Wahyu 18 - Eipomek

Babel mutuku ninye ati, malye kibuka oplopnamdak ati, nyabuk yupu

¹ Aning nirya akunum eipsopura, im deice tam arye yuk malaikat kolukukba, eipse. Amalaikat el mikip ap, el deiyok ning talyamuk ning ap ara, pia weik. El pia teleb ubuk deice arye, dirina pia weik ubukce, tukwak mutuku nirya dirin aribukba, laka kibuk.

² El yupu ara, mikip weika arye ayupu nyabukba, kekepse. El yupu ara, ani. “Weik asik domika, el si ara Babel mutuku, aninye ati Allah arye malye kibuka oplopnule. Oploplirye, amutuku ap amutuku unyak ninye ap, amutuku noutamak, unyak isa nirya ap, Allah arye kum daneiplirye, sirya daknamle. Amutuku noutamak ara, isa ayala-yala nirya unyake. Tonda ninye unak kum ati, pia malye maka weik daunyake. Ara teleb wininyak nang arye, ‘Amaka yala nirya ara, pia malye maka anya arye, nun lik’ tenen, pia Kum dinyak maka yala nirya amutuku noutamak unyake.

³ Allah arye amutuku kon tobuka kum kipreipnamle deiyok ara ani. Ninye kanye wangalamak mek weika arye dibikiba, sik kanye wangabikiba, pia malye ulamak touk, Babel mutuku ulamik ninye ara, Allah ati bataklamikce, sik pia malye ning yala-yala nirya winilamika deice arye, sik kanye talima nirya malyeuk upra balamuk. Winibuka malye weik winilamikba, yuk mutuku ninye nirya elilamikce, ‘E, sik wininyak touk, nun babye wininamabe,’ tenelamikce, amalye ning nirya sik babye winilamik. Tonda, mutuku sirya im sirya nirya sik weik ninye deiyok nang, Raja-Raja nang arye, amutuku kilapu ap, talye yolalamik. Tonda, Babel mutuku ninye arye, ‘Aning-aning nirya weika arye doproptibirye bona weik talin nang unamap’ tenen, weik arye patalamukba, sik kanye talima weik arye engelamika deice arye, yuk im sirya, mutuku sirya nirya dekna deiyok nang arye, bona aning-aning nirya boyangalamikba, Babel ulamik nang arye deklamik. Deklamikba, yo bok weik dololamikce, bona uto-uto talin nang ulamik.” Malaikatnye birye nyabukba, kekepse.

⁴ Kekepsopura, im deice tam arye ayupu ton nyabukba, kekepse. “Na Allah arye nyapsine. Babel mutuku noutamak tuba ululum bukni, nati diba tenenululum ninye ara, adiparyuk amutuku batakuka yukak bindoplulume. Ara talye ati kume. Amutuku batakuka yukak kum biminyopura, amutuku ninye arye, malye unyak ning ara bikmunce, anggun babye atonun winipmunyopura, Allah arye amutuku ninye sik wenena ati, weik kanye imun ning, sik nong deice dopkwetepnul ning ara, ‘Anggun ton tabakuka opsilyak’ tenen, nyapsine. Ati, na Allah ati diba tenenululum kili sal ara, ‘Babel mutuku ninye arye malye weik wininyak ning, anggun babye winipmunba, narye Babel mutuku kili sal sik wenena ati sik nong deice kanye imun ning weik deipnun ning, anggun nong deice babye deipsinirye opsinyak’ tenen, adiparyuk Babel mutuku batakmunce, memebuka moupdopnamlulume.

⁵ Allah arye Babel mutuku ninye weik arye wenepnul ning ara, talye ati kume. Deiyok ara, sik pia malye ning weika arye tabakuka winipra balamikba, nukmanto kum ulule. Ara, keil lelebuka meneng deice dadeipdanin, balamica ani, im bol pipmanto ulamle touk, sik malye wininyak ning nirya ara nukmanto kum ulule. Babel mutuku unyak kili sal arye, malye ninguk talibuka wininyak ning nirya ara, Allah arye tuba tenelula anya arye, amutuku ninye weika arye wenepnamle.”

⁶ “Ati, Babel mutuku unyak ninye, sikce yuk nang ati malye winilamik touk, Allah arye sik wenena ati, sik nong deice pia ikin ning weika arye deipnamle. Amutuku ninye arye, yuk nang ati malye weik ulamik ning ara, mitik tonun bukni, Allah arye sik wenen ning ara, sik nong deice deipnamle ikin ning ara, pia weika arye winipnamle. Sikce yuk ninye ati, sik nong deice delilamik ning ara, ikin mitik tonunuk uamuk bukni, Allah arye sik wenena ati, sik nong deice deipnulam ning ara, ikin pia weik upnamle.”

⁷ “Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.

⁸ Babel mutuku unyak kili sal arye, ‘Nunda pia telebuk wininyabe,’ tenelamika ati ara, akunuma. Allah arye tonok sum noutamak ara, Babel mutuku ninye, sik kanye imun ning adiparyuk weika arye arepniba, weikto upnamle. Ara, dipna ap, din patapliba, din bulang patan asa una ap, ikin kanye bobuka engena ap weik upnamle. Tonda weik uku buk dopkwetepliba, sik mutuku ap, sik nong ap dipnamle. Aning-aning nirya talibuka Weik Deiyoknye, Allah arye, Babel mutuku unyak ninye yupu lipsisikuka, bokeiplirye, wenepnamlanye bira, el mikip pia weik ulula ati, anyapman ning nirya nong upnamle, nyapne.” Im deice arye nyanmok yupu nyanmokba, kekepse.

⁹ Aim deice arye nyanmoknye birye, ayupu tonap dukdongobuka nyabuk. “Allah arye, Babel mutuku ninye ati, wenebuka opliba, uku arye amutuku ulul ning nirya dilirye, weik tulum welepliba, yuk mutuku unyak ninye nirya eipnamake. Yuk mutuku weik ninye deiyok nang, Raja-Raja nang babye eipnamake. ARaja-Raja nang arye, Babel mutuku ninye ap yolalamikce, amutuku noutamak bona weik talin ning ulamuk ning, kanye delilamak ning ap, dekna weik ning ap, talibuka neika ulamik ning ap, uku diplirye, tulum welepliba, sik Raja-Raja nang arye, awelepnamle tulum eibicopura, pia ikin kanye bobuka, weik arye engenamake.

¹⁰ Allah arye akanye imun ning weika arye, Babel mutuku ninye sik nong deice dopkweteplibuk yalyopura, ikin kanye bobikirye, ‘Se’ tenen, weika arye engebuka donmakiba, yuk mutuku Raja nang nirya arye, yukak arye tikuka eibikirye, ayupu nyapnamake.” ‘Se, Se. Amutuku ara, weik mambul mutuku, pia teleb ulamuk. Babel mutuku ulamlum ninye ara, mikip weik ap, pia teleb ap ulamlum bukni, wini talak adiparyuk tonok keting noutamak ara, Allah arye wenepmasilba, akunum kum daneipmasile,’ nyabuka engenamake.

¹¹ Nyabikcopura, yata bona do, aning-aning nirya dobuka dekelbalamica deiyok nang nirya arye, Babel mutuku kum upliba, malye kanye bobuka engenamake. Deiyok ara, minop talak Babel mutuku noutamak ulamik ninye arye, sik bona weika arye deklamik bukni, atalak ara, aning-aning nirya dekmanto nang akunum kum dale. Sik bona aning-aning nirya dobuka, dekelbalamak ning ara, aning dekmanto nang akunum kum danmala ati ara, ‘Se,’ tenen, engenamake.

¹² Sik dekelbalamik bona si ara nirya nukmanto kum bukni, bona aning-aning nirya ara ani. Ara emas ap, perak ap, dekna weik keil ap, laut mekwen noutam arye dolonyak ning el si mutiara ap, pia teleb namin baju mirin ning ap, ining bi ap, nintong teleb yo yala nirya ap, basam si ap, dekna weik yo ap, besi ning ap, urasin teleb keil ap, dopdobikirye puturubuka deibikirye, memenyak ning dekna weik ning aning-aning nirya dobuka dekelbalamik.

¹³ Tonda, to len ning, el si kulit kayu manis ap, nintong teleb ning aning-aning nirya ap, sik si ara, mur ap, kemenyan ap, anggur mek ap, Ara yo duk teikuka dololamik minyak ap, roti dana deiyok ning terigu pia teleb ning ap, tonda ninye arye weilamak ning sapi basam ap, domba ap, kuda ap, tuku deice balamle ning yala nirya ap, ninye arye ‘Sik yo bok deice dekikirye, ikin pil arukikiba, talye pil donamak’ tenen, ninye nong tapu koubuka bobalamik ninye ap, aning-aning nirya, sik Babel mutuku unyak kili sal ila tonap kum dekenamak ati, abona dekelbalamik deiyok nang arye, ‘Se,’ tenen, engenamake.

¹⁴ Mutuku-mutuku nirya, yata bon ning do, ayala-yala nirya dobuka dekelbalamaka deiyok nang nirya arye, Babel mutuku kum daliba, malye kanye bobuka engebikirye, ayupu ton nyanamake. “Se, anggun Babel mutuku ninye arye, ‘Pia teleb ning, aning-aning nirya dopropnamabe’ tenen, talima pum tam engelalum ning nirya ara, akunum kum upmasile. Tonda, anggun talyamlum bona uto-uto talin ning ap, urasin teleb-teleb kibuka ulamlum ning nirya ap ara, akunum kum upmasile. Tuba tonap, pia kum dopropnamlume. Anggunda bicoe,” nyabuka, sik bon-bona dekna deiyok nang arye nyanamake.

¹⁵ Sik bon-bona dekna deiyok nang arye, aning-aning nirya deklamikba, Babel mutuku ninye arye yo bok pia weik arilalamikba, yo bok weik dololamikce, bona uto-uto talin deiyok nang ulamik nang arye, pera mutuku arye tikmakirye, Allah arye Babel mutuku kili sal wenena ati opnamle ning eibikirye, ilil weik upliba, malye kanye bobuka engenamake.

¹⁶ Engebikirye, ayupu ton nyanamake. “Se, Se, anggun Babel mutuku ulamlum ninye ara, mikip pia teleb ninye ulamlumce, dekna weik baju, pia namin baju ongobuka ulamlume. Sik mirin baju ap, bi baju ap, abaju deice ara emas ap, dekna weik keil mitik ning ap, laut mekwen noutamak arye dolamik ning el si mutiara ap dobuka, sik baju bol deice wibuka delilamikba, dirin weik ulamuk. Winyamukba anggunda, bona talina weik kili sal ulamluma anya arye, apia teleb baju ongolamlume.

¹⁷ Bukni, tonok keting deice aryuk, sik ap, sik dekna weik ning ap nirya ara, akunum kum danmale,” nyabuka engenamake. “Tonda aning atonun, sik laut mekwen deice, weik mek liya yo talibuka balamak deiyok nang ap, sik amu tam bukuka amek liya yo deice pil donyak nang ap, amek liya yo noutamak bukuka talye banyak ninye ap, laut mekwen noutam ning, mekin bal do, yuk ning do, dobuka dekenyaka deice arye unyak ninye ap, sik nirya winipnamake.

¹⁸ Pera mutuku tam tikmakirye, Allah arye Babel mutuku unyak ninye nirya ati, wenebuka oplirye, uku dipliba, amutuku ning nirya dipliba weik tulum welenamle ning eibikirye, ayupu nyapnamake. ‘Se, atalak nirya yuk mutuku ninye arye pia teleb asik mutuku-mutuku nirya dobuka delilamikbuk, anyasik-anyasik nirya ara, mitik teleb ulamuk bukni, Babel mutuku tonok ara, pia urasin telebuk ulamuk.’

¹⁹ Winibuka nyabikirye, imun kanye bobuka, tuku but-buta dobuka, sik mining kisok deice pakdakirye, ‘Se, Babel mutuku kumdala ati, nunda mambule weike upsil’ tenen, weik arye engenamake. Engebikirye, ayupu nyapnamake.” ‘Se, Se, Babel mutuku ulamlum ninye ara, anggun bicoe. Sik mek liya yo talilamik ninye, bona yala nirya libuka sik mutuku bobalamikba, bona nirya deklamluma deice arye, amek liya yo talina deiyok nang arye bona uto-uto talin nang kilamik. Bukni, wini talak ara, tonok keting deice aryuk, Allah arye anggun Babel mutuku ululum kili sal wenebuka oplopmasilba, kum danmalume,’ nyabuka engenamake.

²⁰ Ati ara, amalaikat arye ayupu ton nyabuk. “Allah arye, Babel mutuku ulamik ninye sik wenena ati, akunum oplopmala ati ara, anggun im deice tam ululum ninye nirya arye, kanye deibuka pin-pin asa arye unamlume. Tonda, Allah arye wiamsukba, elti, diba tenebuka ululum nang ap, el yupu dobuka peterelbana ati, deiyok kouna nang, dopkwetepsuk Rasul nang ap, el yupu laka nyalamlum nabi-nabi nang ap, anggun nirya babye kanye deibuka pin-pin asa arye unamlume. Deiyok ara, sik Babel mutuku ulamik ninye arye, anggun nong deice ikin ning weika arye delilamsika ati ara, Allah arye sik Babel mutuku unyak ninye ati, akunum wenebuka oplopmala atia. Ati anggun nirya arye kanye deibuka unamlulume.”

²¹ Anye birye ayupu nyabukba, na Yohanes arye kekepse. Kekepse talak ara, adiparyuk yuknye, mikip weik malaikat arye winipmanto ning una ati, tonok mutuku yangan keil, ikin weik keil dobuka ereptalibukce, laut mekwen noutamak donokukce, ayupu nyabuk. “Aweik keil dobuka, mikip arye laut mekwen noutam donokmal touk, Allah arye Babel mutuku tam ulamak ninye nirya weneplirye, mikip arye oplopmale. Wini talak arye dipdongobuka, aminyan doyanamle talak noutamak nirya ara, tuba tonap amutuku aik ap, ninye ap kum unamake.”

²² “Sik mutuku noutamak minop talak ara, pong-pong ana atonun ning, bengkong ato ning el si ara kecapi ap, terompet ap, aning-aning nirya talilamika deice arye mot selalamik bukni, wini talak arye dipdongobuka, aminyan yanamle talak noutamak nirya ara, amot sen ning, sik Babel mutuku noutamak tuba tonap pia kum nyanamake. Abung-bung ana ning arye, kum nyabikiba alelim ton Babel mutuku noutamak kum kekenamake.” “Yata pil do nirya, Babel mutuku noutamak pil yala nirya dolamik bukni, wini talak arye dipdongobuka doyanamle talak ara, pil aning-aning nirya sik mutuku noutamak ara, pil pia kum donamake. ‘Roti din ning dapnuyap’ tenen, kintinina ati, terigu teikna pil dolamikba, alelim kekelamik bukni, doyanamle talak noutamak nirya ara, Babel mutuku noutamak tuba tonap, roti din ning el deiyok ning, terigu teikne pil ton pia kum donamaka deice arye, alelim pia kum kekenamake.”

²³ “Aning atonun, sik mutuku noutamak ara weisa delilamikba, dirin uamuk bukni, wini talak arye dipdongobuka doryanamle talak ara, sik Babel mutuku noutamak ara, dirin tonap pia kum unamle. Tonda minop talak ara, sal arye, ‘Kil dopnuyap’ tenen, kanye deibuka yupu nyalamik ning kekelamik bukni, tuba tonap sik mutuku ara sal ap, kilapu ap dopdakirye, pia kum unamake. Minop talak sik Babel mutuku noutamak ulamik dekna deiyok nang ati, yuk im sirya, mutuku sirya nirya ulamik ninye arye, ‘Se, sikda weik mambule,’ tenelamik bukni, sik babye kum danmake.” “Babel mutuku ulamik ninye arye, sik malye winin ning aning-aning nirya winilamika deice arye, yuk mutuku ninye nirya eibuka kel kiyamikce, malye bisikuk balamik.

²⁴ Babel mutuku tam ulamik ninye arye, sik mutuku noutamak, Allah el yupu laka nyana deiyok nang, nabi nang ap, Allah el mapu ap, yuk ninye weik tonap, oltakalamikba, aninye sik ining balamukba, Babel mutuku noutamak lakak ulamuk. Ati, Allah arye Babel mutuku ulamik ninye nirya oplopmalaba, amutuku ap, aninye ap, kum danmale.” Amalaikat arye nyabukba, na Yohanes arye kekepse.