Yakobus 3 - Eipomek

“Ninye sitang arye malye nyanyake,” nyabuk yupu

¹ Na kayapu, nun du weit atonun kipdeipsuk ninyeo. Ninye nyanyak yupu deice arye, malye ning yala-yala weik weleplirye, malye ulisulula anya arye, ayupu ton nyapnusine. Anggunce, ‘Nun kan-kan arye nun peterena deiyok nang weik unamabe,’ tenena bataknamlulume. Aning ara, deiyok nyapnusine. Anggun kele. Allah arye talye nang ati, yupu bokeipnamle atonun kum bukni, nun peterena deiyok nang ati ara, tonok ning babye lubakina kum arye, nun wininyap ning nirya lilibuka asipdesilirye, winipdesilyeura, yupu mikip arye bokeipnamsil ati nyapsine.

² Nun nirya arye, ‘Na malye kum upnun do?’ tenen, winilebyebuk, mankau arye aning-aning yala yuk-yuk, malye wininyabe. Tonoknye birye, el nyalye yupu noutam nirya ara, tonok malye ning babye, kum nyaplyopura, anye bira dipkoprop diksukumnye winilule. Anye bira, el nyalye yupu nirya, moubuka teneplirye, teleb ninguk nyalul touk, el nong ap, el winin ning nirya ap ati, ‘Malye winipnyak’ tenen, moubuka kalikilalule.

³ Ara, winipmanto yupu nyapnusine. Kuda basam ara, mikip weik ning ulul bukni, ‘Nun tenebibye touk winipnusil’ tenen, kat ning el si arikdongobibirye, dana-dana tam tapu kirikmapyopura, nunce lilobibibuk, nun tenepmabye bisikuk balule.

⁴ Ton ning ara ani. Laut mekwen deice balamak weik mek liya yo ton tenipdelulume. Nong weik mek liya yo ara, ikin weik ning ulul bukni, kumanya mikip aryuk doplibuk, mekwen deice balamak. Balamak bukni, gabung yo der tam mek bukna yo mitik ninguk bukni, pum potokuka ayo kintinibuka deiamica arye, mek liya yo deiyoknye birye bukulyeura, abisikuk balamake.

⁵ Ayupu nyapmasin touk, nun ninye sitang ara, nun nong noutam mitik ninguk upsuk bukni, asitang arye kwalin yupu weik nyabica deice arye, malye ning weik usulule. Ton tenipdelulume. Weik yo kan-kan pamtu ak babye, dou mapturye, kel-kel abuka sesal leptu ura, tonok tong uku arye diniptingbuk, nirya uku diptue.

⁶ Aning atonun, malye yupu nyanyaba deice arye, uku buk dilamle atonun usulule. Nun nong noutamak ara, nun sitang deice arye malye un ning yala-yala weik welepsilirye, nun nong ap, nun winin ning nirya ap, malye ulisulule. Winira, yo noutam weklirye, uku buk weik arye dilamle touk, nun sitang deice arye, nun winin ning nirya malye ulisulule. Sirya talak ara, amalye yupu nyanyak ninye ap, sik sitang ap ara, uku din mutuku uku arye pia dinamle.

⁷ Aning-aning kam ulul ning nirya ara, maka yala nirya ap, kwatima ap, laut mekwen pum bisik ulul ning nirya ap, ninye arye am talyamik touk, tuba tanyake.

⁸ Aning-aning nirya ninye arye tanyak bukni, yata nang do nirya, sitang ara kum am taptinge. Sitang ara pia weik malye ning ati, pia parap-parap alula anya arye, kum batakmanto. Ninye dipna ati, ninye on kwatima, yu weik kwatima arye si toamsilyebuk, uk dibuka dibilamak touk, nun sitang deice, pia malye yupu nyabibya deice arye, ninye malye ubiceura, dibinyake.

⁹ Nun si bam bol ap, sitang ap ara tonok bukni, ton talak ara asitang aryuk bukni, nun ni Allah ati si erenyabe. Ton talak ara, el atonun kwepdeibuk ninye bukni, nunda asitang aryuk sik nong deice malye yupu nyan nyabe.

¹⁰ Nun si bam bol tonok bukni, adeice aryuk Allah si erena yupu ap, ninye malye len yupu ap nyanyabe. Se, na kayapu dipkoprop aning ara, pia kum winiptibye. Ara pia malye atia.

¹¹ Tenipdelulume, teleb ulamle mek ap, sisilya mek ap, tonok mek pu dolonarye yangalul do?

¹² Aning atonun na weit yapu tenipdelulume. Tonok yala yo duk moulamle yo arye, yuk yala yo duk mouptu do? Tonda tonok duk moulamle tapu arye, yuk yala tapu duk mouptu do? Kume, kwarang yo arye, kabalye yo duk kum mouptue. Aning kum winipmanto. Aning atonun, teleb ulamle mek ap, sisilya mek ap, tonok mek pu donarye kum yatue. Aning atonun, nun si bam bol tonok aniryuk, Allah si eren yupu ap, yuk ninye ati malye len yupu ap, talye tabakuka kum nyanamabe. Aning ara, pia malye.

Weik kel kina deiyok ning ati, nyabuk yupu

¹³ Anggun kan-kan noutam arye yata nang do, pung teleb un bisik kel nang ap, aning-aning nirya weik kel nang ap unyak do? Sik awinitingopura, sik teleb winin ning nirya deice arye lakak nyanamsiake. Tonda, Allah arye weik kel bikna deiyok ning, sikti, aribuk deice arye, talima mitang ubuka teleb winin pil dolamaka deice arye, lakak nyanamsiake.

¹⁴ Bukni, anggun kanye talima noutamak ara, yuk nang ning asing eipmunce, ‘Aning nauk doproptinye’ tenen, patana ap, ‘Nauk erepnitinge’ tenen, patana ap awinipsilyopura, aning ati kanye deibuka, kwalina ap, maknya kintinilina ap, kum danamlulume. Tonda, aning awabsilyopura, kum dungnunamlulume.

¹⁵ Winin ning ara, nun ni Allah im deice arye kum arisulule. Ara Allah arye, ‘Wininamake,’ tenesilye touk winin ning kume. Ara nun babye kanye talima noutam patapsilye ning uka. Amalye usilye ning ara, sik diba tenena kum ninye ara, Allah El Dib Kanye nyasilye yupu kum kekenyakce, yaniltanauk wininyak ning ati nyapsine. Tonda aning ara, Isa Mutuku Dongonye arye nyalibuk, malye ubibyopura, malye ulisulule.

¹⁶ Anyapmasina ara talye ati kume. ‘Yuk nang ning nauk doproptinye,’ tenena ap, ‘Nauk erepnitinge,’ tenena ap, awinipsilye mutuku nirya ara, malye ubuka, kwalinarye talye-talye una ap, pia malye tenebuka, malye un ning yuk-yuk nirya ap aunamle.

¹⁷ Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.

¹⁸ Anang ara, ‘Nun nirya talima lamapdongobuka, walana ap, oldana ap kum arye, telebuk neika unamabe’ tenen, winibuka winilamica ani, sik teleb winin ning deice arye duk moupnamle ara, diksukum un ning atia.