Wahyu 6 - Eipomek

Domba Mi Atonye birye, sekna mambul ning, buku deice deiamuk yo pea atonun, palepdongamuk ning debuka, yokeibuk ati, nyabuk yupu

¹ Domba Mi Atonye birye, Allah taruk deice bopmok buku dobuka, abuku noutamak denepdongamuk yo pea ato ning, tekbarye awamuk bukni, tonok ning daklobuka yokeibuk ak, eipse ning ara nyapnune. Minyuma yo pea atonun ning dakukura, sik dumbarye kam unyak ning bukni, tonoknye birye, weik yupu deice arye, “Yalyame,” nyabuk. El yupu nyabuka ara, liman arye lelim weik nyalamle touk ubukba, kekepse.

² “Yalyame,” nyabukba, amining damak binuka dinmasiba, kuda basam kurun ning ton yayukba, eipse. Akurun kuda balye deice bukmoknye bira, yin talipmoke. Allah arye ninye deiyok nang, ati kisok deice kalulamak ning, el si ara mahkota aribukba, el kisok deice kalupdongobukce, akurun kuda deice bukuka, bik-bik abuka biyuk. El bik-bik abuka biyuka ara, sik yin talin deiyok nang arye, ‘Malye ninye oplobibirye, malye kipnuyap’ tenen, mikip asa arye balamak atonun ubuka, kuda deice bukuka bik-bik abuka biyuk.

³ Domba Mi Atonye birye, abuku sekuka deiyamuka yo pea ato ning, bitinye ning dakuka, yokeibuba, sik dumbarye kam unyak ning bitinye ning arye, “Yalyame,” nyabukba, eipse ning ara nyapnune.

⁴ Ayupu nyabukba, tonoknye tonap, kuda basam balye deice bukuka yayuk. El kuda urasin ara, ining bi atonun bukni, uku buke paklamle atonun ubuk. Allah arye anye biti weik parang ya arebuk. Tonda, ninye im sirya, mutuku sirya nirya walana ap, olana ap kumce, ‘Kanye deibuka teleb ubuka neika una deiyok ning dalubuka dopropnamle’ tenen, deiyok ning arebuk. Adeiyok ning arebuk deiyok ara, ‘Ninye im sirya, mutuku sirya nirya arye yu upliba, olanauk unamak’ tenen, yu ulina deiyok ning aribukba, aining bi kuda basam deice bukmonye birye, aning dobuka bobiyuk. Bobiyukba aning ton eipse.

⁵ Domba Mi Atonye birye, mambul buku sekuka deiyamuka yo pea atonun ning, winilye ning dakuka, yokeibuba, sik dumbarye kam unyak ning winilinye birye, “Yalyame,” nyabukba, kekebuka eipse ning ara nyapnune. Ayupu nyabukba, kuda basam tonok ton, mirin ning yayuk. Mirin kuda deice bukmoknye, el taruk deice bopmok ning ara, ‘Ikin do, kanam do?’ tenena ati kiklilen ning, el si ara timbangan talipmokak, eipse.

⁶ Atalak ara, sik dumbarye kam unyak ning noutamak arye, ninye yupu nyalamak atonun yupu deice arye nyanmekba, ayupu kekepse. “Wini talak ara, tonok sum nirya arye, ikin pil donmaca ani, dekne ning arenamak deice arye, din ning mitik anunuk dekenamake. Ara tonok sum nirya ikin pil dobikirye, dopropnamak dekna ning deice arye, roti dana deiyok ning, atu ato ning, el si ara terigu, tonok literuk deknamake. Akumopura, mitik teleb ning yakong atonun ning ara, 3 literuk deknamake. Bukni, Ara yo duk teikikibuk, basam kop atonun mek kwelamak ning ap, anggur mek dilamak ning ap ara, dauplye. Ance aning bitinya ati malye ulina kume, Ara yo kan-kan ap, anggur tapu wa ap ara telebuk unamle,” nyabukba, kekepse.

⁷ Ura, Domba Mi Atonye birye, mambul buku sekuka deiyamuka yo pea atonun ning, dumbarye ning dakuka, yokeibuba, sik dumbarye kam unyak ning, dumbarinye birye, “Yalyame,” nyabukba, kekepse. Atalak eipse ning ara nyapnune.

⁸ Dinmasiba, tonok kuda basam tonap yayukba, el urasin ara, bol ekamuk kuda basam unmokba, eipse. Akuda deice bukmoknye, el si ara Ninye Dipna Deiyoknye bukmok. El menekuka banmokba, el aminyan tam meneng dam yanganmok ning ara, akunum diblamice ninye unyak aik talibuka, ulye deiyoknye yanganmok. Ayanganmarik nang bitinye ara, Allah arye, ninye dipna deiyok ning aribukba, doproprik. Ara tukwak mutuku im sirya, mutuku sirya nirya unyak ninye noutamak bukni, anirya dobuka yupa dumbarye wilibuka deiprikirye, yupa winilye batakuka, ‘Tukwak ninye yupa tonok weik arye oplopnamrak’ tenen, dipna deiyok ning aribukba, doproprik. Dipna deiyok ning doproprikce, sik mikip deice arye pil dopricopura, ninye weika arye dipnamak ara, ani. Ton tam nang arye, ton tam nang ati ya ap, yin ap arye pia olanamaka deice arye, ninye weik dibinamake. Tonda din ning aning-aning nirya kum daliba, din patapliba, din dina kum deice arye, ninye weik dibinamake. Tonda, kanye imun uk, weika arye dilamlyani, ninye weik tonap sakdanin balirye, weika arye dibinamake. Ton ning ara, ninye kum unyakak, bai mutuku noutamak kam ulul ning nirya arye, yu weik upliba, ninye weik olyanganamake.

⁹ Domba Mi Atonye birye, mambul buku sekuka yo pea atonun ning deiyamuka pamubarye ning, dakuka, yokeibuba, eipse ning ara nyapnune. Ara, Allah el si kina ati, kam ning obuka meja deice delilamaka, urasin atonun ning eipse. Ameja amu tam ara, ninye kanye weik aunmekba eipse. Aninye ara, minop talak Allah yupu dobuka peterepra balamikba, yu nang arye, ‘Nun like’ tenen, ikin ning weik sik nong deice delilamik bukni, batakna pia kumce, diba tenenauk ulamikce, lak akuk peterelamikba, malye nang arye aninye oltakalamike. Oltaklamik ninye, sik kanye ameja amu tam bukmikce, ayupu weik arye nyanmek.

¹⁰ Se, nun Deiyoknye, aning-aning nirya talibuka deice tam umince, ance tenelyam touk winilyame. Malye ning tonok babye, kumuk ulule. Anda, pia dib yupu uk nyamince, diksukumuk ulyame. Minop talak tukwak mutuku malye winilamik ninye arye oltakalamsik ati ara, dan talak arye anang ati kwang daknamsilam do? Sikce opsika ati, dan talak arye yupu lipsisikuka bokeipmince, amalye nang ati wenebuka opnalam do?” nyabuka, malye nyanmekba, kekepse.

¹¹ Ayupu nyanmekba, sik nirya ati, pia teleb kurun baju yuk-yuk bokuka aribukba, dobuka ongobik. Ongobikura, ayupu ton tamubuka sikti, nyabuk. “Kume, daulamunya ani, atalak noutamak sik tukwak malye nang arye, weika arye tonap, anggun kayapu ton tabakuka onamake. Ara minop talak sik malye nang arye, anggunti oltaklamsik touk, aminyan talak babye diba tenekirye, Allah el piluk donyak ninye tonap oplopra balamica ani, na arya, ‘Winibuka ninye opnamake,’ tenyamsi touk akunum oplobicopura, amalye nang ati yupu lipsisikuka bokeipnirye, wenebuka oplopnamne,” Domba Mi Atonye birye nyapdeibukba, kekepse.

¹² Nyabukce, Domba Mi Atonye birye, mambul buku sekuka deiyamuka yo pea atonun ning, naku barye ning dakuka, yokeibukba eipse ning ara nyapnune. Mambul buku sekuka deiamuka yo pea atonun ning dakuka, yokeibukura, adiparyuk weik mutuku lulukna lulukuk. Mutuku-mutuku nirya, mikip weika arye lulukukba, keting ara pia miribukce, kunukuk. Miribuka ara, pia mirin kambing potong atonun ubuk. Wala ara, ining bi atonun bi dokuk.

¹³ Wala ining bi atonun ubukba, im deice noutamak tiklamle kurya weika arye, tukwak mutuku sakuk. Ara weik mok piriripna doplirye, akunum kolyamle yo bok dakalsaklamle atonun, kurya weik arye tukwak mutuku sakuka ak, eipse.

¹⁴ Im noutamak nirya ara, ninye malamak amsuna kitilamak touk winibukba, mutuku dup nirya ap, laut mekwen arye sekelongolamle mutuku mek dum-dum ap, el si ara pulau, anirya ap, weik arye lulukunmok.

¹⁵ Aning nirya winibukopura, tukwak mutuku weik ninye deiyok nang, Raja-Raja nang nirya ap, sik amu tam deiyok talibuka unyak nang ap, yin talin nang, sik deice tam deiyok nang ap, bona uto-uto talin ninye nirya ap, weik mikip nang nirya ap, dekna dolona kumce, talye pil melina ninye ap, talye daunyak ninye ayala-ayala nirya ap, tukwak mutuku ninye nirya, ilil pia weik ubukce, asok dama biyuk. Ilil weik ubukba, bai mutuku bik-bik abuka biyikce, ‘Ikin ning arye opsilyak’ tenen, keil deiya pum tam ap, weik keil deiyok ap, duknulbiyik.

¹⁶ Duknubikce, pia ilil weik ubukba, nyanmek. “Se, nun mambul weik upsile. ‘Anggun amutuku kon ap, weik keil nirya ap, nun nong deice sakuka, singnipsutumce, opsutum’ tenen, moropseabe. Ara talye ati kume. Deiyok ara, weik Ninye Deiyoknye, bun ning deice bululnye, Allah arye eipsilirye, wenepsilyak ati ara, nun minopce sakuka opsutumce, siknipsutume,” nyabuka moropseabe. Tonda, ‘Domba Mi Atonye, yu weik upliba, weika arye wenebuka opnamsile’ tenen, ati ara, anggun amutuku kon ap, weik keil nirya ap, “Nun nong deice sakuka singnipsutumce opsutume,” nyabuka moropseyabe.

¹⁷ “Talye kum nyanmabe. Yu pia weik upliba, sik bitinye arye nun tukwak malye unyap ninye nirya ati, weika arye wenebuka opnamsirak sum, weik kanye imun sum akunum damak yanmasila ati, ikin pia weik upsiliba, weika arye donamap ati, mutuku kon ap, keil ap sakmunce, siknibuka opsutume,” nyabuka malye nyanmekce, engenmekba, kekepse.