Yehezkiel 16 - Eipomek

‘Yerusalem mutuku noutam ulamik nang arye, nati, dip tenebuka, na yupu lekene kum ning ati, wenepnamne,” nyabuk yupu

¹ Allah Yahweh arye, na Yeheskiel biti, ton nyamnuk.

² Se, anda ninye sirika arye deipkiknye, ance Yerusalem mutuku noutam unyak nang nirya arye, malye weik wininyak ning nirya ara, ance lak sukum nyalbiminyeba, kekepnamake. Ara, narye, ‘Aning ara, na pia lik,’ tenyamsirye, ‘Aning ara, pia meme,’ nyamse ning bukni, anggunce aning talibuka, malye winilamlum ati nyapkine.

³ Tonda, ance nyapnamlyame. ‘'Anggun Yerusalem mutuku ululum nango, anggun ni koproba Allah, el si Yahweh, aning-aning nirya talilirye, weik tonun erebuka, Pia Mikip Weik Deiyoknye ulya ati, na Yeheskiel biti nyapnuk yupu ara, ani. Ara, anggun Yerusalem mutuku ululum nang ati, domon yupu deice arye nyapnuk yupu ara, nyapnusine. Ara, ‘'Anggun Yerusalem mutuku weik asik noutam ululum nang nirya ara, anggun dam adomon yupu bobuka, lak nyapsine. Se, anggun Yerusalem mutuku noutam ululum nango, anggun deiamsik mutuku noutam ara, Kanaan tam mutuku atia. Anggun pununanye bira, Amori mutukunye birye deiamsuke. Tonda, anggun sekdeiamsuk keil ara, Het mutuku keil arye sekdeiamsuke,’ nyapnuk.

⁴ Tonda, anggun Yerusalem nang deipsik talak ara, anggun nin yapu arye, anggunti, ‘Winiryuk deipman mi ara, nun lik ati, dauplye, dadipnamak,’ tenebuka, winibik. Ara, anggun num ton kum sekamsik. Tonda, anggun nin yapu arye, anggun deipsik talak ara, mek ton kekuka kum deipsik. Aning atonun, anggun nong ton duknubuka deipsik talak arye, ‘Anggun nong bol kat upnamle’ tenen, bedak atonun ning bukni, anggun nin yapu arye garam bobuka, anggun nong deice kum likdeiamsik. Tonda, ‘Anggun taruk ap, yan ap, teleb kibuka diksukum nepnamle’ tenen, kain baju kitibuka, kum deiamse. Aning kum winilamsik deiyok ara, ‘Amapu nun lik, dadipnyak’ tenen, bataklamsik.

⁵ Ati ara, yata nang do, tonok kil babye anggunti, ‘Bicoʼ tenen, ton kum meliamsike. Ati ara, anggun deipsik talak ara, kilapu nirya arye anggunti, bico tenen kum meliamsik bukni, akilapu arye, anggun dobuka, talye bai mutuku mutmuta tikamuk noutam arye, dobuka dongoksike. Ara, talye ati kume. Anggun deiamsik talak aryuk, ‘Akilmapu ara, nun pia lik,’ tenelamsika deice arye, winilamik.

⁶ Anggun nin yapu arye, bataklamsik bukni, nara kume. Narye anggun bisik sekdongobuka, dinmasesibuk, anggun deipsikba, anggun ining sakuka poupmuk noutam, unmalumak epsise. Na dilamsiseak, ‘Amapu dauplye’ tenen, kum eibuka bataksise bukni, narye anggunti, eibuka biksirye, “Anggunda kam buklulume!” nyabuka, kam bukeipsise.

^7-9 Ati, anggun winiryuk deipmasik talak ara, anggun nong deice palyamsuk ining mek una ati, mek kwebuka, anggun nong nirya, mek likeipsise. Atonun, narye minyak zaitun mek arye dobuka, anggun nong deice nirya, minyak zaitun likdeipsise. Winipsiseura, winipmanto ara, talye bai tam dola palamle ning paplirye, weik palamle touk kibuka, aminyan talak anggun nong nepmunyeba, urasin pia teleb wel kilmu ulamlume. Anggunda, pia moubuka nelamlumce, nong cang ap, potong ap, moum ap, teleb kibuka, urasin pia teleb kilapu ulamlume. Urasin pia teleb wel kilapu arye, teleb kibuka nelamak touk, ululumak epsise. Na Allah arye epsise bukni, winipmanto ara, anggunda pia bananguk ulamlume. Winibuka ulamlumbuk, aminyan talak ara, tuba tonap, na abisikuk tamubuka balamse talak ara, anggun ton elilamsisirye, anggun ap, na ap, mun derelalamupu ani, kil don talak, dam akunum kibukba, ‘Akil ara, na akunum dopropnune’ tenen, nyalin yupu deice arye nyapsise. Nyapsise ati, anggun Israel nang arye winilamlum touk kibuka, wini talak na deice ongolamse cang baju dobuka, anggun nong bol deice banang umunye ning ara, ongopdeipsisirye, kalupdeipsise. Winipse deice arye, narye sik kilapu ati, ‘Nara, dipkoprob sikuk dopnun’ tenen, moun dobuka kintinipsirye, dopropsise. Winipse ati, diba wini talak ara, sal arye kil dopnamikce ati, moun nyalamikca, dolamak touk, akunum winipse. Aning winipse deice arye, na damnye koproba, akunum kipdopse. Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unirye nyapsina ati, aning nirya ara, dipkoprob nyapsine.

¹⁰ Narye, anggun akunum dopropsise ara, anggun Yerusalem mutuku ululum nang ara, winipmanto ara, bona weik talin nang arye, kil dobuka ulamak touk, narye winipsise. Ara, bona weik talin Israel nang ara, kil dolamak touk winipse. Min ara, urasin pia teleb dekna weik baju ton arepsiseba, ongolulume. Tonda, urasin pia teleb sapi basam bol, pia namin ning arye, moubuka kintinip deibikce, yan kinikna, el si sandal ton, arepsiseba ongolulume. Tonda, anggun kisok kaluna ati ara, pia teleb namin baju, el si kain lenan arye koupdongopse. Tonda, anggun nong bai tam ongona ati, dekna weik baju, el si juba, pia teleb ning dobuka, ongopdeipse.

¹¹ Winipseura, sik nong deice nirya ara, urasin pia teleb kweirya ton arepsise. Ara, sik taruk deice ara, toupne dama atonun, el si toupnedama ap, buka dam karakna ning, el si kalung rantai ap, arepsinyeba karaknalume.

¹² Aning atonun, amul deice dongon ning, el si cincin ap, u bisik dongon ning, el si anting hidung ap, kintinip deipse. Aning-aning nirya ara, dekna weik kat ning, emas ap, perak ap arye, cincin ap, toupnedama ap, rantai ap, kintinibuka arepsiseba, dongolulume. Tonda, anggun kisok deice ara, urasin teleb ning, deiyok kilapu dongolamak ning atonun, el si mahkota ton, kintinibuka arepsiseba, kalubuka ongolulume.

¹³ Dipkoprob anggun nong deice ara, yata wiribuka dekna kat weik ning, el si emas ap, perak ap, anggunce anggun urasin teleb una ati, aning deice teleb kipdeipdalume. Atonun, anggun pia teleb namin baju, el si kain lenan deice aryuk kitibuka, arepsinyeba, anggun nong bol deice ongolulume. Narye arepsise namin baju nirya ara, pia dekna weik ning, memepdeipsiseba ongolulume. Anggun din ning ara, pia teleb terigu arye, dan roti kwaning, pia teleb ning diplume. Tonda, madu mong mek ap, tonda minyak zaitun mek ap, dilulume. Winibuka ulamlum talak ara, anggun nong urasin nirya ara, pia teleb ulamlume. Atalak ara, anggunda ninye deiyoknye, Raja el kil, ratu ulamak touk ulamlume.

¹⁴ Ura, anggunda ninye deiyok kilapu, ratu-ratu atonun kibuka ulamlumce, anggun nong urasin nirya ara, pia teleb kibuka winilamlum ning ara, sik dana-dana tam, yuk pera mutuku noutam ulamik nang nirya arye, anggunti, ‘Se, sik Yerusalem kilapu nirya ara, dipkoprob pia urasin teleb kilapu unyake,’ nyabuka, anggun si pia erelamsike. Aning nirya ara, talye ati kume. Deiyok ara, narye anggunti, pia teleb kililamasiseba, urasin pia teleb ulamluma ati, yuk mutuku nang arye, anggun si erelamsik. Ara, na Allah Yahweh, aning-aning nirya talibuka, deice tam erebuka unirye, Pia Mikip Weik Deiyoknye ununa ati, talye kum nyapsine. Narye, aning nirya areamsise, nyapsine.

¹⁵ Bukni, anggunce anggun bidamnye, urasin pia teleb una ning ati, moubuka tenilalumce, ‘Se, nunda dipkoprob urasin pia teleb unyap’ tenen, anggunce, anggun teleb kweirya dolamlum ati, ‘Diba,’ tenelamlumce, erepdan arye, kwalibuka maknya kintinilalamlume. Anggun Israel kilapu arye, ‘Se, nunda pia dip kilapu unyabe,’ tenelamlume. Winiplum ning ara, yata nang do nirya, talye balamik nang nirya ati, ‘Nun neika ubula doptibye’ tenen, dololamlumce, talye mangkau neika malamlumce, ubula yolalamlume. Winipmanto ara, kilapu arye, sik domikce nang batakikirye, yuk nang ap, talye-talye malamak touk, anggunce na Allah ati, bataklamnulumce, yuk ning deice, anggun kanye delilamlume.

¹⁶ Atalak ara, anggun urasin pia teleb baju, ongolamlum ning ara, ton tam bokuka doproplumce, yuk nang talye ubula yolana ati, yo lakase yekuka, domluma deice tam singipdongoplumce, anang ap neika malamlumce, ubula yolanauk ululume. Se, anggunce, aning winiluluma nirya ara, min talak kum winilamik bukni, anggunda dipkoprob pia malye winilamlume. Aning nirya ara, ninye arye winipmanto kum ning, pia mem ning winiluluma ati, aning kum winipnamtume! Tonda, aminyan talak, aning atonun ton, kum winipnamlume!

¹⁷ Tonda, wini talak anggun nong urasin pia teleb una ati, dekna kat weik ning, el si emas ap, perak ap, narye anggunti, areamsise kan-kan arye bokuka, ton tam ning dobuka, anggunce ninye urasin atonun ning, patung-patung memebuka deiplume. Winiplumce, anang urasin atonun si atibuk, talye isa si erelamluma ati, winipmanto ara, talye kilapu arye, yuk nang ubula yolalamaka atonun, anggunda aning ton winilamlume.

¹⁸ Aning kum bukni, sikce anang urasin atonun patung-patung ati, sik deice ongon baju, dengna weik baju, narye anggunti, areamsise ninguk, kwiriploplumce, abaju dobuka, anggunce memeplum isa si eren ning, el si patung delilamlum ning, ‘Malye kiplyak’ tenen, singipdongoplume. Aning nirya winipmunyeura, aminyan talak, ‘Talya ning isa si erepnamap’ tenen, aning dobuka, tukwak deipmunce, sik minyak zaitun mek ap, nintong teleb nyan ati, el si dupa ap, dobuka aning dam delilulume. Aning nirya ara, dipkoprob na si erena ati, arepnamnutum bukni, anggunce, talye isa si erena ati, amambul ning boyanuka arepmunce, isa siuk erelulume.

¹⁹ Aning atonun, naryuk anggun dina ati, terigu pia teleb ning ap, mong mek ap, tonda minyak zaitun mek, pia teleb ning ap, areamsise bukni, anggunce aning dobuka, sik talye isa si erena ati, arelamlume. Aryamsise ning nirya ara, anggunce isa mer si erena ati, berhala-hala, el si patung-patung dam, ‘Aning ara, isa eiplirye, nintong kekeplyopura, nunti kanye deipnamsil’ tenen, isa ati areamlume. Nara Allah Yahweh, aning-aning nirya talibuka, Pia Mikip Weik Deiyoknye birye nyapsine. Anggunda, aning nirya dipkoprob malye weik winilulume.

²⁰ Aning kum bukni, tonda, narye melilamsiseba, angguncuk, mapu ap, kilmapu ap, delilulum ning ara, amapu bobuka, sik isa si erena ati, obuka arelamik. Ara, na mapu koproba atonun mapu ara, anggunce amapu nirya bobuka, ‘Nun ni koproba, isa arye dipnul’ tenen, anggun si erelamlum isa ati, amapu dobuka oplumce, arenamlume. Apia malye ning winipmunyeura, anggunce, ‘Kume, nunce yuk nang ap, talye ubula yolalamap ning ara, mitik malye wininyap bukni, weik malye ning ton, tabakuka winiptibye deice arye, Allah yanibibyak,’ tenena deice arye, malye weik ton ululum do?

²¹ Ati anggunda, tuba na mapu koproba nirya babye, ubula dopropmomce, ‘Nun isa si erepnuyap’ tenen, sik amapu nirya, isa si erena ati, berhala-hala atia binuka, akunum obuka arelamlume.

²² Anggun ton tenipdelulume! Malye un kilapu arye, yuk talye nang ubula yolalamak touk, ulamlum talak ap, tonda anggunce pia malye weik un ning talibuka, malye-malye weik winilamlum talak noutam nirya ara, mitik tonun arye, anggun mitik wel talak, min winilamlum ning ara, tuba tonap ton, pia kum tenelamlume. Ara, kanye tenina kumce, anggun nong mitik mapu banang ubikirye, sik mining deipmakce ining mek keklamak touk, anggun Yerusalem kilapu babye, anggun ining mekuk keklamlum ara, tuba tonap kum biklamlume.

Yerusalem mutuku ulamik nang arye, malye-malye weik winilamik ati, wenebuk yupu

²³ Allah Yahweh, aning-aning nirya talibuka, deice tam erebuka, Pia Mikip Weik Deiyoknye unirye nyapsine. “Anggun Yerusalem mutuku ululum nang ara, anggunda bicoe! Se, ikin ning anggun dam yanamsile! Anggunda wenepsinirye, pia malye kibuka opnamsine. Diba opnamsine! Aning deiyok ara, anggunda pia malye winin ning yala-yala nirya ara, weika arye winilulum atia.

²⁴ Tonok ning ara ani. Ara, angguncuk amutuku noutam ap, amutuku nang arye, ‘Yupu talipnamap’ tenen, ninye bulubuka bisik balamikak nirya ara, angguncuk isa mer si, berhala-hala erena ati, dolamlume. Tonda, angguncuk amutuku noutam nirya, talye yolanak ati, aik ton domlume.

²⁵ Aning winimunya deice arye, anggun asik noutam, ninye balamikak nirya ara, anggun bidamnye, anggun urasin teleb un ning ara, malye kilamlumce, yuk talye balamik nang ap, ubula yolalamlume. Winimunya talak ara, yata barye nang do nirya, anggun nong atibuk, ninye ton baca epmunyopura, bimunce, ‘Amio, na ap neika maptinimnye do?” nyabuka, moropmunce, anang bobuka bobalamlume. Winimunya deice arye, anggun ap, talye daulamik nang ap, neika ubula malamlum ning ara, tabaklumce, pia weik tonun, malye ulamlume. Anggun ap, talye nang ap, yolanauk ulamlume.

²⁶ Winipmanto ara, talye kilapu arye, yuk nang ubula yolalamak touk, anggun Israel yala nang arye, anggun dam ulamik nang, sik Mesir mutuku noutam ulamik nang arye, weik wenepnyeba, maknya kintinipdanuka, malye winilamik touk, anggun babye atonun winilulume. Ara, natibuk, ‘Naio nun mal olan nang ati, kalikuka melipsilyame,’ nyabuka, morolamnutum bukni, anggunce, ‘Mesir mutuku nang aryuk, melibuka lyepropsiting’ tenen, sik dam morolbalalume. Anggunce aning winiplum deice arye, na yu weik upnukba, anggunti malye kanye bobuka ulamse. Anggunda, tenepce malye winimunce, natibuk malye kipdeipnulume.

²⁷ Anggunce malye kipdeipnulum deice arye, yu upnuka ati, min talak ara, na adiparyuk anggun wenena ati, deiyok koubuka wenelamsise. Tonda, narye anggunti, pia teleb ning ap, tuku ap, anggun deice dobuka, deiamsise ning nirya ara, adiparyuk tamubuka dopropse. Aning winipsa deice arye, lo arepsiba, adiparyuk, sik Pilistin nang arye, yanuka opsikce, anggunce taleamlum tuku ton, ubula doprobik. Sik Pilistin nang ara, anggun Israel yala ululum nang arye, talye yolana ap pia malye-malye una ap, eibika ati, ‘Se, sikda nun lik,’ tenebikce, anggun malye weik ululuma ati, sikda alye dakdayik. Anggun Israel nang arye, pia malye umunce, dukna atonun umunye ning nirya ara, na Allah arye, anggun bobuka, anggun mal olan nang taruk deice deipsinyeba, sik Pilistin nang arye, ‘Winipnuyabe,’ tenelamik ning nirya ara, talye luparabuka winibike.

²⁸ Bukni, malye kilapu arye, talye yolanauk winilamakak arye, ‘Kabula, ton tuba-tuba aninguk winipnamabe’ tenen, pataplyeba, aninguk tuba-tuba winilamak touk, anggun Israel nang arye ton, aning atonun akunum winiplum bukni, anggun kanye kum lopsuke. Ati ara, anggunce, na Allah bataknulumce, ‘Asyur mutuku nang, sikce ton melipsiting’ tenen, anggunce tuba-tuba Asyur mutuku nang atibuk, ‘Melipsululume,’ nyabuka moryamlume. Winilamluma deice arye, anggunda talye-talye yolan kilapu ulamak touk, akunum ulamlume. Winilulum bukni, anggunda sik Asyur mutuku nang ati, ‘Melipnamsiakʼ tenen, morolamlum bukni, sikce kum melilamsika ati, anggunce, ‘Seʼ tenen, mun kum bulamsuke.

²⁹ Aning atonun, aminyan talak ara, anggunce, ton Babel mutuku nang, sikda bona weik tonun, deklamikce nang ati, ‘Amutuku nang babye, ton melipsiting’ tenen, anggunce amutuku nang ton, moryamlulume. Anggunce wininyamluma deice arye, talye yolanauk ulamikce kilapu wininyak atonun, ulamlume. Winibuka ulamlum bukni, anggunda mun kum bulamsuke.

³⁰ Allah Yahweh aning-aning nirya talibuka, deice tam erebuka, Pia Mikip Weik Deiyoknye birye, nyapsine. Angguncuk pia malye-malye weik winilulum ning nirya ara, na yu weik upnile. Winipmanto ara, anggunda talye yolan kilapu arye, alye una pia kumce, pia malye weik wilamak touk, anggun babye, pia malye weik winilamlume. Ati, na yu weik unulule.

³¹ Anggun mutuku nirya ara, alye dakalana kumce, ninye balamak bisik deiyok kounak ap, bisik elanak ap, sikcuk talye isa si erenak ap, ninye yolanak ati, aik dobuka balamlume. Winimunya deice arye, talye-talye yon kilapu unyak atonun ulamlume. Bukni, sik talye yolalamikce kilapu arye, yo bok morobikce deice arye, yolalamak atonun, kum ululume. Sikda, mitik malye bukni, anggun Israel nang winilalum ning ara, pia malye weik. Ara sik yolan kilapu ara, ‘Yo bok aryuk arebuka deksitingce, yopnamsiting,’ nyanyak bukni, anggun Israel nang ara, aning tenena kumce, talye lubakibuka yolalamlume.

³² Ati, anggunda ninye arye dobuka ulamice kil bukni, akil arye el akanye biti, ‘Na lik’ tenen, bataklamaka kil atonun ululume. Winipmunce, angguncuk yuk nang, kum bikmalum nang bukni, sik dam binuka, anang bobuka, talye yolalamak atonun, winilamak kilapu atouk ululume.

³³ Talya yolan kilapu arye morobikiba, ninye arye, atalye-talye yolamikce kilapu ati ara, yo bok dekenyake. Bukni, anggun Israel nang ara, aning atonun kume. Anggunce, tamubukapmunce, anggunce pia, ‘Anang ara, na talima pia patapnile’ tenen, pia tuba-tuba anang atibuk dekna ara, arelulume. Tonda, sik yuk-yuk mutuku nang yukuna nang ara, angguncuk, yo bok deice arye, libuka yukupmunyeba, dana-dana pera mutuku unyak nang nirya yayikba, anggun ap, neika malulume.

³⁴ Anggunce winilulum ning ara, yuke. Ara, ton nang arye wininyak ning ara, yuk ning wininyake. Sik dam ton yangalamikce, ‘Ubula yopnamasiyabe,’ nyabuka, pi dobuka, kum yukamsik. Tonda, sikce dengna ton, kum arelamsik. Aning kum bukni, angguncuk dengna dobuka, anggun dam yangalamik nang ati, arelamlume. Diba aning ara, yuk ning bukni, anggunce winimunye ning ara, pia yuk-yuk winilamlume.

Yerusalem mutuku nang ati, Allah arye yu upliba, ikin ning deipnamla ati, nyabuk yupu

³⁵ Ati ara, na Yahweh arye, anggun Israel yala nang ara, talye yolana atonun ululum nang ati, nyapnusin yupu ara, kekepnululume!

³⁶ “Se, anggun Yerusalem mutuku ululum nang nirya ara, na nyapye yupu moubuka kekeplulume! Ara, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye, nyapnusin yupu ara, moubuka kekepnamlume. Anggun alye una kumce, adiparyuk, ‘Nun ap, nun mal olan nang ap, neika mapnuyabe’ tenen, anggun baju nirya ara, kwiripmunce, ‘Aning ara, pia tenenamabe’ tenen, asum-asum nirya ara, anggun akunum kintininauk ulamlume. Tonda, anggunce, ‘Se, anang ap, neika maptibye’ tenen, pia patalamuk ninye asik nang ap, sikce talye ning, isa si erena ati, anggunce memebuka deiamlum patung berhala atibuk, si erelamlume. Aning kum bukni, tonda anggun mapu weik tonun obukapmunce, isa arena ati, uku dongopmunce, isa mer berhala-hala, sik siuk erelamlume. Anggun mapu obuka, isa arelamluma deice arye, malye weik ning winimunye atonun, narye weik tonun wenepnamsine!

³⁷ Ati ara, anggun bico tenelamlumba, malye-malye una ati, neika malamlum nang nirya ara, bulupdeipnamne. Winipnamne ning ara, anggunce imun tenelamlum nang ap, tonda anggunce, ‘Nun lik,’ tenelamlumba, anggun olana ati, yanganmek nang nirya ara, tuba tonap bulubuka, anggun dam deipnamne. Atalak ara, anggun damuk tikikirye, antanap dongopnamsiake. Winipsikceba, narye anggun baju nirya, kwiripnamsine. Winipsinyeba, sik anang nirya arye, anggun nong banang umunyak eipnamsiake.

³⁸ Ati ara, narye anggunda. malye pia weik winimunce, talye-talye nang ap yolalamlum ning ap, anggun mapu weik olamlum ning ap ati ara, narye wenebuka, ikin kipdeipnamsine. Ara sal ap, kilapu ap, talye-talye mal olan nang ap, ninye ona deiyok nang ap ati, weik tonun wenebuka olamak touk, narye anggunti, weik tonun wenebuka opnamsine. Ara, na yu upnuk ning ap, ‘Sikda ‘Naʼ tenen nang unyak bukni, yuk ning ati si erenyake’ tenen arye, malye kanye bopse deice arye, anggun tibuk, adiparyuk wenebuka opsinyeba, dipnamlume.

³⁹ Anggunti bico tenen, anggun talima areamsuk nang ati, narye anggun deiceuk, dobuka arepnamsine. Bukni, sik bobuka anang ati arepnyeba, sik anang nirya arye, yu uplyeba, anggun dobuka, talye-talye yolamsik aik, tonda mutuku kon deice isa si erelamlumak nirya ara, uluplopnamake. Tonda, anggun urasin teleb baju nirya kwiriplopsikirye, anggun urasin teleb una ati, dekna weik kweirya nirya, aulubuka dopropnamake. Winibikceba, anggunda nong bananguk unamlume.

⁴⁰ Sikce yuk nang ati yukubikceba, keil dobukabirye, anggun nong deice donokuka, opnamsiake. Tonda anggun nong nirya, pia yu parang ya arye, sekuka opnamsiake.

⁴¹ Aning kum bukni, tonda sik olyanamsiak nang arye, anggun asik nirya ara, uku dongopnamsiake. Tonda, sik dana-dana unyak nang ap, amutuku noutam unyak kilapu nirya ati, nyabikceba yakirye, anggun ikin deipnamsiak ning ati, yanuka eipnamake. Winibikirye, sik biknamake. Lo arepnyeba, anggun mal olan nang yanukam aning nirya winipnamsiak deice arye, narye anggun talye yolalalum ati, adiparyuk kum kipdeipnamne. Aning winipnamne talak ara, anggunda tuba tonap, anggun malye winin ning ati, dekna ton dobuka, anggun pia kanye deilin nang ati, bokuka pia kum arenamlume. Aning nirya, kum kipdeipnamsine!

⁴² Aning-aning nirya akunum winipyopura, narye anggun malye winilamlum ning wenena ati, yu weik upnuka ara, adiparyuk mitang upnamnile. Akunum wenebuka opsinyopura, wini talak, na tuba tamubuka, talye kanye deipnirye, tunim abuka, namin aryuk unamne. Ati wini talak, narye anggunti, yu upnuk ning ap, ‘Se, sikda, ‘Naʼ tenen nang unyake bukni, yata deiyok ati, yuk talye ning si erenyak do?’ tenen, malye kanye bopsise ning ap, kum dalyeba, aning ton pia kum unamne.

⁴³ Bukni, wini talak ara, ayupu nyapsine. Narye anggun ikin ning deibuka wenepnamsin ning ara, deiyok talye ati kume. Ara, anggun min wel ulamlum talak arye, ‘Nun ni Allah arye, weik tonun melilamsuk,’ tenena kumce, pia malye weik ninguk talibuka, pia weik tonun winilamlum ning ara, na yu arye wenepnamsine. Anggunce moubuka tenina kum, pia malye un ninguk talibuka, winilamluma deice arye, wenelamsise. Anggunce malye weik winiluluma atonun, narye weik ikin ning, anggun deice deipnamsine. Nara Allah Yahweh, aning-aning talibuka, deice tam erebuka, Pia Mikip Weik Deiyoknye birye, nyapsine ati, aning ara, dipkoprob nong upnamle! Se, anggun ton tenipdelulume! Anggun pia malye un ninguk, talibuka winilamlum ning nirya ara, aupmal bukni, aninguk kume! Tonda, anggunce ton tabakuka talye yolana weik ulamlume! ‘Aning-aning nirya ara, narye pia lik’ tenen, lik weik unulule. Aning nirya ara, pia malye un ning ati, na pia like. Allah arye, sik Israel nang ati nyabuk.

Winipmanto yupu deice arye, “El lin ulamuk touk, elce deiamuk kilmu babye, atonun ulamuka ati,” nyabuk yupu

⁴⁴ Allah Yahweh arye, winipmanto yupu deice arye, nyabuk. Se anggun Yerusalem ululum nang nirya ati, winipmanto yupu deice arye nyapnusina ati, kekepnululume! Winipmanto yupu nyanyak nang arye, anggunti ayupu ton nyasinyake. Ara, “El nin ulamuk touk, el kilmu babye atonun ulule,” nyanyake. Winipmanto ara, nyanyak nang arye, anggun Yerusalem mutuku ululum nang ati, ayupu bobuka, anggunti nyanamsiake.

⁴⁵ Aning ara diba, “Anda, an nin deipkuk kil ulyama ati, el winilamuk touk, an babye atonun winilyame. An ni bira, el dobuknye biti, ‘Na lik,’ tenelamuk atonun, elcuk deiamuk mapu nirya babye ara, ‘Na pia lik,’ tenelamuk. Aning atonun, an babye, an domninye biti, ‘Na lik,’ tenelyame. Tonda, ance deiamlum mapu nirya ati, ‘Na pia lik,’ tenelyame. An ap, an kwitcapu kilapu nirya atonun ululume. Ara, an kayapu kilapu arye, sik domne nang ap, sikce deiamne mapu nirya ati, ‘Nun pia lik,’ tenelamik touk, an babye atonun, an domkuknye ati, ance deiamlum mapu ati, ‘Na pia lik,’ tenelyame. Tonda, an deiamkuk kil, an nin koproba ara, Het yala kil ulamuk. Tonda, an deiamkuknye bira, an ni koproba ara, Amori yalanye ulamuk.

⁴⁶ An dukul kil ap, elce deibuk kilmapu ap atonun ara, sik Samaria tam ulamik nang, an dam bukni, dabu tam (arah utara) ulamik nang atia. Tonda, aning atonun, an weit kil ap, elce deibuk kilmapu ap atonun ara, sik Sodom mutuku ulamik nang, an dam bukni, iknapye tam (arah selatan) noutam ulamik nang atia.

⁴⁷ Amutuku bitinye noutam ulamik nang arye, pia malye ning talibuka, malye weik winilamik bukni, an eipmunyeura, wini talak anda, ‘E, sikce unyak touk, na babye atonun unamne’ tenen, akunum kanye deipkuka ati, sikce urasin yuk kipdeipnirye, malye weik winilamik ning ara, biklum ning atonun malye winilyame. Bukni, anda mitik tonun tam kum bukni, weik tam ning ara, adiparyuk pia malye weik tonun, sik akilapu arye, malye winilamik babye, ance an winilalum ning yala-yala nirya ara, pia weik tonun malye winilyame. Winipmanto ara, sikda mitik malye bukni, anda pia malye weik winilyame.

⁴⁸ Nara pia dipkoprob yupu nyapsine. Na Allah Yahweh aning-aning nirya talibuka, deice tam erebuka, Pia Mikip Weik Deiyoknye birye nyapsine. Ara, an kwitcapu kilapu atonun nang, sik Sodom mutuku ulamik nang ap, sikce deiamik nang nirya ap, pia malye weik winilamik touk, an babye aning atonun winilyame. Tonda, sikce kum wininyak ning ara, an ap, ance deiplum nang ap, angguncuk malye weik ton ap, tabakuka winilulume.

⁴⁹ Sik Sodom mutuku noutam ulamik nang nirya arye, malye winilamika deiyok ara ani. Ara, diltaknauk ulamik. Tonda, sik din ning yala-yala nirya ara, pia weik tonun, kintinip deiamik ning arye dilamikce, maknya kipdanuka ulamikce, namin arye, talye tunim abuka, kanye deibuka, teleb aryuk, pia dukdongobuka, neika ulamik. Bukni, sik aning-aning nirya, kum uamuk nang, sik pia talye kankan nang ap, aning-aning kum uamukba, pia patanauk ulamuk nang ati, ‘Sik anang ara, dauplye’ tenebuka, bataklamikce, pia kum melilamik.

⁵⁰ Winibuka pia malye ulamikce, sikda kwalina ap, maknya kintinilana ap, ulamik. Tonda, sik anang nirya ara, kekena kumce, kat kanye bobuka ulamikce, nara, ‘Aning ara, pia kum wininamlume. Awinina ara, na pia lik ati, aning ara, mem ning,’ nyapdeiamse ning atibuk, aning talye luba kibuka winilamik. Aning nirya malye weik winilamik ati ara, na eipseura, na adiparyuk, sik Sodom mutuku ulamik nang nirya, kum kipdeipsirye, sice bukuka batakse.

⁵¹ Diba, wini talak ara, Samaria unyak nang ara, malye weik wininyak bukni, sik malye wininyak ning ara, mitik tonun wininyake. Bukni, anggun Israel yala nang arye, pia malye weik ning talibuka winilulume. Winipmanto ara, sikce, ton tam bokuka, malye wininyak bukni, anggunda, aning-aning nirya, pia malye weik winilulume. An winilyam touk, sikce kum wininyake. Deiyok ara, an pia malye winilyam ning ara, pia weike. Ati ara, ance malye weik winilyam ning ap, sik Samaria mutuku nang malye winilamik ning ap, ‘Dan ning pia malye weik winilul do?’ tenen, dilenye ning ara, dipkoprob anggun Israel nang, pia malye weik winilulum ning ara, ikin pia weik ulule. Sik Samaria mutuku nang ara, mitik tonun uka.

⁵² Anda, pia malye weik ulyama ati, anda pia ilil tenena ap, alye una ap, unamlyame. Anggunce pia malye weik winilamlum ning ara, pia weik ati, yuk nang arye eibikcopura, adeice arye, ‘Se, sik Samaria mutuku nang arye, malye winilamik ning ara, mitik tonun uka,’ tenenyake. Ati, diba, anggun Israel nang ara, alye weik dakdanalume! Yuk nang nirya arye, anggunti, ‘Sikda pia malye weik wininyake,’ tenebikirye, nyek-nyek anamaka ara, talye kekepmunce, tunim abuka unamlume! Yupu tamubuka nyana kume. Allah arye nyabuk.

“Sodom mutuku ap, Samaria mutuku ap, Israel mutuku ap, tuba tamubuka, teleb kipdeipnamsine,” nyabuka, nyalin yupu deice arye, nyabuk yupu

⁵³ Allah Yahweh arye, Yerusalem mutuku nang ati nyabuk, “Ara Sodom ap, Samaria ap, amutuku noutam unyak nang nirya ara, narye tamubuka, pia teleb kipdeipnamne. Winipnyopura, an mutuku unyak nang babye, adiparyuk tamubuka, pia teleb kipdeipnamsine.

⁵⁴ Narye, Yerusalem mutuku nang nirya ati, tamubuka teleb kipdeipnamsine deiyok ara, ani. Ara, anggun mening nong ilil uplyeba, weik tonun alye daknamlume. Tonda, sik Samaria mutuku nang ap, Sodom mutuku nang ap, sik Yerusalem mutuku nang eibicopura, ‘Se, nunda mitik malye winilamupu bukni, sik Yerusalem mutuku nang ara, dipkoprob malye weik ning talibuka winilamik. Nunda mitik tonun uka,’ tenebikirye, anggunti yanibuka nalipsikceba, anggunda, pia alye dakalanamlume.

⁵⁵ Tonap nyapsine. Narye, Sodom ap, Samaria ap, amutuku noutam unyak nang nirya ara, wenebuka opsirye, sice buklopse bukni, sik nirya min talak teleb winilamik touk, narye tamubuka, pia teleb kipdeipnamne. Winipnyopura, Yerusalem babye, an mutuku unyak nang babye, adiparyuk tamubuka, pia teleb kipdeipnamsine.

⁵⁶ Anggunda, tonap tenipdelulume! Anggun Yerusalem mutuku ululum nang, pia malye weik winilamlum ning, lak kipdeipsiba, ninye nirya arye kum bikse talak ara, sikce, anggun kwitcapu, Sodom mutuku noutam ulamik nang nirya ara, ayupu ton kum batakamlum do? Tonda, min talak sikce, anggun kwitcapu, sik Sodom mutuku nang ati, diltaknauk kum ulamlum do? Kume, min talak ara, sikce, anggun Sodom mutuku nang ati, kwalinauk winilamlumce, ‘Se, sik Sodom mutuku nang ara, dipkoprob pia malye nang,’ nyabuka, akutubuka, nyek-nyek alamlume.

⁵⁷ Winibuka nyalamlum bukni, aning ara anggun pia malye weik winilamlum ning, min kum lak kipdeipsiba, lak kibukba, sik yuk-yuk mutuku nang nirya arye, eibuka kum bikamsik talak nyapsine. Bukni, wini talak anggun nirya arye, anggun Yerusalem nang malye weik winilamlum ning ara, akunum bikamse. Wini talak ara, anggun babye atonun winipmalume. Ati, sik Edom mutuku noutam unyak nang ap, sik dana-dana unyak nang ap, tonda sik Pilistin yala nang ap, tonda anggun kwitcapu dana-dana unyak nang ap, ukirye anggun Yerusalem mutuku nang ara, ‘Se, sikda dipkoprob, pia malye weik winilamik,’ tenepsikirye, nalibuka, ‘Nun lik,’ tenesinyake.

⁵⁸ Winibuka tenesinyaka ati ara, anggunda pia uk talina atonun ulamsilyeba, pia malye kanye bobuka unamlume. Aning ara, ikin weik unamsile. Ara, anggunce pia malye ning talibuka winilamlum ning ap, narye, ‘Winina ara, pia na lik’ tenen, ‘Aning ara meme,’ nyamse ning bukni, anggunce aning winilamlum ning ati, wenepnamsine. Nara, Allah, aning-aning talibuka, deice tam erebuka, mikip weiknye birye nyapsina ati, aning nirya ara, dipkoprob nong upnamle.

Allah arye Israel nang ati, “Wenepsenyopura, alye dakdanalume,” nyabuk yupu

⁵⁹ Allah arye, sik Israel yala nang ati nyabuk. Ura, dipkoprob nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye nyapsine. “Ara, anggun Yerusalem mutuku ululum nang, anggun wenena ati, weik ikin bobuka, anggun deice deipnamsine. Aning ara, angguncuk, pia malye weik winilamlum ning deice aryuk, wenepnamsine. Anggunda, pia malye winilamlum touk, narye pia ikin weik ning kipdeipsinya deice arye, wenepnamsine. Min talak ara, narye anggun Israel yala nang nirya ati, ‘Winibuka melipnamsine. Tonda, narye, ‘Aning ara, winipnamlume. Aning ara, pia kum winipnamlume,’ nyapdeipsinyeura, aninguk talibuka winipmunyeura, weik tonun ton melinamne,’ nyabuka, nyalin yupu deice arye nyapdeiamsise. Nyapdeiamsise bukni, angguncuk aning nirya ara bataknulume. Narye nyalin yupu arye nyapdeiamsise ning ara, anggunce, ‘Aning ara, nun like. Aning nirya kum talibuka wininamabe,’ nyaplumce, yanilamnuluma deice arye, malye weik ululume.

⁶⁰ Winibuka malye winilulum bukni, anggun wel atonun ulamlum talak, na kanye aryuk, anggunti, ‘Winipnamsine, winipnyeba, anggunda wininamlume,’ nyapdeipsirye, kintinip deiamse ning, tuba teninamne. Aning ara, na lubakina kumce, aning nirya ara, pia aupnamle ning uka. Pia min kum kum danamle.

⁶¹ Anggun, tuba tamubuka, anggun min talak malye weik winilamlum ninguk, tenipnamlume. Tenepmunyeura, anggun ilil upsilyeba, alye weik dakdanalume. Ara winipmanto, anggun kwitcapu kilapu atonun unyak nang ara, weit kil ap, du kil ap, narye tamubuka anggun damuk boyaniba, anggun adiparyuk ilil upnamsile. Aning winipyopura, amutuku bitinye urudak nang, sikda anggun kwitcapu kilapu atonun kipkipnirye, sik amu tam deipnyopura, unamake. Narye, ‘Sik Israel nang ap, na ap epdanuka, teleb kibuka neika unamap’ tenen, nyalin yupu deice nyapsise ning ara, anggunce ayupu talibuka, diksukumuk winilamluma deice arye kume. Tamubuka teleb kipdeipnamsina deiyok ara, na kanye aryuk winipnamsine.

⁶² Atalak ara, na kanye aryuk, ‘Winipnamsine, winipnyeba, anggunce aning ton winipnamlum,’ nyabuka nyalin yupu deice arye nyapsinirye, akunum teleb kipdeipsinyopura, anggun nirya arye, nati biknamnulume. Ara anggunce, ‘Se, nun ni koproba ara, dipkoprob Allah Yahweh ulule’ tenepnumunce, biknamnulume.

⁶³ Ati, narye anggun malye weik winilamlum ning ara, narye, ‘Teleb dauplye. Namin kibuka kilipnamsine,’ nyabuka, anggun malye winin ning kum kipdeipsinyopura, anggunce tuba tonap, ‘Se, nunda pia malye weik winilamupu,’ tenepmunce, alye weik dakdanalume. Anggun malye winilamlum ning ara, pia kum luba kipnamlum ati, anggunda pia ilil upsilyeba, alye dakdanamluma ati, aminyan doyanamle talak ara, yatato yupu do nirya, anggunce yupu ton, pia kum nyapnamlume. Aning nirya, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unune. Ati ara, narye ayupu nirya nyapmasina ati, aning nirya ara, dipkoprob nong upnamle! Allah arye, sik Israel nang ati, nyabuk.