Yehezkiel 15 - Eipomek

Allah arye, ‘Yerusalem mutuku nang wenepnamne’ tenen, winipmanto yupu deice arye, yo ap, anggur tapu taruk ap ati, nyabuk yupu

¹ Allah Yahweh arye, na Yeheskiel biti, nyapnuk yupu ara, ani.

² Se, Yeheskiel anda ninye sirika arye deipkikba ulyame. Narye asipdenukine. Moubuka tenipnulyame. Ara, anggur duk, el mitik taruk ara, ninye arye mitik taruk seklobikceba, ayo dobuka, pia teleb ning ton dobuka delinyak do? Tonda, yuk yala yo nirya ara, bai tam talye palamle yo ara, yala weik tikilule. Ninye arye ayo yala-yala nirya ara, koubuka, ayo dobikirye, yuk teleb ning memebuka donyak do? Kum do? Ninye arye, yata tenenyak do? Anggur tapu, el mitik taruk sekenyap ning ara, pia teleb bukni, yuk yo yala nirya, bai tam talye palamle kat yo nirya ara, ayo tomobuka deibibirye, yuk teleb ning kum doptibye,’ tenenyak do? Kume, an kele, aning kum tenenyake.

³ Winipmanto ara, sik amutuku noutam unyak nang nirya arye, anggur tapu mitik taruk ton sekuka dopropnarye, teleb ning memebuka delinyak do? Sik baju do, yuk bona do, ‘E, mitik taruk deice arye, nun bun ning memebuka deilinak ara, ayo arye ton memebuka deiptibye,’ tenenyak do, kum do?

⁴ Aning atonun, sik amutuku nang ara, sik aik uku dan yo ati, anggur tapu taruk ara, mitik ning sekuka, bobikceura, sik aik pum tam, uku dapmakce bukni, uku arye mitik yo taruk kup-kup dana-dana tam nirya ara, uku dibuka sirya daklyeura, ayo taruk noutam, tuba upmalye yo ara, doproptingce, teleb ning memebuka delinyak do? Kume, aning ara pia kum wininyake. Tonda, aning atonun, anggur taruk mitik nong noutam babye, uku arye dibuka, sirya daklyeura, uku kalum upnamle ning ara, doproptingce, teleb ning memepting do? Kume, aning babye, kum wininyake. Amitik tonun, yo taruk ara, uku arye akunum dibuka, sirya daklyeura, sikce bultakalule.

⁵ Tonda, anggur tapu yo taruk sekuka, uku min kum dapmakce talak ara, mitik yo dobuka, teleb ning ton kum memenyake. Aning atonun ton, mitik yo akunum uku dabikceba, uku arye akunum dibuka, sirya daklyeura, kalum buknamle ara, yata arye, akalum bobuka, aning arye teleb ning ton memepting do? Kume, aning babye, kum winipmanto.

⁶ Ati ara, na Allah Yahweh, weik tonun erebuka, aning-aning nirya talibuka, Pia Mikip Weik Deiyoknye unirye nyapsine. Ninye arye, anggur tapu yo ara, mitik taruk seklobikce ning ap, bai tam palamle yo ap, werebikirye, adiparyuk uku dalamak ning nirya ara, narye, ‘Sik uku dapnamak’ tenen, ayo nirya areamsise. Aning winilamse atonun, sik Yerusalem mutuku noutam, kam tuba unyak nang nirya babye, atonun winipnamne! Ara, anang bataknyeba, sik Babel mutuku nang arye, yanuka mal obikirye, sik mutuku tamubuka bobinamake.

⁷ Narye, sik amutuku noutam tuba unyak nang nirya ati, wenepnamne. Ara, Babel mutuku nang ati, lo arepnyeura, weik uku dilamle touk, ayu nang arye, Yerusalem mutuku yanuka, anang pia weik tonun arye, obuka sirya danamake. Winipnamne ati, sik anang ara, uku dilamle noutam ara, tonoknye babye, pia binmanto kum upnamake. Weik uku arye, yo nirya dibuka, sirya daklamle touk, Babel mutuku nang arye, sik anang nirya ara, obuka, malye kipnamake. Aning nirya ara, sik Yerusalem mutuku kam tuba unyak nang ati, weik tonun wenepnyopura, anggun anang nirya arye, ‘Se, diba nun ni koproba Allah Yahweh ara, dipkoprob aulule’ tenen, biknamnulume.

⁸ Amutuku noutam kam tuba unyak Israel yala nang nirya arye, diba kum tenelamnikce, ‘Allah arye nyapsilye yupu nirya ara, pia kum kekebuka talipnamabe,’ tenelamikce, yaninuk ulamnike. Winibuka, malye weik winilamika ati ara, amutuku tuku nirya ara, na taruk deice arye, malye kipdeipnyeba, ninye arye kounyak ning nirya ara, pia kum panamle. Amutuku unyak nang ap, sikce domik asik nirya ara, kum kipdeipnyeba, pia asik oldem upnamle. Nara Allah Yahweh, weik tonun erebuka, aning-aning nirya talibuka, Pia Mikip Weik Deiyoknye unirye, nyapsine. Ati ara, anyapmasin yupu nirya ara, dipkoprob nong upnamle! Allah arye, nabi Yeheskiel biti, ayupu nirya nyabukak, kekebukce sekdeibuk.