Yakobus 1 - Eipomek

Yakobus arye, deiyok kouna ati, nyabuk yupu

¹ Na Yakobus arye Yahudi yala nang 12 yala bokuka, yuk-yuk amutuku-amutuku umunce, diba tenelulum nang nirya ati, ayupu sekeipsene. Na Yakobus ara, nun ni Allah ap, nun Deiyoknye Yesus ap, sik talipnirikura, sik piluk dobuka ununye birye, ayupu sekeipsene. Telebe nyapsine.

Winilen ning usilye ning ap, kanye imun ning usilye ning ap ati, nyabuk yupu

² Na kayapu, Yesus dib teneluluma ati, nun du weit atonun ninyeo, kekepnuse. Kanye imun ning yala-yala weik upsilye talak nirya ara, teniltona kum, kanye teleb bobukauk unamlulume.

³ Ara, talye ati kume. Anggun kele, diba tenebibibuk, kanye imun ning usulula deice arye, diba tenenyap ning ara wisisulule. Wisipsilyopura, batakna pia kum arye, diba tenenauk tenebibirye, pil pia palibuka don nang unamabe.

⁴ Diba tenenauk ubuka, pil pia palibuka dolamibya ani, talima wisipsilyopura, nun teleb ubuka un ning nirya ara, kum suktalipnamle, pia langdibuka telebuk unamsile.

⁵ Anggun kan-kan noutamak arye, yata nang do nirya, teleb una ati, weik kele deiyok ning kum upmasilyopura, Allah ati moronamlume. Sikce sik pataplye touk, Allah ati morobice nang ara, wenena kum arye talye urdem weika arye arilule anya arye, Allah arye dipkoprop arenamsile.

⁶ Bukni, Allah moropnamlanye bira, kanye bokoltona kum arye, ‘Dipkoprop arepnamnile’ tenen, moronamle. Kanye bokoltonanye bira, weik mek laut mekwan pum arye lonting-lonting ablirye, mek kup-kup bini yana, kiplirye, bolkeklamla atonun ulule. Winilula ati, diba tenena deice aryuk moronamlume.

⁷ Kanye bokoltonauk ululnye bira, ‘Allah arye aning-aning arepnamnile,’ tenelul bukni, kum arenamimile.

⁸ Atonye bira, el kanye talima tonok kum tenelirye, kanye bintinilule. El un ning noutamak nirya ara, kanye moubuka kum tenelirye, pia teniltonauk ulule.

Bona weik talin nang ap, bona talina kum nang ap ati, nyabuk yupu

⁹ Bona talina kum nang, talye kan-kan nang ara, sik kan-kan danerye diba tenelamak nang ara, Allah arye akunum lyebuka ereibuka ati, Allah e kanye ara, ‘Aninye ara, sik mambul ninye,’ tenelule. Ati ara, sik kanye deibuka unamake.

¹⁰ Weik mambul nang, sik bona weik talin ninye ara, sik kan-kan arye diba tenyamika deice arye, amu tam kipnin banamake. Bukni, akunum diba tenenyaka ati, sik talima ap, sambala dib kanye ap ara, pia unamle anya arye, sik babye kanye deibukauk unamake. Ara kapye yo kita popmalya ani, like tonok arye kum ulamle touk, sik nong ap, sik talibuka unyak ning ap, kum upnamle ati nyapsine.

¹¹ Keting deiplirye, bupu weik uplyopura, akapye yo kita, sisal seplirye, lulsaklamle. Lupsaklirye, kita saklyopura, el urasin teleb ulamle ning ara, kum ulule. Aning kum ulamle touk, sisin nang babye, sik pil dolamaka noutam arye, sik nong kum upnamle.

Ikin ning upsiliba winildesulul ning ap, malye ning patapsilyeura, kanye ‘Se,’ tenelamsil ning ap ati, nyabuk yupu

¹² Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.

¹³ Yata nang do nirya, sik kanye malye tenena deice arye, ‘Aning winiptinye se’ tenen, patasilyeba, kanye talima lilosulul talak ara, “E, ara Allah arye, ‘Malye upnul do?’ tenen, na kanye talima lilonulirye, winilenmanile,” kum nyanamlulume. Ayupu kum nyanamlulume deiyok ara, Allah elda malye un ning nirya ara, kum patalula anya arye, malye ning deice arye, el kanye kum lilopdetue. Malye ning arye elti, kum winipdetue. Tonda, Allah arye ninye nirya ati, ‘Malye uptinge’ tenen, malye ning deice arye, sik talima kum lilosululce, ‘Se amalye ning doptinge,’ kum tenelule, tonda kum asilesulule.

¹⁴ Allah arye nunti, ‘Malye wininamak’ tenen, nun kanye kum lilosulule. Kum winildesulul bukni, ninye nirya ara, sik bidamnye aryuk, ‘Na yuk malye upnun’ tenen, kanye malye tenena deice arye patapliba, kanye lilosululce, ‘Se,’ tenenyakce, malye wininyake.

¹⁵ Pia patapliba tenenauk uplyopura, aminyan ara malye ning laka nong ulule. Malye un ning nong akunum kiplirye, neplyopura, dapia malye upra balamica ani, aminyan sirya talak ara, Allah arye uku din mutuku dopkwetepnamle. Dopkweteplyeura, uku pia dinamle.

¹⁶ Ura, na kayapu, na du weit atonun ululum nang ati, na kanye delisunune. Ayupu ton nyapnusine. Anggun bidamnye aryuk, tilila ning kum tenenamlulume. Tonda, tilila ning kum nyalanamlulume.

¹⁷ Yata teleb ning do nirya, pia teleb diksukum winina ning nirya ara, Allah elcuk arepsilyeura, im deice arye yangasulule. Ara, im deice dirina ulul ning nirya kwepdeibuknye, Allah elcuk pia teleb ning arisulule. Tonda, Allah elda, keting deiplirye, kanya urasin yuk-yuk kinim-kinim alamle touk, pia kum ulule. Allah el pil dobuka ulul ning nirya ara, pia tuba telebuk ulule.

¹⁸ Allah el kanye tenena deice aniryuk, dopropsukce, el dipkoprop yupu deice arye, el mapu kipdeipsuke. El dipkoprop yupu deice arye, el mapu kipdeipsuka ara, aning-aning nirya kwepdeibuk noutam arye, utenyamuk. ‘Na mapu koprop kipdeipse nang ara, sikda minop nang atonun, weik mambul unamake. Aning-aning nirya ara, winiryuk ning kintinibuka deipnamne bukni, na mapu ara, minop atonun unamake,’ tenyamsuke. Utenyamsukce, nun dobuka, el mapu kipdeipsuke.

Teleb winina ap, amul arye yupu kekena ati, nyabuk yupu

¹⁹ Na kayapu, nun du weit atonun ululum ninye, anggun nirya ati, na bico tenesunune. Anyapnusin yupu ara, moubuka kekeplulume. Ninye nirya ara, ninye arye yupu nyabikbuk, ‘Adip aryuk kekenamap’ tenen, kanye kintinilinamlulume. Bukni, yuk nang arye yupu nyanmace bukni, ‘Sik yupu yaniptapnirye, minopce na yupu uk nyapnune,’ tenena kume. Yupu nyapnumunye talak nirya ara, minopce moubuka tenepmunce, yupu moubuka nimalye aryuk nyanamlulume. Tonda, minopce yu pia una meme.

²⁰ Ara, Allah arye, ‘Diksukumuk unamake,’ tenelul ning ara, ninye yu una deice arye, teleb kibuka kum uptuma ati nyapsine.

²¹ Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.

²² Allah yupu nyapsicebuk, anggun amul deiceuk kekeplopmunce, ‘Akunuma,’ kum tenenamlulume. Ara, talye amul deiceuk kekeplopmunyeura, sik bidamnye aryuk, tilila yupu tenelalamak nang atonun ululuma ati, “Aning ara winina meme,” nyapsine. Allah el yupu deice nyasilye touk, moubuka kekepmunce, dobolbanlulume. Anyak winina kumura, tilila yupu nyan nang atonun unamlulume.

^23-24 Yata nang do nirya, Allah yupu amul deice aniryuk kekenyak bukni, kum dobolbanyak nang ara, sik winilamak ning atonun ning ara, nyapnusine. Ara, tonoknye birye kimilana dobuka, el bidamnye urasin dipdalirye, el urasin elilalul bukni, kimilana deibuka yukak bilyopura, adiparyuk el urasin eipmalye ning ara, luba kilule. Aning atonun, Allah yupu nyakiba, amul deiceuk kekenyak nang ara, ‘Allah arye nyapnile, aning ton winibuka nyapnile’ tenen, moubuka kum tenenyakce, luba kildongonauk unyaka ati, nyapne.

²⁵ Bukni, yata nang do nirya, Allah arye, ‘Wininamak’ tenen, diksukum areamsuk yupu ara, moubuka pia kel kibikirye, luba kina kum arye, pia dobolbalamice nang ara, sik kanye deibuka unyak ning nirya ara, telebuk unamake. Allah arye diksukum yupu areamsuk ning ara, malye ning arye kouamsuk noutam arye lobuka delisulule.

²⁶ Yatanye do nirya, elce el bidamnye ati, “Na diba tenepsa ati, diksukumnye unune,” talye nyaltakalul bukni, el nyalye yupu moubuka tenena kum arye, talye luba kibuka nyaplyopura, anye bira tilila yupu uk nyalalule. Atonye bira, el dib tenebuka talibuka ulul ning ara, deiyok kum ubuka ati, nong kum upnamle. Diba tenebuk ning ara, talyeuk ulule.

²⁷ Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.