Wahyu 3 - Eipomek

Allah arye, sik Sardis mutuku diba tenelamik ninye ati, nyabuk yupu

¹ Ninye Mi Koprop Atonunye birye nyapnuke. “Yohanes, ance Sardis mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” “Allah el bulul sukum urasin tam unyak dib kanye, tekbarye ap, tonda kurya tekbarye ap, talibuka ununye birye ayupu nyapsine. Anggun ululum ning nirya ara, narye kel bikisunune. Yuk ninye arye anggunti, ‘Kume, anang ara, sik teleb kibuka, Allah yupu kekebuka diksukumuk dobolbanyak,’ nyasinyake. Winibuka nyasinyak bukni, narye dipkoprop kele. Anggunda, dipkoprop teleb ubuka na yupu ati kum dobolbalulume. Ati, na kanye ara, anggunda akunum diamik ninye atonun ululume.”

² “Ati anggun kanye mouplulume! Mitika arye na yupu kekebuka dobolyanganamnulum ning ara, ‘Kum kipninbisilyak’ tenen, mikip kilinamlulume. Na yupu teleb kibuka talipmunce, teleb kibuka dobolyanganululume. Kumopura, talye ati kum nyapsine. Na nyasinye yupu batakanumunya ap, anggun winimunye ning nirya ap, dipdesisa anya arye, na biksise. Allah arye, ‘Winibuka unamake,’ tenyamsuk touk, teleb kibuka kum ululume. Ton ning ara batakuka, talyauk umunya ati nyapsine. Allah arye, anggunti, ‘Sik Sardis mutuku unyak ninye ara, malyeuk unyake,’ tenesulule.”

³ “Aning ati, anggunce peterelamsikba, kekenamlum ning nirya ara, ila tuba tonap tenepmunce, dipkoprop lipsisikuka dobolbanamlume. Anggun malye ululum ning batakmunce, urasin tamubuka diksukumuk unamlulume. Bukni, anggun kanye kum moupmumyopura, sik ubula don nang, talya karin arye, duknubuka yangalamak touk, anggun dam yanamsine. Anggunce, ‘Atalak noutamak, asum arye yanamasil’ tenen, moubuka kum kel bikmamunye talak aryuk wenelyanamsine.”

⁴ “Bukni, anggun Sardis mutuku ululum ninye kan-kan arye ton nang ara, malye winin ning min kum wininyake. Ninye arye, ‘Nun baju bental duplyak’ tenen, moubuka ulamak touk, akili sal ara, malye ning talibuka kum unyakce memelonyake. Adiksukum unyak ninye dobukapnarye, pia teleb koprop kurun baju arepniba, ongobikirye, na ap neika unamabe. Allah arye anggunti, ‘Malye kum wininyaka ati sikda teleb,’ tenelula ati, na ap neika unamabe nyapsine.

⁵ Ati malye winin ning aning-aning nirya, ‘Nun like’ tenen, malye kilamice ninye ati ara, anyapmasin ninye atonun, pia lek kurun baju arepniba, ongonamake. Kam Pia Unamak Ninye Si Sekna Buku noutamak anggun ninye si sekeipsik nang ara, pia kum kilipnamne. Ato ninye, sik si kum kilipnamne bukni, na ni Allah el dam binuka, “Aninye ara na mapu kopropa unyake,” nyabuka, sik si lakak si nyapnamne. Tonda, Allah el im deice pil don nang, sik malaikat nirya babye, aninye sik si lakak nyapneba, kekenamake.

⁶ Ati anggun amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye nirya ara, Allah El Dib Kanye arye, anggun diba tenelulum ninye ati nyasilye yupu ara, moubuka kekenamlulume.” Ninye Mi Koprop Atonunye birye, na Yohanes ati, nyapnuke.

Allah arye, Piladelpia mutuku diba tenelamik ninye ati, nyabuk yupu

⁷ Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.

⁸ Anggun Piladelpia mutuku ninye ara, anggun winilulum ning nirya akunum kel bikamsise. Anggun kanye mouplulume. Narye buplan akunum kukeipman ning ara, yuk ninye arye kum tiriksitinge. Na kele, anggunce na pil dona ati, anggun mikip mitik tonunuk upmasil bukni, anggun mikip mitik tonunuk upmasilya babye, na yupu moubuka talimunce, dobolyanganululume. Anggunce, na ap na si ap ati, ‘Nun lik’ tenen, “Anye bira nun walwale,” nyabuka, pia kum batakanululume. Aikin ning ara, anggun dam kum yaliba, narye anggunti winibuka kum asilenamsine.

⁹ Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.

¹⁰ Narye anggun nirya ati, “Ikin ning upsilya babye, batakna kum pia pi dobuka lamapdongobuka arye pil tuba donamlulume,” nyapsise touk, tuba umunya ati ara, narye anggunti lyepnamsine. Ara, ninye mutuku-mutuku nirya ati, weik kanye imun ning yanamla deice arye, aninye nirya ati, ‘Yesus bataknamak do, tuba diba tenenamak do?’ tenen, asilenamle bukni, anyasilen ning min kum yanmalye talak ara, narye anggun Piladelpia ninye ati, lyebuka dopnamsine. Aning ara anggunti asininto kum unamsine

¹¹ “Narye minopce yanamna ati, anggunce akunum teleb kibuka ulamunye ning ara, pia moubuka talipmunce, darabuka unamlulume. Deiyok ara, ‘Nun pil dekna ati menenga ning arepnamsile ning ara, kum dasilyak’ tenen, moubuka unamlulume.

¹² Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.

¹³ Ati, amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye nirya ati nyasilye yupu ara, moubuka kekenamlulume.” Ninye Mi Koprop Atonunye birye, na Yohanes ati, nyapnuke.

Allah arye Laodikia mutuku diba tenelamik ninye ati, nyabuk yupu

¹⁴ Ninye Mi Koprop Atonunye birye nyapnuke. “Yohanes, ance Laodikia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Ayupu nyapsinye bira, na tenene ning nirya nong akunum upnamla ati, ‘Amin,’ nyananye unune. Nara, batakna pia kum diparyuk, Allah el yupu tuba dipkoprop nyanune. Allah arye kwepdeibuk ning nirya ara, na talinirye, weik deiyoknye unune.

¹⁵ Anggun Laodikia mutuku ululum ninye ara, anggun winimunye ning ara, na akunum kel bikamsise. Anggunda, uku buk dilirye, tin weik ulamle touk utumopura, anggunce nati weika arye diba tenebuka dobolyanutume. Bukni, aning kum winilulume. Tonda, mek lum saklirye, moul weik ulamle touk utumopura, anggunce nati, “Nun like,” nyabuka, talye luba kibuka bataknutume. Na kanye ara, ‘Teleb ning ara, namin atonun ninye uptinge. Akumopura, bupu atonun ninye uptinge,’ tenenune.

¹⁶ Bukni, anggunda, tin kum, moul kum, talye kanye bobuka, ‘Dip do, tilila do?’ tenen, teniltonauk unululuma ati ara, ninye arye mitang ning dipdekirye, adiparyuk dukultakalamak touk, narye anggunti, ‘Na like, anggunti na like’ tenen, adiparyuk bataknamsine.

¹⁷ Anggun bidamnye arye, anggun bidamang ati nyalalulume. “Kume, nunda aning-aning ayala-ayala nirya weika arye bulubuka akunum deiamuba ati, nunda bona uto-uto talin ninye akunum unyabe. Yata ning do nirya kum patasulule,” nyabuka kwalilulume. Utenebukce nyalalulum bukni, dipkoprop winimunye ning ara, moubuka kum tenelulume. Allah arye anggunti el kanye ara, ‘Kume, aninye ara, pia malye-malyeuk wininyaka anya arye, yuk nang nirya arye anggunti, se sikda bicoe,’ tenenamake. Sikda talye bona utotoa kum ninye ap, asing kun ninye ap, talye nong demuk banang banyak ninye ap atonun unyake. Allah arye anggun ati, ‘Sik Laodikia ninye ara, na like,’ utenesulule.

¹⁸ Ati ara, narye anggunti nyapsine. Emas ning dobukapnarye, ‘Malye ning nirya kum danul’ tenen, uku dongopnaba, malye ning nirya uku dipliba, pia teleb uplye ning ara, anggunce na dam dekelyanganulum. Aning winipnumunyopura, dipkoprop bona uto-uto talin ninye atonun unamlume. Na dam yanuka pia lek kurun baju dekmunyopura, anggun talye nong demuk balamunye ninye ara, anggun nong bol lelna ati, teleb koprop kurun baju ongopmunce, teleb unamlume. Tonda, na dam yanuka asing likne obat, kweten ning dekmunyopura, anggun asing likmunyeba, teleb upsilyopura, teleb kibuka elinamlum. Wini talak ara, anggunce malyeuk winimunye ning ara, bita kum dilalulume.

¹⁹ “Narye bico tenebuka melinun ninye ara, malye winibikcopura, wenepnirye lipsisikuka peterenune. Ati, talye kanye bobuka, ‘Dauplye’ tenen, talye nyaltakana kum bukni, dipkoprop anggun malye winilulum ning nirya batakuka urasin tamupmunce, diksukum bisikuk banamlulume.

²⁰ Nara, anggun dam akunum yanmasine. Anggun aik buplan dam tiknirye, ‘Bublan kukeipnuniyak do?’ tenen, bisik lorum-lorum asunune. Yata nang do nirya, na yupu kekebikirye, sik buplan kukeipnicopura, na adiparyuk sik aik weknirye, sik ap, na ap dine dibuka neika unamabe.”

²¹ “Malye winin ning nirya ati, ‘Nun like’ tenen, malye kilamice ninye ati ara, weik ninye deiyok ning arepniba, na weik deiyoknye buna ning deice ara, na ap, sik ap, neika bunamabe. Aning ara, narye malye winin ning nirya ati malye kipsirye, na Ni Kopropa Allah, el deiyoknye ulul ati bulul sukum deice, el ap neika bunyam touk ati, nyapsine. Aning ara, narye malye winin ning nirya ati malye kipsirye, na ni Allah el deiyoknye ulul ati bululak deice, el ap neika bunyame. Anggunce malye winin ning batakmunce, diksukumuk upmunyopura, na ni ap neika bunyam touk, anggun ap, na ap, neika bunamtibye nyapsine.

²² Amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye nirya ati nyasilye yupu ara, moubuka kekenamlulume, nyapsine.” Ninye Mi Koprop Atonunye birye, na Yohanes ati, nyapnuke. Anye birye nyapnuk touk, na Yohanes arye sekuka nyapsine.