Wahyu 19 - Eipomek

Im deice tam unyak ninye, yupa weika arye, Allah el si erebik ning ati, nyabuk yupu

¹ Ayupu nirya Kekepsopura, im deice tam noutamak arye, ninye yupa pia weika arye, yupu weik arye nyanmekba, ayupu tonap kekepse. “Haleluya, nun nirya arye, Allah el siuk pia erenamabe. Nun Ni kopropa Allah pia telebuk ulule anya arye, el dirina ara pia weik ulule. Ninye Lyena Deiyok ning ap, weik Mikip Deiyok Ulul ning nirya ap, el deiceuk ulule. Elda Weik Erenanye ulula ati ara, nun nirya arye Allah el siuk pia erenamabe.

² Allah arye yupu bokeipsilirye, usilye ning nirya ara, pia diksukumuk ulule. El nyalul yupu nirya ara dipkoprop ulule. Talye Yolana Deiyok Kil, el malye ulamuka deice yuk mutuku ninye im sirya, mutuku sirya nirya eibuka kel kiyamikce, sik babye malye winin ninguk talibuka ulamik. Ati ara, Allah arye akil ati wenebuka oplopmale. Allah el pil dolamik ninye ati, yu nang arye oltakalamikba, sik ining saklamuk ning nirya ati ara, aninye olamika deiyok ati, akil deice deipmalce, sik ining kwang dakna ati, akil wenebuka oplopmale,” nyanmekak kekepse.

³ Ayupu nyanmikce, tuba tonap ayupu ton nyanmekba, kekepse. “Haleluya, nun nirya arye, Allah el siuk pia erenamabe. Allah arye Babel mutuku ulamik ninye talye yolalamak kil atonun ulamika ati, wenebukce, uku dopkwetepliba, auku dilirye, tulum welenamle ning ara, pia kum dankunamle. Atulum ara, pia welenamle.”

⁴ Ayupu nyabikba, kekepse. Ayupu nyanmekba, sik 24 wisi ninye deiyok nang ap, sik teleb kam un ning dumbarye ap, sik nirya arye Allah el ninye deiyoknye bun ning deice bukmokak, urasin tam gutam tuku dipdongobuka bukmikce, ayupu ton nyabik. “Nunce, ‘Amin,’ nyababe. Ara, ‘Aning nirya dipkoprop pia ulula’ tenen, “Haleluya. An siuk, pia erenamkiyabe,” nyanmekak kekepse.

⁵ Ayupu nyabikba, Kekepsopura, adiparyuk tonoknye Allah el weik ninye deiyoknye bun ning dam arye ayupu tonap nyabukba, kekepse. “Allah el amu tam bukuka, el piluk dolulum ninye nirya arye, nun Ni Kopropa Allah ati, el siuk erepnululume. Allah ati, ‘Se, elda mambul pia weike’ tenen, elti, si erelulum ninye nirya, mambul nang babye, mambul kum nang babye, anggun nirya ansinibuka el siuk erenamlulume,” nyabuk.

⁶ Nyabukopura, ninye yupa pia weika arye, yupu weik arye nyanmekba, alelim ara liman ap, mek onmalirye, weik lelim nyalamle touk, lelim ap nyanmokba, kekepse. Sikce nyabik yupu ara, ani. “Nun ni Allah ati, Haleluya, nyababe. Nun Weik Deiyoknye, nun Ni Kopropa Allah arye aning-aning nirya deice tam ulirye, Weik Eitamnye ulule. Yuk mikip ning aulul bukni, elda pia mikip weiknye ulirye, aning nirya el amu tam ululbuk elcuk talilule.

⁷ Ati ara, nun nirya arye kanye deibuka, pin-pin asa arye elti, ‘Anda pia telebe,’ nyabuka si erenmabe. Deiyok ara, Domba Mi Atonye, el kil dopmanto talak, akunum yanmala anya arye, elce dopnamal kil ato ninye ara, sik kanye talima nirya akunum kintinipmake.

⁸ El dopnamal kil ato ninye ara, pia teleb namin baju, lek ning, dirin weik ulul ning ara, akunum arepmalaba, ongopmake.” Ayupu nirya nyabikba, Na Yohanes arye, kekepse. (Na Yohanes arye nyapsine. Pia teleb namin baju nyabuk ning ara, winipmanto ulul bukni, aning nong ara, ani. Ara, Allah arye wiamukba, elti, diba tenebuka, el yupu kekebuka dobolbalamik ninye arye, diksukumuk ulamik ning ati, tenenyabe.)

⁹ Ayupu kekepse talak ara, tonok malaikat arye nati nyapnuke. “Anyapnukin yupu ara, seknamlyame. Ayupu ara, ani. Domba Mi Atonye, el kil dopnamal talak ati, weik kwalya kwalibuka deipnamak ning ati, elce anggunti yukupsilirye, ‘Anggunda yalulume, yamunyeura, neika dipnamape,’ nyapnamle ninye ara, Allah arye aninye ati pia teleb updeipliba, kanye deibuka telebuk unamake. Anyapkin yupu ara, dipkoprop Allah elcuk nyapmanilba, nyapkine,” nyapnuk.

¹⁰ Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.

Kurun kuda deice bukuka, unmoknye biti, nyabuk yupu

¹¹ Nyapnuk talak im deice tam, dipdesiba, im deice tam nirya lakak ubukba, eipse ning nyapnune. Tonoknye, el si ara Dipkopropnye, tonda, Batakna Kumnye bira, tonok kurun kuda balye deice bukmokak, eipse. Anye bira, urdem una kum bukni, pia diksukumuk ubuka, yupu lepsisikuka bokolilirye, malye winin ning nirya ap, Allah ati yaninyak kili sal ap, ati olbalule.

¹² El asing ara, weik uku buk dilamle touk ubuk. El kisok deice ara, ninye deiyok nang kina ati, sik kisok deice kalunyak ning el si ara mahkota, weik ubukba, eipse. El nong bol deice ara, weik mambul si sekuka deiyamuk ning ara, el bidamnye aryuk asi kel kiyamuk. Yuk ninye nirya arye kum kel kiyamik.

¹³ El ongolamuk baju ara, cang baju ngang dam arye dipdongobuka, yan dam sekelon baju ongamukba, eipse. Abaju ara, ining mek noutamak dongamik baju ongolamuk. Anye bira el si ton, Allah Yupu Deiyoknye nyanyake.

¹⁴ Anye bira, kurun kuda deice bukmokce menekuka banmokba, Allah el im deice tam yin talin malaikat nirya arye, el aminyan tam yanganmekak eipse. Ayin talin malaikat babye kurun kuda balye deice bukuka, el aminyan tam yanganmekak, eipse. Sik baju ara, pia teleb namin baju, kurun baju ongopmekak, eipse.

¹⁵ Allah Yupu Deiyoknye, el si bam bol pum tam arye, yu weik parang ya belebukba, eipse. Aparang ya arye, sik malye winin ning talibuka unyak ninye ayala-yala nirya ap, im sirya, mutuku sirya nirya noutamak unyakce, malye wininyak kili sal ap ati, aparang ya arye opnamle. Tukwak ninye mutuku-mutuku nirya weik mikip deice arye talinamle. Ninye nirya arye, elti, malye kum kipmanto unamake. Winipmanto ati, ‘Anggur mek binamle’ tenen, weik keil deice pum lukikirye anggur dukdongobuka, yanibikiba, amekwen balamle touk, anye birye Allah ati mambul pil donamle. Ayupu nong ara, ani. Ara aning-aning nirya deice tam ulirye, weik mikip ap, weik eitamnye ap ululnye Allah ara, el yu weik upliba, tukwak malye un ninye nirya, weik arye wenebuka yupu lipsisikuka, oplopnamdak ati tenenyabe. Malye winin ninye ati wenena deiyoknye bira, akurun kuda deice bukuka balamlanye bira el uka.

¹⁶ Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.

¹⁷ Aning nirya eipsopura, amenyan talak yuk eipse ning ton nyapnune. Ara, keting deipmokce, dirin unmokak tonok malaikat ton tikukce, maka ayala-yala nirya, im noutamak lakuka banmek maka ati, weik yupu deice arye nyabuk. “Anggun maka yala-yala nirya buluplulume. Allah el weik kwalina dinamle ning ara, anggun babye dilyanamlulume.

¹⁸ Talye ninguk kum dipnamlum bukni, weik ninye deiyok nang Raja nang ap, yin talin nang sik weik deiyok nang ap, mikip unyak ninye ap, yin talin nang sik kuda basam ap, kuda balye deice bukikirye yin talibuka banyak nang ap, talye-talye unyak ninye nirya ap, mambul ninye babye, mambul kum ninye babye, yo bok deice dekikiba urdemuk pil don nang babye, sik kanye aryuk pil donyakce, yo bok donyak nang babye, aninye ayala-ayala nirya oplopniba, anggun maka nirya arye, sik nong tup dobuka dinamlume. Ati bulubuka yalulume,” nyabukba, kekepse.

¹⁹ Nyabukura, adiparyuk eipse ning ara nyapnune. Ara, minyuma laut mekwen noutamak arye yayuknye, Kam Ululnye bukni, Pia Malinye ap, tukwak mutuku talye unyak ninye, sik weik ninye deiyok nang Raja nang nirya ap, anang sik yin talin nang nirya ap, bulubuka yanmek. Sik yanmeka deiyok ara ani. Ara, kurun kuda deice bukmoknye ap, el tam nang ap, ‘Olbinuyap’ tenen, bulubuka yanmek. Ara, Weik Ninye Deiyoknye, el si ton Allah Yupu Deiyoknye, el baju ining dongamik baju ongopmoknye ap, el melina ati yin nang ap, Pia Malinye ap, el amu tam ulamik nang ap arye, ‘Opdenuyap’ tenen, sik malye winin ninye nirya bulupmek.

²⁰ ‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.

²¹ Ati, pia Malye Kam Ulirye, ap, Tilila Yupu Nyana Deiyoknye, tilila yupu nyan nabi ap, uku pia dilamuka pum tam dopkwetebik. Kurun kuda balye deice buka balulnye, el yin talin malaikat arye amalye deiyok nang bitinye, sik amu tam malye nang nirya ap, sik yin talin nang nirya ap, oplobik. Oplobikba im noutamak bulubuka yanmek maka nirya arye, sik nong nirya dinmekbuk, boubuk. Aning nirya wininmokak na Yohanes arye eipse.