Yehezkiel 14 - Eipomek

Isa si erelamik nang ati, Allah arye wenepnamle ning ati, nyabuk yupu

¹ Israel yala nang, sik ninye deiyok nang nirya, yata barye nang arye, Israel mutuku talibuka ulamik nang nirya arye, na Yeheskiel dam yayikce, Allah Yahweh el tenelamuk ning ati, yanuka asilyanik.

² Winibikba, Allah Yahweh arye, na Yeheskiel biti nyapnuk.

³ “Se, Yeheskiel, anda ninye sirika arye deipkikba ulyame. Anda, sik ayanuka asipmakiyak nang ara, sik talima noutam nirya ara, talye ning isa si erenyak nang unyake. Anang ara, sik si erenyak ning dobuka, sik asing dinak deibikirye, tuba-tuba si erenyake. Amalye unyak ning deice arye, tuba malye winilinauk unyake. Winipmanto ara, ninye arye bisik banmanbuk, keil arye yan kisok duklyeba, sakuka poulbalamak touk unyake. Wininyaka ati, sikce nati yanuka asipdenetinga babye, yata deiyok ati, sik anang arye moropnamak yupu, kekepnamne do?

⁴ Ati ara, sik anang nirya ati nyapnulyame. Ara, Allah Yahweh el pia deice tam erebuka, aning-aning nirya talibuka, pia mikip ulul deiyoknye, elce nyapmasile. Sik Israel nang nirya arye, ‘Nun ni koproba ani’ tenen, sik talye ning si erenyak isa ati, pia diba tenebikirye, aisa bobuka, anggun kanye talima noutam ara, pia dongonyak nang ara, pia malye tuba wininyake. Wininyaka ati, anang kan-kan arye, tonoknye, na yupu lak nyana deiyoknye, dipkoprob nabi dam yalirye, nati moropnilyopura, na Allah arye, elti, tamubuka lak nyapdeipnamne yupu ara, ‘Isa si eren nang kekeptingʼ tenen, sik wenena ati, yupu nyapdeipnamne.

⁵ Winibuka nyapdeipnamne deiyok ara, ani. Ara, Israel yala nang kan-kan arye, isa si erelamik nang arye, wininyak ning deice, na dam arye kisikdakuka, yukak wininyake. Na dam yanuka, na siuk kum ereninyake. Wininyaka ati, isa si erenyak nang arye, na nabi nang dam yanuka moropnikceura, na nyanamne yupu deice arye, isa dam ara, narye na mapu koproba dobuka, kisikdakuka yukak deipnamne. Winipye deice arye, na mapu koproba, sikcuk ara, isa mer ati talibuka unyak ning ara, batakikirye, tuba tamubuka, na damuk deipnyeba, na tamuk yanganamake.

⁶ Ati ara, anda Yeheskiel birye, sik Israel yala nang nirya ati, lak nyapnalam yupu ani. Anggun ni koproba Allah Yahweh, pia deice tam erebuka, aning-aning nirya talibuka Pia Mikip Weik Deiyoknye ulirye, anggunti nyapsile. Ara, anggun malye weik winilulum ning nirya ara, adiparyuk batakmunce, amnyok kanipdongobuka, tamubuka na damuk yanamlume. Winipmunce, anggun si erelulum isa ap, patung memebuka, deilulum ning ap, aning ati, pia malye weik winilulum ning, pia weik tonun talye winilulum ning nirya ara, adiparyuk batakmunce, na dam tamubuka yanganamlume.

⁷ Ura, aning ara, talye ati kum nyapsine. Anggun moubuka kekepnululume. Yata nang do nirya, sik Israel yala nang do, yuk mutuku arye yanuka, sik ap neika unyak ninye asik nang do? Sikda nati, pera mutuku atonun umunce, isa ati, aning si erena ati, el si ara patung memebuka, anggun dinak deipmunce, si erelulum ning dobuka, anggun kanye talima noutam boplumce, aning ati, pia diba tenelulum nang ati nyapsine. Anggun kan-kan arye, na yupu dipkoprob lak nyana deiyoknye, nabinye el dam yalirye, “Allah tenelul ning ara, lak nyapnilyame,” nyabuka, morobuka, unyak nang ara, na Allah arye anggunti, lak nyapdeipnamne.

⁸ Ara naryuk, na yupu deice arye, anang ati asibuka, wenepnamsine. Tonda, ‘Yuk nang arye ton, anang malye wininyak ning eibikirye, atonun winibikcak’ tenen, weik ikin ning, sik nong deice deipnyeba, bikna atonun kipdeipnamne. Winipnyeba, yuk nang arye aning eibikirye, ‘Kume, aning atonun winipsilyak’ tenen, ‘Isa si pia kum erenamabe,’ tenepnamake. Tonda, winipnamne talak ara, narye anang dobukapnirye, na mapu koproba, sik Israel yala nang dam arye, bobuka deipnirye, obuka sirya dakamne. Winipnyopura, na mapu koproba, sik Israel nang nirya arye, ‘Se, diba nun ni koproba Allah Yahweh ara, dipkoprob aulule’ tenen, sikce nati biknamniake.

⁹ Tonda, Israel nang wenena ati, dipkoprob na nabi bukni, narye ‘Nyapnukine,’ nyaplyeba, tonoknye kekeplirye, talye yupu nyalya deice arye, talye-talye yupu lak nyapdeiptu babye, anggunce, ‘Kume, Allah elce anye talima noutam nyapdeibuk touk nyapmale,’ tenenamlume. Ara, sik Israel nang malye unyak ning, wenena ati, naryuk talye yupu nyalinune. Bukni, atalye yupu nyalul nabinye bira, wenepnirye opnamne. Na mapu koproba, sik Israel yala nang dam arye, dopkwetepnamne.

¹⁰ Pia teleb ning ara, winipnamne deice arye, isa si erenanye, na dam yanuka moropmalinye babye, anabi birye, ayanamlanye biti, lak nyapnamlanye babye, sik bitinye atonun, wenepnirye, opnamne! Ara, weik ikin wenen atonun ning ati, dopropnamake.

¹¹ Aning nirya ara, winipnamne deice arye, sik Israel yala nang nirya ara, tuba tonap, na dam arye kisikdakuka, yukak ton pia kum binamake. Winibuka, narye, “Aning ara, wininamlume. Aning ara, pia kum wininamlume,” nyapdeipse yupu ati, ton kum yanipnamake. Winibikirye, tuba malye weik kum wininamaka ati, na sik dam arye kisikdakuka, yukak kum binamne. Sikda telebukceura, narye anggunti, ‘Sikda, telebuk unyakak ati, tuba tonap, na dam yatinge,’ tenenamne. Malye winin ning ton bindobuka, kum unamake. Ati ara, sik Israel nang ara, na mapu koproba unamake. Sikda winikceura, na, anggun ni koproba Allah unamne. Nara Allah Yahweh, pia deice tam erebuka unirye, aning-aning nirya talibuka, Pia Mikip Weik Deiyoknye birye nyapsine.

Allah arye, tukwak mutuku nang nirya wenena ati, nyabuk yupu

¹² Aminyan talak ara, Allah Yahweh arye, na Yeheskiel biti, nyapnuk yupu ara, ani.

¹³ Se, anda ninye sirika arye deipkiknye ulyame. Yata mutuku nang do nirya ara, amutuku noutam ulamikce nang nirya arye, malye winilamtingce nati, ‘Elda pia diba kum tenenyaba ati, elce nyapsilye yupu, talibuka pia kum wininamabe’ nyabuka, bataklamniting toura, na adiparyuk amutuku noutam ulamikce nang nirya ati, wenebuka, weik ikin ning, sik deice deipnamne. Aning winipnirye, na taruk mikip arye, adiparyuk wa wilamik ning nirya, kum kipdeipnirye, sik din ning kintinibuka deilinyak ning nirya babye, malye kipdeipnamne. Winipnyopura, kanye imun weik din patan talak arepnyeba, yanamle. Tonda, amutuku nirya malye kipdakceura, amutuku noutam unyak nang nirya, opnyeba dibikceura, sikce taruk talibuka weinyak kam ulye ning nirya babye, obuka sirya daknamne. Winipyeba, atalak ara, yuk mutuku nang babye, amutuku kum yanuka unamake. Amutuku ara, asik oldem upnamle.

¹⁴ Winipmanto ara, pia ikin weik aulamuk bukni, na batakna kumce, pia diksukumuk winilamik nang, sik punun nang, winilye nang ara, Nuh ap, Daniel ap, Ayub ap nirya ara, amutuku noutam ulamtinga babye, sik awinilye nang, sikce pia teleb dolamika deice arye, sik nong koproba lyepdeiptinye bukni, yuk ning ton teleb kum kipdeiptinye. Yuk nang ap, yuk ning nirya ap, kum kipdeiptinye. Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyok ununye birye, nyapsine.

¹⁵ Winipmanto ning ton nyapnusin. Diba ato mutuku ati ara, na adiparyuk bai tam, yuk kam ning yu weik ning ton, sik si ara binatang buas, dobuka deiptinyeba, ayu weik kam ulul ning ara, yu kam do, yu singa kus do, yuk yala ning do yatingce, amutuku noutam unyak nang nirya, obuka diptinge. Amutuku nang nirya, obuka diptingba, yuk mutuku nang, dana-dana unyak nang, tonoknye babye, amutuku noutam kum binmanto uptingba, amutuku ara, tuba ton teleb kum uptue. Amutuku ara, pia asik oldem uptue.

¹⁶ Tonda, ato mutuku ubtu ura, min talak pia diksukumuk winilamik nang ara, Nuh ap, Daniel ap, Ayub ap nirya ara, amutuku yanuka uptinga babye, yuk nang nirya, pia kum lyepdeiptinge. Sik mining mapu babye, kum lyepdeiptinge. Akum bukni, sik tibuk lyepdatinge. Ara, sik nong atibuk narye lyepdeiptinye. Tonda, amutuku noutam unyak nang nirya ara, adiparyuk obuka, sirya daknyopura, dibinauk unamake. Anang arye deiamting mapu silip babye, kum lyepdeiptinge. Amutuku nirya ara, asik oldem upnamle. Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ununa birye nyapsine. Tonda, nara, pia kam ununye birye nyapsin ati, aning nirya ara, dipkoprob nong upnamle.

¹⁷ Winiptu ura, telebe. Winipmanto ning ton nyapnune. Aning atonun, arup lak nyapmanu mutuku atonun uptopura, naryuk, “Amutuku noutam ara, ninye ona ati, yu yin nang dopdeipnyeura, amutuku noutam nirya ara, ninye nirya obuka, sirya daknamake. Ara, ninye nirya, sikce weinyak kam ning ap, talye bai tam kam ulye ning ap nirya ara, obuka sirya daktinge.

¹⁸ Winiptinyeba, sik min talak pia diksukumuk winilamik nang winilye, Nuh ap, Daniel ap, Ayub ap, amutuku noutam ubtinga babye, sikce yuk nang nirya, pia kum lyepdeiptinge. Tonda, sik mining mapu babye, kum lyepdeiptinge. Akum bukni, sik pia diksukum wininyak deice arye, sik nong atibuk lyepdatinge. Dipkoprob ara, sik nong atibuk, naryuk lyepdeiptinye. Nara, Allah Yahweh, aning-aning nirya talibuka, Pia Mikip Weik Deiyoknye unirye, nyapmasina ati, aning ara tenepnirye, nyaptinyopura, dipkoprob nong upnamle!

^19-20 Aning atonun ton. Winipmanto ara, na Allah arye, yu weik upnilyeba, imun kanye bona ara, amutuku noutam arepnyeba, ninye weik nukmanto kum dipmakcebuk, tuba tamubuka, amutuku noutam, ninye ap, sikce talibuka weinyak kam ning ap nirya ara, diptingba, aning nirya kum kipdeiptinye. Winiptinyeba, sik min talak, pia diksukumuk winilamik nang winilye, Nuh ap, Daniel ap, Ayub ap, amutuku noutam ubtinga babye, sikce yuk nang nirya, pia kum lyepdeiptinge. Tonda, sik mining mapu babye, kum lyepdeiptinge. Akum bukni, sik pia diksukum unyak deice arye, sik nong atibuk lyepdatinge. Dipkoprob ning ara, sik nong atibuk, naryuk lyepdeiptinye. Nara, aning-aning nirya talibuka, Pia Mikip Weik Deiyoknye unune. Tonda, na Kam Pia Una Deiyoknye ununa ati, akunum nyapmasin yupu, ‘Winiptue,’ tenipnyopura, dipkoprob aninguk upnamle!

²¹ Ura, na Allah arye, sik mutuku imun kanye bona uk areptinyeba, ninye nukmanto kum dipting bukni, aning ara, mitik tonun winiptue. Bukni, ninye ara, yupa pia weik, nukmanto kum dipnamtinga ara, ani. Ara, na Allah Yahweh arye, weik tonun erebuka, aning-aning nirya talibuka, Pia Mikip Weik Deiyoknye ununa ati, narye kanye imun wenen ning, dumbarye dopdeiptinyeura, ninye nukmanto kum diptinge. Ara, pia kanye imun ning ara, Yerusalem mutuku noutam adumbarye wenen ning arepnyeba, amutuku noutam unyak nang ap, sikce weinyak kam ning ap, nirya kum kipdeiptinye. Awenen ning ara, ani. Ara, yuk mutuku yu nang wibuka, sik dam arepnyeba, anggunce Yerusalem mutuku noutam ululum nang ati, adiparyuk olyasitinge. Tonda, weik din patana deice arye, ninye weik diptinge. Tonda, yu weik talye bai tam daulul ning arye, ninye weik ton obuka diptinge. Tonda, imun kanye bobuka, Yerusalem mutuku noutam dobuka, deiptinyeba, ninye weika arye diptinge. Winiptinye deice arye, ninye nukmanto kum ap, kam ulye ning ap, weika arye opnirye, kum kipdeiptinye. Dipkoprob ning ara, sik Yerusalem mutuku noutam tuba unyak nang, malye weik wininyaka ati, sik wenena ati, imun kanye nirya bobuka, sik deice deipnamle!

²² Winipnyopura, ninye pia weik dipnamak bukni, Yerusalem mutuku noutam arye, Israel yala nang ap, kilapu ap, mapu ap ara, mitik tonun lyepdeipnamne. Ara, anggun Babel mutuku noutam ululum nang arye, min talak akunum deiamlum mapu ap, kilmapu ati nyapsine. Atalak ara, anggun mapu mitik tonun akunum lyepdeipsinyeba, Babel mutuku dam yakceura, anggun amutuku akunum ulamlum nang arye, moubuka dipdemunce, aning ara, biknamlume. Ara, Yerusalem mutuku noutam unyak nang arye, malye weik wininyak ning, akunum bikmunyopura, anggunce, ‘Se, wini talak nun akunum bikabe. Allah arye anang ati, yu ubukba wenebukce, imun kanye, sik deice delilamuk nang, weik akunum mereukuka obuke,’ tenemunce, biknamlume. Wini talak anggunce, ‘Se, yata deiyok ati, nun ni Allah arye, nun tam nang weik tonun wenebuka obuk do?’ tenepmaluma ara, atalak aryuk bataknamlume.

²³ Diba, wini talak, sik Babel mutuku ulamik nang ara, aminyan talak ara, Yerusalem mutuku noutam unyak nang arye, pia malye weik winilamik ning ati, akunum kekeplumce, moubuka bikmunyeura, anggunce, ‘Se, dipkoprob Allah arye, anang wenebuka obuka ara, diksukumuk kibuk,’ tenepmunce, biknamlume. Ati, na Allah Yahweh, weik tonun erebuka, aning-aning nirya talibuka, Pia Mikip Weik Deiyoknye unirye nyapsine. Narye, sik Yerusalem mutuku noutam tuba kam ulamik nang, pia malye weik winilamik ati, deiyok aubuka ati, anang ara, weik tonun wenebuka opse ara, pia diksukumuk winipse. Allah arye Yeheskiel biti, lak nyabukba, Yeheskiel birye sekuk.