Wahyu 21 - Eipomek

Allah arye weik asik Yerusalem Winiryuk mutuku, kwepdeipnamle ning ati, nyabuk yupu

¹ Anirya eipsopura, aminyan eipse ning ton laka nyapnune. Ara, minop talak tukwak mutuku uamuk ning nirya ap, im deice ap akunum kum dayuk ati, dinmasiba, Allah arye tukwak mutuku tam winiryuk kwepdeibuk ning ap, im deice winiryuk kwepdeibuk ning ap, eipse. Tonda, minop arye deiamuk laut mekwen nirya kum dayukura, winiryuk ning ton kum kwepdeibuk.

² Allah im deice tam noutamak arye, weik asik el si ara, Yerusalem Winiryuk dopkwetebukba, koluka yanganmoka, eipse. Yerusalem Winiryuk asik noutamak ara, malye ning tonok babye kum ulamukce, pia telebuk uamuk asik eipse. Winipmanto ara, ninye arye, ‘Nun tam nang kil dopnul’ tenen, kam kil el nong deice pia urasin teleb baju ap, kwerya ning ap weika arye memebuka dolilamak touk, Yerusalem Winiryuk (Yerusalem Baru nyalamiknye) asik nirya ara, urasin pia telebuk ubukba, eipse.

³ Eipsiba, Allah el weik bun ning dam, tonoknye birye ayupu nyabuk. “Wini talak ara, Allah el pia unamlak ara, el ap, ninye ap neika pia unamake. Kam tuba unyak ninye nirya ara, Allah el mapu kopropa unamake. Allah arye aninye nirya ati talipliba, sikce, ‘Nun Ni’ tenen, Allah el siuk pia erenamake. Allah elda, sik ap neika unamake.

⁴ Allah arye aninye nirya ati, kanye imun ning nirya kum kipdeipliba, pia telebuk unamaka anya arye, tuba tonap pia kum engenamaka ati, sik asing maka cepdeipnule. Minop talak ulamuk ning nirya, akunum kum danmala ati, dipna ap, ninye dipnaba engena ap, kanye imun upsiliba engena ap, uk disilya deiyok ning nirya ap, amalye ning nirya ara pia kum upmala ati, tonap pia kum unamle,” Allah arye nyabukba, kekepse.

⁵ Kekepse talak ara, Weik Ninye Deiyoknye, el weik kurun bun ning deice bukmoknye birye ayupu nyabuk. “Winira, yata ning do, aning-aning nirya ara, winiryuk ning kwepdeipne. Ati, na nyapnukin yupu ara, pia dipkoprop ulula ati ara, ninye nirya arye diba tenenamake. Ati, anyapnukin yupu ara, kekepmince seknulyame,” nyapnukba, kekepse.

⁶ Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”

⁷ “Yata kil do, yatanye do, malye un ning ap, malye winin ninye ap nirya ati, ‘Nun like’ tenen, malye kibikirye, nati kum batakicopura, dekna ning arenamne. Ara, ance elinmalam ning ap, narye nyapkinaba, kekenmalam ning nirya ap arepniba, nati kum bataklamnik ninye arye dolonamake. Na Allah arye aninye nirya ati talipniba, sikda na mapu kopropa unamake. Na siuk erenamniyake.”

⁸ “Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.

⁹ Ayupu kekepseura, tonok malaikat na damak yanmok. Anye bira, sik tekbarye malaikat arye, karu mek makau tekbarye talipmekak, amek makau pum weik kanye imun ning, tekbarye talipmek ning kan-kan bukni, tonok malaikat na dam yayukce, “Anda yalyame. Domba Mi Atonunye kil dopnul ning ara, kapdeipkiniba, eipnulame,” nyapnuke.

¹⁰ Allah El Dib Kanye talipnuka deice arye, amalaikat dobuka bobinukce, weik mutuku dup deipnuk. Weik mutuku dup deipnukba, Allah im deice tam arye dopkwetebukba, koluka yanganmok ara weik asik Yerusalem Winiryuk ning eipse. Anyasik noutamak nirya ara, malye ning tonok babye kum uamuk. Pia telebuk uamukak eipse.

¹¹ Allah el dirina ara, pia weik ubuka deice arye, Yerusalem Winiryuk ning babye dirina weik ubuk. El dirina ara pia dekna weik ning silye keil mitik ning, el si ara yaspis, akeil atonun dirin weik ubukce, pia teleb ubuk.

¹² Anyasik dana-dana tam nirya, cang weik keil poka ubukba, apoka buplan ara obarye 12 ubuk. Abuplan urasin deice ara, Israel ninye sik yala deiyok si 12 sekuka deiyamikba, eipse. Abuplan dam nirya ara, kalikna ati malaikat ara, 12 malaikat tikuka kalikmekak, eipse.

¹³ Akeil poka noutamak uamuk buplan ara, keting yangan tam ara winilye ubuk, keting wekelban tam ara winilye ubuk, tonda aning atonun, deice tam ap, utam ap ara, buplan winilye ubukba, eipse.

¹⁴ Anyasik dana-dana tam domik cang keil poka amu tam ara, aik ayukumna kopropa ikuka dolamak touk, weik mutuku yangan keil atonun, deiyok keil yuk-yuk 12 deiyamikak eipse. Adeiyok keil urasin laka upmokak ara, yuk-yuk bukni, ninye si 12 ton sekuka deiamik ning eipse. Aninye si 12 nang ara, Domba Mi Atonye, ‘Na yupu dobuka peterena deiyok kouna deiyok nang unamak’ tenen, wipdeiyamuk Rasul nang, sik si akeil deice yuk-yuk, sik si sekuka deiyamika upmokba, eipse.

¹⁵ Nati, yupu nyapmanuk malaikat arye, ‘Cang ara ani, pala ara ani’ tenen, kiklilen ning, pina atonun bukni, emas arye memamik ning bopmok. Akiklilen ning bopmoka ara, weik asik Yerusalem Winiryuk ning, ‘El cang ara winibuka, el pala ara winibuka’ tenen, kiklipdenirye, ‘Kel kipnun’ tenen, bopmokba eipse.

¹⁶ Allah arye anyasik Yerusalem Winiryuk ning dobuka ara, el cang panjang ap, el pala lebar ap ansinibuka winibuk. Malaikat arye kiklilen ning emas ning dobuka, Yerusalem Winiryuk ning kiklilenmokak, el cang panjang ara, yupa pia weik 2.200 kilometer ubuk. Tonda, el pala lebar babye, yupa weik atonun 2.200 kilometer ubuk. Aning atonun, tukwak douapce dipdongobuka, anirya kiklipdeyuk ara, cang ara yupa weik 2.200 kilometer kibuk.

¹⁷ Amalaikat arye, anyasik dana-dana ubuk keil poka kiklipdeyuk ara, el cang weik ubuk ning ara, 65 meter ubuk. Aning-aning nirya ara, ninye arye nyalamak touk, “Cang ani, pala ani,” nyabukba, kekepse.

¹⁸ Anyasik dana-dana dobik poka ara, dekna weik keil poka, el si ara yaspis, silye keil atonun keil domik. Anyasik noutamak domik aik nong nirya ara, dekna weik gat ning el si ara emas arye domik. Emas ubuk bukni, pia turukna kum bol ning ubuk.

¹⁹ Apoka amu tam deiyok keil urasin deice ara, dekna weik keil tablakdeibik ning ara eipse. Minyuma deiyok keil ara, dekna weik keil silye keil, el si ara yaspis, keil deibik. Bitinye ning deiyok keil ara, dekna weik keil kira bol ning atonun ap, kurun ap, silye keil, el si ara nilam, keil deibik. Winilye ning deiyok keil ara, dekna weik keil kau keil urasin atonun bukni, el si ara mira, ton yakut nyalamak keil deibik. Dum barye ning deiyok keil ara, dekna weik keil imbik maka ulamle touk kibukce, sukup-sukup alamle keil, el si ara Zamrud, keil deibik.

²⁰ Pamu barye deiyok keil ara, dekna weik keil el urasin ara bi ap, kurun ap telen keil, el si ara unam, keil deibik. Naku barye deiyok keil ara, dekna weik keil basam bouke keil urasin atonun bukni, el si ara sardis ton, delima nyalamak keil deibik. Tek barye deiyok keil ara, dekna weik keil kumasan bol ap, imbik maka turuk keil ap, kisir keil atonun bukni, el si ara ratna cempaka, keil deibik. Pin barye ning deiyok keil ara, dekna weik keil mula bok ato keil, el si ara, beril ton pirus nyalamak, keil deibik. Toupne ning deiyok keil ara, dekna weik keil mangai ken dinge atonun kweilyang bola keil, el si ara, topas ton kerisolit nyalamak, keil deibik. Taku barye deibik deiyok keil ara, dekna weik keil yangarwa keil bukni, kimil kemel atonun, akeil el si ara krisopras, keil deibik. Koklom barye ning, 11 deibik deiyok keil ara, dekna weik keil bukni, el urasin ara sisilya keil atonun ubuk. El si ara, lasaudi keil deibik. Obarye, 12 deibik deiyok keil ara, dekna weik keil sukun keil atonun bukni, kimil atonun ubuk. El si ara, kecubung keil deibik.

²¹ Apoka buplan nirya ara, laut mekwen pum tam arye dololamak ning, el si ara mutiara bukni, mitik ning ara kume. Pia weik ning ati ara, tonok buplan ara, tonok mutiara deibuka dobik. Anyasik noutamak uamuk bisik ara, dekna weik ning emas bukni, pia teleb ning kemel atonun, mek kukia dilamak emas arye deiyamikba, eipse.

²² Anyasik Yerusalem Winiryuk ning noutamak nirya dipdese bukni, Allah el si erena aik ton kum domika ati, anyaik ton kum ubuk. Aning-aning nirya deice tam ulul weik mikipnye Allah, nun Weik Deiyoknye ap, Domba Mi Atonye ap, anyasik noutamak ururakba, im deice unyak ninye arye, ‘Sik si erepnuyap,’ tenebice talak nirya ara, adiparyuk talye luparabuka erenamaka ati ara, sik si eren aik kum patalula ati, anyaik ton kum domik.

²³ Aning atonun, keting dirin ap, wala dirin ap, ‘Adirina lapsutuba eiptibye’ tenen, patalyeba, pia kum tenenyake. Allah el bidamang dirina ara, pia weik ulula ati ara, im deice unamak ninye ara, yuk dirin ning ton kum patalule. Tonda, Domba Mi Atonye birye, el bidamang dirin weik ululba, anyasik noutamak weik dirin atonun unamla ati ara, keting ap, wala ap ara, winiryuk im deice mutuku kum ulule.

²⁴ Atalak arye dipdongobuka doryanamle talak noutamak nirya, kam unamak ninye im sirya, mutuku sirya nirya ara, Yerusalem Winiryuk, dirin weik unamla ati, bikirye, adirin deiceuk unamake. Tonda, atalak unamak ninye deiyok nang, Raja atonun ninye nirya arye, sik talinyak ning, bona uto-uto talin nang dobuka Yerusalem Winiryuk (Yerusalem Baru nyalamiknye) noutamak boyanganamake.

²⁵ Atalak nirya amutuku ara, kuna ning ton kum yanamla ati, pia kum inipnamle ati, Yerusalem mutuku Winiryuk asik unamla ara, apoka buplan pia kum tirikinamake. Abuplan talye kukultaknauk pia unamake.

²⁶ Atalak noutamak nirya kam unamak ninye mutuku-mutuku nirya, sik teleb ning ap, dekna weik ning nirya ap, si eren deiyok ning nirya ara, anyasik Yerusalem Winiryuk mutuku noutamak boyanganamake.

²⁷ Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.