanto nyabuk ning ara, deiyok lak nyan ati, nyabuk yupu

¹¹ Allah Yahweh arye, na Yeheskiel dam yanuka, nati lak nyapnuke.

¹² Ara ani. Ance sik Israel yala nang ati nyapnulyame. Sikda nati, diba tenena kumce, talye luba kibuka, malye-malye ukirye, nati yaniltaninyak nang ati, asipdelyame. Ara, anggun aululum nang nirya arye, dipkoprob awinipmanto yupu nyapmasin yupu nirya ara, ‘E, ayupu deiyok noutam ning ara, ani’ tenen, akunum tenibuka bikilulum do, kum do?’ nyabuka asipdenulyame. Winibuka nyapmince, anang nirya ati, lak nyaplyame. Ara, Babel mutuku talibuka, weik deiyoknye Raja Babel bira, akunum Yerusalem mutuku yanamukce, anggunti obuka sirya dakuk. Winibuk ning ara, Yehuda tam nirya, Israel yala nang deiyok kibuka, talibuka ulamuk Rajanye ap, el amu tam pil dolamika deiyok nang nirya ap, adiparyuk tapu koubuka, anang bobuka, el mutuku, Babel mutuku tamubuka bobiyuk.

¹³ Winibuk bukni, tonda elcuk Yehuda tam ulamik nang arye deibikba, dadeipdanin yangalamika yanuka, deibiknye tonok ton, kam tuba ulamoknye dobuka, ‘Amutuku talibuka ninye deiyoknye unamle’ tenen, wipdeibuk. Winibuk ning ara, elce anye biti, “Dengna, ance nati, ‘Na ni, an yupu kekenamkine,’ nyapniminyeura, narye nyapdeipnamsin ning nirya ara, adiparyuk aninguk winipnamlume. Yuk ning ton kume,” nyabuka, ninye deiyok kin ning arebukce, erepdeibuk. Winibukce el adiparyuk, “Wininamlume,” nyapdeibuk. Winibukopura, el anye Zedekia birye, “Deiyok, aning ara winipnamne,” nyabuka, sik bitinye arye, nyalin yupu nyapdarik. Raja Babel birye, ayupu nyapdarik talak ara, elce sik Israel yala nang taleamik deiyok nang ap, weik nang ap, kel bikna nang ap, akunum tapu koubuka, doprobukce bobiyuk.

¹⁴ Amutuku deiyok nang nirya ap, kel bikna nang ap, bobiyuk deiyok ara, ‘Amutuku nang kanye arye mikip bokirye, na yupu yanibuka, na pil ton kum dopnamniak’ tenen, ubuk. Tonda, ‘Na yupu kekebuka, na amu tamuk, pia unamake. Na yupu moubuka kekebikirye, tunim abuka ubicopura, kam tuba unamak’ tenen, winibuk.

¹⁵ Raja Babelnye birye, winibuk bukni, Israel tam, ara, utara tam arye erepdeibuk ninye deiyoknye, el si Zedekia, sik bitinye arye, nyapdarikce, nyalin yupu ning ara, moubuka kum talibukce, batakuk. Batakukce, ‘Winipnamabe,’ tenebukce, wibuka dopdeibuk nang arye, Mesir mutuku morolbiyik. Aning deiyok ara, ‘Mesir mutuku nang deiyok Raja birye, el mutuku kuda basam ap, yin talin nang, pia weik tonun arepnutuba, anang melipnetingce, nun neika kipdobibyeura, Babel mutuku nang ati, batakuka optibye’ tenen, ubuk. Winibuk bukni, anggun ton tenipdelulume! Israel tam deiyoknye birye, awinibuk ning ara, dipkoprob nong upnamle do, kum do? Tonda, yata nang do nirya, sik deice tam weik deiyok unyak nang ati, batakikirye, sik yupu yanibikirye, ‘Nun talisinyak nang opnabe’ tenen, adeiyok nang ati, warikuka kintinibikceura, el mal olan nang nirya ara, ato ning eibikirye, talye biknamaka do, kum do? Tonda, sikce nyalin yupu nyapdarik ning nirya ara, batakikirye, bai sakuka bindoptinga babye, kam tuba unamak do? Sik talinyak deiyok nang arye, yanuka obikirye, sirya daknamak do? Akunum winipnamak do? Aning ara, pia kume. Anye birye, sik nyalina yupu deice arye nyapdarik ning yaniptoura, el talilula weik deiyoknye birye, yanuka weik wenen ninguk arepnamle!

¹⁶ Na Allah arye nyapsine. Dipkoprob, nara pia kam una deiyoknye ununa ati, narye nyapsinye yupu ara, ‘Pia dipkoprob,’ kitininamlume. Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unirye, nyapsina ati, na nyapne yupu ara, dipkoprob upnamle! Ara, ninye deiyoknye Raja Yudea, elda Babel mutuku noutam dipkoprob dipnamle! Aning deiyok ara, ani. Babel mutuku ninye deiyoknye, Raja birye, anye erebuka, ‘Ninye deiyoknye kibuka, amutuku tia talak talipnamle’ tenen, erepdeibuka bindobuk bukni, Yudea tamnye bira, sik bitinye nyalin yupu nyapdarik ning ara, akunum batakuka ati, aminyan talak ninye deiyoknye Raja Babel bira, anye bobinuka deiplyeura, daunmalya ani, aminyan talak Babel mutuku noutam dadipnamle!

¹⁷ Ura, Yudea tam tia talak talibuknye ninye dopdeibukba, sikce Mesir mutuku talibuka, ninye deiyoknye Raja Firaun dam, elti, ‘Meliplulume!’ nyabuka, bina moropting bukni, Firaun ap, el yin talin nang ap, yupa pia weik tonun uptinga babye, Yudea tam nang ati, yanuka kum melipnamake. Aning kum bukni, Babel mutuku ninye deiyoknye Raja ap, el yin talin nang arye, ‘Yudea mutuku nang nirya bobinamap’ tenen, yakirye, Yudea tam weik asik Yerusalem mutuku warikuka opnamak talak ara, Firaun ap, el tam nang arye yanuka, kum melipnamake. Babel tam nang arye, ‘Anyansik-anyasik nirya ulubuka, sirya dakipyak arye, amutuku nang nirya opnamap’ tenen, Yerusalem mutuku dana-dana antanap dongobuka, domik cang keil poka dam yanuka, sikce, ‘Apoka dam tuku palibuka deibibirye, aning deice welebuka, anyasik weknamap’ tenen, pil dopnamak talak ara, tonda, ‘Cang keil poka deice tam mal bisikabibyeba, amutuku nang opnamap’ tenen, cang aik ton dopnamak talak ara, sik Mesir mutuku nang arye yanuka, Yudea tam nang ati, kum melipnamake.

¹⁸ Kume, Yudea tam taleamuk deiyoknye bira, bai sakuka, bendopturye, kum lyepdatue! Aning deiyok ara, elce, “Na si deice nyapkine,” nyapdeiamuk yupu nirya, tonda, “Aning ara, winipnaname, winipnemnyopura, narye an yupu kekenamne,” nyabuka, Raja Babel biti, nyalin yupu deice arye nyapdeiamuk yupu nirya ara, Yudea tam deiyoknye birye, akunum yanibuka ati, el bidamnye, nong kum lyepdatue. Babel mutuku noutam dadipnamle!

¹⁹ Ati ara, nara Allah Yahweh, aning-aning nirya talibuka, deice tam erebuka, pia mikip ununye birye, nyapsine. Nara, dipkoprob pia kam ununa ati, narye nyapsin yupu ara, dipkoprob nong upnamle. Ara ani. Narye ninye deiyoknye Raja Yehuda biti, “Narye winibuka melipnamkine, winipkinyeura, ance na yupu moubuka kekepmince, pia ati dobolyanammnilyame. Tonda, teleb winin ning ara ani, malye winin ning ara, ani,” nyabuka, nyalin yupu deice nyapse yupu nirya ara, elce, ‘Aning ara, na like. Ayupu kum kekepnamap,’ nyabuka, nunce nyapdanumu ning nirya ara, yanipnuka ati, narye el nong deice, ikin weik deibuka wenepnamne! Deiyok ara, elce, ‘Aning ara, wininamlume,’ nyabuka, nyalin yupu deice arye, Babel mutuku ninye deiyoknye ati, nyapdeiamdik ning ara, pia moubuka kum taleamukce, akunum batakuka ati, aning nirya ati, el nong deice, ikin ning deibuka wenepnamne.

²⁰ Winipmanto ara, ninye arye maka tomona ati, el si jala bobikirye, maka webuka youlamak touk, narye anye biti, akunum youpnyeura, bobuka Babel mutuku bobinamake. Winipnamak talak ara, el wenena ati, el bobuka Babel mutuku noutam akunum deibikceura, narye elti, mikip arye wenepnamne. Deiyok ara, elce nati, pia teleb kum tenelamnuka ati, na nyamse yupu akunum yanipnuka ati, anye weik tonun wenepnamne!

²¹ Anye wenebuka opnamne talak ara, narye lo arepyeba, sik Babel mutuku yin talin nang arye, el dam yakirye, el yin talin pia teleb nang babye, yu parang ya arye, opnamake. Ninye weik tam nang ara, opmakcebuk, tuba kam unamak nang ara, bai sakuka bendobikirye, im sirya, mutuku sirya ara, yuk-yukak bindopnamake. Aning nirya akunum winiplyeura, anggun nirya arye, nati biknamnululume. Ara, ‘E diba, nun ni koproba Allah, aning-aning talibuka, deice tam erebuka, pia mikip weiknye birye, ‘Winipnamneʼ',’ nyapsuk touk, akunum upmal atia,’ tenepmunce, moubuka biknamnulume. Ayupu ara, akunum nyapdeipsine.

Allah arye tenebuka, ‘Winipnamsine,’ nyapdeibuk yupu

²² Nara Allah Yahweh, aning-aning nirya talibuka, deice tam erebuka, pia mikip weik deiyoknye ununa ati, narye nyapdeipnusin domon yupu ara, atia. Ara ani. ‘Naryuk, keipyal yo koubikba, weik tonun pabuka, cang weik arye eitam welebuk keipyal yo dam yanuka, winiryuk teleb yo dup ning ara, narye daknamne. Akunum pia winiryuk yo taruk, dup teleb ning dakuka, aning ara, pia teleb winiryuk taruk ning, naryuk winibuka daklopnamne ning ara, bobinirye, tuba tamubuka koupnamne. Ara, ayo taruk dobuka, tonok weik tonun welyamuk mutuku kon deice, tuba tonap akunum koupneba, nepnin balamya ani, cang pia weik welepnamle.

²³ Israel mutuku noutam bukuk mutuku kon, cang weik mambul mutuku ara, ayo dup tuba tamubuka, narye koupneba paplirye, el yo bok ap, taruk ap, pia weik tonun upnamle. Winiplirye el taruk babye, weik tonun leklirye, panapnamle. Bilirye, el duk pia teleb kibuka moupnamle. Winiplyopura, akeipyal yo ara, pia urasin teleb cang yo upnamle. Wininamle talak ara, ayo dup nirya ara, maka yala-yala nirya arye, ayo dup, sik maka aik donamake. Tonda, ayo akunum paplye talak ara, ayo weik cang arye tiklyeba, ayo taruk deice tam nirya ara, sik amaka yala-yala nirya, nukmanto kum yanuka unamake.

²⁴ Ati ara, dan mutuku do nirya, amutuku-amutuku noutam upnamle yo yala-yala nirya arye, nati bikuka tenenamniyake. Ara, dipkoprob nati, sikce, ‘Se, Allah elda, dipkoprob Yahweh aulule,’ tenebikirye, nati moubuka biknamniake. Ati naryuk, weik cang arye pabuka tiknamle yo nirya ara, naryuk webuka, amu tam deipnamne. Tonda, yata yo do nirya, el bumang arye papnamle yo ara, naryuk dopropnirye, cang weik yo kipdeipnamne. Tonda, teleb kibuka tilirye palamle yo ara, sekdobikceba, lyubuka koululamle yo atonun kipdeipnamle. Tonda, naryuk kouamnye yo nirya ara, tuba tamubuka koupneba, teleb kibuka panamle. Ara, talye yupu kum nyapsine. Nara, Allah Yahweh arye, ayupu ara, akunum nyapmasina ara, ayupu yala nirya nyapdeipman ning ara, dipkoprob wininauk upnamne. Ton pia kum bataknamne ati ayupu ara, akunum nyapdeipsine. Allah Yahweh arye nyapdeibukba, Yeheskiel kekebukce, sekdeibuk.