Yehezkiel 10 - Eipomek

Allah Yahweh arye, el ap, el dirina ap, el si eren aik pum tam arye, batakuka bindobuka ati, nyabuk yupu

¹ Ura, na Yeheskiel birye mapmasirye, lengdar deice atonun dinmasiba, Kerub bitinye, sik pol otam atam arye dukdongamdik ning bukni, sik Kerub bitinye, sik kisok deice belebuka lak uamuk ning eipse. Ara, pia urasin teleb dekna weik keil, el si ara, batu nilam, aning arye pia teleb ninye bun ning, memepdeibik ning, el si tahkta urasin atonun ning, lak ubukba, narye eipse.

² Aning eipse talak ara, Allah Yahweh arye, pia teleb kain baju lenan ongopmoknye biti, nyabuk. “Otam tikmak Kerub-Kerub, sik yan amu tam, aupmal bisik arye wekmince, roda-roda aupmal noutam, binuka weknulyame. Asukum wekminyopura, uku kalum aupmal noutam arye, kalum ton dopropmince, an taruk arye talipnulyame. Akalum dopropminyopura, dobukapmince, amutuku Yerusalem mutuku deice tam, im noutam arye, utam yamupminyeba, Yerusalem asik deice saknamle,” nyabuk. Nyabukba, adiparyuk nyapdeipmok touk, anye birye wininmokba, nara moubuka bita, dinmase.

³ Akunum adiparyuk nyapdeipmok touk, kain lenan ongopmoknye birye, abiyukopura, aning el si Kerub ara, iknapye dam tam, Allah Yahweh el si eren aik dam tam, arah selatan tam tikmek. Sik atikmekba, anye birye, Allah el aik dam biyukopura, Allah el si eren aik tam nirya ara, dua bum tonok yayukce, lelipdongobukba eipse.

⁴ Winipmok talak ara, Allah el weik dirina til weik dang-dang alamle ning ara, kisikdakuka, yukak binmok. Ara, minop talak, Pia Teleb Lek Aik pum tam, Peti Perjanjian deiamik deice tam, Kerub urasin atonun ning, bitinye puturubuka deibik ning deice arye, Allah el dirina uamukak ara, kisikdakuka, Allah el si eren aik bai tam wekelbana ati, bisik bublan botopdeiamikak, asukum binuka tikuk. Winibukopura, adua ara, Allah el si eren aik pum tam nirya langdibuk. Tonda, anyaik bai tam bukni, anyaik dam ara, Allah el teleb una ap, mikip ap, lak kilin ning, el weik dirina ara, weik ubukba, anyaik dam nirya ara libukba, til weik upmok ning ara, langdibukba, eipse.

⁵ Malaikat urasin atonun ning, el si Kerub, pol dana-dana arye, lang-lang nyanmeka deice arye, weik lelim nyamukba, Allah el aik pum noutam babye, bai tam aik dam bukni, mitik pere sukum nirya babye, lelim weik nyanmokba kekepse. Alelim kekenmase ning ara, Allah Yahweh aning-aning nirya talibuka, Pia Mikip Weik ululnye birye, el yupu nyanmaliba, lelim nyalamle touk, nyamukba kekenmase.

⁶ Allah Yahweh arye, pia teleb kain lenan baju ongopmoknye biti, nyabuk. “Anda uku kalum bukni, uku buk arye dinmal ning, tonok ton dopropnulyame. Ara, sik malaikat urasin atonun ning Kerub, otikmakak bukni, sik yan amu tam ara, roda-roda upmalak arye, dopraka binulyame,” nyabuk. Nyabukba, anye elda, adiparyuk obinuka, tonok roda dam binuka tikuk.

⁷ Asukum tikmok talak ara, Kerub tonoknye birye, el taruk tonok arye, uku dinmoka noutam kan-kan arye, el taruk dongobuk. El taruk uku dinmok bisik dongobukce, adiparyuk uku kalum duk, nukukabukce, yata barye duk kalum nukuka, doprobukopura, lenan baju ongopmoknye biti arebukba, elce aning dopraka biyuk.

⁸ Tonda, aning doprobukce biyuk talak ara, narye eipse ning ara, ani. Ara, aKerub nirya, sik pol amu tam arye uamuka eipse ning ara, ninye taruk urasin atonun ning, uamukba eipse.

^9-10 Na Yehezkiel bira, aning dipdesiba, aKerub nirya bukni, yuk-yuk ara, el bisik ban ning ati, roda, el yan tonok-tonok lilun tam uamukba eipse. Eipse ning ara, Kerub sik yan dam ara, roda dumbaryeuk eipse bukni, sik urasin ara, neikto uka. Aroda urasin ara, pia teleb, likne mek arye likikba, mel dang-dang aplirye, urasin pia teleb ulamle touk, unmokba eipse. El yan roda ara, yuk-yuk tonok-tonok uamuk bukni, yan tonok ning ara, noutam koprop otam arye, atam noutam ton uamuk ning ara, bitinye atonun uamukak eipse.

¹¹ Aning roda dumbarye nirya ara, aKerub nirya ara, sik urasin tam eibikce, ‘Atam binunʼ tenen, tenebikce banmek tam ara, aroda babye atamuk banmek. Sik dumbarye roda ara, yuk-yuk bisik bokuka, kum banmik. Ara, sik Kerub nirya urasin ton kwalina kumce, diksukumuk binmek touk, aroda dumbarye babye, atonun diksikumuk biyik.

¹² Sik aKerub nirya ara, sik nong nirya dana-dana ap, sik donga tam ap, sik taruk ap, sik pol ap, tonda sik bisik bana ati, yan roda ap nirya ara, asing weik tonun uamuk.

¹³ Tonda, na Yehezkiel birye kekepse ning ara, ayan roda nirya ara, “Aning ara, minopce bikbik abuka, ban ning ulule,” nyabikba kekepse.

¹⁴ Akerub nirya bukni, sik yuk-yuk, sik nong ara tonok, sik urasin ara, dumbarye yuk-yuk uamuk. Urasin minop ning ara, malaikat atonun, Kerub urasin uamuk. Bitinye urasin ara, ninye urasin atonun uamuk. Winilinye ning ara, bai tam ulamle weik pus, el si singa kus urasin atonun uamuk. Tonda, dumbarye ning urasin ara, maplya maka urasin atonun (Raja wali) maka urasin atonun uamuk.

¹⁵ Ura aminyan talak ara, sik aKerub nirya ara, lakuka sik pol deice arye, lakuka banmek. Aning nirya moubuka dipdesirye, bikse. Ara, ‘Se, aning ara, minop talak, Kebar mek lilun tam arye akunum eipmase ning ukaʼ tenen, moubuka bikse.

¹⁶ Akerub banmek talak ara, sik nong dam bukni, amu tam uamuk roda, yan serek babye, neik bisikuk banmek. Tonda, atonun, sik Kerub nirya arye, sik pol nirya laklopmekce, banmek talak babye, sik yan dam uamuk yan serek ning babye, melibuka banmek. Mining damuk, neika tonok kibuka unmek.

¹⁷ Ati, sik yuk-yuk bana kume. Sik Kerub nirya ara, tonokak dem bablobuk tikmek talak ara, sik yan serek babye asukumuk unmek. Aning atonun, sik Kerub nirya, im tam lakuka welepnarye, tuba tonap tamubuka, yanapna, binapna kinmek talak ara, sik roda babye, atonun neika melibuka banmek. Yuk-yuk kum banmeka deiyok ara, aKerub, sik kanye talima babye, sik yan roda noutam nirya babye, adip kanye uk ulamuk.

¹⁸ Ura, aning nirya dinmasi bukni, Allah Yahweh, el pia teleb una ap, mikip ap, lak kilin ning, el weik dirina til dakanmok ning ara, Allah el si eren aik wekelban bisik bublan dam bukni, deice tam unmokcuk, batakuka, otam bai tam, sik Kerub nirya unmeka deice tamuk, kisikdakuka binmok.

¹⁹ Winipmokba, na Yehezkiel birye dinmase talak ara, aKerub nirya eipse ning nirya ara, sik pol mikip arye, lakuka erebuka banmekce, pol lelim pia weik lenmek ning ap, tonda lakdakuka banmekce, sik aulamik mutuku noutam nirya batakuka, sik pola bindobik. Sik banmek talak ara, sik yan serek nirya babye, melibuka bindobik. Mitik tonun otam bindobikopura, Allah Yahweh el si eren aik wekelbana ati, bisik bublan dam, keting panalyangan tamak, binuka baplobuka tikik. Asukum binuka baplobuka, tikik talak ara, Allah el weik dirina ara, sik aKerub deiceuk yanuka ubuk.

²⁰ Winipmokba, narye moubuka dipdesirye, tuba tonap tamubuka tenipsirye, moubuka bikse. ‘Se, aning kam ulye ning, si Kerub ara, minop talak ara, Kebar mekin unmase talak, eipmase ninguk ulule,’ tenepsirye bikse. Aning Kerub nirya ara, minop talak Kebar mekin dam, Israel nang arye si erenyak Allah, el amu tam uamuk ning, eipmase ning ara, akunuma, sik babye aKerub nirya anyuk eipse.

²¹ AKerub nirya babye, yuk-yuk bukni, urasin dumbarye uamuk. Tonda, sik pol nirya bitinye otam, atam ubuka anya arye, anirya isibuka dumbarye uamuk. Tonda aning atonun, ninye taruk urasin ulamle touk, uamuk ning ara, sik pol amu tam uamukba eipse.

²² Ati, Allah el si eren aik dam eipmase Kerub ara, sik urasin babye atonun uamuk. Ara minop talak, Kebar mek balamuka lilu dam arye eipmase ninguk, tuba tamubuka ton ap atalak babye eipmase. AKerub nirya ara, sik yuk-yuk bukni, atonun tonok bisik diksukum punguk banmokba eipse.