Yehezkiel 12 - Eipomek

Allah Yahweh arye, ‘Israel nang ikin weik unamle ning ara, bikilin ning ati, lak nyabuk yupu

¹ Allah Yahweh arye, na Yeheskiel biti, ayupu ton ap lak nyapnukba kekepse. Ara, ani.

² “Se Yeheskiel, anda ninye koproba aryuk, deipkiknye ulyame. Anda malye unyak nang kan-kan noutam arye ulyame. Ara, sik Israel nang arye, na Allah ati, moubuka kum teninyakce, na yupu tuba-tuba yaninyake. An ap, anang ap, neika ululume. Ati, sik Israel nang ara, asing aulul bukni, sik moubuka kum elinyake. Atonun, sik amul aulul bukni, pia moubuka kum kekenyake.

³ Sikce na unye ning winipnyeba, kum elinyak ning ap, na nyanun yupu kum kekenyaka ati, deiyok ara, sik anang nirya arye nati, moubuka talibuka, kum wininyake. Sikce, ‘Allah ara, nun lik’ tenen, yaninuk unyake.

⁴ Ati ara, ‘Israel yala nang biknamak’ tenen, narye an Yeheskiel biti, bikilin ning atonun, akunum dopdeipkine. Ati ara, winipnamlyame. Ara, keting noutam tuba auplye talak aryuk, an bona nirya ara, moubuka kintinibukapmince, sik anang dinmace sukum arye, bobuka banalyame. Ara, ton tam nang arye, yuk mutuku nang ati, obuka malye kibikirye, ‘Nun mutuku tamubuka bobinamap’ tenen, “Kintinipnulume!” nyabikiba, aobikce nang arye, ninye asik nang atonun kibuka, sik bona kintinibikirye, dobuka bolamak touk, an Yeheskiel babye, atonun winipnalyame. Winipminyopura, sintam babye, inilamle talak babye, lukunyan talak babye, atalak nirya ara, adiparyuk aning winipnalyame. Ara, ton tam nang arye, ton tam nang ati obikiba, sik amu tam unmakce nang arye, sik bona kintinibikirye, balolamak touk, an babye atonun winipnalyame.

⁵ Tonda, atalak babye, sik anang dinmacak, anyasik domikak, dana-dana tam nirya, antanap dongobuka domik cang keil poka dam bimince, bai tam bisik ati, bisik ton botopdeipnalyame. Bisik botopdeipminyopura, sik anang nirya arye, eibuka bikinamake. Tonda, aning ance moubuka dongopmince, kitaminye kitin ara, dopropmince, poka noutam botopdeiplum bisik arye, bobinamlyame.

⁶ An takunya deice ato kitin ara, abisik botopdeiplum bisik arye, binulyame. Ara, iniplye talak babye, tonda benalam lukunyan talak babye, pia adiparyuk banamlyame. Atalak ara, ‘Na binamne bisik ara, pia kum eipnamne’ tenen, an asing nirya ara, baju arye lelipdongopmince, binamlyame. Ara, ‘Atalak abinaman bisik bana ara, kum biknamne’ tenen, bikilina ati winipnalame. Ara, ance awinimalam ning nirya ati ara, sik Israel mutuku noutam arye batakuka, pia pera karin mutuku binuka, unamak nang arye, eipnamaka ati nyapkine. Winipminyeba, sikce, ‘Se, Yeheskiel birye winipmal touk, nun babye, aminyan talak winipnamle. Tonda, yuk mutuku nang arye, bobuka deipnamak mutuku ara, kum biktibye!’ tenen, ‘Bikikirye, moubuka teninamak’ tenen ati nyapkine.

⁷ Ura, na Yeheskiel bira, adiparyuk Allah arye, “Aning ara, winipnamlume,” nyapdeipnuk touk, akunum winipse. Ara asum, adiparyuk, keting noutam talak aryuk, na bona nirya ara, dobukapsirye, kitibuka sengapse. Ara, ton tam nang arye, ton tam nang ati, mal obukabikirye, sik mutuku bobiceba, anang arye winice touk, na babye winipse. Atonun, lukunyan talak akunum ubukopura, amutuku batakuka, bai bisik banak ati, akeil poka noutam ara, na taruk deice aryuk, bisik botopdeipse. Winipdeiamse aryuk, na bona nirya ketinibuka deipse ning ara, na takunya deice takubuka bindopse. Winipsopura, sik anang nirya arye, moubuka eipnikce bikik.

⁸ Winibuka, mapmasa berekukopura, ambusumto ara, Allah Yahweh arye, na Yeheskiel biti, na dam nyapnuk yupu ara, ani.

⁹ “Se, Yeheskiel anda, ninye sirika arye deipkiknye ulyame. Ance apil nirya dominyeba, sik Israel yala nang, pera mutuku noutam tuba unyak nang nirya ara, na Allah ati, ‘Elda nun ninye deiyoknye, nun ni aulule’ tenen, moubuka kum tenenyak nang unyake. Ati, sikce an pil dolamlum ning eipkikirye, anti akunum asipdekik do? Diba, sikce, ‘Se, Yeheskiel, ance apil dopmom ning ara, yata deiyok ati, apil dopmom do?” nyabuka, akunum asipdenamake.

¹⁰ Ati ara, ance sik Israel nang nirya ap, sik ninye deiyok nang nirya ara, narye nyapnukin yupu, ara anggun anang nirya ati nyapkine. Ati, an Yeheskiel birye, ayapnukin yupu dobuka, anyapmakin nang nirya ati, lak nyalbinalame. Ayupu ara ani. Nara, “Allah Yahweh, weik arye eitam erebuka, aning-aning nirya talibuka, pia mikip weik deiyoknye unune. Wininuna ati, Yerusalem mutuku noutam ululum Israel yala nang ap, anggun nirya ati, talibuka deiyok-deiyok kibuka ululum deiyok-deiyok nang ara, ayupu nyapsine.

¹¹ Allah arye, na Yeheskiel dobuka, anggunti, lakin ning deipnuka ati, anggun moubuka tenipmunce, biknamlume. Narye, apil donmanuba, eipmalum nang nirya ara, Allah arye aning atonun, anggun wenena ati, atonun winipnamsile. Ara, aminyan talak ikin ning yanuka, anggun deice deipnamsil ati, nyapsine. Ara, Israel mutuku noutam unyak nang bukni, Yerusalem mutuku noutam unyak nang ara, Babel mutuku yu nang arye, yanuka opsikirye, anggun mutuku tamubuka bobinamsiak ati, nyapsine. Babel mutuku unyak nang arye, anggunti yanuka opsikceura, tuba kam unamak nang ara, bobuka, sik mutuku bobinuka, wenen aik deipnamaka atia. Ati, anggun moubuka teninamlume.

¹² Diba, atalak ara, sik Israel yala nang kankan unyak deiyok-deiyok nang ara, sikce talinyak bona nirya kitibuka deipmakce ning, lukunyan talak akunum uplyeura, adiparyuk abona dobuka, sik takunya deice takubikirye, adiparyuk bobinamake. Ara, ‘Nun mal olan nang arye, opsicak’ tenen, ilil uplyeba, sik asik dana-dana tam, weik keil dobuka, domik poka noutam, sik taruk arye, bisik botopdeibikirye, abotokmakce bisik kin-kin ara, adiparyuk aninye deiyok nang ara, kutuksakuka binamake. Atalak ara, sik asing nirya ara, lelipdongobuka binamak talak ara, sik binamak bisik ap, binamak mutuku ap, kum eibuka biknamaka atia. Sikda, talye mangkau binamake.

¹³ Anang ara, ‘Bikbik abuka bibirye, lyepdanamap’ tenen, binamake. Bukni, winipmanto ara, na Allah arye sik ninye deiyoknye Raja, el youna ati, el si ara jala deipnamne. Ara, ikan dobuka ona ati atonun ning ara, kintinip deipnamne. Winipnirye, Israel yala nang, sik ninye deiyoknye, Raja bobuka, Babel mutuku dobuka bobinamap’ tenen, bisik binamake. Bukni, winipnamne talak ara, elti, tapu koubuka bobinamak mutuku, Babel mutuku ara, el asing arye kum eipnamle. Abinuka deipnamne mutuku noutamuk, dadipnamle.

¹⁴ Tonda, wini talak ara, na Allah arye, el taleamuk mutuku noutam ulamik nang ap, el melilamik deiyok-deiyok nang ap, el yin talin nang nirya ara, sik wenena ati, yakuka dopkweteptinyeura, mutuku sirya, im sirya, yuk-yuk mutuku noutam dabindopnamake. Bukni, narye lo arepyeba, yuk mutuku yu nang arye, sik deiyoknye Raja, amu tam pil dobuka melilamik nang nirya ati, dobolbanauk ulamikca ani, adiparyuk anang nirya, yu parang ya arye, obuka sirya daknamake. Aning nirya ara, na Allah arye!

¹⁵ Sik mutuku talibuka ulamuk Raja ap, amutuku nang ap, sik talibuka unyak nang deiyok-deiyok nang ap nirya dopkwetepniba, yuk mutuku noutam dabinamak talak ara, sik nirya arye nati, ‘Se, Allah elda, dipkoprob, Pia Mikip Weik Deiyoknye Allah Yahweh ulule’ tenen, biknamniake.

¹⁶ Sik Israel nang kan-kan arye, ninye dekna ara, mitik tonun bobuka, ‘Naʼ tenen deipnyeba, kam tuba unamake. Sik anang ara, mal olalamik talak ap, weik kanye imun din patan talak ap, weik kanye imunuk, yala dipnamle talak ap, anang boknirye, lyebuka teleb kipdeipnamne. Winipyeba, sik yuk pera karin mutuku noutam, ninye asik nang atonun kibuka unamake. Atalak noutam ara, anang nirya, sik ikin weik unamak ning nirya ap, pia malye ning, sik dam yalyeba, ikin weik unamaka nirya ara, aminyan talak sikce lak nyalanamake. Winibikcopura, sik Israel yala nang nirya arye, nati, ‘Se, Allah Yahweh ara, elda dipkoprob eitam erebuka, pia mikip weiknye ulule’ tenen, biknamake.

Allah arye, nabi Yeheskiel biti, tuba tonap, yupu ton dukdongobuka nyabuk ning ati, sekuk yupu

¹⁷ Aminyan talak ara, tuba tonap, Allah Yahweh arye, na Yeheskiel biti, yupu ton nyapnuk. Nyapnuka ara, ani.

¹⁸ Se, Yeheskiel anda, ninye koproba aryuk, deipkiknye ulyame. Atalak ara, ance din dobuka dinamlam talak ara, an nong nirya ara, sirim talinamkile. Aning atonun, an mek dobuka dinalam talak ara, ance, ‘Se, ikin weik ning ara, yata atonun nun dam yanamsil do?’ tenen, ilil pia weik upkilyeba, an nong nirya ara, sirim talinamkile.

¹⁹ Winipkilyopura, ance amutuku noutam tuba kam unyak Israel nang nirya ati, sik dam binuka, ayupu lak nyapnalyame. Ara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, sik Yerusalem mutuku, weik asik domika noutam tuba ululum nang ati, nyapsile. Ara, anggun anang nirya, din dinamlum talak nirya ara, ilil pia weik upsilyeba, anggun nong nirya sirem talinamsile. Atonun, anggun mek kwebuka dinamlum talak nirya ara, ‘Se, ikin weik ning, nun dam yanamsila ati, yata winiptibye do?’ tenen, kanye teniltonauk upsilyeba, anggun nong bol nirya ara, bol tililing apsilyeba, anggun nong nirya sirem talinamsile. Winipnamaka ara, talye ati kum bukni, deiyok ara ani. Ara, aminyan talak ara, sik unamak mutuku ap, amutuku noutam ulye ning ap nirya babye, pia malye unamle. Deiyok ara, wini talak sik mutuku noutam unyak nang nirya arye, pia yu weik uplirye, ‘Nun lik,’ tenelanauk ubikirye, pia tuba-tuba malye unamake. Wininamaka ati, ninye mal olana ap, walana ap, malye kililana ap, ubula dona ap, upnamaka deice arye, amutuku teleb ulye ning nirya ara, pia kum danamle.

²⁰ Atalak noutam ara, Israel yala nang ululum mutuku nirya ara, pia malye uplyopura, aik oldem upnamle. Anggun weik asik dolamlumak nirya babye, yuk mutuku yu nang arye yanuka opsikirye, sice bukuka bataknamsiake. Atonun, anggun wa wilulum tuku nirya babye, adiparyuk malye kipdeipyeba, aning-aning nirya kum mutuku upnamle. Anggun wenena ati, arepnamsin ikin ning nirya ara, anggun kam tuba unamlum nang nirya arye, ‘Se, Allah Yahweh, elda dipkoprob aning-aning nirya talibuka, Pia Mikip Weik Deiyoknye ulule’ tenen, biknamnulume.

Allah arye, “Aminyan talak winipnamsine,” nyapnamle yupu nirya ara, dipkoprob nong upnamla ati, nyabuk yupu

²¹ Aminyan talak, Allah Yahweh arye, na Yeheskiel biti nyamnuk yupu ara, ani.

²² Se, Yeheskiel anda, ninye sirika arye, deipkiknye ulyame. Yata deiyok ati, sik Israel yala nang nirya arye, ayupu, winipmanto yupu ati, tuba tenekirye, si pia tuba-tuba nyanyak do? Sikce nyanyaka ara, ani. “Allah arye, nyalye yupu kekebikirye, lak nyanyaka deiyok nang ara, sik nabi-nabi nang arye nyasinyak yupu nirya ara, talye-talye nyasinyake. Keting tamun yupa weik upnamtibya babye, sikce nyasinyak yupu nirya ara, nong pia kum unamle,” nyabuka, malye nyanyake.

²³ Sik Israel yala nang arye, ayupu tuba nyanyaka ati ara, ance anang ati nyanamlyame. Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye birye, ayupu nyapsile. “Anggunce amalye yupu nyalulum ning ara, kum kipdeipnamne. Aning ara, tuba kum nyanamlume. Israel yala nang unyak mutuku nirya ara, ayupu pia kilipnamne. Ayupu pia kum kipdeipnamne atia. Bukni, anang dam ati nyapnamlyame. Allah arye aning punupnirye, anyapnusin yupu uk, nyanamlyame. Ara ani. Siriya daknamle talak ara, akunum dam upsile. Ati, na Allah arye, lengdar mana deice arye, sik nabi-nabi nang ati, yupu areplyopura, aning nirya ara, dipkoprob nong upnamle. Nong uplyopura, anggunce adiparyuk eipnamlume. Sik nabi-nabi nang arye nyalilamik ning ap, nyanamak ning ara, akunum dukdongopnirye, lak kipdeipnamne.

²⁴ Ati ara, atalak arye dipdongobuka, doyanamle talak nirya ara, sik Israel yala nang nirya ati, talye yupu nyanyak nabi nang arye ton, pia kum tikuka nyanamsiake. Tonda, sik tilila yupu nyanyak nabi nang arye, ‘E, atilila yupu nyapnyeba, amutuku nang arye, nati, kanye delinamnika ati, talye yupu uk, nyanamne’ tenen, tilila yupu ton, pia kum nyanamake. Atilila yupu nyanyak nabi nang nirya ara, kum kipdeipnamne atia.

²⁵ Nabi-nabi nang arye, talye-talye yupu ton, pia kum nyapnamak bukni, nara, Allah Yahweh arye, anggun Israel nang ati, dipkoprob yupu nyanamsine. Narye nyamsin yupu nirya ara, narye pil dopnyeba, aning nirya dipkoprob nonguk upnamle. Tonda, “Tuba asum-asum nong upnamle. Aminyan talakuk nong upnamle,” nyabuka, kum nyanamsine. Aning kum bukni, narye, ‘Winipnamle,’ nyapnye touk, adiparyuk, anggun kam tuba unamlum talak, dipkoprob nong upnamle! Ati kekepnululume. Se, anggunda wini talak ululum nango. Anggunda, moubuka kum tenibuka ululume. Anggunce nati, ‘Kume, Allah arye nyapsilye yupu nirya ara, nun like,’ tenenyaba ati, ‘Aning ara, pia talibuka kum unamabe’ tenen, yaninuk unululume! Bukni, atalak arye dipdongobuka, doyanamle talak ara, narye, “Winipyeba, aning-aning ton upnamle,” nyanamne yupu ara, na adiparyuk, aninguk dipkoprob winipnamne. Nara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unirye, ayupu akunum nyapmasina ati, dipkoprob nong upnamsile! Allah arye nyabuk.

²⁶ Nyapnuk ura, aminyan talak ton, Allah Yahweh arye, na Yeheskiel biti, nyapnuk. Ayupu ara, ani.

²⁷ Se, Yeheskiel, anda ninye sirika arye, deipkiknye ulyame. Sik atalak unyak Israel yala nang, amutuku noutam unyak nang nirya ara, ance nyaplum yupu ati, winibuka nyakinyake. “Kume, Yeheskiel bira, lengdar mapmana deice arye bikukce, wini talak nyasul yupu ara, aupmal bukni, ayupu nong upnamle talak ara, wini talak kume. Ara, nun atalak unyap nang deice, ikin ning kum yanuka unamsil bukni, pia doyanamle talak lak uplyeba, nong upnamle. Ati ara, nun kanye deice arye teneninyap ninguk, tuba talibuka unamabe,’ tenenikirye, nyakinyake.

²⁸ Ati ara, sik anang nirya ati, nyapnulyame. Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, ayupu akunum nyapmasila ati, dipkoprob atalak aryuk, nong upnamsile! Allah Yahweh arye, akunum nyapdeipmasil yupu nirya ara, dipkoprob atalak noutam nong upnamle. Ati, anggunce, ‘Kume, ara osum, oketing tamun, aminyan doyanamle talak upnamle,’ tenena kume. Aning kum bukni, narye nyapsine. Arup ton nyapman yupu ara, adiparyuk pil dopnyeba, dipkoprob lak uplyeba, nong upnamle! Nara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unirye, ayupu akunum nyapmasina ati, dipkoprob atalak aryuk, nong upnamsile! Akunum nyapmasine. Yeheskiel, ance ayupu kekepmince, sik Israel yala nang nirya ati, lak nyalbinamlyame, nyapkine. Allah arye nyabuk.