Wahyu 9 - Eipomek

Malaikat pamunye ap, nakupnye ap arye, sik terompet deice lelim nyaprikba, winibuk ning ati, nyabuk yupu

¹ Aminyan ara, malaikat pamunye birye el terompet deice lelim nyabukba, im noutamak arye tonok weik kurya ton, tukwak mutuku sakukba, eipse. Akurya sakukce, malaikat atonun dayukba, Allah arye buplan kukne ning kunci aribuk. Akunci aribuka ara, tukwak mutuku noutamak tuku pum bisik weik telenga balamuk tam, el deice tam buplan tirikamuk ning kukne ati, akunci aribuk.

² Kurya bukni, malaikat dayuknye birye, telenga pum weik balamuk bisik deice tam buplan kuklobukba, abisik arye tulum pia weik welebuk. Atulum ara, wa demica ani, weik uku ibikiba, tulum weik arye welelamle touk ubukce, welebukba, keting ap, im noutamak dana-dana nirya ap kunukuk.

³ Tuku pum tam weik karu uamuka noutamak arye, tulum weika arye welenmok talak ara, atulum welenmok noutamak arye, sul kwising weik tulum kan-kan arye welenmeka ani, tuba tamubuka tukwak mutuku koluka yayik. Allah arye, asul kwising ati, uk dina deiyok ning arebuk. Ara, ‘Ninye sul kwising arye toplyopura, ninye tanga arye topsiliba, uk dilamle touk, uk weika arye dinamle’ tenen, uk deiyok ning arebuk.

⁴ Tonda asul kwising ati nyabuk. “Tukwak mutuku ulul maning ap, mutmuta ap, yo kan-kan ap, paplirye, palamle ning nirya ap ara, bok ara, kum dipnamlume. Aning bok dibuka malye kum kipdeipnamlulume. Bukni, Allah el pitin kilin ning sik asok deice kum wamlye ninye ara, weik arye si tonamlulume. Bukni, Allah arye, ‘Aninye ara na tenen nang’ tenen, laka kilin ning, sik asok deice sekuka deibik ninye ara, si tona meme. Bukni, Allah el laka kilin ning, sik asok deice kum ulamle ninye ara, weika arye si tonamlulume.

⁵ Anggun sul kwising arye, si tonamlum nang babye, si tonamlum bukni, kum oplopnamlume. Wala pamubarye deice arye si tolamunya ani, uk weika arye aninye dilamliba, weik arye malye nyalamikirye, donamake,” nyabuk. Aninye ati, uk dinamla ara, tanga arye ninye si topsiliba, uk weika arye dilamsil touk unamle.

⁶ Sul kwising si tolamliba, tukwak ninyeuk weik dinamle talak ara, sik talye tukwak ninye nirya arye, ‘Se, yata deice arye opsutuba, minopce diptibye do?’ tenen, dipna ning ati pia elinamak bukni, kum eipnamake. Kamuk ukirye, pia engebuka donamake.

⁷ Asul kwising, sik urasin ara, yin talin nang arye, ‘Nun kuda deice arye bukukab, malye nang olbinuyap’ tenen, sik kuda kintinilamak touk, winibikba, eipse. Asul kwising sik urasin ara, ninye urasin atonun kibuk. Sik kisok deice ara, emas atonun ning, el si ara mahkota ato ning koupdongamikba eipse.

⁸ Sik kisok potong ara, bol kurun kilapu sik potong cang antonun ubuk. Sik si ara, weik yu kuse, el si ara singa kus, weik cang si ulul touk ubuk.

⁹ Sik taram tam ongobik ning ara, ting atonun bukni, besi ning ubuk. Sik sul kwising lakuka banmek talak ara, sik pol lelim ara, mek onmalirye, mek lelim mimialamle touk winibuka ak, kekepse. Tonda yin talin nang arye, sik kuda balye deice bukikirye, sik tuku deice balamak ning, el si ara kereta kuda, balamikba, lelim weik lelamle tonun ubukba kekepse.

¹⁰ Sik amu ara, tanga amu atonun ubukba, ninye toplyopura, uk weik dilule. Sik amu arye tukwak ninye toplyopura, wala pamubarye deice arye, uku weik dinmaliba, engebikirye weika arye donamake.

¹¹ Asul kwising sik deiyoknye bira, weik tuku pum bisik malaikat ulule. Ibrani ninye yupu deice arye, el si ara Abadon nyanyake. Yunani yupu nyanyak ninye arye, el si ati Apolion nyanyake. Asi bitinye ning nyanyak deiyok ara, anye elda Ninye Oltakana Deiyoknye ululua ati, asi nyanyake.

¹² Aning nirya eipsa deice arye kel bikse. Arup Bib Seng-seng ana maka lakuka banmalce, “Bicoue, bicoe, bicoe,” nyanmo ning ara, weik kanye imun ning ‘Tonok ning ara, akunum winipmalba, eipmane’ tenen, kel bikse. Bukni, “Bicoe,” nyapmok ning ‘Weik kanye imun ning bitinye ning ara, aminyan talak ton yanule’ tenebuka bikse.

¹³ Aning tenepse talak ara, malaikat nakupnye birye, el terompet lelim nyabukba, ninye yupu atonun nyabukba kekepse. Ara, Allah el bulul sukum urasin tam deipmek emas meja deice arye, tace dana-dana belyamuk ning noutamak arye ayupu nyabuk.

¹⁴ “Wini talak ara, sik malaikat dumbarye tapu koupmunce, weik mek balamle mek, el si ara Efrat mekinak, tapu koubuka deibupu dumbarye malaikat ara, lopdongoplulume,” nyabuk.

¹⁵ Nyabukura, nakup malaikat, terompet nyanmokba kekebuka deice arye, Efrat mek kin tapu koubuka deiyamik malaikat dumbarye lopdongobuk. Amalaikat dumbarye lopdongobuk deiyok ara, tukwak mutuku unyak ninye nirya dobuka, yupa winilye bokuka, yupa bitinye batakuka, ‘Yupa tonok ara, aninye nirya ara oplopnuyak’ tenen, lopdongobuk. Tonda, talye talakuk kum bukni, Allah arye, ‘Na tenyamse talak, awala ap, asum noutamak, aketing deice aryuk, tukwak mutuku noutamak amalye ninye onamake,’ tenelamuk touk, atalak aryuk amalaikat dumbarye lopdongobukba ninye on pil deiyok koupnamake.

¹⁶ Amalaikat dum barye, sik melina ati, yin talin nang yupa pia weik unmeka ara, nukmanto kum unmekak, eipse. Sik kuda balye deice unmeka ara, kum nukmanto unmekak, eipse. Ara amalaikat ap, ayin talin nang ap arye, tukwak mutuku unyak ninye yupa tonok oplopnamaka ati nyapne. Ayin talin nang sik kuda balye deice bukuka kintinibuka bulupmeka ara pia weike. Nomor nukuka deibikba, kekepse ning ara dua ratus juta, atau 20 ribu laksa pasukan ubikba eipse.

¹⁷ Atalak ara, lengdar deice elilamap touk eipse ning ara nyapnune. Sik kuda deice bukuka kintinipmek ninye, sik urasin laka nyapnune. Sik taram deice ting atonun ning ongobik ning ara, ining bi ap, mirin ap, poron ap dayuk. Sik kuda basam ara, sik nong ara, kuda basam atonun kibuk bukni, akuda basam kisok ara, weik yu kuse, el si ara singa kus, urasin atonun ubukba, eipse. Akuda nirya si bam bol pum tam arye, uku buk ap, tulum ap, keil lyein tin pia weik ning ap, welebukba eipse. Aning nirya winibuka deice arye, sikin tong atonun weik arye nyanmokba, kekepse.

¹⁸ Tukwak ninye nirya bokuka deibukba, yupa bitinye ara batakik bukni, tonok yupa ara, aninye nirya oplobik. Ara talye ning arye ninye obik ning ara kume. Sik kuda si pum tam arye uku buk ap, tulum ap, keil lyein tin pia weik ning welebukce, tukwak mutuku unyak ninye weika arye dibukba, eipse.

¹⁹ Akuda arye, ninye obika deiyok ning ara bitinye ubuk. Ton ning ara, sik si pum tam arye kutukuka yayuk ning arye ninye obik. Bitinye ning ara, sik amu ara, ninye ton kwatima kisok atonun ubuka anya arye, sik amu arye tukwak mutuku ninye si tobikba, ninye weik dibik.

²⁰ Ura, tukwak ninye yupa winilye bokuka deibikba, tonok yupa ara, akunum oplobik bukni, tukwak mutuku ninye yupa bitinye tuba kam unmek. Sik kam unmek ninye arye, sik bidamang taruk deice arye, malye-malye winilamik ning ap, isa mer si erelamik ning ap, dekna weik ning dobuka, ninye urasin atonun puturubuka, ‘Nun ni kopropa’ tenen, memebuka deipnarye, si erelamik ning ap, anirya ati ara, sikce, ‘Se, nun malye winilamubu’ tenen, kum batakdongobik. Amalye ning talibuka tuba unmekba eipse. Ninye urasin atonun ning puturubuka deiamikce, si erelamik ning ara, dekna weik ning emas ap, perak ap, besi ning ap, urasin teleb keil ap, yo ap deice arye puturubuka deiyamik bukni, aning-aning nirya ara, kam kum ulamuk ning anya arye, bisik bana ap, asing elina ap, yupu kekena ap, yupu nyana ap pia kum ulamik. ‘Nun ni koprop anye’ tenen, puturubuka deiyamik ning nirya ara, talyeuk ulamik.

²¹ Amalaikat ap, sik melibuka yin talin nang ap arye, kum obik ninye ara, sikce yuk ninye oltakalamik ning ap, kir dolamik ning ap, bai mal olamik ning ap, kilapu talye ubula yolalamik ning ap, yuk nang bon-bona ubula dolamik ning ap ati, “Se, nun malye unyabe,” nyabuka, kum batakik. Kekena kumce, malye kibuka pia malyeuk winibik. Aning nirya eipse touk, na Yohanes arye nyapsine.