Yehezkiel 1 - Eipomek

Minop talak Allah el yupu laka lena deiyoknye, el si Yehezkiel birye, Allah el dirina weik ning tonok eibukce, nyabuk yupu

¹ Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.

² Ibrani nang arye nuklamap touk, dumu wala arye, like pamu sum (tanggal 5) ubuk sum aniryuk, aning eipse. Ara, Babel mutuku nang arye, nun Israel ninye taleamsuk ninye deiyoknye, el si Yoyakin tongobuka, tapu koubikce bobinamika ani, keting tamun pamubarye akunum ubuk talak ara, aning eipse nyapne.

³ Na ni koproba el si ara, Busi. Na ni Busi bira, Allah el si eren aik pum tam, pil donanye ulamuk touk, nara el mi Yehezkiel birye, apiluk donune. Allah el si Yahweh arye, el mikip arepnuka deice arye, mambul ning laka upmokba, eipse. Aulamse talak arye kekenmasibuk, Allah arye mambul yupu ton nyapnuke. Allah el si Yahweh arye, mambul yupu nyapnuka ara, Babel mutuku noutam bukni, mek si Kebar mekin dam unmase talak arye, ayupu nyapnuke. Nyapnukce, Allah arye nati, ‘Na yupu laka nyalbinamle’ tenen, el mikip, na nong deice deipnuke.

⁴ Allah arye, yupu nyapnuk talak ara, narye dipkoprob dinmasiba, kumanya mikip weik ning ton, outam arye dobukba, mikip weik asa arye, dua bum kat ning weik arye, bopdakuka yayuk. Adua deice ara, uku buk weik arye lengerekenmokba, adua dana-dana tam nirya ap, im deice tam nirya ara, dirina pia weik ubuk. Auku noutam, kiklina ara, kat ning uku pakanmalye noutam dapmakibuk, buppu pia weik uplirye, bi ubuka ongolamle touk ubuk.

⁵ Winibuk talak, auku noutamak dinmasiba, kam ulul ning dumbarye unmekak eipse. Aning dumbarye nirya ara, sik urasin ninye urasin atonun unmekak narye eipse. Akam ulamle ning dumbarye ning, sik urasin ara, mitikto ninye urasin atonun unmekba, narye eipse.

⁶ Adumbarye kam ulamak ning ara, mitikto ninye urasin atonun upmek bukni, adumbarye ning sik nong ara, tonok bukni, sik urasin ara, yuk-yuk dumbaryeuk unmek. Sik nong ara, tonok-tonok unmek bukni, tonok nong ara, kisok ap, urasin ap ara, dumbarye ubuk touk, sik pol babye yuk-yuk dumbarye ubuk. Sik nong deice nirya awamuk pol ara, maka pol atonun ubukak, narye eipse.

⁷ Tonda kam tuba ulamak ning, sik yan nirya ara, pung diamuk ubuk. Aning ubukba, sik yan nirya ara, sapi basam yan kala ulamle touk ubuk. Ara, sik yan nirya ara, kat ning el si ara, tembaga winiryuk memepdeipmace talak, urasin teleb ulamle touk, mil weik ubuk.

⁸ Adumbarye kam ulamak ning, sik pol baru tam dumbarye tam nirya bukni, sik pol amu tam ara, ninye taruk atonun, taruk ton aubuk. Akam ulamak ning dumbarye ara, yuk-yuk bukni, sik ninye urasin atonun ubuk ning ap, sik maka pol ato ning ap ara, sik nirya neiktoto ubukba, narye eipse.

⁹ Akam ning unmek ning, sik pol nirya ara, neiktoto lang-lang buka banmikce, singnilanmekak, eipse. Sik pol mouse siryak nirya ara, bol pibuka lingnipdanin banmik. Sik banmek talak ara, pung bisikuk banmekce, bisik ton kirikuka kum banmek. Diksukum bisikuk banmekba eipse. Sik banmek talak ara, sik nong nirya tamubuka dilina pia kumce, pung diksukum diamuk banmekba, narye eipse.

¹⁰ Ati aning sik urasin eipse ning ara, laka nyapnune. Sik kam un ning dumbarye bukni, sik urasin ara, neiktoto ubuk. Sik nong ara, tonok bukni, sik urasin yuk-yuk dumbarye ubuk. Bukni, tonok urasin ara, ninye urasin atonun ubuk. Ton urasin sirik tam ning ara, bai tam ulamle yu weik kuse, el si ara, singa kuse atonun ubuk. Sik urasin kwanim tam ning ara, sapi basam atonun ubuk. Tonda, sik urasin balye tam ara, weik bip maka atonun ubukba, narye eipse.

¹¹ Sik nong deice dana-dana tam, dumbarye ubuk ning nirya ara, maka pol atonun ubukura, sik pol nirya erebuka talilanmek. Sik nong nirya pol bitinye arye, dinikdongopdayikce, ton pol bitinye ning ara, yongkaleklobikba, sik nong nirya pakupdongobukba eipse. Ati, tonok kam ulamuk ning, el mining dam tikmok kam ning ara, sik pol epdanuka unmarik. Ton tam pol bitinye arye, sik nong yuk-yuk bukni, sik nonguk kitibuka, dungnupdongoprik. Sik nirya atonun wininmekbuk, narye eipse.

¹² Sik kam ulamak ning unmik ning nirya, pol yuk-yuk arye, sik bisik diksukumuk bana ati, kintinibikce banmik. Ara, ‘Dib Kanye arye nyapsilye touk binuyabe’ tenen, ketenebikce, Dib Kanye banmok touk, sik babye banmek. Sik banmek talak ara, neikto touk, banmek, dana-dana tam kirikuka, bana pia kume. Diksukumuk banmeka ati, ‘Tamubuka kum yatibye,’ tenebik.

¹³ Akam unyak ning, sik nong noutamak arye ubuk ning ara, uku sekmakiba, uku dinmalirye, uku duk lonmalirye, bi paralamle tonun ubukba eipse. Tonda, sik dumbarye bukni, sik kan-kan ara, weisa ubikiba, dirina weik ulamle touk ubukba, narye eipse. Auku buk noutamak nirya ara, dirina weik ubuk. Tonda, auku buk noutamak arye, bebeya lakna weik arye ubukba, mil parabuka bindakuk.

¹⁴ Winibukopura, sik dumbarye kam unmek ning nirya arye, bebeya laklamle tonun ubikce, minopce lakuka banmekba eipse. Sik dumbarye kam un ning ara, otam binmana, atam yanmana kinmekba, narye eipse.

¹⁵ Awininmek talak ara, dipkoprob narye dinmasiba, sik dumbarye kam un ning yuk-yuk bukni, sik yan serek dumbarye ara, sik tikmek sukumuk, tuku deiceuk, upmokba eipse. Sik nong tonok bukni, urasin ara dumbarye ubuk ati, tonok kam un ning ara, el nong amu tam ara, yan serek tonok ubukba eipse. Sik kam ning dumbarye unmek touk, yan serek babye, dumbarye ubukba, narye eipse.

¹⁶ Aupmok yan serek, sik urasin ara, dirina weik uplirye, mil dang-dang alamle ning, dekna weik keil, el si ara permata nyalamak keil atonun ubuk. Sik yan serek nirya ara, tonok ning babye, yuk ning babye nirya, ansinibuka noutamuk kintinibuka deiamikba, narye eipse. Ton mitik roda ara, weik yan serek anoutamuk, deibikba aubuk.

¹⁷ Tonda, sik nirya arye, ayan serek ara, nirya dopdobikce, sik dumbarye kam un ning unmek ning urasin dinmek tamuk banmek. Sik nirya, ‘Atam binun’ tenepne tamuk, talye balamik bukni, ton tam banmek talak ara, kum tamubuka yayik. Sik nong ap, urasin ap ara, ton tamubuka kum dilinmek. Diksukumuk banmek.

¹⁸ Ayan serek ara, koubuka darapdongoamik ning nirya ara, asing babye nirya dareamikba, narye eipse. Ayan serek ara, ongopdeibik ning ara, cang weik ubukba, aning eipse anya arye, ‘Se aning ara, weik mambule,’ tenepse. Sik dumbarye kam un ning nirya, sik yan serek lilunak nirya ara, asing weik uamuk.

¹⁹ Ara, sik kam unyak ning nirya, balsusunmek talak ara, sik ayanuka yan serek nirya babye, balsusunmek atonun binuka, yanuka kinmek. Tonda, kam un ning nirya lakuka, eitam welebanmek touk, ayan serek dumbarye nirya babye, abisikuk welebanmek.

²⁰ Tonda, kam ning dumbarye ara, sik dib kanye ara, sik yan serek dumbarye noutamak aubuk. Ati ara, sik kanye arye, ‘Atam binun,’ tenepman touk, sik kam ulamik ning nirya babye, abisikuk balamik. Atonun sik ayan serek babye atonun, ubuka banmik. Tonda, ayan serek ara, noutam koprop ulamik kanye arye, ‘Banuyap,’ tenepman touk, sik kam un ning dumbarye, abisikuk neika banmek.

²¹ Adib kanye banmek talak ara, akam unyak ning nirya ap, sik yan serek babye, abisikuk banmek. Sik dib kanye bataknopura, sik kam un ning ap, sik yan serek ap ara, batakamik. Sik tukwak arye, im noutam welepne talak ara, sik kam un ning babye, welena uka. Aning ati ara, kam un ning nirya ara, sik dib kanye ara, sik yan serek noutamuk ulamika ati, neikauk banmek.

²² Tonda, kam un ning dumbarye, sik kisok deice tam, im noutamak atonun ara, aik arum atonun ning uamuk. El urasin ara, keting deipliba, ikip mek es deice, mil dangdangalamle atonun, ubukba, eipse. ‘Aning ara, keting deiplirye, dirina weik uplibuk, weik asik seng mil dangdangalamle atonun ning uple,’ tenepse.

²³ Amil dangdangalamle ning amu tam ara, akam ning dumbarye sik pol ara, pung bibik talibikba, sik pol mouse ara, bol pipdayik. Sik pol ton bitinye arye, sik mining nonguk kitibuka, dungnupdongobik. Sik nirya ato touk wininmekbuk, narye eipse.

²⁴ Sik akam un ning nirya, pol deice arye lakuka banmekba, pol lelim weik arye nyanmokbuk kekepse. Ara, weik mek lum sakanmalirye, lelim lelamle atonun, nyanmoke. Tonda, yin talin nang arye, ‘Yuk nang olbinamap’ tenen, yin lelim weik arye nyalamak touk nyabik. Tonda, aning-aning nirya, talibuka deice tam ulirye, Weik Erenanye, el yupu weik arye nyaliba, lelim weik lelamle tonun, sik lakuka banmek talak ara, sik pol lelim weik nyabik. Winipmanto ara, yin talin nang weik arye bulubikirye, yupu weik arye nyakiba, lelim weik nyalamak touk, banmek talak ara, weik lelim nyanmek. Bukni, sik tunim abuka unmek talak ara, sik pol ara, tukwak tam deibikba, sik pol lelim tunim abukura, anirya tunimabuk.

²⁵ Aning atonun, sik kisok deice tam, weik til daklamle ning, seng aik arum atonun ning, im deice tam arye, ninye yupu atonun lenmokba, sik adiparyuk kekebikce, tunim abuka, tonap kum banmek. Winibuka tunim abik talak ara, sik pol ara, tuku deice deibikba, sik pol babye, lelim pia kum lenmok.

²⁶ Eitam ubuk ning, aik arum atonun ning deice tam ara, ninye deiyok nang bulamak ning atonun ning ubuk. Abun ning, el urasin ara, dekna weik keil, el si ara nilam keil, el urasin puturuna ara, im kalum atonun ubuk. Tonda, abulamak ning deice tam ubuk ning ara, ninye urasin atonun, kam un ning ton upmokak eipse. Akam un ning ara, ninye urasin atonun ubukbuk, narye eipse.

²⁷ Tonda, aninye urasin atonun upmok ning dinmasiba, el der tam arye diprongobuka, el nong deice tam nirya ara, mil ara, besi ning uku dapmakibuk, buppu weik uplirye, uku weik arye ongolamle touk ubuk. Tonda, bebeya lakuka liman olamle touk uamukce, el der tam arye dibuka, el nong outam ning ara, uku buk dilamle tonun ubukce, mil weik unmokba eipse. Winibukba, dana-dana tam nirya ara, keting sinarya dirina weik ulamle touk ubuk.

²⁸ Aning atonun dinmasiba, anye bira, el nong dana-dana tam nirya ara, dirina pia weik ubuk. Winipmanto ara, el dirina urasin ara, mok cebuka alakmalirye, manu senamnya dua deice maplirye, senamnya yuk-yuk ulamle touk ubukba, narye eipse. Allah el si Yahweh, el dirina ara, manu senamnya deiplirye, keting sinarya deice donokliba, til daklamle atonun ubukba eipse. Adirina ap, aning-aning nirya ap, eipse talak ara, ‘Allah el aunmala ati, talye mangkau kibuka kum eiptinye’ tenen, el si erena ati, kisok kanupdongopsirye, tukwak dipdongobuka mapmase. Winibuka kanupdongobuka, tukwak mapsa talak aryuk, ninye yupu atonun yupu deice arye, nyanmokba kekepse. Ara, Allah arye, ‘Yehezkiel elda, na yupu laka nyalbinamle’ tenen, yukupnukba kekepse. Allah el yupu laka lena deiyoknye, nabi Yehezkiel birye nyabuk.