Wahyu 8 - Eipomek

Abuku taplakna ati, yo pea atonun ning, tekbarye ning dakuka yokeibukak, eibuk ning ati, nyabuk yupu

¹ Ayupu nirya laka nyabukba, kekepseura, Domba Mi Atonye birye abuku taplakna ati, yo pea ato ning tekbarye ning dakuka yokibuk ak, eipse ning ara nyapnusine. Yo pea atonun ning dakuka yokibukba, im deice mutuku noutamak nirya ara, tonok keting noutam atonun (setengah jam) ubuk talak ara, lelim mitik tonun babye, ton kum kekepse. Aning-aning nirya yupu tana kum dayik.

² Akarenuk, Allah el bulul sukum urasin tam pia tikinyak malaikat tekbarye yanmekba, weik pong-pong ana atonun ning, el si ara terompet, bokuka yuk-yuk aribukba, dobuka talipmek.

³ Talipmekak, yuk malaikat tonoknye birye, mek makau atonun ning, urasin ara, ngolol makau songgol atonun bukni, emas arye memamik ning dobuka, Allah el si erena ati, teleb ning arenyak dam tikilyayuk. Siltong teleb ning uku danyak ning talipmokce, Allah el si erena ati arinyak sukum, ameja dam tikilyanmok. Ameja babye, emas arye memamik ning ara, Allah el weik bun ning, urasin tam ubukba eipse. Malaikat yayukba, ‘Ngolol makau songgol pum tam dilamuk uku noutamak dongopnul’ tenen, siltong teleb ning weik arebikba, doprobuk. Tonda, Allah arye wibuka deiamukba, el mapu unyak ninye arye Allah ati moronyak yupu ton dobuka amalaikat arebikba, amalaikat arye ayupu ap, asiltong teleb ning ap tabakuka deibukce, emas meja deice deibuk.

⁴ Siltong teleb ning dobuka, el taruk arye bopmok makau pum tamuku dilamuka noutamak arye dongobukba, tulum welebuk. Atulum welepmok ning ap, Allah el mapu arye morolamak yupu ap, amalaikat el taruk arye arebukba, Allah dinmok akuk tabakuka neika welenmokba, Allah arye kekenmokce, dinmok.

⁵ Winibukba, amalaikat arye, Allah el si erena ati, siltong teleb ning uku dongonyak, emas meja deice dilamuk uku dobuka, ngolol makau songgol talipmok ning pum tam dongobukba, langdibuk. El ngolol makau langdibukopura, aning nirya mikip arye im deice arye, tukwak mutuku dopkwetebuk. Auku dobuka tukwak mutuku deice dopkwetebukura, liman ap, bebeya lakna ap, weik lelim ap, weik mutuku lulukna ap ubukba kekebuka eipse.

Tek barye malaikat arye, terompet tekbarye talebikce, adeice arye pong-pong abik ati, nyabuk yupu

⁶ Ura, aning nirya akunum winibukba, sik tekbarye malaikat arye, sikti, arepmek pong-pong ana el si ara terompet, ‘Pong-pong apnuyap’ tenen, kintinibik.

⁷ Min deiyok koubuk malaikat arye, el bopmok terompet pong-pong abuk deice arye, adiparyuk uku buk ap, ining ap, dekne dukduka puru ap, lakak ubukba, aning-aning nirya tabakuka bobukce, im deice arye tukwak mutuku mikip asa arye dopkwetebuk. Dopkwetebukba, tukwak mutuku sakuka deice arye, tukwak mutuku im sirya, mutuku sirya nirya bokuka winilye kibukce, bitinye ning batakuk bukni, tonok tam ning ara, uku dibuk deice arye kum dayuk. Aning atonun, yo kan-kan nirya bokuka, winilye deibuk bukni, yo kan-kan bitinye ning ara, batakuka tonok ning ara uku dibuk deice arye kum dayuk. Tukwak mutuku maning ap, mutmuta ap nirya ara, uku dibuka deice arye kum dayuk.

⁸ Malaikat bitinye anye birye, el terompet pong-pong abuk deice arye lelim lebukopura, weik mutuku kon atonun ning ara, weik uku dinmoka ani, laka kibuk. Winibukba, amutuku doprobukce, im deice arye tukwak mutuku laut mekwen noutamak, mikip asa arye dopkwetebukba, tukwak mutuku laut mekwen nirya bokuka winilye kibukura, bitinye tam batakuka, tonok tam ara ining mekwen dayuk.

⁹ Aning atonun, laut mekwen noutamak ulirye, balamle ning aning-aning nirya noutamak, yupa winilye bokeibuk bukni, yupa bitinye batakukba kam tuba ulamik bukni, tonok bokuka deibuk ning ara, adiparyuk dibik. Aning atonun laut mekwen deice banmek mek liya yo, el si ara kapal laut, nirya dobuka winilye bokukabukce, yupa bitinye batakuk bukni, tonok yupa kapal laut ara oplobukba, laut mekwen dibuka deice arye kum dayuk.

¹⁰ Malaikat winilinye birye, el terompet nyabuka deice lelim nyabukura, im noutam akuku buk weik arye dinmok kurya weik ning ara, tukwak mutuku balamuk mek ap, mek puak ap, adeice sakuk. Mek nirya aubuk bukni, winilye bokreibukce, bitinye ning batakuka telebuk ubuk bukni, bokuka tonok ning ara malye kipdeibuk.

¹¹ Im noutamak arye sakuk kurya el si ara, Sikulula anya arye, tukwak mutuku balamuk mek ap, mek pu panalamukak ap nirya bukni, winilye bokreibukce, bitinye ning batakuka, tonok ning ara sik weik ubukba, kum dipmanto ubuk. Amek nirya sik pia weik ubukba, tukwak ninye amek kwebuka mangkau arye dipnarye, sik deice aryuk, dilamukba, tukwak mutuku ninye weika arye dipra balamik.

¹² Malaikat dumbarinye birye, el terompet nyabuka deice lelim nyabukopura, adiparyuk keting ap, wala ap, kurya ap malye updeibukba, kunukuk. Ara keting ap, wala ap ara, nong tonok-tonok bukni, anoutamak bokukabukce, mitik tam kunukuk bukni, weik tam ara tuba teleb ubuk. Kurya ara, yupa weik uamuk bukni, winilye atonun bokukabukce, mitik tam kunukukce, weik tam ara, tuba teleb ubuk. Keting ap, wala ap, kurya ap bokuka, mitik tam kunukuka deice arye, keting noutam babye, lukunyan babye, mitik talak ara, dirin kum kibukce, pia kunukuk. Ton talak ara, dirin tuba ubuk.

¹³ Aning nirya wininmokba, dinmasi talak ara, tonok Bib Seng-Seng ana maka arye, im noutamak lakuka banmokce, ayupu nyanmok. Elce nyanmok yupu ara, ani. “Sik yuk malaikat winilye nang arye, sik terompet deice lelim nyabikiba, anggun tukwak mutuku ululum ninye nirya ara, weik kanye imun ning winilye tonap yanganamsila ati, anggunda bicoe. Se, anggun bicoe, bicoe, bicoe,” nyabuka, lakuka banmokce nyabukak, kekepse.