Yakobus 2 - Eipomek

“Ninye urasin dipdebuka, kanye bokolina meme,” nyabuk yupu

¹ Na kayapu, nun du weit atonun kipdeipsuk ninyeo, Allah elda weik mambulnye ulirye, pia teleb-telebuk ulye touk, nun deiyoknye Yesus Kristus babye atonun ulule. Anggunce Yesus ati, akunum dib teneluluma anya arye, ninye urasin eipmunce, kanye kum bokoltonamlulume.

² Winipmanto ning nyapnusine. Ura, anggunce, ‘Allah yupu kekepnuyap’ tenen, Allah yupu aik akunum wekelyatum talak ara, tonok sisinanye, bona weik talinanye birye, dekna weik ning, emas taruk duk dongolul ning ap, pia teleb ongon baju ap ongobuka, wekelyatu bukni, atalak aryuk pia talye kankanye ton, pun deibuka kwiliksakamtu baju ongobuka wektuopura, anggunce yatato yupu nyaptum do?

³ Sisinanye bona weik talinanye, pia teleb baju ongolul weiknye ati, ‘Se elda mambul,’ tenebuka, nimalye arye, “Telebe amio, telebak dabulyalyame,” nyaptum bukni, pia talye kankanye ati ara, “Orkaren akuk tikilbinulyame, akumopura, nun yan yanilamap amsuna deiceuk buklyame,” nyaptumopura, aning ara, pia malye winilulume, nyapsine.

⁴ Ato yupu dipkoprop nyaptuma deice arye, anggun kan-kan noutam arye, ton nang ati ara, ‘Telebe,’ ton nang ati ara, ‘Malye’, tenebuka, akunum kanye bokolilalulume. Tonda, ato yupu nyaptuma deice arye, yupu bokolin nang atonun bukni, malye ning tenebuka, malye nang atonun akunum ubnalume. Ati ato winina ara, pia meme nyapsine.

⁵ Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?

⁶ Kankan ninye wibuk bukni, anggunce, ‘Kankan ninye mambul kume,’ tenepmatum deice arye, anang sik nong deice malye yupu nyaplulume. Ton tenipdelulume. Sik bona weik talin ninye arye, anggun nong deice ikin ning deipsikirye, anggun ning dobuka malye ulisinyak ara, kum tenipmalum do? Tonda, sik sisin ninye bona weik talin ninye arye, ‘Anggun talipdongobuka, sik ning dalubuka dopropnamap’ tenen, yupu bokolina deiyok nang dam bobasinyak ara kum tenipmalum do?

⁷ Tonda, sik sisin nang bona weik talin ninye arye, nun lyebuka talisululnye, el si pia telebnye Yesus ati, malye yupu nyabuka, lululinyaka ara, kum tenipmalum do? Aning ati ara, ninye urasin dipdebuka kanye bokolina kume, nyapsine.

⁸ Allah arye, ‘Wininamake’ tenen, el yupu deice arye weik mambule nyapsuk ning ara, ani. ‘Ara, anggunce anggun bidamnye patapsilye ning, ‘Aning mambule’ tenen, melilalamlum touk, anggunce anggun ap neika ululum nang ati, bico tenebuka melinamlume, nyapdeipsuke.’ (Imamat 19:18) Anyapdeipsuk yupu ara moubuka kekepmunce, dobolbalamunyeura, pia telebuk unamlulume.

⁹ Bukni, anggunce yuk nang ati, urasin dipdebuka, kanye bokeipmunyopura, adeice arye malye ululume. Ara Allah arye, ‘Wininamlulume, aning ara kum wininamlulume,’ nyapsuk yupu mem yupu deice arye, “Winina meme,” nyapdeipsuka ati, ayupu yaniptapmunyopura, ara Allah arye nyapdeiamuk yupu yaniltan nang ululume.

¹⁰ Ayupu nyapmasina ara, talye ati kume. Yata nang do nirya, Allah arye nyapdeiamuk yupu nirya dobolbanyak bukni, tonok ning ton yanibicopura, ara ayupu nirya yaniltana atonun unyake.

¹¹ Anyapmasin yupu deiyok ara, ani. Ara, “Anggun kil kopropa batakuka, yuk kil dobuka talye yolana meme,” nyabuknye, elcuk ayupu ton, “Ninye talye oltakana meme,” nyabuk. Ayupu nyabuka deiyoknye bira tonok ulula anya arye, anggun kil batakuka, yuk kil kum yolulum bukni, ninye opmunyopura, ara el nyabuk yupu nirya yaniltana atonun ululume. Anyapmasin yupu deiyok ara, ayupu nirya nyabuka deiyoknye bira, el tonok ati nyapsine.

¹² Allah el yupu ara, malye ning arye koupsukba, ulamupa noutam arye, lobuka deipsuke. Tonda, tuba-tuba loltakasulule. Sirya talak ara, Allah er yupu deice arye, nun unyap ning nirya ati, yupu bokeipnamsile. Ati, anggun nyanamlum yupu nirya ap, anggun wininamlulum ning nirya ap noutam arye, aninguk tenebuka, diksukumuk unamlume.

¹³ Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.

Dib tenebibirye, Allah yupu dipkoprop melibuka bana ati, nyabuk yupu

¹⁴ Na kayapu, nun du weit atonun kipdeipsuk ninyeo, yata nang do nirya, sik talye yupu deice arye, “Na akunum diba tenepse,” nyaplopting bukni, sik diksukum winin ning kum uplyopura, ara talye nyanyaka anya arye, sik diba tenenyak ning ara, nong kum upnamle. Ato yupu, talye nyaltakalamtu yupu deice arye, Allah arye atonye ati lyeptu do? Kume. Pia dipkoprop diba kum tenelula ati, Allah arye atonye kum lyepnamle.

^15-16 Anyapmasin yupu ara, winipmanto yupu ton nyapnusine. Ura, tonoknye do, tonok kil do, sik asum-asum nirya din ning ap, ongon baju ap, pataplye ning kum wabtuopura, anggun kan-kan tonoknye birye anang ati, “Amio, telebe, bupu ongon bau ongobuka, teleb dinuk dibuka unamlulume,” nyabuka, talyeuk nyaplopturye, dipkoprop anye pataptu ning ati, kum meliptuopura, talye yupu deice arye meliptu do? Awinina ning ara, teleb do? Kume.

¹⁷ Anyapmasin ning atonun, sik diba tenen ning aupmatu bukni, dipkoprop diksukum winin ning ton kum uplyopura, talyeuk ulule. Nong kum upnamle. Ara dibina atonun ulule.

¹⁸ Bukni, tonoknye birye, nati nyapnutue. “Kume, tonye bira, diba tenen ninguk upmale. Yuknye bira, diksukum winin ninguk upmale,” nyapnutue. Bukni, narye tamubuka nyapsine. Anggunce, anggun winin ning laka nyana kum arye, “Na diba tenepse ning ara, ani,” nyabuka, talye yupu deice arye, laka peterepnutum bukni, lakak nong kum kel kipsitinye. Nara anggunti, na diksukum wininun ning, laka nyapsitinyopura, na winin ning deice arye, diba tenepse ning ara, nong lakak uplibuk, aning deice arye, kel kipnamlume.

¹⁹ Anggunda, ‘Allah el tonokuk ulule’ tenen, diba tenelulume. Adiba tenelulum ning ara, teleb bukni, isa mer nirya, sik babye anggun tenelulum atonun tenebikirye, Allah ati ilil ubikirye sirimtalilule.

²⁰ Se, anggun walwal arye, kanye bona kum nang atonun ululume. Narye, diba tenen ning aupmatu bukni, dipkoprop diksukum winin ning ton kum uplyopura, dipna atonun ulule nyapmasine. Anyapmasin yupu ara, ‘Deiyok aubtubuk kekeptibye’ tenen, patapmasilbuk, diba kum tenepmanulum do? Ati ara, deiyok ning tonok ubuk ning ton, laka nyapnusine.

²¹ Aning ton kum tenipmalum do? Nun apu kopropa Abraham arye el mi tonok ulamuk bukni, Isak dobuka keil pala yangabuka deipmokak deibukce, ‘Allah arena ati opnun’ tenen, kintinibuka deice arye, Allah arye utenebuk. Allah arye, ‘Abraham apil nati dopnila deice arye, na kanye ara, Abraham elda dipkoprop diksukumnye ulule,’ tenebuk.

²² Allah arye utenebuka ati, anggun ton teniplulume. Abraham apil dobuka deice arye, elce Allah ati diba tenyamuknye lakak ubuka ati, kel kiptume. Abraham el diba tenebuk ning ap, el pil dipkoprop dobuk ning ap ara, neika atonun ubuk. Atouk winibuka ati, el diba tenebuk ning ara, apil dobuka deice arye, teleb ubuka pia wisibuke.

²³ Abraham arye awinibuk ning ara, Allah arye nyalilamuk touk winibuk. Allah nyalilamuk yupu ara ani. ‘Abraham arye Allah ati dipkoprop tenebuka deice arye, Allah el kanye ara, ‘Abraham ara pia diksukumnye ulule,’ tenebukce, teleb kipdeipbuk.’ (Kejadian 15:6) Tonda, yuk nang arye, Abraham ati nyabik, ‘Abraham elda, Allah el ka kopropa ulule,’ nyanyake.

²⁴ Aning ati ara, akunum lakak uple. Allah arye ninye nirya ati, ‘Anang ara diksukum nang,’ tenepsilirye, ayupu nyalisilya ara, ‘Nun talye diba tenepmabe,’ nyaltakabya deice arye kume. Nun diba tenena ap, diksukum una ap, diksukum winina ap unyaba deice, Allah arye, ‘Anang ara teleb nang, diksukum winin nang unyake,’ tenepsilirye, ayupu nyalisululce, teleb kipdeipsilirye.

²⁵ Aning atonun, Rahab ara, talye-talye yolamik kil, malye kil ulamuk bukni, el teleb pil dobuka deice arye, Allah arye, ‘Akil ara teleb kil ulule,’ tenebukce, ayupu nyapdeipbukce, akil ati teleb kipdeibuk. Rahab arye pil dobuka ara, ani. Ara, Rahab ara, Israel yala kil kum bukni, Israel nang arye, ‘Amutuku unyak kili sal obuka bisipnamap’ tenen, dilyarikbuk, akil arye anang dobuka, el aik noutam duknubuka deibukura, mabrik. Mapmarika berekukopura, amutuku nang arye, ‘Israel nang bitinye opnuyap’ tenen, dilyanganmek bisik batakuka, yuk bisik dopkwetebukura, birik. Apil dobuka deice, Allah arye, akil ati, “Akil ara akunum teleb kipdeipne,” nyabuke.

²⁶ Ati, ayupu ton nyapsine. Ninye nong dipmace talak, ninye kanye akunum bilyopura, ninye nong dibinauk unyake. Atouk, anggun diba teneptum bukni, anggun diksukum winin ning ton kum ulyopura, anggun diba tenena ning babye, dipna atonun ulule.