Yehezkiel 11 - Eipomek

Israel nang, sik deiyok-deiyok nang nirya ara, Allah arye wenepnamle ati, nyabuk yupu

¹ Aning nirya, akunum winibukba eibukopura, aning ara, Allah el Pia Teleb, Lek Dip Kanye arye, na Yeheskiel biti, inibuka bobinukce, mitik otam deipnuke. Elce deipnuka ara, Allah Yahweh el si eren aik dam bukni, keting panalyangan tam ara, keil arye cang poka domik, anyasik dam wekna ati, bisik bublan botopdeiamik ning ara, bisik bublan dam deipnuke. Asukum ara, narye dilamsak, bisik bublan dam bulubuka tikmek nang ton, eipse. Ara, anang nirya ara, dua puluh lima (25) nang unmikak eipse. Aunmeka noutam ara, sik amutuku taleamdik nang, deiyok nang bitinye eipse. Ara, ninye si Asur, elce deiamuknye Yaazanya ap, tonda Benaya elce deiamuknye Pelaca ap, unmikak, narye eipse.

² Atalak ara, Allah arye, na Yeheskiel biti nyapnuk, “Se, Yeheskiel, anda ninye sirika arye deipkiknye, Yerusalem mutuku noutam ati, amutuku nang yanuka, malye-malye yupu nyarurak ning ara atia. Ance aning ara, eipmalame. Tonda, sik anang arye, ‘Malye weik un ning winiptibye’ tenen, amutuku nang dam yarikirye, ‘Winipnamap, winipnamap,’ nyabuka, malye yupu ap, talye yupu ap, weik tonun nyarurake.

³ Ara, sik abitinye nang arye nyarurake. “Kume, minopce nun mal olan nang arye, anyasik-anyasik nirya ulubuka, sice buklobik bukni, nun kanye ara, wini talak aryuk, anyasik-anyasik nirya ara, minpola tamubuka doptibye. Ara, Yerusalem mutuku weik asik, dana-dana aknapdongobuka, cang weik keil poka domik noutam unyaba ati, winipmanto ara, weik besi mek makau pum atonun unmabe. Ati, winipmanto ara, ninye arye, pia teleb tup dobuka, ‘Na tenen deipnamap’ tenen, besi makau yunmaka pum atonun, nunda amutuku noutam akunum aunmaba ati, nunda pia teleb unyabe. Asukum noutam ara, ikin ton, nun dam kum yasetue,” nyabuka, tilila yupu nyanyake.

⁴ Abitinye nang arye, amutuku nang kekenmacak arye, talye yupu nyaruraka ati ara, na Allah arye aminyan talak, amutuku nang ati, ikin weik ning arepnamaka ara, wenen yupu nyapdeipkin yupu nirya ara, ance kekepmince, amutuku nang ati, lak nyalbinulyame. Yeheskiel anda ninye sirika arye, deipkiknye ulyama ati, ance atalye yupu nyarurak nang ati, wenen yupu lak nyapnamlyame,” nyamnuk.

⁵ Nyapnukura, adiparyuk Allah Yahweh, el Pia Teleb, Lek Dip Kanye ara, na dam wekuka langdipbukce, na nong talibuka melipnukba, Allah arye nyamnuk yupu kekepse. Allah Yahweh arye nyamnuk yupu ara, ani. Nara, Allah Yahweh ununa ati, anggunda na mapu Israel yala nang ululume. Anggun nirya arye, anggun kanye talima noutam tenelulum ning nirya babye, na akunum moubuka bikisunune. Anggunce, ‘Kume, Yerusalem mutuku noutam, akunum yanuka unmaba ati, aminyan talak ara, ikin ning ton ap, nun dam kum yanamsile,’ tenelulum bukni, na Allah arye dipkoprob yupu nyapnusine. Ara, ani.

⁶ Min talak ara, anggunce yuk nang, pia weik tonun akunum omlume. Ninye weik akunum omlum ning ara, amutuku noutam balamik bisik nirya ara, anggun aopmalum nang, sik nong ara, pia weika arye langdilule.

⁷ Ati ara, nara, erebuka pia deice tam, aning-aning nirya talinirye, mikip ninye deiyoknye Allah Yahweh unune. Ati, anggun amutuku ninye nirya ati, nyapsine. Diba, Yerusalem mutuku noutam, weik asik dolamik ara, weik besi yun makau atonun ulule. Bukni, winipmanto ara, abesi makau pum tam ara, tup atonun aupmal bukni, ara sik Israel yala nang ati kume. Amakau pum tam tuba aunmal tup atonun ara, anggun mince ninye weik obuka bataklamlum nang, sik tup atia. Ati, narye anggun nirya ara, amutuku arye yakuka dopkwepnyeba, pia pera mutuku binamlume!

⁸ Tonda, anggun amutuku ululum Israel yala nang ara, ‘Se, nun osinyak nang ara, dan talak yakirye, sik yu parang ya arye opnamsiak do?’ tenen, pia ilil weik usulule. Ati, na Allah arye, aning-aning nirya talibuka, Pia Mikip Weik Deiyoknye unirye, anggun ilil weik tenelamlum ning dobuka, anggun deice deipnamsine. Winipnamsina ati, yuk mutuku yu nang arye, sik yu parang ya dobuka, olyanamsiake. Diba, narye nyapsinyeba, ayu nang arye, anggun dam yanuka mal olyanamsiake.

⁹ Anggun amutuku ululum nang ara, na Allah arye, adiparyuk opsinirye, amutuku noutam arye, yuk pera mutuku bobinamsine. Winipsinirye, yuk mutuku ninye asik nang ati, dobuka arepnamsine. Winipnamsina ara, narye anggun wenena ap, dibina ap, weik kanye imun wenen ning dobuka, anggun deice adiparyuk deipnamsine.

¹⁰ Winipsiniba, yu ninye asik nang arye yanuka, anggun amutuku ulamik nang weika arye, opnamake. Ara, sik yu parang ya arye, anggun amutuku ululum nang, yupa weik tonun obuka, sirya daknamake. Opsikcopura, weik tonun dipnamlume. Diba, anggun amutuku atam, yuk pera mutuku otam, danoutam, mutuku yuk-yuk bikilina ati, wililamik dam ara, narye anggun atam ululum nang wenebuka, weik tonun opnamsine.

¹¹ Ati ara, anyasik Yerusalem mutuku noutam ara, anggun talye kanye bobuka, kum unamlume. Anggunce, ‘Kume, anyasik noutam ara, weik besi makau pum tam atonun ululuma ati, nunda ninye arye, ‘Naʼ tenen, delinyak tup ning, besi makau pum tam ulamle touk, unmaba ati, ikin nun dam kum yasetue,’ tenelulume. Bukni, na Allah arye, dipkoprob nyapnusine. Anggunda, amutuku noutam ara, pia teleb dakeiam asa arye kibuka, kum unamlume. Besi mek makau pum tam, tup moubuka deibikiba ulamle touk, pia kum unamlume. Narye, anggun wenena ati, pia dobolyasinirye, adiparyuk yupu bokdeipsinirye, opnamsine.

¹² Winipsinyopura, anggun adiparyuk biknamnulume. Ara, anggunce, ‘Se, dipkoprob Allah Yahweh ara, aulule. Elda aning-aning talibuka, Pia Mikip Weik Deiyoknye ulule,’ tenen, moubuka biknamlume. Diba, nara Pia Mikip Weik Deiyoknye unirye, anggunti, “Aning ara wininamlume. Aning ara, pia kum wininamlume,” nyapdeipsise yupu nirya ara, anggunce yaninuk unululume. Narye, “Teleb winin ning ara, ani. Malye winin ning ara, mem,” nyabuka, sekuka areamsise yupu ara, moubuka pia kum kekelulume. Anggunce, talye bataknauk ulamlume. Aninguk kum bukni, tonda anggun mutuku dana-dana tam arye, antanap dongopsuk mutuku noutam unyak nang, yala-yala nirya, anggun kanye aryuk, ‘Diba’ tenebuka talinyak yupu ara, aninguk taleamlumce, ulamlume. Ati ara, na Allah arye, anggun Israel yala nang nirya ati, wenepsinirye, ikin ning anggun deice deipnamsine. Allah arye, na Yeheskiel, na kanye talima noutam nyapdeipnukba, ayupu tuba nyanmase talak ara, mambul ton ubukba eipse.

¹³ Na Yeheskiel birye, adiparyuk ayupu nirya tuba nyanmase talak ara, bikna kum, adiparyuk tonoknye, el si Benaya birye deiamuknye, Pelaca, elda tuku deice lokuka poulbiyukce, adiparyuk dibuk. El akunum dibukopura, na babye, ilil weik upnuka deice arye, adiparyuk tuku deice sakuka poulbisirye, weik yupu deice arye, nyapse. Ara, “Se na ni Allah, anda aning-aning nirya talibuka, Pia Mikip Weik Deiyoknye ulyame! Nun Israel yala nang ara, mitik tonun tuba kam aunmab nang nirya ara, adiparyuk opsimince, sirya daknamsilam do?” nyabuka, ngaluksirye, malye nyapse.

Allah arye, walwal lyamne nang atonun uamuk nang ati, “Winipnamsine,” nyapdeibuk yupu

¹⁴ Allah Yahweh arye, na Yeheskiel biti, ton yuk yupu dukdongobuka nyapnuk. Allah arye nyapnuk yupu ara, ani.

¹⁵ Se Yeheskiel, anda ninye koproba aryuk deipkiknye, ulyame. An ap, an kwitcapu ap, an mapu silip ap, tonda Israel yala nang, pia weik ara, yuk mutuku yu nang arye yanuka, opsikce, tapu koubuka, sik anang mutuku tamubuka bobisikceba, keting tamun weika arye, daulamunya ani, wini talak ara, Yerusalem mutuku tamubuka, akunum yanmalume. Atalak ara, walwalan nang atonun wamlumbuk, wini talak ara, akunum tamubuka yanmalume. Bukni, wini talak, Yerusalem mutuku weik asik noutam unyak nang arye, sik min talak yu nang arye, bobinamsik nang ati, ayupu nyasunune. Ayupu ara, ani, “Kume, pia pera yuk mutuku noutam bobinamik nang ara, min talak ara, Allah arye nyalamuk yupu nirya, yaninuk ulamik ati, sik wenena ati, Allah arye yu ubukba, lo arebuk talakuk, yuk yu nang arye yanuka, anang obuka bobiyik. Ati ara, Israel mutuku noutam tuku ara, nun ni koproba Allah arye, nun atalak asukumuk tuba unyap nang ati, akunum dobuka, nunti areamsukba, wini talak ara, nuncuk atuku talinyabe. Ara, nun tenen ninguk ulule.” Nyabuka, nyanyake.

¹⁶ Wini talak, amutuku unyak nang arye, ayupu nyanyaka ati, an Yeheskiel birye, amutuku nang ati, nyapnulyame. Kume, aning-aning nirya talibuka, Pia Mikip Weik Ulul Deiyoknye, Allah ara, ayupu nyapsile. Dipkoprob ning ara, min talak ara, sik yala nang ap, sik kwitcapu ap, weik tonun, yuk pera mutuku, dawangapdanmanto ulamik. Narye sik wenena ati, anang dobuka bobisirye, pia karin, yuk-yuk mutuku noutam deipseba, daulamik. Winilamik bukni, sikda yuk mutuku nang noutam daulamik talak nirya ara, naryuk sik Israel nang nirya ati, pia melibuka kaliklamse. Sik wenena ati, tiya talak, pera mutuku noutam deipseba, daulamik bukni, wini talak ara, sik dobuka, tuba tamubuka, anggun mutuku koproba, boyangasunune.

¹⁷ Ati ara, an Yeheskiel birye, nyabuka lak nyanamlyame. Nara, Allah Yahweh, aning-aning nirya talibuka, pia deice tam erebuka, Pia Mikip Weik Deiyoknye unirye, nyapsine. ‘Naʼ tenen, nang, sik Israel yala nang nirya ara, anggun yuk pera mutuku noutam, bobinuka deipyamsise nang ara, wini talak narye, sik anang nirya, yuk-yuk mutuku aulamlumak arye bulupdeipsine. Anggun tuba kam ululum Israel yala nang bobuka, anggunti areamsise mutuku koproba, Israel mutuku noutamuk yanuka, tamubuka deipnamsine.

¹⁸ Anggun yuk-yuk pera mutuku noutam arye, boyasinirye, tamubuka asukumuk, akunum deipnyopura, anang nirya arye, Yerusalem mutuku nirya ara, tuba tamubuka, teleb kilinamake. Ara, amutuku dam akunum tamubuka yakceura, anggun atam ululum nang arye, ‘Nun ni ani’ tenen, talye ning talibuka, si erelulum isa ap, isa si erena ati, memebuka deiplum ning ap, sik aik ap, sik patung ap, pia malye yupu nyalulum ning ap, yu kanye bolulum ning ara, kum kilinamake. Ara, na Allah arye, ‘Aning nirya ara, na pia lik,’ tenenun ning nirya ara, atalak yanganyak nang arye, aning nirya obuka, sice buklopnamake. Sikce aning nirya ara, adiparyuk bataknamake.

¹⁹ Winibuka akunum winibikcopura, wini talak ara, narye Israel nang, sik talima pum teninyak ning nirya ara, winiryuk ninguk arepnamne. Tonda, sik kanye teninyak ning ara, pia teleb lek winiryuk ninguk arepnyopura, sik nirya ara, tonok kanye deibuka, neika unamake. Tonda, tonok Dip Kanye dobuka, sik talima nirya ara, arepnamsine. Min talak, sik talima noutam ara, kat keil atonun ulamuk ning ara, adiparyuk narye dopropnamne. Winipnirye, winiryuk kanyeuk, punubuka arepnamsine. Winipnyopura, sik talima pum tam nirya arye, natibuk diba tenepnikirye, na yupu kekenamniake.

²⁰ Aning nirya wininamna deiyok ara ani. Ara, sik anang ara, na Allah arye, “Aning ara wininamlume, aning ara pia kum wininamlume,” nyapdeipse yupu nirya ara, pia dobuka talibikirye, moubuka teninamake. Tonda, aninguk talibikirye, moubuka unamake. Winibuka, teleb kilisinyeba, diksukum ubicopura, sikda dipkoprob na mapu koproba unamake. Tonda, na Allah ara, anggun ni koproba, pia unamne. Sikda, na siuk erebuka unamake.

²¹ Bukni, yata nang do nirya, sik anang arye tuba-tuba, ‘Nun ni ani’ tenen, talye ning talibuka, si erenyak isa ap, isa si erena ati, memebuka deilinyak ning ap, aning si eren aik ap, patung ap, pia malye yupu nyanyak ning ap, yu kanye teninyak ning ara, aning nirya, pia talibuka unamak nang ati ara, weik tonun wenepnamsine. Ara, anggunce pia malye weike winiluluma deice arye, kanye imun weik dobuka, anggun nong deice delinamsine. Winapnamne deice arye, sik malye wininyak nang ati, wenepnirye, sirya opnamnarya! Nara Allah Yahweh, aning-aning nirya talibuka, eitam erebuka, Pia Mikip Weik Deiyoknye ununa ati, aning nyapmasin touk, dipkoprob nong upnamlarya, nyapsine. Allah arye nyabukba, na Yeheskiel birye, kekepse.

Allah arye, Yerusalem nang dam batakamuk bukni, tamubuka yayuk ati, nyabuk yupu

²² Aning nirya, akunum winibukura, sik pol dana-dana uamuk malaikat, sik si ara Kerub, sikda bulubuka, sik pol arye erebuka, laka biyik. Tonda, sik yan dam ara, bisik ban ning, el si ara, roda-roda nirya babye, banmik. Wininmek talak ara, Israel nang arye, si erelamik Allah, elce, ‘Israel yala nang ap, na ap, neika asukum aunamabe’ tenen, bikna ati, el pia teleb weik dirina ara, sik aKerub deice tam deipmokba, aning ara, lak kibukba, na Yeheskiel birye eipse.

²³ Aning akunum winibukura, Allah Yahweh, el teleb weik dirina ara, Yerusalem mutuku weik asik domik noutam deipmuka nirya ara, adiparyuk kisikdakuka, amutuku dam bukni, keting panalyangan tam, mutuku kon bukamukak bindopmokce, amutuku kon deice bukukak eipse.

²⁴ Ati ara, tukwak kipdeipmok talak ara, Allah el Pia Teleb, Lek Dip Kanye arye, na Yeheskiel erepnukba, lengdar mapsa deice arye, adiparyuk tamubuka, Babel mutuku noutam bukni, min talak, sik Babel mutuku yin talin nang arye, Israel nang nirya obikce, ton tam nang ati, tapu koubuka, sik mutuku, Babel mutuku tamubuka bobinuka deiamikba, ninye asik nang atonun ubuka ulamikak, amalaikat arye, na bobinuka deipnuk. Winipnukura, aeipmasi lengdar nirya ara, adiparyuk kum dayuk.

²⁵ Babel mutuku noutam bukni, Israel nang ninye asik nang atonun ulamik nang dam deipnuk ning ara, narye sik Israel nang ati, Allah Yahweh arye, “Aminyan doyanamle talak winipnamle ning ara, ani, ani,” nyabuka, winiryuk lak nyapdeipmanuk ning nirya ara, sik anang wekuka kekenmikak arye, yanuka, lak nyapseba, kekepnik.