Wahyu 20 - Eipomek

Keting tamun yupa weik, 1.000 tahun ati, nyabuk yupu

¹ Aning nirya eipsopura, aminyan eipse ning ton lake nyapnune. Im deice tam arye tonok malaikat koulukuk. Anye birye, tukwak mutuku bukni, tuku pum tam telenga weik uamukak ati, el buplan kukne ning kunci ap, tapu koulongon ning, weik rantai tapu ap dobuka kouluku yanganmokak eipse.

² Kolukukce, adiparyuk, weik Mem Kwatima Urasin Atonye, ara minop talak kwatima atonun dayuknye, el si ara Isa Mutuku Dongonye, tonda Setan nyanyapnye ati, amalaikat mikip arye talipdongobuk. Malaikat arye Isa Mutuku Dongonye talibukce, weik rantai tapu arye tapu koupdongobuk. Ara, ‘Keting tamun yupa weik 1.000 tahun deice arye, pia lopmanto kum unamle’ tenen, amalaikat arye, Isa Mutuku Dongonye tapu koupdongobuk.

³ Tapu koupdongobukce, tuku pum karu weik uamuk noutamak dopkwetebukce, atuku pum tam buplan tirikukce, kunci dakdongobuk. Winibuka deiyok ara, ‘Keting tamun seribu tahun min kum uplye talak noutamak nirya ara, Isa Mutuku Dongonye arye, tukwak mutuku ninye ayala-ayala nirya ati, tilila yupu tonap pia kum nyanamle. Tilila yupu kum nyaptua ati ara, atalak noutamak ara tukwak kili sal mutuku-mutuku nirya, elce nyalul tilila yupu ton diba kum tenenamake’ tenen, buplan tirikdongobuk. Keting tamun 1.000 tahun akunum uplyopura, like tonok mitik anun tonap lopdongopnamle bukni, atalak ara tuku pum tam dopkwetebukba, eipse. Na Yohanes arye nyapne.

⁴ Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.

⁵ Aninye sik dib kanye kam bukikce, Kristus ap 1.000 tahun deice arye, ninye deiyok nang ulamikce, aning nirya talilamik. Sikda winilamik bukni, yuk ninye, min arye akunum diamik ninye nirya ara, atalak ara min kum kam bukik. Keting tamun yupa weik, 1.000 tahun upnin balamuka ani, akunum ubukba, sik yuk talya dadiamik ninye babye kam bukik. Bukni, sik dib kanye minyuma kam bukik ning ara, atalak ati nyanyap si ara, Kam Bulina Minyuma Talaknye ati nyanyabe.

⁶ Sik minyuma talak kam buknamak ninye ara, Allah arye teleb updeipliba, pia kanye deibuka unamake. Sikda pia mambule. Allah arye aninye ati webuka deiamuk ati, sikda malye winin ning tonok babye kum talinyakce, pia diksukum ninyeuk unyake. Aninye ara, Allah arye minyuma talak kam bukeipnamle. Bukni, yuk malye ninye nirya ara, dipna bitinye talak ton dipnamak bukni, atalak minyuma kam bukuka unamak ninye ara, like bitinye talak kum dipnamake. Telebuk pia kam unamake. Sikda, keting tamun yupa weik 1.000 tahun deice arye Allah ap, Kristus ap, sik amu tam buknamak bukni, sik bitinye ap, aninye ap ninye deiyok ning talibuka, aning-aning nirya talibuka unamake. Sik aninye ara, Allah el mambul pil don nang pia unamake.

Isa Mutuku Dongonye ati, nyabuk yupu

⁷ Akiting tamun yupa weik 1.000 tahun upnin balamlya ani, akunum uplyopura, tonok malaikat arye, Isa Mutuku Dongonye talibuka tapu koupdongobukce, weik tuku pum bisik noutamak arye dongobuka, kunci tirikdongobuka ara, atalak ila tuba Isa Mutuku Dongonye lopdongopnamle.

⁸ Isa Mutuku Dongonye lopdongopliba, atuku pum arye weleyalyopura, tukwak mutuku dana-dana tam unyak ninye ati, tilila yupu nyalbinamle. Atalak ara, sik tukwak mutuku dana-dana tam unamak ninye sik si ara bitinye. Ton ninye yupa, sik si ara Gok nyanamake. Ton ninye yupa sik si ara, Magok si nyanamake. Isa Mutuku Dongonye eltilila yupu nyapliba kekebikirye diba tenebicopura, elce sik nirya ati bulubuka deipnamle. Ara, weik olana talak kintinina ati, aninye yupa bitinye bulubuka deipnamle. Aninye sik yupa ara, nukmanto kume. Ara, laut mekwen kup-kup ak, keil wenenga pia weik aulye touk, yupa nukmanto kum unamake.

⁹ Na Yohanes arye eipse ning ton nyapnune. Ara, sik Gok si talibuka unamak ninye ap, Magok si talibuka unamak ninye ap ansinibuka tukwak mutuku noutamak bisik banmeka ani, akunum biyikopura, Allah elti, diba tuba tenelamik ninye, sik unmekak dana-dana nirya warikuka denepdongobikbuk eipse. Amutuku ara, Allah arye el kanye deiyamuk mutuku Yerusalem asik domik ati nyapne. Anyasik warikuka denepdongobik bukni, im deice tam arye, weik uku buk dopkwetebukce, amalye winin ninye nirya, sik Gok ninye ap, Magok ninye ap dibuk.

¹⁰ Uku arye dibukba, amalye winin kili sal ati, tilila yupu nyalamuknye Isa Mutuku Dongonye, sik malaikat arye tuba tonap tongobikce, weik uku din mutuku noutamak dopkwetebik. Ara uku buk dilamukce, tin ap, kumasan bol keil el si ara belerang, kel lyin ap, ara uku tin weika arye dipliba, keil but-buta tong bukni, sikin tong atonun tong weik lelamle ning tong ap nyalamukce, deiyamuk mekwen noutamak dopkwetebuk. Ara, pia Malye Kam Ululnye ap, Tilila Yupu Nyalamuknye ap minyuma talak dopkwetebuk akuk, Isa Mutuku Dongonye babye, auku din mutuku noutamak dopkwetebuk. Keting noutam babye, lukunyan babye, atalak nirya, batakna pia kum aryuk, auku arye sik nong deice, uk weik dilamlya ati, pia donmaca ani, engenauk unamake.

Min arye diamik nang ati, yupu lepsisikuka bokuka wenepnamle ning ati, nyabuk yupu

¹¹ Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.

¹² Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.

¹³ Atalak ara, laut mekwen deice balamik bukni, diamikba weik laut mekwen dilamukba, danoutam ulamik bukni, min arye akunum diamik ninye lakak tikilyayik. Tonda dipna deiyok ap, diamik ninye ulamikak, el si ara Kerajaan Maut ap, asukum ulamik bukni, min arye diamik ninye ara, lakak yanganmekba, eipse. Aweik deiyoknye, weik buna ning deice bukmoknye birye, aninye nirya ati, yupu lipsisikuka bokeibukce, wenebuk. Aninye nirya babye, sik tukwak mutuku tuba kam ulamik talak noutamak arye, winilamik ning nirya, im deice buku noutamak akunum sekuka deiamika anya arye, abuku dipdeyikce, abuku sekeiyamika noutamak uamuk touk, yupu lipsisikuka bokeibukce aninye nirya ati, wenebuke.

¹⁴ Aweik ninye deiyoknye birye, apil nirya akunum dopra balamuka ani, apil nirya akunum dobukopura, dipna deiyok ning ap, diamik ninye wekelbalamikak, el si ara Kerajaan Maut ap ara, amutuku bitinye doprobukce uku din mutuku noutamak dopkwetebuk. Uku din mutuku noutam akuku tuba dilamle mekwen ara, Dipna Bitinye ning ati nyanyabe.

¹⁵ Yata nang do nirya, Allah el buku si, Kam Pia Unamak Ninye Si Sekna Buku noutamak, si kum uamuk nang nirya ara, adiparyuk doprobikce, uku deibukba, uku pia dilul mekwen noutamak dopkwetebikba, na Yohanes arye eipse.