Wahyu 7 - Eipomek

Allah arye, ‘Israel ninye ara, na tenen ninye unamak’ tenen, yupa weik, 144.000 ninye, sik nong deice, pitin kilina ning deibuk yupu

¹ Aning nirya eipsopura, aminyan eipse ning ton nyapnusine. Ara malaikat dumbarye nang arye, tukwak mutuku koluka biyik. Ton malaikat ara, mutuku sirya im sirya bukni, keting yangan tam tikilbiyuk. Tonye bira keting wekelban tam tikilbiyuk. Tonye bira outam, tonye itam bukni, mutuku sirya im sirya tikilbirik. Sik malaikat dumbarye nang arye, dana-dana tam nirya yangalye kumanya ati, talibuka kalikil biyik. Ara, kumanya arye tukwak mutuku deice ap, yo kan-kan noutamak ap, laut mekwen tam nirya ap, ‘Min doplyak’ tenen, kumanya kalikil biyik.

² Tonok malaikat ton keting yangan tam arye yanmokak, eipse. Amalaikat arye, laka kilin ning talibuka yanmok. Elce bopmok ning ara, Allah arye, ‘Aninye na tenen ninye unamak’ tenen, laka kilin ning dirina bopmok. Amalaikat arye, Allah el mapu pitin kilina deiyok ning talipmokce, sik yuk malaikat dana-danatikmek malaikat ati, weik yupu deice arye ayupu nyabuk. “Tukwak mutuku nirya ap, laut mekwen nirya ap, malye kilina deiyok mikip akunum arepsuk bukni, kabula.”

³ “Wini talak ara, tukwak mutuku nirya ap, yo kan-kan nirya ap, laut mekwen nirya ap ati, min malye kum kipdeipnulame. Nun ni Allah, el amu tam bukuka, eltibuk kanye deibuka, el piluk donyak ninye nirya ati, pitin kilina ning, sik asok deice taplakdeipnuyabe. “Sik ti, akunum lak kilin ning winibibyopura, aminyan ara, nunce laka kilin ning, kum taplakibyeura, sik malye ulina pil donamlulume,” nyabuk.

⁴ Nyabukura, ‘Aninye Allah arye na tenen ninye’ tenen, sik asok deice taplakdeibuk ninye, sik yupa si ara kekepse. Ara, Israel nang ayala-yala nirya noutamak arye bokuka, ninye yupa weik 144.000 ninye pitin kilin ning taplakuk. Aninye ara, Israel ninye bukni, sik yala ap si ap, sik nomor yupa ap, yuk-yuk nyapnune, ara ani.

⁵ Yehuda yala ninye noutamak arye, yupa weik 12.000 nang wibuka, sik asok deice pitin kilina ning deibuk. Ruben yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Gad yala ninye noutamak arye, yupa weik 12.000 nang wibuka, sik asok deice pitin kilin ning taplakuk.

⁶ Asyer yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Naftali yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Manase yala ninye noutamak arye, yupa weik 12.000 nang wibuka, sik asok deice pitin kilin ning taplakuk.

⁷ Simeon yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Lewi yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Isakhar yala ninye noutamak arye, yupa weik 12.000 nang wibuka, sik asok deice pitin kilin ning taplakuk.

⁸ Zebulon yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Yusuf yala ninye noutamak arye, yupa weik 12.000 nang wibuka, sik asok deice pitin kilin ning taplakuk. Benyamin yala ninye noutamak arye, yupa weik 12.000 nang wibuka, sik asok deice pitin kilin ning taplakuk.

⁹ Aning nirya akunum winibuka, eipsopura aminyan eipse ning ton nyapnune. Ara, ninye pia yupa weik, ninye arye kum nukmanto ninye bulupmekak, eipse. Aninye ara, tukwak mutuku im sirya, mutuku sirya nirya noutamak arye, asukum-asukum arye, dobuka bulubuka wekmek ak eipse. Ara ninye ayala-ayala nirya ap, ninye yupu ayala-ayala nirya ap, weik mutuku ninye negara-negara nirya ap, noutamak arye bokuka wibuka deipmekba, bulubuka unmek. Sik nirya ara, weik Ninye Deiyoknye bun ning deice bukmoknye ap, Domba Mi Atonye ap, sik urasin tam tikmek. Pia kurun baju ongobuka tikmikce, ‘Nun Ni kopropa si erepnamap’ tenen, sik taruk arye, kelapa bok talipmekce, kwakdubuka, si erenmekak, eipse.

¹⁰ Wininmekce, weik yupu deice arye nyanmek. “Weik Ninye Deiyoknye bun ning deice bululnye, nun Ni kopropa Allah ap, Domba Mi Atonye ap, sik bitinye ara Ninye Lyena Deiyok nang ururake. Sikcuk lyesururake.”

¹¹ Ayupu nyanmek talak ara, sik malaikat nirya ara, sirya tam antanapdongobuka tikmek noutamak ara, sik 24 wisi deiyok nang ap, sik dumbarye kam unyak ning ap tikmekba, noutamak ara, Allah el weik bun ning deice bukmokak eipse. Eipse talak ara, sik nirya arye, ‘Nun Ni kopropa Allah kibuka, el si erepnuyap’ tenen, el bun ning urasin tam gutam tuku dipdongobuka bukmikce, ayupu nyanmek.

¹² Sik nyanmek yupu ara ani. “Nun nyapnuyap ning nirya, ‘Dipkoprop nong upnamle’ tenen, “Amin,” nyababe. Nun Ni kopropa Allah ati ara, si erena ning nirya ap, mikip weik ulul ning nirya ap, weik kel bikna deiyok ning nirya ap, teleb nyan yupu nirya ap, anirya ara, an deiceuk pia unamkile. Anda pia telebe, an siuk pia erepkiyabe. Anyanmap ning nirya ara, wini talak arye dipdongobuka, doryanamle talak noutamak nirya ara, ‘Apia unamkil’ tenen, “Amin,” nyababe.” Nyabuka, el si erenmekba, kekepse.

¹³ Akaren uk, sik 24 wisi weik deiyok nang kan-kan tonoknye birye, na Yohanes ati asipdenuke. “Sik kurun baju ongobuka aunmak ninye ara, ‘Anang ara ani, sik mutuku ara ani’ tenen, moubuka kel kipmalam do, kum do?” nyabuka asipdenuk.

¹⁴ Asipdenukbuk, narye, “Na walwal bukni, anda kele,” nyapse. Nyapsiba, anye birye ayupu tamubuka, laka nyapnuke. “Kume, sik aninye ara talye nang kume. Sirya talak noutamak ara, malye nang arye, Allah el mapu nirya ati, ‘Nun like’ tenen, ikin ning pia weika arye, sik nong deice delilamikba, imun kanye weik bolamik bukni, Allah pia kum bataklamik. Kanye darapdongobuka, Allah elti, diba tupa tenelamik. Domba Mi Atonye obikba, el ining biyuka deice arye, sik malye winin ning nirya kum kipdeibukce, pia diksukumuk kipdeibuk. Winipsuka ati ara, sik nirya arye pia teleb koprop kurun baju ongopmake,” nyapnuke.

¹⁵ Ati ara, aninye ati ayupu ton laka nyapnuke. “Diksukumuk akunum kipdeibuk ninye ara, Allah el dam noutamak tuba-tuba unyake. El bulya dam unyakce, keting noutam babye, lukunyan babye, el amu tam bukuka el piluk donyake. Allah arye sikti, pia kalikuka melinamle.

¹⁶ Allah arye aninye ati, pia melilamlya ani, atalak arye dipdongobuka aminyan doryanamle talak nirya ara, din ap, mek ap, pia kum patanamle. Keting bupu din ning, sik nong deice pia kum teng-teng anamle. Aning atonun, yuk weik tin ning nirya arye, sikti, tin upliba, uk kum dinamle.

¹⁷ Aning ara talya ati kume. Deiyok ara, weik Ninye Deiyoknye bun ning noutamak bululnye, Domba Mi Atonye birye, sik deiyoknye pia unamle. Ara, domba wein nang arye, sik domba bico tenebuka, pia teleb kibuka weilamak touk, elce sikti, namin asa arye melibuka unamle. Elce minopce menekuka balibuk, sikda el aminyan tam dobolbaceura, Kam Una deiyok mek pu dam bobanamsile. Aninye sik mambul kanye bobuka, asing maka saknamle ning ara, Allah arye anang ati engena deiyok ning kum kipdeipnamsile. Kum kibuka deiplirye, asing maka cepdeipnamle ninye ara, tuba tonap pia kum engenamake.” Anye birye nyabuka laka nyapnuke. Na Yohanes arye nyapsine.