Yehezkiel 13 - Eipomek

Minop talak, Yeheskiel birye sik tilila yupu nyalamik nabi-nabi nang ati, wenebuk yupu

¹ Allah Yahweh arye, na Yeheskiel biti nyamnuk yupu ara, ani.

² Se, Yeheskiel anda, ninye sirika arye, deipkiknye ulyame. Israel mutuku noutam ukirye, talye-talye yupu nyanyak nabi-nabi nang ati, wenen yupu nyapnalyame. Deiyok ara, anggunti, ‘Allah arye nyapsilye yupu deice arye nyasinyabe,’ nyabuka, nyanyak bukni, tilila yupu nyanyake. Ara, sik kanye tenen ning aryuk, tenibuka nyanyake. Sikda, talye yupu nyan nabi-nabi unyaka ati, anang dam nyapdeipkin yupu ara, lak nyalbinulyame. Ara, “Allah Yahweh arye, nyapsilye yupu ara, anggun moubuka kekeplulume,” nyabuka, lak nyalbinamlyame.

³ Allah Yahweh, weik deice tam erebuka, aning-aning nirya talibuka, Pia Mikip Weik Deiyoknye ulule. Elce nyapsile. Ara, anggun talye-talye yupu nyalulum nabi-nabi nang ara, anggunda pia bicoe. Ara, aminyan talak, Allah arye obuka, kum kipdeipnamsile! Deiyok ara, ani. Ara, Allah arye lengdar mana deice arye, mambul yupu anggun dam kum nyasiliba, anggunce kum elilulume. El yupu kum kekelulum bukni, anggun kanye tenina deice aryuk, tenibuka tilila yupu nyalulume.

⁴ Anggun tilila yupu nyalulum nabi-nabi nang ara, talye nang ululume. Winipmanto ara, bai tam talye ulamle yu kam yalirye, ninye arye aik dobuka batakamikceba, asik oldem wamlyak ulamaka atonun ululume.

⁵ Anggun tilila yupu nyalulum nabi-nabi nang arye, malye weik ululum ning ara, nyapnusine. Winipmanto ara, ninye arye, sik asik dana-dana tam antanap dongobuka domik keil poka noutam ara, yuk mutuku nang arye, ‘Anang opnuyap’ tenen, bisik botopdeiamika ara, adiparyuk abisik lipsisikuka dolamak touk, kum ulule. Tonda, yin talin nang arye, akeil poka deice tam welebikirye, amutuku nang ati, moubuka melibikirye, kaliklamak touk, anggunda kum winilulume. Anggunda, ‘Israel nang malye kibikcak’ tenen, moubulka, melibuka kum kalikilulume. Ati, na Allah Yahweh arye, tukwak nang nirya, sik malye uning wenena ati, aning nirya akunum opnyeba, daksaklyopura, olyanamsil talak ara, Israel yala nang ara, teleb kibuka kum tiknamake. Sik ti, wenepniba, ikin weik unamle. Ara, Allah Yahweh arye, ninye nirya ati, wenen sum akunum dam upnamle ati, nyapsine.

⁶ Sik tilila yupu nyanyak nabi-nabi nang arye, ‘Tuba-tuba lengdar mana deice arye, “Allah Yahweh arye, laka kipdeipmasil yupu, lak nyasinyabe,” nyabuka, tilila yupu nyanyak bukni, aning nirya ara, talye ning uka. Na Allah arye, anang wibuka, sik Israel nang dam kum dopkwecamse. Tonda, sikcuk tenibuka nyanyak yupu babye, kum nyapse. Sikce talye nyanyak bukni, sikce, ‘Kume, nunce lak nyasiyap yupu ara, dipkoprob nong upnamle’ tenen, tuba nyanyake.

⁷ Bukni, nara Allah Yahweh arye nyapsine. Anggunce, sik Israel yala nang ati, ‘Kume, Allah Yahweh arye, ayupu lak nyapsukba, nunce anggun dam laka nyanyabe,’ nyabuka, nyalulum ning ara, talye-talye nyalulume. Narye, aning nirya dipkoprob kum nyapsise. Tonda, anggunce, “Lengdar mana deice arye, Allah arye nyapsuka ara ani, ani,” nyabuka, nyalulum yupu deice arye, tilila yupu nyalulume. Narye lengdar deice arye, pia kum nyasununa atia.

⁸ Ati ara, nara Allah Yahweh arye, deice tam erebuka, aning-aning nirya talibuka, pia mikip weik deiyoknye unirye, anggunti nyapsine. Anggunce, ‘Lengdar mapmana deice, Allah arye nyapsuka ara ani, ani,’ nyabuka, nyalulum ning ap, tonda, ‘Allah Yahweh arye, ayupu lak nyapsukba, anggunce sik dam lak nyapnyabe,’ nyabuka, tilila yupu nyalulum ning ati ara, narye anggun wenena ati, weik ikin ning ara, anggun dekena ati, anggun nong deice deipnamsine. Dipkoprob ning ara, narye ton, “Anggun yupu bobuka nyalbilulume,” kum nyapdeipsise bukni, yupu nyalulume! Ati ara, nara Allah Yahweh, pia deice tam erebuka, aning-aning nirya talibuka, pia mikip weik ununye birye, anggunti wenepnamsine. Naryuk, ayupu akunum nyapsine.

⁹ Ati narye anggun talye-talye yupu nyalulum nabi-nabi nang nirya ati, na mikip taruk deice arye, ikin ning deipsinirye wenepnamsine. Winipnyopura, anggunda pia bicoe. Anggun talye-talye yupu nyalulum nabi-nabi nang ap, tonda talye ning tenilamunya ani, ‘Lengdar mana deice arye, aning ara elce lak kipdeipmasile,’ nyabuka, nyalulum nang nirya ara, wenepnamsine! Anggun anang nirya ara, na mapu koproba, Israel nang deiyok-deiyok nang arye, yupu tabikirye, ‘Aning ara, winipnamabe,’ nyabuka, sisikinyakak ara, sik ap neika wekelbana meme. Tonda, Israel yala nang, yala-yala yuk-yuk, si sekna buku deice sekuka deiamsikceba, wamsilya noutam arye, kiliplopnamsine. Winipsinyopura, Israel nang noutam bukni, sik mutuku noutam ara, tuba tonap, pia tamubuka kum yanuka wekenamlume. Winipyeba, anggunce, ‘Se, diba, Allah Yahweh elda, pia deice tam erebuka, aning-aning nirya talibuka, Pia Mikip Weik Deiyoknye, dipkoprob aulule,’ tenen, biknamnulume.

¹⁰ Se, aning nirya dipkoprob winipnamna deiyok ara, ani. Ara, anggun talye-talye yupu nyalulum nabi-nabi nang ara, na mapu koproba, sik Israel yala nang nirya ati, nyalamlume. ‘Kume, weik kanye imun ning ara, nun dam pia kum yanamsile. Nun nirya ara, talye kanye bobuka, teleb unamabe!’ nyabuka, pia tilila yupu nyalulume. Winipmanto ara, ninye arye, mikip pia kum keil poka tembok domikce, poka lokuka sakmanto uplyeba, sik amutuku deiyok nang arye, ‘Aning moubuka, kum teninamak’ tenen, anggunda talye yamunyak arye, abilinga likna mek, cat kurun ning arye liklamak touk, ululume. Ara, dipkoprob yupu nyana kum bukni, talye nyaltakan yupu atonun nyaluluma ati, nyapsine.

¹¹ Ati, an Yeheskielo, sik talye-talye yupu nyanyak nabi-nabi nang, sikce, mikip kum keil poka deice likne mek, cat kurun likne atonun unyak nang ati, nyapnamlame. ‘Anggunce talibuka domlum tembok ara, kurun cat mek liknalum bukni, dipkoprob akeil poka ara, akunum daknamle. Winipmanto ara, na Allah arye, weik kanye imun mok cepnamle. Tonda, moul weik es mok, Lim lumtaia dopkwetepniba yanamale. Winipnamna talak, kanye imun weik kumanya ara, pia mikip weik tonun puaplirye, dopnamle. Aning ap, tonda weik moul lumtaia, el si es ap, tabakuka dopkwetepniba, akat keil arye deibuka, doplum poka nirya ara, ulubuka, saknamle.

¹² Winiplirye, ulubuka saknamle. Aning winiplyeura, ninye nirya arye eibikirye, anang nirya ara, tuba-tuba asinamsiake. ‘Se, yata deiyok ati, nunce deibuka dobupu keil poka ara, akunum dalubuka sakmal do? Sik deiyok-deiyok nang arye, kurun cat mek, akeil poka deice, cat mek liklum ning ara, wini talak dan sukum ubuk do? Apoka nirya ara, akunum sakuka, tuku deice poulbinmal atia!’ nyabuka, malye nyabuka engebikirye, nyanamake.

¹³ Nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye birye nyapsine. Na yu weik unilyeba, ninye tukwak nang nirya ara, anggun ap, wenena ati ara, kanye imun weik umunya ap, pia mikip mok ap, lim lumtai el si es mok ap, dopkwetepniba yalirye, anggun domlum keil poka ara, dalubuka, sice buklopnamle.

¹⁴ Anggunce, ‘Ninye moubuka eibikirye, ninye arye dipkoprob kum teninamak’ tenen, kurun mek cat dobuka, likamlum keil poka ara, narye pia yu tenepnamne talak ara, aning nirya ulultaknauk upnamne. Amutuku arye, doplum keil poka ara, daluplopniba, el ayukumna ikuka dolalum ninguk, lak uplyeba, ninye nirya arye eipnamake. Acang keil poka ara, adiparyuk dalubuka saklirye, anggun nong deice opsilyopura, anggun nirya kum kipdeipnamsine. Obuka bataksilyeba, tuba kam unamak nang ara, eibikca deice arye, ‘Se, Allah Yahweh elda, dipkoprob aulule’ tenen, biknamake.

¹⁵ Yerusalem mutuku dana-dana tam domik keil poka ap, akeil poka deice mek likna, el si cat mek aryuk likuka, kurun mek cat arye, liklamik nang ap, amutuku noutam ulye ning nirya ara, na yu arye akunum uluplopnirye, sirya obuka, sice buklopnamne. Aning winipnyeura, naryuk tamubuka, sikti nyapnamne. “Anggunce domlum keil poka ara, akunum kum kipmalce, sirya dakmale. Tonda, “Akeil poka namin kipmal ning ara, ‘Moubuka kum eipnamak’ tenen, mek koproba, el si kurun mek cat aryuk, likuka liklamik nang ara, akunum kum kipdeipmane. “Nyapnamnarya!’ tenen, nyapmane.

¹⁶ Ara, yuk nang ati kume. Ara, anggun talye-talye yupu nyalulum nabi-nabi nang atia. Anggun kanye aryuk tenibuka nyalulum ning ara, ‘Kume, Yerusalem mutuku ap, nun nirya ara, teleb unyabe. Aminyan talak ara, ikin nun dam pia kum yanamle. ‘Mal olana kumce, talye kanye bobuka, teleb neika unamabe,’ nyabuka, tilila yupu, pia nyalulume. Bukni, aning nirya ara, talye nyaltakna yupu nyalulume. Ayupu nirya ara, na Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye birye, akunum nyapsine.

Min talak Israel yala kilapu arye, ‘E, sik nabi nang arye, wininyak ning atonun, nun babye atonun winibuka uptibye’ tenen, malye ulamik ati, sekuk yupu

¹⁷ Allah Yahweh arye, na Yeheskiel biti, nyapnuk. Wini talak ara, Yeheskiel anda ninye koproba aryuk deipkiknye ulyame. Anda sik amutuku ukirye, malye-malye unyak kilapu ati, wenepnalyame. Ara, amutuku noutam arye, sik akilapu nirya ara, ‘E, sik nabi-nabi nang arye, mambul yupu nyanyak touk, nun babye atonun kibuka nyaptibye,’ tenebikirye, sik kanye deice aryuk tenibuka, talye-talye yupu nyanyak kilapu ati, ance weik tonun, wenen yupu nyapnulyame.

¹⁸ Ance ayupu lak nyalbinamlyame. Allah Yahweh elda, pia deice tam erebuka, aning-aning nirya talibuka, pia mikip deiyoknye ulule. Elce, anggun Israel yala kilapu nirya ati nyapsuke. Ara, anggunce pia malye-malye pil, mem pil dolulum kilapu ati, nyapsine. Anggunce, ‘Yuk nang taliptibyeba, nun amu tam uptibyopura, nunce nyanyap yupu kekenamsiak’ tenen, mem ning kintinibuka delilulume. Ara, anggun nirya arye, ninye taruk dongona ati, atonun el si ara, toupnedama ara, ninye kisok nirya lelilongon ning, el si ara, kerudung wibuka, ninye weik tonun arelulume. Ara, ‘Winiptibyeba, anang nirya ara, nunce nyanyap yupu kekepsikirye, yanganamak’ tenen, winilulume. Aning winilulum ning ara, na mapu, sik Israel yala nang kan-kan arye, ‘Yata nang ton doproptibye do?’ tenen, dinauk ululumce, amem ning wibuka arelyame. Ara, nong cang nang babye, bumang nang babye, tonda wisi nang babye, mitik mapu babye, anang nirya ati, ‘Doproptibye’ tenen, dinauk ululume. Ati ara, na Allah arye asipdesine. Sik babye, anggun kam una ara, kalikilanauk ululum bukni, na mapu koproba, sik talye daunyak Israel yala nang ara, ‘Dadiptinga babye telebe,’ tenenauk ululum do? Winilulum ning ara, pia malye weik ululume.

¹⁹ Anggunda, na mapu koproba, Israel yala nang noutam arye, ninye weik tonun, akunum doproplume. Tonda, anang weik tonun, akunum oplume. Anggun mem pil dolulum deice arye, ninye weik tonun, akunum olulume. Winilulum talak ara, amem pil dekna ati, yuk nang arye, sikti, dekna arebikirye, anggun mem pil dolulum ning ara, pununyake. Winibikceura, anggunce mitik-mitik ning dololulume. Ara, gandum el duk ap, roti kwaning tobuka, el bun dolona ap ati, ‘Naʼ tenen nang olulume. Anang ara, malye kum ulamik ati, kam tuba upting bukni, anggunce, anang oplume. Tonda, deiyok auplyeba, ‘Mouple’ tenen, wenebuka opnamting nang ara, anggunce melibuka kalikmunyeba, kum wenebuka onyake. Amalye winin nang ara, tuba kam unyake. Israel yala nang arye, tilila yupu weik tonun kekebikirye, diba tenenyak nang unyaka ati, anggun mem pil doplum kilapu arye, anang ati, tilila yupu nyalulumba, diba tenenyake. Awiniluluma deice arye, pia malye weik ululume. Winilamlumce, na mapu koproba, sik Israel nang ati, malye yupu nyalilamlumba, anggunce, sik nyapne yupu ati, diba tenelamik.

²⁰ Ati ara, na Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye birye, anggun mem pil dolulum kilapu ati nyapsine. ‘Anggun mem pil dolulum kilapu arye, memebuka memelulum toupne dama nirya ara, na pia dina ara, lik weik,’ unulule. Ati, na mapu koproba, sik Israel yala nang ati, ‘Dadipting’ tenen, sik taruk dongona ati, toupne dama arepmunyeba, dongonamak ning nirya ara, adiparyuk na mikip arye, buluklopnamne. Winipye deice arye, anggun taliplum nang nirya ara, naryuk lopdeipyeba, kam unamake. Winipmanto ara, ninye talye bai tam balamle maka olbalamak touk, anggun mem pil dolulum kilapu arye, ‘Naʼ tenen nang, weik tonun olbalulume.

²¹ Ati ara, na Allah arye, anggun kilapu ara, kisok deice kouna ati wilulum ning, el si kerudung nirya ara, narye kwilikuka bataknamne. Winipnirye, ‘Naʼ tenen nang, sik Israel yala nang ara, bobuka yuk telebak deipnamne. Atalak arye dipdongobuka, doyanamle talak nirya ara, anggun mem pil dolulum kilapu arye, anang ton kum onamlume. Aning winipyopura, anggun malye winin kilapu ap, anang nirya arye, ‘E, diba Allah Yahweh ara, dipkoprob aulule’ tenen, biknamnulume.

²² Sik pia teleb diksukumuk unyak nang ati, yuk-yuk ning, sik dam ton kum winipse bukni, anggun mem pil dolamlum kilapu arye, minin yupu nyalamlum yupu arye, sik talima noutam ara, mitik tonun arye, kanye tenilamikce, imun kanye bobuka ulamikce, ‘Se’ tenen, talima dakalsaknauk ulamuk. Bukni, sik malye ning talibuka, malye weik wininyak nang ati, sikce, “Kume, anggun malye weik winilulum ning ara, batakna kume. Talya lubakibuka wininamlume. ‘Allah arye wenebuka opsilyak’ tenena ara, pia meme,” nyabuka, nyalamluma ati, anang ara, malye winin ninguk, tuba unyake.

²³ Ati ara, wini talak arye dipdongobuka, doyanamle talak nirya ara, sikce, ‘Kume nun lengdar mapmaba deice arye, mambul ning elinyabe,’ nyabuka, tuba kum nyanamlume. Tonda, anggunce, “Kume, nun ap, akunum diamik nang, sik kanye ap, yupu sisikinmapce, sikce nyanmasiak yupu ara, ani,” nyabuka, pia tuba kum nyanamlume. Anggun kanye aryuk, talye tenebuka nyanmalum ning nirya ara, kum kipdeipnamne. Winipye deice arye, na mapu koproba, sik Israel yala nang ara, anggun malye winin ninguk, talibuka ulamluma kan-kan, ulamik nang ara, naryuk lyepdopnamne. Aning nirya akunum winipnyopura, sik amutuku ulamik nang nirya arye, nati ara, ‘Se, diba, Allah Yahweh ara, dipkoprob aulule’ tenen, biknamnulume.