Yakobus 5 - Eipomek

Sisin ninye bona weik talinyak nang, dib tenena kum unyaka ati, wenebuk yupu

¹ Ura, anggun diba tenena kum arye, sisin ninye bona weik talilulum ninye ululum nang ara, na nyapnusin yupu ara moubuka kekeplulume. Anggun pia ikin ning, aminyan talak upnamsil ning ati, kanye imun kanye bopmunce, malye nyabuka weik arye engenamlume.

² Aning-aning nirya dekna weik arye dekuka, ‘Na’ tenen, delilalum ning ara, akunum lyubuke. Anggun pia teleb ongon baju ara, singe ap, kiririma ap arye akunum dipropsuke. Anggun kat ning, dekna weik ning, emas ap, perak ap ara, ‘Na,’ tenen deiamlum bukni, sisilya burubukura, akunum malye ubuke.

³ Anggun dekna weik ning sisilya ubuka deice arye, “Anang ara malye nang,” nyabuka, sisekipnamsile. Tonda, uku buk arye ngelum-ngelum abuka dilamle touk, asisilya atonun ubuk ning arye, anggun nong pia, uk dinauk unamsile. Winira sirya daknamle talak noutam arye akunum unyabe. Awinipsilye talak noutam arye, anggunce, ‘Aning nirya, na uk talipnamne. Aning ara, na ning’ tenen, moubuka deililamlum ning ara, pia malye ululume.

⁴ Anggun moubuka tenepnululume. Anggunce, “Nun wa wipdeipsululume,” nyalilamlum ati, anggun wa wilamsiak bukni, wa wina ati dekna yo bok ara kum arilamlumce, anggun aikuk moubuka deililamluma deice arye, si sekelisulule. Anggun wa wibuka kouamik ning libuka, sirya dakuka yangalamik nang arye, malye nyabuka engelamik yupu ara, Allah nun Weik Deiyoknye damak biyukbuk kekebuke. Allah ara, aning-aning nirya talina deiyoknye ululce, moupbuka disilirya anye arye, anggun ara bicoe. Ikin weik upnamsile.

⁵ Anggun tukwak mutuku umunye talak nirya ara, ninye kanye delina pia teleb ning nirya talibuka, mutan nang ululume. Winipmanto ning ara ani. Anggunda, ‘Sapi basam owala obuka dipnamape’ tenen, el dina weik arye arilamice bukni, weik neplirye, bol teleb uplyopura, asapi basam arye, ‘Na opnamniak,’ kum tenyamlye bukni, obuka dilamak atonun ululume. Sapi basam arye, ‘Na opnamniak,’ kum tenyamlye atonun, anggun babye, ‘Nun malye winin ning weik upsilyeura, aminyan talak ara, Allah arye wenebuka opnamsile’ tenena kumce, malye kanye kum boluluma ati, nyapsine.

⁶ Tonda, yuk nang arye, sik bona weik talin ninye ati, ‘Sik yupu ara nunce yanibuka bisipnamabe,’ kum tenelamikce, malye un ning kum ulamik bukni, anggun sisin nang arye anang ati, malye yupu nyabuka bokolilamlumce, oltakalulume. Ati, anggunda pia malye ululume nyapsine.

“Ikin ning upsiliba, teniltona kum arye, tunim abuka unamlulume,” nyabuk yupu

⁷ Ara, na kayapu. Nun du weit atonun kipdeipsuk ninye ati nyapsine. Nun deiyoknye Yesus tamubuka kum yanmalye talak ara, teniltona kum arye, teleb kanye bobuka tunim abuka unamlulume. Winipmanto yupu ati nyapnusine. Ara, wa wibuka koulamle deiyoknye birye, ‘Na koupse ning ara teleb ubuka pablyopura, libnamanca’ tenen, tonda, ‘Dou talye manmalya ani, aminyan ara, mok yanamalca’ tenen, teleb kanye deibuka, talye luba kibuka ulamle touk, anggun babye atonun wininamlulume.

⁸ Ara, ‘Yesus talibuka unamne do, bataknamne do?’ tenen, teniltona kum arye, teleb kanye deibuka, ding abuka unamlulume. Ara talye ati kume. Nun deiyoknye Yesus, el yanamle talak dam upmala ati nyapsine.

⁹ Tonda, anggunda, anggun kanye dukdongopdalum nang ati, malye yupu kum nyalanamlulume. Malye yupu nyalalulumopura, aminyan ara, Allah arye yupu bokeipsilirye, wenepnamsile. Winira nun yupu bokeipnamsil Deiyoknye bira, buplan dam akunum tikilyanmalce dinmasile.

¹⁰ Na du weit atonun ululum nang ati nyapsine. Allah el si deice arye, el yupu laka nyalamik nang, sik nabi-nabi nang arye ulamik ning ara, ila tonap nyapsinibuk, tenipdenamlume. Sik kanye imun kanye bomik talak noutamak ara, kanye teniltona kum arye, tunim abuka winilamik ara, tenipdelulume. Ikin ning weik ulamu bukni, sik kanye deibuka ulamik ara, pia teleb ulamika anya arye, anggun aninguk tenepmunce, sik ulamik atonun wininamlulume.

¹¹ Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule.

¹² Winira nun du weit atonun unyap nang ati, weik mambul yupu ara nyapnusine. Anggunce, “Wininamabe,” nyalulum talak nirya ara, ‘Yuk nang arye diba tenepnamsiyak’ tenen, mambul ning si ap deice arye nyana kume. Tonda, yupu canga arye nyana meme. Ara, yata ning si do nirya, im deice ulul ning si ap, tukwak ulul ning si ap, tabakuka nyana meme. Tonda, ‘Yuk ninye arye, diba tenepnamniak’ tenen, “Nara, talinye birye nyapmakin do?” nyabuka, yupu weika arye nyalamak touk winina meme. Ati, malye yupu nyapmunyebuk, Allah arye wenepsilyak ati, ‘Telebe, aning winipnune,’ tenepmunyopura, “Teleb, aning winipnune,” nyana uka. Aning atonun, “Kume, aning kum winipnune,” tenepmunyopura, lak akarye, “Kume aning kum winipnune,” nyana uka. ‘Yuk nang arye, nun nyanyap yupu diba tenepnamsiyak’ tenen, mambul ning si ap tabakuka nyana meme.

“Pia dib tenena deice arye, Allah moronamlume,” nyabuk yupu

¹³ Anggun kan-kan noutam arye, tonoknye ton kanye imun ning uplyopura, adiparyuk elce Allah moronamle. Tonda, yuknye ton, kanye deiplyopura, kanye deibuka Allah ati, “Telebe,” nyabuka, Allah si erebuka mot nyanamle.

¹⁴ Anggun kan-kan noutam arye yuknye ton, uk dinmalyeura, Allah yupu aik talin nang, majelis nang ati yukupnamlulume. Yukupmunyebuk yakcopura, anang arye basam mekwen atonun minyak dobuka, Allah el si deice arye, anye el nong deice likeipbikirye, ‘Allah arye kweteipnul’ tenen, Allah moronamake.

¹⁵ Kanye bokoltona kum arye, Allah pia diba tenebikca deice arye morobikcopura, Allah arye, uk dilamlinye kweteipnamle. Kweteiplirye, kam bulinamle. Auk dilinye bira, minop arye malye ulamtuopura, Allah arye anye bira el malye winina ati, namin kiplirye, kum daneipnamle.

¹⁶ Aning ati ara, ‘Allah arye kweteipnamsil’ tenen, anggun malye winimunye ning nirya, lak akarye laka nyabuka nyapdamunce, Allah morolanamlulume. Pia diksukumuk wininyak ninye arye, Allah morolamaka ara, mikip weik ulya deice arye, Allah kekeplirye, teleb kipdeilisulule.

¹⁷ Ura, minop talak ulamuk nabinye Elia ara, nun talye ulamap nang atonun ulamuk bukni, elce, ‘Mok kum cepnamle’ tenen, pia diba tenebukce, pia pi dobuka, Allah morobukopura, keting tamun winilye ap, ton keting tamun noutam ap deice arye, mok pia kum celamuk. Dou uk malamuk.

¹⁸ Winibuka morobukura, dou malamukba, nabi Elia arye, ‘Ila tamubuka mok ceptu’ tenen, Allah morobukopura, tamubuka mok celamuka ani, ninye arye koulamik ning palamuk.

¹⁹ Na kayapu, nun du weit atonun kipdeipsuk nango, yupu ton nyapnusine. Ara yata nang do nirya, Allah el dipkoprop yupu deice nyasilye bisik bindebuka, abisik batakuka, yuk bisik kirikuka bilyopura, yuk nang arye anye dobuka, teleb bisik akuk, yanuka tamubodeibicopura, ara pia telebe. Ati, anyapnusin yupu ara, ila tamubuka tonap tenenamlulume.

²⁰ Yata nang do nirya, yuk nang malye bisik bace bukni, teleb bisikuk yanuka tamupdeibice nang ara, pia mambul pil donyake. Ara, amalye bisik banyak nang ara, abisik pia dobolbitingopura, diptingopura, uku din mutuku dongoptubuk, apia unamtinge. Bukni, anang arye tamubuka, teleb bisik delilyanamak deice arye melibikikba, Allah arye malye bisik binamice ninye ati lyelule. Tonda, apil melibuka dolamaka deice arye, Allah arye sik malye winin nang, sik malye ning nirya namin kibuka, teleb ubuka delinamle. Telebe, asukumuk sekuka deipsine. Telebe na Yakobus arye nyapsine, akunuma.